ទិដ្ឋភាពសាលាខេត្ដបាត់ដំបង កាលពីកន្លងមក ។ សហការី
បាត់ដំបងៈ ខេត្តបាត់ដំបងគ្រោងនឹងបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ក្រោមប្រធានបទ «យើងនាំគ្នាចូលរួម និងពង្រឹងចលនាសកម្មភាពគោលនយោបាយភូមិ ឃុំ សង្កាត់ មានសុវត្ថិភាព» នៅថ្ងៃទី៥ និង៦ ខែធ្នូ ឆ្នាំ២០២៣ខាងមុខដើម្បីឆ្លើយតបនឹងបញ្ហាប្រឈម ក្តីកង្វល់ និងតម្រូវការរបស់ពលរដ្ឋ។
លោក អ៊ុយ រី ប្រធានក្រុមប្រឹក្សាខេត្តបាត់ដំបងបានថ្លែងឱ្យដឹងដូចនេះ ក្នុងពិធីបើកកិច្ចប្រជុំសាមញ្ញលើកទី៥៤ របស់ក្រុមប្រឹក្សាខេត្តបាត់ដំបង អាណត្តិទី៣ កាលពីថ្ងៃទី២០ ខែវិច្ឆិកា ឆ្នាំ២០២៣។
លោកបានថ្លែងថា៖«វេទិកានេះធ្វើឡើងក្នុងគោលបំណងដើម្បីចូលរួមអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាល ដែលតម្រូវឱ្យមានការកែលម្អប្រព័ន្ធអភិបាលកិច្ចនៅថ្នាក់រដ្ឋបាលនានា ដើម្បីជំរុញលទ្ធិប្រជាធិបតេយ្យនៅថ្នាក់មូលដ្ឋាននិងជំរុញកិច្ចអភិវឌ្ឍន៍សេដ្ឋកិច្ច សង្គមកិច្ច ក្នុងការធានាការរួមចំណែកនៃការកាត់បន្ថយភាពក្រីក្រនៅទូទាំងប្រទេសកម្ពុជា»។
លោកបានឱ្យដឹងទៀតថា វេទិកាដែលគ្រោងនឹងធ្វើនាពេលខាងមុខ ក៏ដើម្បីឱ្យក្រុមប្រឹក្សាខេត្តបានប្រាប់ទៅដល់ក្រុមប្រឹក្សាក្រុង ស្រុក ឃុំ សង្កាត់ សហគមន៍ ប្រជាពលរដ្ឋ និងអ្នកពាក់ព័ន្ធនានាពីសកម្មភាពរបស់ក្រុមប្រឹក្សាខេត្ត ក្នុងរយៈពេល១ឆ្នាំ ចំពោះការឆ្លើយតបនឹងសំណូមពររបស់ក្រុមប្រឹក្សាក្រុង ស្រុក សហគមន៍ ប្រជាពលរដ្ឋ និងអ្នកពាក់ព័ន្ធ ក្នុងការពិភាក្សាស្រាយបំភ្លឺពីបញ្ហាប្រឈមនានាដល់អ្នកចូលរួមផងដែរ។
លោកមានប្រសាសន៍ថា ៖ «វេទិកានេះ ក៏មានគោលដៅដើម្បីលើកកម្ពស់ការឆ្លើយតបចំពោះតម្រូវការរបស់មូលដ្ឋាន និងការផ្សព្វផ្សាយពីតួនាទី ភារកិច្ច ការទទួលខុសត្រូវរបស់ក្រុមប្រឹក្សា គណៈអភិបាលខេត្ត និងពិគ្រោះយោបល់ និងការឆ្លើយតបនូវបញ្ហាប្រឈម ក្តីកង្វល់ និងតម្រូវការជាអាទិភាពជាមួយប្រជាពលរដ្ឋ នៅតាមមូលដ្ឋាន ដើម្បីសិក្សាស្វែងយល់ រកដំណោះស្រាយសមស្រប និងឆ្លើយតបបានទាន់សភាពការណ៍ផងដែរ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ បានថ្លែងថា វេទិកាសាធារណៈពិតជាមានសារៈសំខាន់ណាស់ដើម្បីឱ្យអាជ្ញាធរប្រមូលបញ្ហារបស់ប្រជាពលរដ្ឋ ជាពិសេសបញ្ហាទាក់នឹងរស់នៅប្រចាំថ្ងៃ ដូចជាការអនុវត្តគោលនយោបាយភូមិឃុំមានសុវត្ថិភាពជាដើម ដែលអាជ្ញាធរត្រូវពិនិត្យមើលលើការអនុវត្តរបស់ខ្លួនឡើងវិញ។
លោកបានថ្លែងថា៖«រដ្ឋបាលខេត្តអាចប្រមូលសំណូមពររបស់ប្រជាពលរដ្ឋដែលបានជួបប្រទះយកមកពិចារណាក្នុងការដោះស្រាយ ឬក៏ក្នុងករណីដោះស្រាយនៅថ្នាក់ខេត្តមិនបាន ថ្នាក់ខេត្តអាចបញ្ជូនសំណុំរឿងនេះទៅកាន់ថ្នាក់ជាតិឬទៅស្ថាប័នពាក់ព័ន្ធ ដោយកន្លងមក យើងឃើញក្រសួងមហាផ្ទៃបានដោះស្រាយច្រើននូវបញ្ហាទាំងនោះ»។
បើតាមលោក សំអាត លោកចង់ឱ្យមានការបើកវេទិកាសាធារណៈនេះ ជាប្រចាំ និងដោយពុំមានការប្រកាន់និន្នាការនយោបាយ ដែលអាជ្ញាធរអាចប្រមូលមតិយោបល់ពលរដ្ឋ ដើម្បីជំរុញការដោះស្រាយបញ្ហាបានរហ័ស ទាន់ពេលវេលា។
ចំណែក លោក ស៊ឹង សែនករុណា អ្នកនាំពាក្យនៃអង្គការអាដហុក បានឱ្យដឹងដែរថា ការបើកវេទិកាជាសាធារណៈនេះ គឺរឿងល្អមួយ ប៉ុន្តែអាជ្ញាធរថ្នាក់ខេត្ត គួរតែអញ្ជើញគ្រប់ភាគីពាក់ព័ន្ធ ជាពិសេសប្រជាពលរដ្ឋដែលមានបញ្ហាឱ្យចូលរួមក្នុងវេទិកានេះ។
លោកបានបញ្ជាក់បែបនេះថា៖«ខ្ញុំទទួលបានព័ត៌មានបានពីថ្នាក់មូលដ្ឋានច្រើនដែរទាក់ទងនឹងការរៀបចំវេទិកាសាធារណៈកន្លងទៅដោយពលរដ្ឋបានរអ៊ូរទាំថា អាជ្ញាធរហាក់បីដូចជាបានកំណត់មុខសញ្ញាដើម្បីចូលរួម។ដូច្នេះខ្ញុំស្នើថា អាជ្ញាធរគួរបើកទូលាយជាទូទៅចំពោះការរៀបចំវេទិកានេះ»៕
