ព្រៃឈើ ក្នុងស្រុកស្រែអំបិល ដែលត្រូវបានគេលួចឈូសឆាយវាទយកដី។ រូបថត FN
កោះកុងៈលោក សុខ សុទ្ធី អភិបាលរងខេត្តកោះកុង បានឱ្យដឹងថា អាជ្ញាធរខេត្តមិនទាន់ចាប់បានក្រុមជនល្មើស ដែលចូលទៅឈូសឆាយដីព្រៃរបស់រដ្ឋ ប្រមាណ ១ ហិកតា នៅស្រុកស្រែអំបិលបាននៅឡើយទេ ខណៈដែលអ្នកឃ្លាំមើលបរិស្ថានទទូចឱ្យអាជ្ញាធរ មានចំណាត់ការពិតប្រាកដ ទើបអាចរកឃើញក្រុមជនល្មើសបានលឿន។
លោក សុខ សុទ្ធី បានឱ្យដឹងនៅថ្ងៃទី២០ ខែវិច្ឆិកាថា អាជ្ញាធរខេត្តបានចាត់ឱ្យមន្ត្រីជំនាញ និងអាជ្ញាធរមូលដ្ឋានស្រុកស្រែងអំបិល ព្រមទាំងមន្រ្តីជំនាញបរិស្ថាន ធ្វើការចុះស្រាវជ្រាវ កំណត់មុខសញ្ញាទៅលើបុគ្គលពាក់ព័ន្ធ ដែលយកគ្រឿងចក្រឈូសឆាយដីព្រៃរដ្ឋ។
ការចាត់វិធានការនេះធ្វើឡើងបន្ទាប់ពីទទួលបានព័ត៌មានថា មានក្រុមជនល្មើស បានដាក់គ្រឿងចក្រឈូសឆាយដីព្រៃនៅចំណុចកំពង់ខ្លឹម ចំណុចពាមត្រែង និងចំណុចគងឆា ក្នុងភូមិបាក់អង្រុត ស្រុកស្រែអំបិល ដែលលួចចូលទៅកាប់ទន្រ្ទានយកដីព្រៃនេះ ធ្វើជាសម្បត្តិកម្មសិទ្ធិផ្ទាល់ខ្លួន។
លោកបានថ្លែងថា៖ «មកដល់ពេលនេះ យើងនៅមិនទាន់កំណត់អត្តសញ្ញាណជនល្មើសបាននៅឡើយទេ ដោយសារតែអ្នកខ្លះនៅពេលដែលគាត់មានបញ្ហាអ៊ីចឹង គាត់បានលើកដាក់អ្នកនេះ អ្នកនោះ ហើយគ្រឿងចក្រដែលយើងចាប់បានហ្នឹង គឺគ្រាន់តែជាអ្នកស៊ីឈ្នួលប៉ុណ្ណោះ»។
លោក សុខ សុទ្ធី បានអះអាងទៀតថា ក្នុងករណីដែលអាជ្ញាធរខេត្តបានស្រាវជ្រាវរកឃើញក្រុមជនល្មើសហើយ ទោះបីជាអ្នកមានអំណាច អ្នកមានលុយក៏ដោយ អាជ្ញាធរខេត្តនឹងអនុវត្តច្បាប់ឱ្យបានតឹងរ៉ឹង ដោយប្ដឹងទៅតុលាការដើម្បីដាក់ទោស ពីព្រោះនេះជាបទល្មើសដែលទន្ទ្រានដីព្រៃរបស់រដ្ឋ។
បើតាមអភិបាលរងខេត្តកោះកុងដដែលនេះ កន្លងមកដីដែលក្រុមជនល្មើស បានឈូសឆាយនេះត្រូវបានកាត់ឆ្វៀលរួចរាល់ហើយ ដោយប្រគល់មកឱ្យរដ្ឋបាលខេត្តជាអ្នកគ្រប់គ្រង ចាត់ចែង ដើម្បីធ្វើសម្បទានកសិកម្មជូនប្រជាពលរដ្ឋ ហើយដីទាំងនោះក៏ត្រូវបានប្រជាពលរដ្ឋ នាំគ្នាផ្ដិតមេដៃទិញ-លក់ ខណៈដែលការទិញ-លក់ដីនេះ វាមិនអាចធ្វើការទិញ-លក់បានទេ ព្រោះដីនេះស្ថិតក្រោមការគ្រប់គ្រងរបស់រដ្ឋ។
លោកបន្ថែមថា ចំណែកឯការឈូសឆាយនេះវិញ ក៏មិនមានការអនុញ្ញាតចេញពីអាជ្ញាធរណាមួយនោះដែរ តែជាការលួចឈូសឆាយយកតែម្តង។
ទាក់ទងនឹងការទន្ទ្រានយកដីព្រៃនេះ លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្តាញយុវជនកម្ពុជា (CYN) បានថ្លែងថា ចំពោះចំណាត់ការរបស់សមត្ថកិច្ច គួរតែធ្វើឡើងឱ្យបានរហ័ស និងលឿនជាងនេះ ពីព្រោះការបំផ្លិតបំផ្លាញធនធានធម្មជាតិ និងការកាប់ព្រៃឈើនេះមិនមែនធ្វើឡើងដោយស្ងាត់ៗនោះទេ វាអាចមានការដឹងលឺពីអាជ្ញាធរមូលដ្ឋានផងដែរ។
លោកបញ្ជាក់ថា៖ «ដូច្នេះបើសិនរដ្ឋបាលខេត្តកោះកុង មានចំណាត់ការពិតប្រាកដចង់រកឃើញជនល្មើស នោះខ្ញុំគិតថា អ្នកពាក់ព័ន្ធហ្នឹងគឺអាចនឹងរកឃើញនៅរយៈពេលដ៏ខ្លីខាងមុខ ដើម្បីយកមកឱ្យទទួលខុសត្រូវចំពោះមុខច្បាប់»។
បើតាមលោក ហេង គឹមហុង ទន្ទឹមនឹងការដាក់ទោសជនដែលពាក់ព័ន្ធតាមផ្លូវច្បាប់ហើយ អាជ្ញាធរខេត្ត និងអាជ្ញាធរពាក់ព័ន្ធត្រូវបង្កើនកិច្ចសហប្រតិបត្តិការគ្នាស្វែងរកជនដែលនៅពីខាងក្រោយ និងអ្នកកាប់បំផ្លាញ ព្រមទាំងបង្កើននូវចំណាត់ការព័ត៌មាន ដើម្បីធានាថា រាល់សកម្មភាពបំផ្លាញធនធានធម្មជាតិផ្សេងទៀត នឹងត្រូវរាយការណ៍ជាបន្ទាន់មកកាន់រដ្ឋបាលស្រុក រដ្ឋបាលខេត្ត ក្នុងការបង្ក្រាបលើសកម្មភាពទាំងនេះ។
លោកបានបន្ថែមថា ការទទួលខុសត្រូវចំពោះមុខច្បាប់នេះ មិនមែនតែក្រុមជនល្មើសនោះទេ តែសមត្ថកិច្ចនៅក្នុងមូលដ្ឋានក៏ត្រូវចូលរួមចំណែកដោយខានមិនបានឡើយ ព្រោះនេះជាការធ្វេសប្រហែសដែលបណ្ដាលឱ្យមានបទល្មើសទន្ទ្រានយកដីព្រៃ និងការកាប់បំផ្លាញធនធានធម្មជាតិនៅក្នុងដែនសមត្ថកិច្ចរបស់ខ្លួន៕
