អ្នកស្រីហែម ស៊ីណាតបេក្ខជនប្រឡងបាក់ឌុបឆ្នាំ ២០២៣ ដែលមានវ័យចំណាស់ជាងគេ។ រូបថត ក្រសួងអប់រំ
បន្ទាយមានជ័យៈ ដោយសារតែមានក្តីស្រមៃចង់បានសញ្ញាបត្រធ្វើជាគ្រូបង្រៀន អ្នកស្រីហែម ស៊ីណាត ដែលមានវ័យ ៥៧ ឆ្នាំ គឺជាបេក្ខជនដែលមានវ័យចំណាស់ជាងគេ ក្នុងចំណោមបេក្ខជនជាង ១៣ ម៉ឺននាក់ ដែលបានចុះឈ្មោះប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង កាលពីថ្ងៃទី ៦-៧ ខែវិច្ឆិកា ឆ្នាំ ២០២៣។
បច្ចុប្បន្ន អ្នកស្រីមានមុខរបរជាគ្រូបង្រៀនអក្ខរកម្មអប់រំក្រៅប្រព័ន្ធ ដែលជាគ្រូជាប់កិច្ចសន្យារបស់ក្រសួងអប់រំ យុវជន និងកីឡា។ អ្នកស្រីកើតនៅថ្ងៃទី១៥ ខែកញ្ញា ឆ្នាំ ១៩៦៦ នៅភូមិត្រពាំងរុន ឃុំតានី ស្រុកអង្គរជ័យ ខេត្តកំពត។ បច្ចុប្បន្នអ្នកស្រីស៊ីណាតរស់នៅភូមិថ្មរមៀលខាងកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
អ្នកស្រីជាស្ត្រីមេម៉ាយ មានកូនចំនួន ៤ នាក់ ស្រី ២ នាក់ និងមានចៅចំនួន ៧ នាក់ ស្រី ៣ នាក់។ អ្នកគ្រូហែម ស៊ីណាត បានបង្រៀនអក្ខរកម្មមនុស្សចាស់នៅក្នុងភូមិថ្មរមៀលខាងកើត ខេត្តបន្ទាយមានជ័យ ដោយទទួលបានប្រាក់បៀវត្សប្រចាំខែចំនួន ៥០ ម៉ឺនរៀល ក្នុង ១ ខែ។ អ្នកគ្រូបង្រៀនអក្ខរកម្មពីថ្ងៃចន្ទ ដល់ថ្ងៃសៅរ៍ ហើយក្នុង ១ ថ្ងៃអ្នកគ្រូត្រូវបង្រៀនរយៈពេល ២ ម៉ោង នៅពេលរសៀលពីម៉ោង ៥ ដល់ ៧ យប់។
អ្នកគ្រូស៊ីណាតបាននិយាយថា គាត់ធ្វើការបង្រៀនមនុស្សចាស់ ដែលជាកសិករធ្វើស្រែធ្វើចម្ការ ក្រោយពីចប់ម៉ោងការងារ ពួកគាត់បានមករៀនអក្សរជាមួយនឹងអ្នកគ្រូ។ សម្រាប់ប្រាក់បៀវត្សរ៍ដែលបានមក គឺសម្រាប់ផ្គត់ផ្គង់ជីវភាពគ្រួសាររបស់អ្នកគ្រូ។
អ្នកគ្រូធ្លាប់បានប្រឡងបាក់ឌុបចំនួន ២ ដងរួចមកហើយ តែដោយសារតែឆ្នាំមុនអ្នកគ្រូប្រឡងធ្លាក់ ក៏អ្នកគ្រូសម្រេចចិត្តចុះឈ្មោះចូលរួមប្រឡងសាជាថ្មីទៀតនៅឆ្នាំ ២០២៣ នេះ។
អ្នកគ្រូ ហែម ស៊ីណាត បានប្រាប់ ភ្នំពេញ ប៉ុស្តិ៍ថា៖ «ខ្ញុំសម្រេចចិត្តថា ខ្ញុំនឹងយកសញ្ញាបត្រឱ្យបាន ពីព្រោះអីសញ្ញាបត្រវាសំខាន់ណាស់សម្រាប់បញ្ជាក់នូវការសិក្សារបស់យើង ហើយចង់ឱ្យក្មេងៗនឹងយកតម្រាប់តាម កុំឱ្យបោះបង់ការសិក្សា»។
អ្នកគ្រូ ស៊ីណាត បានរៀនបន្ថែមនៅសាលាបំពេញវិជ្ជានៃអនុវិទ្យាល័យខ្លាកូន ស្ថិតក្នុងក្រុងសិរីសោភ័ណ ជារៀងរាល់ថ្ងៃអាទិត្យដើម្បីត្រៀមនៅក្នុងការប្រឡងបាក់ឌុបហើយក្រៅពីនោះអ្នកគ្រូរៀនបន្ថែមតាមយូធូបដោយអ្នកគ្រូមើលពីរបៀបធ្វើលំហាត់ ក៏ដូចជាកម្រងសំណួរដែលធ្លាប់ចេញប្រឡងតាមអនឡាញ។
នៅក្នុងការប្រឡងឆ្នាំនេះ អ្នកគ្រូស៊ីណាត ប្រឡងនៅមណ្ឌលអនុវិទ្យាល័យទឹកថ្លា នៅសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ បន្ទប់លេខ ២០ លេខតុ ៤៨៩។
ការធ្វើដំណើរពីផ្ទះដែលអ្នកគ្រូស្នាក់នៅទៅមណ្ឌលប្រឡងមានចម្ងាយប្រហែលជាជាង ១០០ គីឡូម៉ែត្រដោយជិះម៉ូតូប្រើរយៈពេលប្រហែល ២ ម៉ោងកន្លះ។ នៅក្នុងការរៀបចំខ្លួនសម្រាប់ការប្រឡងនេះដែរ អ្នកគ្រូ ហែម ស៊ីណាតបានក្រោកតាំងពីម៉ោង ៤ ព្រឹកមក ដោយអ្នកគ្រូបានស្នាក់នៅបន្ទប់ជួលនៅទល់មុខសាកលវិទ្យាល័យគ្រប់គ្រង និងសេដ្ឋកិច្ច សាខាខេត្តបន្ទាយមានជ័យ (UME)។
សម្រាប់ការប្រឡងក្នុងរយៈពេល ២ ថ្ងៃ កាលពីថ្ងៃទី ៦ ទី ៧ ខែវិច្ឆិកា អ្នកគ្រូបានត្រៀមសម្ភារដូចជាប៊ិក បន្ទាត់ ត្រៀមចិត្ត ក៏ដូចជាការថែទាំសុខភាពខ្លួនឯងឱ្យបានល្អផងដែរ។ អ្នកគ្រូបាននិយាយថា អ្នកគ្រូអាចធ្វើបានច្រើន តែមិនទាន់ដឹងថា លទ្ធផលអាចជាប់ ឬក៏ធ្លាក់នោះទេ។ ប្រសិនបើអ្នកគ្រូធ្លាក់ អ្នកគ្រូនៅតែបន្តដាក់ពាក្យប្រឡងទៀតនៅឆ្នាំក្រោយ ហើយនឹងខិតខំប្រឹងរៀនបន្ថែមទៀត។
អ្នកស្រីឃួន វិច្ឆិកាអ្នកនាំពាក្យក្រសួងអប់រំ យុវជន និងកីឡា បានថ្លែងថា៖ «តាមពិតទៅ នៅក្នុងគោលការណ៍នៃការណែនាំនៅក្នុងការប្រឡងនឹង គឺគាត់ទទួលបានការអនុញ្ញាតឱ្យចូលរួមនៅក្នុងការប្រឡង ហើយជាការសម្រេចចិត្តមួយរបស់គាត់ដែរ ដែលគាត់ចង់ប្រឡងជាប់ដើម្បីបន្តគោលបំណងរបស់គាត់ ទៅថ្ងៃអនាគតទៀត។ ការចូលរួមរបស់គាត់ គឺក្រសួងអប់រំ ស្វាគមន៍ និងរីករាយ ហើយក៏លើកទឹកចិត្តគាត់ដែរ នៅក្នុងការខិតខំប្រឹងប្រែងហើយក៏សូមជូនពរគាត់ដែរ ឱ្យគាត់ទទួលបានជោគជ័យនៅក្នុងការប្រឡង»។
និយាយរួមអ្នកស្រី ឃួន វិច្ឆិកា បានបញ្ជាក់ថា នៅក្នុងគោលការណ៍របស់ក្រសួងអត់មានការហាមឃាតបេក្ខជនដែលមានអាយុច្រើនមិនឱ្យប្រឡងទេ ដោយក្រសួងពុំមានកំណត់អាយុបេក្ខជនដែលមានបំណងប្រឡងបាក់ឌុបនោះឡើយ។
ជាមួយគ្នានេះដែរ អ្នកគ្រូ ហែម ស៊ីណាត បានលើកឡើងថា៖ «ការសិក្សាពេញមួយជីវិត គឺមានសារៈសំខាន់ណាស់ ព្រោះអីសព្វថ្ងៃ មានការរីកចម្រើនរបស់សង្គមជាតិ ក៏ដូចជាការរីកចម្រើននៅលើសកលលោក។ អ៊ីចឹងការសិក្សាពេញមួយជីវិតត្រូវតែសិក្សា ពីព្រោះអីដើម្បីឱ្យបានប្រើប្រាស់នូវអ្វីដែលថ្មីៗ បច្ចេកវិទ្យាចេញមកថ្មីៗ។ កាលពីមុន យើងអត់មានបច្ចេកវិទ្យាថ្មីៗទេ ឥឡូវយើងមានបច្ចេកវិទ្យាចេញមកថ្មីៗ យើងត្រូវតែខំសិក្សាដើម្បីចេះប្រើវា»។
អ្នកគ្រូ ហែម ស៊ីណាត បានឱ្យដឹងថា៖ «ប្រសិនបើខ្ញុំប្រឡងជាប់បាក់ឌុប ខ្ញុំមានបំណងមកបន្តការសិក្សានៅភ្នំពេញបន្ថែម ដោយខ្ញុំចង់បន្តការសិក្សាដើម្បីបានសញ្ញាបត្រធ្វើជាគ្រូបង្រៀន ព្រោះបំណងខ្ញុំ គឺ ចង់ក្លាយជាគ្រូបង្រៀនជាយូរមកហើយ»។
ស្ត្រីដែលជាបេក្ខជនប្រឡងបាក់ឌុបមានវ័យចំណាស់ជាងគេរូបនេះបញ្ជាក់ថា អ្នកស្រីចង់បន្តការងារជាគ្រូបង្រៀនទៀត ដោយអ្នកស្រីចង់ប្រឡងបាក់ឌុបឱ្យជាប់ ដើម្បីអាចបន្តការសិក្សានៅថ្នាក់ឧត្តមសិក្សាបាន៕
កុសល សិរីកន្យា
