ព្រះមហាក្សត្រនរោត្តម សីហមុនី ចូលរួមសន្និសីទអន្តររដ្ឋាភិបាលនៅទីក្រុងប៉ារីស ប្រទេសបារាំង។ រូប Simona-Mirela Miculescu
ភ្នំពេញៈ សន្និសីទអន្តររដ្ឋាភិបាលលើកទី៤ ស្តីពីរមណីយដ្ឋានអង្គរ-សំបូរព្រៃគុក របស់អង្គការយូណេស្កូ បានសម្រេចដាក់ចេញនូវផែនការបង្កើនការអភិវឌ្ឍប្រកបដោយចីរភាព និងឥទ្ធិពលបម្រែបម្រួលអាកាសធាតុសម្រាប់តំបន់ទាំង ២ ជាពិសេសការអភិរក្សតម្លៃអង្គរ ថែរក្សាធនធានធម្មជាតិ អភិវឌ្ឍសហគមន៍មូលដ្ឋាន លើកកម្ពស់ប្រាង្គប្រាសាទ និងសកម្មភាពទេសចរណ៍ដោយស្មារតីទទួលខុសត្រូវ ក៏ដូចជាបង្កើនសមត្ថភាពអ្នកជំនាញ។
យោងតាមសេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈ នៅថ្ងៃទី ១៨ ខែវិច្ឆិកា បានលើកឡើងថា ការដាក់ចេញផែនការនេះ ធ្វើឡើងតាមរយៈសន្និសីទអន្តររដ្ឋាភិបាលលើកទី៤ ស្តីពីរមណីយដ្ឋានអង្គរ-សំបូរព្រៃគុក នៅទីស្នាក់ការអង្គការយូណេស្កូ នាទីក្រុងប៉ារីសប្រទេសបារាំង។
សន្និសីទអន្តររដ្ឋាភិបាលនេះ ក៏មានព្រះរាជវត្តមានរបស់ព្រះករុណា ព្រះបាទនរោត្តម សីហមុនី ព្រះមហាក្សត្រនៃកម្ពុជា,លោកស្រី Audrey Azoulay អគ្គនាយិការអង្គការយូណេស្កូ,លោកស្រី Rima Abdul Malak រដ្ឋមន្ត្រីក្រសួងវប្បធម៌បារាំង, លោក Komura Masahiro អនុរដ្ឋមន្ត្រីក្រសួងកិច្ចការបរទេសជប៉ុន, លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងមន្ត្រីនៃបណ្តាប្រទេសសមាជិកអាយស៊ីស៊ី-អង្គរ និងប្រទេសផ្សេងៗទៀតផងដែរ។
សេចក្តីប្រកាសព័ត៌មានបានបញ្ជាក់ថា សន្និសីទនេះធ្វើឡើងក្នុងន័យពិនិត្យពីវឌ្ឍនភាពលើការងារអភិវឌ្ឍ និងអភិរក្សរមណីយដ្ឋានអង្គរសំបូរព្រៃគុក រយៈពេល ៣០ឆ្នាំកន្លងមកនេះ ព្រមទាំងសម្រាប់ដាក់ចេញផែនការសកម្មភាពសម្រាប់ការងារទៅ ១០ ឆ្នាំខាងមុខ។
យោងតាមប្រភពដដែល សន្និសីទនេះក៏បានដាក់ចេញការងារ ១ ទសវត្សរ៍ទៅមុខទៀតទៅលើការបង្កើនការអភិវឌ្ឍប្រកបដោយចីរភាព ការពារអភិរក្សតម្លៃជាសកលរបស់អង្គរ គិតគូរពីការបម្រែបម្រួលអាកាសធាតុ ការពារបរិស្ថាន ទេសភាពវប្បធម៌ ធនធានធម្មជាតិ អភិវឌ្ឍសហគមន៍មូលដ្ឋាន ថែរក្សាប្រាង្គប្រាសាទ និងសកម្មភាពទេសចរណ៍ប្រកបដោយភាពទទួលខុសត្រូវ។ ជាពិសេសបង្កើនសមត្ថភាពអ្នកជំនាញខ្មែរតាមរយៈការបណ្តុះបណ្តាលសិក្ខាសាលាអាហារូបករណ៍នៅបរទេស ការសិក្សានៅនឹងកន្លែង និងប្រើប្រាស់បច្ចេកវិទ្យាទំនើប ក្នុងការងារអភិរក្សជាដើម។
លើសពីនេះ នឹងមានការធ្វើបច្ចុប្បន្នភាពឯកសារធម្មនុញ្ញអង្គរដោយផ្តោតលើការងារអភិរក្ស និងអភិវឌ្ឍន៍ប្រកបដោយចីរភាព មិនត្រឹមតែក្នុងតំបន់អង្គរឡើយ តែក៏សម្រាប់តំបន់ប្រវត្តិសាស្ត្រផ្សេងៗទៀតជាមួយនឹងការបង្កើតគោលនយោបាយដោយបញ្ចូលភាពជាបុរាណស្ថាន ភាពជាពិសិដ្ឋរបស់សាសនា ការប្រែប្រួលក្រុងសៀមរាប និងការវិវឌ្ឍវិស័យទេសចរណ៍។
សេចក្តីប្រកាសបានបញ្ជាក់ថា៖ «សន្និសីទអន្តររដ្ឋាភិបាលលើកទី៤ ក៏បានលើកឡើងពីការរៀបចំយុទ្ធសាស្ត្រសមស្របសម្រាប់សហគមន៍មូលដ្ឋានដើម្បីគាំទ្រដល់ការអភិវឌ្ឍសេដ្ឋកិច្ច និងវប្បធម៌ បង្កើនប្រាក់ចំណូលក្នុងសកម្មភាពកសិកម្ម សិប្បកម្ម តាមរយៈការបណ្តុះបណ្តាល ការផ្តល់សម្ភារ និងហេដ្ឋារចនាសម្ព័ន្ធសមស្រប ព្រមទាំងពង្រឹងភាពជាដៃគូរវាងស្ថាប័នសាធារណៈ និងស្ថាប័នឯកជន»។
សន្និសីទដដែលនេះក៏បានវាយតម្លៃខ្ពស់ទៅលើកិច្ចខិតខំរបស់សហគមន៍អន្តរជាតិពាក់ព័ន្ធការប្រឆាំងការលួចគាស់កកាយ ការជួញដូរសម្បត្តិវប្បធម៌ខុសច្បាប់ ក៏ដូចជាការប្រមូលត្រឡប់មកវិញនូវវត្ថុបុរាណខ្មែរដែលបានបាត់បង់ កាលពីសម័យសង្គ្រាម និងបានឯកភាពពង្រឹងវិសាលភាពរបស់មជ្ឈមណ្ឌលឯកសាររបស់អាជ្ញាធរជាតិអប្សរាឱ្យមានស្តង់ដាអន្តរជាតិផងដែរ។
លោក ឈត ប៊ុនថង មន្ត្រីស្រាវជ្រាវផ្នែកទំនាក់ទំនង អប់រំ វប្បធម៌ និងទេសចរណ៍នៃរាជបណ្ឌិត្យសភាកម្ពុជា យល់ថា ផែនការដាក់ចេញសម្រាប់ការងារ ១០ ឆ្នាំរបស់គណៈកម្មាធិការអន្តររដ្ឋាភិបាលនេះជាផែនការល្អមួយសម្រាប់ការងារអភិរក្ស និងអភិវឌ្ឍន៍តំបន់រមណីយដ្ឋានអង្គរ និងសំបូរព្រៃគុក ដែលកន្លងមកការងាររបស់គណៈកម្មាធិការនេះបានបំពេញយ៉ាងល្អ ជាចំណែកសំខាន់ក្នុងការការពារសម្បត្តិបេតិភណ្ឌកម្ពុជា និងពិភពលោក។
លោកបានថ្លែងប្រាប់ថា៖ «កិច្ចការទាំងនេះមានសារៈសំខាន់ណាស់ក្នុងការពារអត្តសញ្ញាណជាតិរបស់កម្ពុជា ក៏ដូចជាប្រភពចំណូលជាតិមួយសំខាន់ពីទេសចរណ៍វប្បធម៌ និងការសិក្សាស្រាវជ្រាវ ហើយជាការផ្សព្វផ្សាយទៅកាន់ពិភពលោកពីអរិយធម៌ខ្មែរដែលបានបន្សល់ទុកពីដូនតា។ មួយវិញទៀតនេះជាកាតព្វកិច្ចមិនអាចខ្វះបានរបស់យើងក្នុងការការពារ និងអភិរក្សសម្បត្តិដូនតាទាំងមរតករូបី និងអរូបី»។
លើសពីនេះលោក ឈត ប៊ុនថងបានសង្កេតឃើញថា កន្លងមក កិច្ចសហប្រតិបត្តិការអភិរក្សរបស់គណៈកម្មាធិការអន្តររដ្ឋាភិបាល ដែលមានការចូលរួមពីអង្គការយូណេស្កូនេះមានរចនាសម្ព័ន្ធច្បាស់លាស់ ក៏ដូចជាមានអំណាចដើម្បីការអភិរក្សប្រកបដោយការយកចិត្តទុកដាក់ខ្ពស់ ជាភាពគំរូមួយផងដែរ។
សូមបញ្ជាក់ផងដែរ យោងតាមអង្គភាពអ្នកនាំពាក្យរាជរដ្ឋាភិបាលកម្ពុជា លោកនាយករដ្ឋមន្ត្រីហ៊ុន ម៉ាណែត នឹងអញ្ជើញថ្វាយព្រះវន្ទនកិច្ច ព្រះករុណាព្រះបាទសម្ដេចព្រះបរមនាថនរោត្ដម សីហមុនី ព្រះមហាក្សត្រនៃកម្ពុជា ស្តេចយាងមាតុភូមិនិវត្តន៍ពីសាធារណរដ្ឋបារាំង នាថ្ងៃទី ១៩ ខែវិច្ឆិកា ឆ្នាំ ២០២៣។
សូមរំឭកដែរថា ព្រះមហាក្សត្រនៃព្រះរាជាណាចក្រកម្ពុជា ស្តេចយាងទៅបំពេញព្រះរាជទស្សនកិច្ចផ្លូវការ ដើម្បីចូលរួមសន្និសីទអន្តររដ្ឋាភិបាលលើកទី ៤ ស្តីពីការអភិរក្សរមណីយដ្ឋានប្រវត្តិសាស្ត្រតំបន់អង្គរ ដែលត្រូវបានរៀបចំឡើងក្នុងឱកាសសម័យប្រជុំលើកទី ៤២ នៃសន្និសីទអង្គការយូណេស្កូ នៅទីក្រុងប៉ារីស សាធារណរដ្ឋបារាំងកាលពីថ្ងៃទី ១២ ខែវិច្ឆិកាកន្លងទៅ៕
ព្រះមហាក្សត្រនៃព្រះរាជាណាចក្រកម្ពុជា ស្តេចយាងទៅបំពេញព្រះរាជទស្សនកិច្ចផ្លូវការ ដើម្បីចូលរួមសន្និសីទអន្តររដ្ឋាភិបាលលើកទី ៤ ស្តីពីការអភិរក្សរមណីយដ្ឋានប្រវត្តិសាស្ត្រតំបន់អង្គរ ក្នុងឱកាសសម័យប្រជុំលើកទី ៤២ នៃសន្និសីទអង្គការយូណេស្កូ នៅទីក្រុងប៉ារីស សាធារណរដ្ឋបារាំងកាលពីថ្ងៃទី ១២ ខែវិច្ឆិកា។ រូប Simona-Mirela Miculescu
