សិស្សអាយុ ១៥ ឆ្នាំ ឈ្មោះ ចនពៅ ស៊ីរ៉ាណូ ដែលប្រកួតលើវិញ្ញាសា eLife Map ទទួលបានមេដាយមាស។ រូបថត សហការី
ភ្នំពេញៈ កុមារា ចនពៅ ស៊ីរ៉ាណូ ជាសិស្សត្រៀមចូលថ្នាក់ទី១០NGS-C3 នៃសាលារៀនជំនាន់ថ្មី ទីតាំងព្រះយុគន្ធរបានឈ្នះមេដាយមាសនៅក្នុងការប្រកួតជាសកលផ្នែកព័ត៌មានវិទ្យាឆ្នាំ ២០២៣ លើវិញ្ញាសា eLife Map នៅទីក្រុងអាប៊ូដាប៊ីសហព័ន្ធអារ៉ាប់អេមីរ៉ាតដែលបានប្រកាសលទ្ធផលបេក្ខជនដែលទទួលជយលាភីនៅថ្ងៃទី ២៧ ខែតុលា ឆ្នាំ ២០២៣។
កុមារា ចនពៅ ស៊ីរ៉ាណូ កើតនៅថ្ងៃទី ២៦ កក្កដា ឆ្នាំ ២០០៨ នៅរាជធានីភ្នំពេញបច្ចុប្បន្នមានទីលំនៅនៅបឹងត្របែក។ នៅក្នុងគ្រួសារ ស៊ីរ៉ាណូ គឺជាកូនពៅដែលមាន បងប្អូន ២ នាក់រួមមានស៊ីរ៉ាណូ និងបងប្រុស ១ នាក់ទៀត។
ទោះបីជាយ៉ាងណាក៏ដោយសព្វថ្ងៃនេះ ស៊ីរ៉ាណូ កំពុងមានពិការភាពនៅលើដៃទាំងសងខាងរបស់គេដែលហាក់ដូចជាមានការលំបាកនៅក្នុងការប្រកបការងារប្រចាំថ្ងៃបន្តិចបន្តួចដែរ។ ភាគច្រើនមិត្តភក្តិរបស់ស៊ីរ៉ាណូថា គាត់ជាមនុស្សរួសរាយរាក់ទាក់ ស្រួលនៅក្នុងការនិយាយជាមួយគ្នា ងាយនៅក្នុងការពឹងពាក់។ មុននឹងប្អូនប្រុសបានធ្វើការផ្លាស់សាលាមករៀននៅស៊ីសុវត្ថិជំនាន់ថ្មី គឺប្អូនធ្លាប់បានសិក្សានៅសាលារៀនសុវណ្ណភូមិ។
នៅក្នុងថ្នាក់វិញប្អូនប្រុសម្នាក់នេះ មានអត្តចរិតស្ងាត់ស្ងៀមពេលត្រឡប់មកពីការសិក្សាដូចក្មេងប្រុសដទៃដែរនៅផ្ទះ គឺប្អូនចូលចិត្តអានសៀវភៅនិងលេងហ្គេមជាមួយមិត្តភក្តិ។ណាមួយដោយសារតែប្អូនមានពិការភាពតាំងពីកំណើតផងដូច្នេះពេលទៅសាលារាល់ដងនៅក្នុងការធ្វើដំណើរទៅសាលារៀន គឺប្អូនមានឪពុកម្តាយនិងសាច់ញាតិជាអ្នកជូនមកសាលារៀន។
តាមរយៈការសម្ភាសជាមួយយុវសិស្ស ស៊ីរ៉ាណូបានឱ្យដឹងថា ការប្រកួតជាសកលផ្នែកព័ត៌មានវិទ្យា (IT) នេះធ្វើឡើងពីថ្ងៃទី ២៤ ដល់ទី ២៨ ខែតុលា ឆ្នាំ ២០២៣ នៅទីក្រុងអាប៊ូដាប៊ីសហព័ន្ធអារ៉ាប់អេមីរ៉ាត។ ពេលទៅប្រកួតប្អូនប្រុសបានទៅជាមួយសមាជិកក្រុមនិងអ្នកដឹកនាំ ២ នាក់មកពីខាងក្រសួងសង្គមកិច្ច អតីតយុវជននិងយុវនីតិសម្បទា ដោយពួកគាត់បានទាក់ទងមកខាងប្អូនដើម្បីចូលរួមប្រកួតក្នុងកម្មវិធីមួយនេះ។
នៅក្នុងការប្រកួតវិញ្ញាសា eLife Map យុវសិស្សស៊ីរ៉ាណូបានលើកឡើងថា នៅក្នុងការប្រកួតនេះខ្លួនមានអាយុក្មេងជាងគេ ដោយបេក្ខជនខ្លះទៀតមានអាយុវ័យខ្ទង់ប្រហែលជាង ២០ ឆ្នាំអី តែយ៉ាងណាក៏ដោយកុមារា ១ រូបនេះបានខិតខំប្រឹងប្រែងនៅក្នុងការប្រកួតដោយប្រើចំណេះបញ្ញារបស់គេដែរ។
ប្អូនប្រុសបាននិយាយថា៖ «ការប្រកួតបែប eLife Map ហ្នឹងគឺជាការប្រកួតដែលគេឱ្យប្រធានបទ ១ យើងត្រូវស្វែងរកចម្លើយ ឬព័ត៌មានទាក់ទងនៅក្នុងហ្នឹងយើងអាចប្រើប្រាស់អីក៏បានដែរ ដូចជាវេបសាយកន្លែងស្វែងរកព័ត៌មាន Wikipedia អ៊ីចឹង»។
ក្រៅពីនេះ កុមារា ស៊ីរ៉ាណូ បានឱ្យដឹងថា ប្អូនប្រុសពិតជាមានអារម្មណ៍រំភើបនៅពេលដែលបានចូលរួមការប្រកួតមួយនេះ។ ការត្រៀមសម្រាប់ការប្រឡងមួយនេះ ប្អូនប្រុសបានបញ្ជាក់ថា ប្អូនបានមើលមេរៀនដោយក្នុង ១ ថ្ងៃ ប្អូនបានមើលមេរៀនយ៉ាងច្រើន ១ ម៉ោងជារៀងរាល់ថ្ងៃ។ គន្លឹះសំខាន់ៗរបស់ប្អូនប្រុសដែលត្រៀមខ្លួននៅមុនពេលប្រឡងគឺ៖ «ខ្ញុំមើលថាតើការប្រឡងបែបម៉េចខ្ញុំបង្កើតសំណួរដូចហ្នឹងដែរហើយចាំខ្ញុំស្វែងរកតាមហ្នឹង»។
ក្រោយពីការប្រកួតនេះចប់អ្វីដែលប្អូនប្រុសបានរៀនអំពីការប្រកួតនេះ គឺការខិតខំប្រឹងប្រែងពិតជាមានសារៈសំខាន់ដែលធ្វើឱ្យប្អូនអាចមានសមត្ថភាពនៅក្នុងការទទួលបានមេដាយមាសនេះបាន។ ប្អូនប្រុសបាននិយាយថា៖ «ខ្ញុំពិតជាមានមោទនភាពខ្លាំងនៅពេលទទួលបានមេដាយ»។
ចាប់តាំងពីឆ្នាំ ២០១៤ មកដល់បច្ចុប្បន្នកម្ពុជាមិនធ្លាប់បានទទួលមេដាយមាសនៅលើការប្រកួតនេះទេ រហូតទាល់តែប្អូនប្រុស ស៊ីរ៉ាណូ ដែលបច្ចុប្បន្នមានអាយុ ១៥ឆ្នាំបានដណ្តើមយកមេដាយមាសជូនជាតិ។ ការទទួលបានមេដាយមាសនេះបានធ្វើឱ្យបេក្ខជនផ្សេងៗដែលចូលរួមប្រកួតមកពីប្រទេសផ្សេងដូចជាប្រទេសថៃ វៀតណាម និងហ្វីលីពីន មានការកោតសរសើរ និងពិតជាមិនគួរឱ្យជឿថា យុវសិស្សនៅកម្ពុជាអាចមានសមត្ថភាពដណ្តើមមេដាយមាសបានទេ។
ណាមួយដោយសារតែប្អូនប្រុសមានភាពវៃឆ្លាតពីកំណើតនិងមានចំណេះដឹងភាសាអង់គ្លេសល្អប្រសើរផងដែរ។ ជាក់ស្តែងតាមបញ្ជីឈ្មោះអ្នកជាប់ជយលាភីដែលផ្តល់ដោយប្អូនប្រុស ស៊ីរ៉ាណូ គឺនៅក្នុងនោះមានប្រទេសចំនួន ៤ ដែលជាប់ចំណាត់ថ្នាក់លេខ ១ នៅលើវិញ្ញាសា eLife Map ក្នុងឆ្នាំ ២០២៣ នេះ មានដូចជាប្រទេសកម្ពុជា ម៉ាឡេស៊ី ឥណ្ឌូនេស៊ី និងប្រទេសកូរ៉េ។
កុមារាស៊ីរ៉ាណូ បានឱ្យដឹងថា៖ «មូលហេតុដែលប្អូនជ្រើសរើសយកមុខវិជ្ជាIT ពីព្រោះថា IT តាំងពីតូចមកពេលប៉ះកុំព្យូទ័រ ប៉ះទូរស័ព្ទអីគឺចាប់អារម្មណ៍ខ្លាំង អ៊ីចឹងចង់ដឹងច្រើនយូរៗទៅវាក៏ចាប់ផ្តើមជាចំណាប់អារម្មណ៍តាមហ្នឹងដែរ»។ ដោយសារតែមូលហេតុនេះហើយទើបបណ្តាលឱ្យ ស៊ីរ៉ាណូ មានគោលបំណងទៅថ្ងៃអនាគតគឺចង់ធ្វើការរកស៊ីហើយនឹងចូលខាងតិចណូឡូជី ជាពិសេសគឺខាងផ្នែក IT ហ្នឹងដែរ។
លោក សម្យ កំសាន្ត នាយករងសាលារៀនជំនាន់ថ្មីវិទ្យាល័យព្រះស៊ីសុវត្ថិបាននិយាយថា៖ «បានជាសិស្សានុសិស្សចាំបាច់ត្រូវរៀនមុខវិជ្ជាITហ្នឹងដោយសារមុខវិជ្ជា IT ជាមុខវិជ្ជាស្នូលមុខវិជ្ជាគោលនៅក្នុងពេលបច្ចុប្បន្ន គឺដូចជាទៅពេលអនាគត ពីព្រោះថាពិភពលោកយើងក្នុងពេលបច្ចុប្បន្នអ្វីៗដែលយើងហៅថាយុគសម័យឌីជីថលសម័យបច្ចេកវិទ្យាដូច្នេះសាលារៀនចាំបាច់កែសម្រួលកម្មវិធីសិក្សាដែលអាចឱ្យសិស្សរៀន IT នេះ ឬកុំព្យូទ័រនេះបច្ចេកវិទ្យានេះតាំងពីថ្នាក់ទី ៧ តាំងពីបឋមសិក្សាមកនោះដោយសារឆ្លើយតបនឹងបរិបទពិភពលោក»។
លោកនាយក សម្យ កំសាន្ត បានបន្តថា៖ «ម្យ៉ាងវិញទៀតនៅក្នុងយុគសម័យនេះកូនសិស្សត្រូវការប្រើប្រាស់បច្ចេកវិទ្យាដើម្បីជួយគាំទ្រការសិក្សារបស់ពួកគេ។ តាមបណ្តាប្រទេសជឿនលឿន បច្ចេកវិទ្យានេះបានជួយពន្លឿនការសិក្សាស្រាវជ្រាវការរៀនសូត្រកាន់តែមានភាពត្រឹមត្រូវ និងភាពទូលំទូលាយនៃចំណេះដឹងប្រើពេលវេលាតិច ចំណេះដឹងអាចជាក់លាក់អាចប្រាកដនិយម ដែលមិនចាំបាច់រង់ចាំលោកគ្រូ-អ្នកគ្រូប្រាប់ ឬក៏បង្រៀនដោយផ្ទាល់នោះទេ។
ដូច្នេះនៅក្នុងសាលាជំនាន់ថ្មីយើងការងារបង្រៀន ឬក៏បញ្ជ្រាបបច្ចេកវិទ្យាវាជាកត្តាមួយចាំបាច់បំផុតសម្រាប់សិស្សយើងហើយទាំងអស់នេះក៏បង្ហាញពីសារៈសំខាន់ដែលពលរដ្ឋនីមួយៗដែលនឹងក្លាយទៅជាមូលធនមនុស្ស ឬក៏ជាកម្លាំងអភិវឌ្ឍន៍ប្រទេសមួយគឺត្រូវតែមានចំណេះដឹងបច្ចេកវិទ្យានេះដែរ»។
តាមការលើកឡើងរបស់លោក សម្យ កំសាន្ត បានឱ្យដឹងថា នៅក្នុងកម្មវិធីសាលារៀនជំនាន់ថ្មីសម្រាប់ការត្រៀមសិស្សទៅប្រកួតនៅក្រៅប្រទេសសាលាបានបណ្តុះបណ្តាលភាសាអង់គ្លេសឱ្យខ្លាំង ឱ្យសិស្សដឹងអំពីរបៀបនៅក្នុងការចូលរួមប្រកួត ចេះពីរបៀបស្រាវជ្រាវដើម្បីត្រៀមទៅប្រកួតដើម្បីជាចំណេះដឹងរបស់ពួកគេដើម្បីឱ្យពួកគេទទួលបានចំណេះដឹងបទពិសោធន៍ពីបណ្តាប្រទេសនានាអំពីចំណេះដឹងវប្បធម៌ផងដែរ។
សកម្មភាពដែលសាលារៀនជំនាន់ថ្មីអនុវត្តប្រចាំឆ្នាំនៅក្នុងការត្រៀមខ្លួនឱ្យសិស្សានុសិស្សត្រៀមប្រកួតនៅក្រៅប្រទេស គឺតាមរយៈការធ្វើសិក្ខាសិលាតម្រង់ទិសការបណ្តុះបណ្តាលក្លិបកូនសិស្ស និងលោកគ្រូដើម្បីឱ្យយល់ដឹងអំពីសកម្មភាព និងការងារនៅអន្តរជាតិដើម្បីឱ្យកូនសិស្សស្វែងយល់ធ្វើការស្រាវជ្រាវ និងចូលរួម។
ជាមួយគ្នានេះដែរសម្រាប់សិស្សានុសិស្សដែលមានបំណងចូលរួមទៅប្រកួតនៅក្រៅប្រទេស ប្អូនប្រុស ចនពៅ ស៊ីរ៉ាណូ បានផ្តាំផ្ញើថា៖ «សំខាន់ គឺភាពក្លាហាន បើយើងអត់មានភាពក្លាហានទេយើងក៏អត់មានឥទ្ធិពលនៅក្នុងការចូលរួមប្រកួតដែរ អ៊ីចឹងភាពក្លាហាន គឺសំខាន់។ ចូលហ្នឹងយើងត្រូវមានភាពក្លាហានការដាក់ចិត្តចូលរួមការខិតខំប្រឹងមើលមេរៀន ខំប្រឹងដាក់ចិត្តប្រឡងហ្នឹងដែរ»។
លោក កំសាន្ត ឱ្យដឹងថា ក្នុងឆ្នាំ ២០២៣ នេះសាលារៀនជំនាន់ថ្មីវិទ្យាល័យព្រះស៊ីសុវត្ថិទទួលបានមេដាយចំនួន ៥៨៣ មេដាយ ពានរង្វាន់ចំនួន ២៤ ពាន និងវិញ្ញាបនបត្រចំនួន ១០៥ សន្លឹក ទាំងការប្រកួតថ្នាក់ជាតិ និងអន្តរជាតិដែលបានមកពីការប្រកួតនានាដូចជា World Scholar's Cup ឬ Math Competition ផ្សេងៗនៅតាមបណ្តាប្រទេសអន្តរជាតិ រួមមានប្រទេសកូរ៉េ ថៃ សិង្ហបុរី អង់គ្លេស និងអាមេរិកជាដើម។
ជាមួយគ្នានេះដែរក្នុងរយៈពេល ៦ ឆ្នាំចុងក្រោយនេះចាប់តាំងពីឆ្នាំសិក្សា ២០១៧ ដល់ ២០២៣ សាលារៀនជំនាន់ថ្មីវិទ្យាល័យព្រះស៊ីសុវត្ថិទទួលបានមេដាយសរុបចំនួន ១ ៨៦៧ មេដាយមកហើយ រួមមានមេដាយមាស មេដាយប្រាក់ និងមេដាយសំរឹទ្ធ៕
កុសល សិរីកន្យា
