លោក សួស យ៉ារ៉ា (ស្តាំ) ចាប់ដៃជាមួយ លោក មូហាម៉ាត់ មុយស៊ូ ក្នុងដំណើរទស្សនកិច្ចកាលពីថ្ងៃទី១៩ វិច្ឆិកា។ រូបថត រដ្ឋសភា
ភ្នំពេញៈ កម្ពុជា-ម៉ាល់ឌីវ បានពិភាក្សាលើការជំរុញកិច្ចសហប្រតិបត្តិការលើវិស័យសំខាន់ៗមួយចំនួនជាមួយគ្នា ដែលក្នុងនោះប្រទេសទាំង ២ ក៏បានលើកឡើងពីគម្រោងការតភ្ជាប់គោលដៅទេសចរណ៍ ការធ្វើពាណិជ្ជកម្ម ការផ្លាស់ប្តូរទៅវិញទៅមកលើការអភិរក្សវប្បធម៌ ព្រមទាំងលើកកម្ពស់សន្តិភាពក្នុងតំបន់និងពិភពលោក។
ការលើកឡើងពីការជំរុញកិច្ចសហប្រតិបត្តិការនេះ ធ្វើឡើងក្នុងដំណើរទស្សនកិច្ចការងារ និងការចូលរួមពិធីប្រកាសចូលកាន់តំណែងរបស់លោក មូហាម៉ាត់ មុយស៊ូ ( Mohamed Muizzu )ជាប្រធានាធិបតីនៃសាធារណរដ្ឋម៉ាល់ឌីវ របស់លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន និងជាប្រធានសភាអន្តរជាតិដើម្បីភាពអត់ឱន និងសន្តិភាព (IPTP) កាលពីថ្ងៃទី ១៦ ដល់ ១៩ ខែវិច្ឆិកា ឆ្នាំ២០២៣។ នេះបើយោងតាមសេចក្តីប្រកាសព័ត៌មានរបស់រដ្ឋសភា ស្តីពីលទ្ធផលនៃដំណើរទស្សនកិច្ចការងារ ដែលបានចេញផ្សាយនៅថ្ងៃទី២០ ខែវិច្ឆិកា ឆ្នាំ ២០២៣។
នេះជាការឆ្លើយតបតាមការអញ្ជើញរបស់ការិយាល័យប្រធានាធិបតីជាប់ឆ្នោត នៃសាធារណរដ្ឋម៉ាល់ឌីវ លោក សួស យ៉ារ៉ា បានទៅបំពេញទស្សនកិច្ចការងារ និងបានចូលរួមជាភ្ញៀវកិត្តិយសក្នុងពិធីប្រកាសចូលកាន់តំណែងរបស់លោក មូហាម៉ាត់ មុយស៊ូ (Mohamed Muizzu) ជាប្រធានាធិបតីថ្មី និងលោកហ៊ូសេន មូហាម៉ាត់ ឡាទីហ្វ (Hussain Mohamed Latheef) ជាអនុប្រធានាធិបតីថ្មី នៅរដ្ឋធានីម៉ាល់នៃសាធារណរដ្ឋម៉ាល់ឌីវ។
សេចក្តីប្រកាសព័ត៌មានបានឱ្យដឹងថា ក្នុងជំនួបពិភាក្សាការងារដោយឡែកជាមួយ លោកអនុប្រធានាធិបតី ហ៊ូសេន មូហាម៉ាត់ ឡាទីហ្វ បានលើកឡើងពីទស្សនកិច្ចជាប្រវត្តិសាស្ត្ររបស់ លោក ហ៊ុន សែន អតីតនាយករដ្ឋមន្រ្តីនៃកម្ពុជា មកកាន់ប្រទេសម៉ាល់ឌីវកាលពីខែមករា ឆ្នាំ២០២៣ កន្លងទៅ ហើយលោកអនុប្រធានាធិបតីក៏បានថ្លែងអំណរគុណចំពោះរដ្ឋាភិបាលកម្ពុជាផងដែរ ដែលបានជ្រើសរើសផ្លូវ ១ ខ្សែ នៅខេត្តព្រះសីហនុ ដាក់ឈ្មោះថា «ផ្លូវមិត្តភាពកម្ពុជា-ម៉ាល់ឌីវ» សម្រាប់អបអរខួបលើកទី ៣០ ឆ្នាំ នៃចំណងការទូតប្រទេសទាំង២។
សេចក្តីប្រកាសបញ្ជាក់ថា ៖ «ភាគីទាំង២ បានពិភាក្សាលើការជំរុញកិច្ចសហប្រតិបត្តិការរវាងគ្នា ដូចជាការតភ្ជាប់គោលដៅទេសចរណ៍នៃប្រទេសទាំង២ ពាណិជ្ជកម្ម ការវិនិយោគ ការផ្លាស់ប្តូរទៅវិញទៅមកលើការអភិរក្សវប្បធម៌និងធនធានសមុទ្រ, រួមគ្នាលើកកម្ពស់សន្តិភាពក្នុងតំបន់និងពិភពលោក មនុស្សធម៌ សន្តិសុខស្បៀង ព្រមទាំងការគាំទ្រគ្នាទៅវិញទៅមកលើវេទិកាអន្តរជាតិ និងអន្តរសភានានា»។
លោក ធួន ស៊ីណាន ប្រធានសមាគមទេសចរណ៍អាស៊ី-ប៉ាស៊ីហ្វិក នៅថ្ងៃទី២០ ខែវិច្ឆិកា បានថ្លែងថា ប្រទេសនៅលើពិភពលោក គឺសុទ្ធសឹងតែមានសកា្តនុពលលើការតភ្ជាប់វិស័យទេសសចរណ៍ សេដ្ឋកិច្ច ពាណិជ្ជកម្ម និងវិនិយោគ ប៉ុន្តែសម្រាប់ប្រទេសម៉ាល់ឌីវ គឺជាប្រទេស ដែលតូច និងមិនសូវមានសក្តានុពលទេសចរណ៍ និងនយោបាយសម្រាប់ធ្វើឱ្យប្រទេសកម្ពុជាទាក់ទាញច្រើននោះទេ។
លោក ធួន ស៊ីណាន បានថ្លែងថា៖«តាមពិតម៉ាល់ឌីវ មានភ្ញៀវហើយ ប៉ុន្តែសូមចាំថា គោលដៅដែលគេទៅម៉ាល់ឌីវ គេមានបំណងផ្សេងមួយដែលមិនអាចយកមកបញ្ចូលជាមួយកម្ពុជាបាននោះទេ ហើយការតភ្ជាប់ជើងហោះហើរ ត្រង់រវាងប្រទេសទាំង២ក៏មិនទាន់ត្រូវបានរកឃើញដែរ មិនដូចជាប្រទេសសិង្ហបុរី ហុងកុង ថៃ វៀតណាម ថៃ ម៉ាឡេស៊ី និងឥណ្ឌូនេស៊ីជាដើមនោះទេ»។
លោកសង្កត់ធ្ងន់ទៀតថា៖«ប្រទេសម៉ាល់ឌីវ គឺជាប្រទេសស្ថិតនៅលើកូនកោះមួយដ៏តូចទេ មិនទាន់មានសក្តានុពលសេដ្ឋកិច្ច និងនយោបាយសម្រាប់ពិភពលោកច្រើននោះក៏ទេដែរ»។
សូមបញ្ជាក់ដែរថា នាឱកាសទៅទស្សនកិច្ចការងារ និងការចូលរួមពិធីប្រកាសចូលកាន់តំណែង ប្រធានាធិបតីថ្មីនៃសាធារណរដ្ឋម៉ាល់ឌីវនោះដែរលោក សួស យ៉ារ៉ា ក៏បានជួបពិភាក្សាការងារជាមួយ លោក អាល់ចាវ៉ាន់ (Ahmed Bin Mohammad Al-Jarwan)ប្រធានក្រុមប្រឹក្សាសកលដើម្បីសន្តិភាព និងភាពអត់ឱន (GCTP) នៃអេមីរ៉ាតអារ៉ាប់រួម លើកិច្ចសហប្រតិបត្តិការជាមួយរដ្ឋសភាកម្ពុជាផងដែរ។
ក្នុងកិច្ចពិភាក្សាគ្នានោះ ភាគីទាំង២បានផ្តោតលើការត្រៀមរៀបចំមហាសន្និបាតសភាអន្តរជាតិ ដើម្បីភាពអត់ឱននិងសន្តិភាព នៅខែមិថុនា ឆ្នាំ២០២៤ ខាងមុខ ដោយកម្ពុជាគ្រោងធ្វើជាម្ចាស់ផ្ទះ ដើម្បីពិនិត្យបង្កើតគោលការណ៍ នៃកិច្ចសហប្រតិបត្តិការ សន្តិភាពសកលគឺមិនយកសង្គ្រាមដើម្បីបញ្ចប់សង្គ្រាមដែលជាគំនិតផ្តួចផ្តើមរបស់លោក ហ៊ុន សែន អតីតនាយករដ្ឋមន្រ្តីកម្ពុជា ផងដែរ៕
