លោកនាយករដ្ឋមន្រ្តី ក្នុងឱកាសអញ្ជើញស្រោចស្រពព្រះសុគន្ធវារី ប្រគេនព្រះមន្ត្រីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជាចំនួន ១១ អង្គ។ រូបថត តេឡេក្រាម ហ៊ុន ម៉ាណែត
លោកនាយករដ្ឋមន្រ្តី ហ៊ុន ម៉ាណែត អំពាវនាវដល់គ្រប់មជ្ឈដ្ឋានដែលកំពុងរស់នៅលើទឹកដីកម្ពុជា ប៉ុន្តែមានជំនឿសាសនាខុសគ្នា រួមគ្នាថែរក្សាសុខដុមនីយកម្មសាសនា និងចូលរួមផ្សព្វផ្សាយការលើកកម្ពស់សីលធម៌សង្គម ខណៈរដ្ឋាភិបាលអាណត្តិទី៧ នៅតែប្រកាន់គោលនយោបាយក្នុងការធានាសិទ្ធិសេរីភាពគ្រប់សាសនាទាំងអស់។
ការថ្លែងរបស់លោកនាយករដ្ឋមន្រ្តី បានធ្វើឡើងក្នុងឱកាសអញ្ជើញស្រោចស្រពព្រះសុគន្ធវារីប្រគេនព្រះមន្ត្រីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជាចំនួន ១១ អង្គ ដែលពិធីនេះប្រព្រឹត្តទៅនៅវត្តមុនីសុវណ្ណ ហៅវត្ត ចំពុះក្អែក ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ នៅថ្ងៃទី១៧ ខែវិច្ឆិកា ឆ្នាំ ២០២៣។
លោក ហ៊ុន ម៉ាណែត បានថ្លែងថា ក្រោយបញ្ចប់សង្គ្រាម ឆ្នាំ ១៩៧៩ មក គឺបានស្រោចស្រង់ និងផ្តល់ឱកាសឱ្យប្រជាពលរដ្ឋគ្រប់សាសនាទាំងអស់ស្មើគ្នា ការគោរពប្រតិបត្តិ ការជំរុញ និងការលើកកម្ពស់នូវសិទ្ធិសេរីភាពសាសនាត្រូវបានរដ្ឋាភិបាលយកចិត្តទុកដាក់។
លោកបន្តថា ទោះបីជាពុទ្ធសាសនា ជាសាសនារបស់រដ្ឋ សិទ្ធិសេរីភាព ការគោរពជំនឿសាសនា ត្រូវបានធានាដោយរដ្ឋធម្មនុញ្ញ ហើយប្រជាពលរដ្ឋគ្រប់រូបមានសិទ្ធិពេញលេញ ក្នុងការគោរពប្រតិបត្តិសាសនាផ្សេងៗ ដោយគ្មានការរើសអើងឡើយ។
លោកថ្លែងថា៖« រហូតមកទល់ពេលនេះនៅក្នុងប្រទេសកម្ពុជា គ្មានប្រជាពលរដ្ឋណាម្នាក់ដែលត្រូវបានធ្វើទុក្ខបុកម្នេញដោយសារគោរពជំនឿសាសនារបស់ពួកគាត់ឡើយ ផ្ទុយទៅវិញការគោរព និងការប្រតិបត្តិ ជំនឿសាសនាផ្សេងៗរបស់ប្រជាពលរដ្ឋកម្ពុជាគ្រប់រូបត្រូវបានធានាការពារនៅក្នុងលក្ខខណ្ឌដែលមិនធ្វើឱ្យប៉ះពាល់ដល់ជំនឿ ឬសាសនាដទៃក៏ដូចជាផ្តល់សណ្តាប់ធ្នាប់សង្គម និងសន្តិសុខសាធារណៈ»។
«យើងអាចនិយាយបានថា មិនមានជម្លោះសាសនានៅកម្ពុជានោះទេ នេះជាតថភាពដែលយើងគួរមានមោទនភាពព្រោះមានប្រទេសជាច្រើនដែលមិនអាចធានាបាននូវសុខដុមរមណីយកម្មសាសនា ដែលពេលខ្លះបានបង្កជម្លោះបែកបាក់រវាងប្រជាជននៅក្នុងសហគមន៍សាសនា រហូតដល់បង្កើតទៅជាសង្គ្រាមថែមទៀតផង។
នៅកម្ពុជាមិនមានសាសនាណាមួយ ដែលប្រកាន់នូវនិន្នាការជ្រុលនិយមនោះទេ ពិតណាស់នៅក្នុងព្រះពុទ្ធសាសនា យើងមាននិកាយខុសគ្នា នៅក្នុងសាសនាអ៊ិស្លាម ក៏មាននិកាយខុសគ្នា នៅក្នុងគ្រឹស្តសាសនា ក៏មាននិកាយខុសគ្នា ប៉ុន្តែមិនមានការប្រតិបត្តិជ្រុលនិយម ដែលធ្វើឱ្យមានជម្លោះនៅក្នុងសាសនាតែមួយ ឬរវាងសាសនា និងសាសនា នៅកម្ពុជានោះទេ។ នេះបើតាមលោក ហ៊ុន ម៉ាណែត បញ្ជាក់បន្ថែម។
លោករំលេចថា ការប្រកាន់គោលជំហរ គោលនយោបាយរើសអើង ឬគោលនយោបាយទស្សនៈជ្រុលនិយមបែបណាមួយនោះ គឺដាច់ខាតត្រូវរួមគ្នា ការពារកុំឱ្យកើតមាន ហើយកើតមានត្រូវលុបបំបាត់ឱ្យអស់ ដើម្បីថែរក្សានូវសុខសន្តិភាព និងសុខដុមរមណីយកម្មនៅក្នុងសង្គមខ្មែរ។
លោកសង្កត់ធ្ងន់ថា៖«ទស្សនៈ និងគោលការណ៍ជ្រុលនិយម មិនថានៅក្នុងសាសនា ឬនយោបាយ ត្រូវលុបបំបាត់ បំផ្លាញចោលឱ្យអស់ ព្រោះវាធ្វើឱ្យបែកបាក់សាមគ្គី ក្នុងសង្គមជាតិ ដែលជាកត្តាបំផ្លាញនូវសុខសន្តិភាព សេរីភាព។ ព្រោះសង្គ្រាមមិនចាំបាច់កើតឡើងដោយសារអាវុធនោះទេ អាវុធគឺជាឧបករណ៍ អ្វីដែលកើតឡើងមុនគេគឺជម្លោះ នៅក្នុងចិត្តរបស់ប្រជាពលរដ្ឋ ការប្រកាន់ ការរើសអើង ការលាបពណ៌គ្នា ការឱ្យស្អប់សញ្ជាតិនេះ សាសនានោះ គឺជាកត្តាធ្វើឱ្យមនុស្សឈានទៅដល់ការស្អប់គ្នា»។
ជាមួយគ្នានេះ លោកស្នើឱ្យមានការគោពគ្នាទៅវិញទៅមកគ្រប់សាសនា ការទុកចិត្តគ្នា ការយោគយល់គ្នា ដែលជាមូលដ្ឋានគ្រឹះ អាចឱ្យយើងថែរក្សានូវសុខសន្តិភាពបាន ខណៈលោកសង្កេតឃើញថា ការរៀបចំពិធីសាសនា ប្រពៃណីទំនៀមទម្លាប់ ពីមួយឆ្នាំទៅមួយឆ្នាំកាន់តែមានភាពអធិកអធមខ្លាំងឡើងៗ។
បើតាមលោកនាយករដ្ឋមន្រ្តី៖«បច្ចុប្បន្ន មានវត្តអារាមសរុបចំនួន ៥១៣៣ វត្ត ដែលមានព្រះសង្ឃចំនួន ៦៨ ៩៦៧ អង្គ និងមានវិហារនៃសាសនាអ៊ិស្លាម និងសាសនាគ្រឹស្ត ជាច្រើនទៀតនៅទូទាំងព្រះរាជាណាចក្រកម្ពុជា សមិទ្ធផលទាំងនេះដែលភាគច្រើនបានមកពីការរួមជាភាគទានរបស់ប្រជាជនកម្ពុជាផ្ទាល់ បង្ហាញច្បាស់អំពីទំនាក់ទំនងមិនអាចកាត់ផ្តាច់បានរវាងផ្នែកអាណាចក្រ និងសាសនាចក្រ»៕
ពិធីស្រោចស្រពព្រះសុគន្ធវារីប្រគេនព្រះមន្ត្រីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជាចំនួន ១១ អង្គ។ រូបថត តេឡេក្រាម ហ៊ុន ម៉ាណែត
ពិធីស្រោចស្រពព្រះសុគន្ធវារីប្រគេនព្រះមន្ត្រីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជាចំនួន ១១ អង្គ ដែលពិធីនេះប្រព្រឹត្តទៅនៅវត្តមុនីសុវណ្ណ ហៅវត្ត ចំពុះក្អែក ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ នៅថ្ងៃទី១៧ ខែវិច្ឆិកា ឆ្នាំ ២០២៣។ រូបថត តេឡេក្រាម ហ៊ុន ម៉ាណែត
