វេបសាយ Humans-of-Cambodia ដែលផ្ទុកព័ត៌មានចម្រុះច្រើន។ ហុង មិនា
ភ្នំពេញ: នៅក្នុងយុគសម័យឌីជីថលដែលបានផ្លាស់ប្តូររបៀបនៃការផ្សព្វផ្សាយនិងចែករំលែកព័ត៌មាន វេបសាយថ្មីមួយឈ្មោះថា Humans of Cambodia ត្រូវបានបង្កើតដើម្បីបង្ហាញអំពីសក្ដានុពល និងភាពចម្រុះនៅក្នុងប្រទេសកម្ពុជា។
ដោយយកលំនាំតាម Humans of New York ដែលទទួលស្គាល់ជាសកល វេបសាយនេះផ្ទុកព័ត៌មានច្រើនជាងអត្ថបទទូទៅ ជាពិសេសវាផ្ដោតលើភាពធន់ ក្តីសុបិន និងមរតកវប្បធម៌ដ៏សម្បូរបែបរបស់ប្រជាជនកម្ពុជា។
ព័ត៌មានដែលរៀបរាប់អំពីការរស់នៅក្នុងទីក្រុងរហូតដល់ការពិពណ៌នាពីភាពស្ងប់ស្ងាត់នៃទេសភាពជនបទ Humans of Cambodia បានលាតត្រដាងពីជីវិតប្រចាំថ្ងៃរបស់ប្រជាជនកម្ពុជា ដោយផ្តល់នូវទស្សនៈដែលយល់លើសពីការនិទានរឿងធម្មតា។
អ្នកនាង Suparna Roy ស្ថាបនិក និងជានិពន្ធនាយកវេបសាយបានឱ្យដឹងថា៖ «មនុស្សគ្រប់រូបមានរឿងដែលគួរនិយាយ។ ផ្លេតហ្វមរបស់យើងគឺជាស្ពានតភ្ជាប់ការនិយាយរឿងទាំងនេះជាមួយពិភពលោក ដោយបង្ហាញពីភាពពិតពីប្រទេសកម្ពុជា»។
បើយោងតាមលោក Abhijeet Sandilya សហស្ថាបនិកបានឱ្យដឹងថា វេបសាយ«Humans of Cambodia» ផ្ដល់អាទិភាពសំខាន់លើការស្វែងរកប្រភព ការសម្ភាសនិងកិច្ចខិតខំប្រឹងប្រែងរួមគ្នា។
លោកបានសង្កត់ធ្ងន់លើការប្តេជ្ញាចិត្តក្នុងការបង្ហាញរឿងរ៉ាវជាច្រើនដែលកើតឡើងមានឡើងនៅកម្ពុជាប្រកបដោយភាពត្រឹមត្រូវរួមទាំងការរៀបរាប់ពីបុគ្គល អ្នកថែរក្សាវប្បធម៌ អ្នកដឹកនាំសហគមន៍និងអង្គការមានឥទ្ធិពល។
លោក Sandilya បានកត់សម្គាល់ថា ភាពត្រឹមត្រូវនៃរឿងទាំងនេះត្រូវបានធានាតាមរយៈការសន្ទនាដោយគោរព និងបើកចំហ ដែលអនុញ្ញាតឱ្យអ្នកប្រាប់អំពីសាច់រឿងរបស់ពួកគេសរសេរជាពាក្យពេចន៍ផ្ទាល់ខ្លួន។
លោកបានប្រាប់ភ្នំពេញប៉ុស្តិ៍ថា៖«គោលបំណងរបស់យើងគឺបង្កើតភាពចម្រុះនៃប្រទេសកម្ពុជាដោយផ្តល់នូវការយល់ដឹងអំពីផ្នែកវប្បធម៌ និងប្រវត្តិសាស្ត្រដ៏ល្អឯក»។
លើសពីនេះ ភ្ញៀវទេសចរ និងជនបរទេសដែលចង់ភ្ជាប់ទំនាក់ទំនងជាមួយសហគមន៍មូលដ្ឋាន រួមជាមួយនឹងអ្នកនិយាយសាច់រឿង អ្នកសរសេរដែលស្វែងរកការបំផុសគំនិតក្នុងជីវិតពិតនឹងរកឃើញគេហទំព័រដ៏មានប្រយោជន៍ជាពិសេសនេះ។
លោកSandilya និយាយថា៖ «យើងទទួលបានការគាំទ្រច្រើនលើសលប់ជាមួយការបង្ហាញពីសេចក្តីស្រឡាញ់របស់ពួកគេចំពោះរឿងរ៉ាវដែលយើងចែករំលែក»។ យ៉ាងណាក្ដី ដំណើរការវេបសាយ Humans of Cambodia ក៏ប្រឈមនឹងបញ្ហាមួយចំនួនផងដែរ ជាពិសេសការធ្វើឱ្យមានតុល្យភាពរវាងការនិទានរឿង និងប្រែប្រួលនៃវប្បធម៌។
លោកបានបន្ដថា ក្រុមការងារបានសិក្សាពីសារៈសំខាន់នៃការស្តាប់ ការសម្របខ្លួន និងការរៀនសូត្រជាបន្តបន្ទាប់។ ឧបសគ្គផ្នែកហិរញ្ញវត្ថុ និងពេលវេលាបានបង្កជាឧបសគ្គ តែចំណង់ចំណូលចិត្តរបស់ក្រុមសម្រាប់ការនិទានរឿងជួយពួកគេដោះស្រាយបញ្ហាប្រឈមទាំងនេះ។
លោក Sandilya លើកឡើងថា៖ «យើងយល់ថា ការបង្កើតផ្លេតហ្វមដែលផ្ដល់តម្លៃ និងកិត្តិយសដល់វប្បធម៌របស់ប្រទេសកម្ពុជាចាំបាច់ត្រូវសិក្សាស្រាវជ្រាវជាបន្តបន្ទាប់និងការប្តេជ្ញាចិត្តយ៉ាងមុតមាំក្នុងការរៀនសូត្រពីសហគមន៍ដែលយើងទៅដល់»។
វេបសាយ Humans of Cambodia គ្រោងនឹងពង្រីកវិសាលភាពរបស់ខ្លួន ដោយស្វែងរកប្រធានបទផ្សេងៗទៀត ដូចជា ទស្សនវិស័យអន្តរជំនាន់ និងនិរន្តរភាពបរិស្ថាន។
គម្រោងថ្មី ដូចជា«Humans of Phnom Penh» និង «Humans of Siem Reap» កំពុងដំណើរការ ដោយមានកិច្ចសហការជាមួយក្រុមPhnom Penh Photography Collective ក្នុងគោលបំណងផ្តោតទៅលើការនិទានរឿងក្នុងតំបន់។
លោក Sandilya បាននិយាយថា៖ «ជាផ្នែកមួយនៃការប្តេជ្ញាចិត្តរបស់យើងចំពោះការចូលរួមសហគមន៍ យើងកំពុងស្វែងរកភាពជាដៃគូយ៉ាងសកម្មជាមួយអង្គការក្នុងស្រុកដើម្បីពង្រីករឿងរ៉ាវដែលមានឥទ្ធិពលនិងចែករំលែកការនិទានរឿងដែលបំផុសគំនិត»។
ផ្លេតហ្វមនេះចូលរួមជាមួយសហគមន៍មូលដ្ឋាន និងលើកទឹកចិត្តបុគ្គលម្នាក់ៗឱ្យចែករំលែករឿងរ៉ាវរបស់ពួកគេតាមរយៈបណ្តាញផ្សេងៗរួមទាំងប្រព័ន្ធផ្សព្វផ្សាយសង្គមនិងការបញ្ជូនដោយផ្ទាល់នៅលើគេហទំព័ររបស់ពួកគេ។
នៅក្នុងដំណើរការនិទានរឿងរបស់ពួកគេ ភាពរសើបនៃវប្បធម៌ និងភាពត្រឹមត្រូវនៅតែនាំមុខគេ ដោយធានាបាននូវទិដ្ឋភាពនិទានរឿងប្រកបដោយការគោរព និងបរិយាបន្ន។
លោក Sandilya បានបញ្ជាក់ថា៖ «ភាពប្រែប្រួលនៃវប្បធម៌គឺជាទិដ្ឋភាពមូលដ្ឋាននៃដំណើរការនិទានរឿងរបស់យើង។ យើងសហការយ៉ាងជិតស្និទ្ធជាមួយអ្នកនិទានរឿង ដើម្បីធានាបាននូវការតំណាងដ៏ត្រឹមត្រូវ គោរព និងឱ្យតម្លៃនូវទស្សនៈតែមួយគត់របស់ពួកគេ»។
លោកបានលើកឡើងថាការទទួលមតិកែលម្អជាប្រចាំនិងការប្តេជ្ញាចិត្តបន្តកិច្ចការចំពោះការអប់រំនិងការយល់ដឹងនៅក្នុងក្រុមរបស់ពួកគេ រួមចំណែកដល់ការរក្សាភាពប្រែប្រួលនៃវប្បធម៌និងភាពពិតប្រាកដក្នុងការនិទានរឿង។
Sandilya បានបង្ហាញពីជំនឿលើសក្តានុពលរបស់បុគ្គលគ្រប់រូប ដើម្បីក្លាយជាកត្តាជំរុញឱ្យមានការផ្លាស់ប្តូរជាវិជ្ជមាន ដោយមិនគិតពីពូជសាសន៍ ឬសញ្ជាតិឡើយ។
លោកបានថ្លែងថា ក្នុងការបង្កើតខ្លឹមសារ ពួកគេមានមនសិការចៀសវាងការលម្អៀងផ្នែកនយោបាយក្នុងគោលបំណងបង្កើតព័ត៌មានសម្បូរបែបទៅតាមទីតាំងនីមួយៗ។
ខណៈពេលដែលផ្តោតជាចម្បងលើរឿងដែលរៀបចំនិងបង្ហាញដោយក្រុមរបស់ខ្លួននោះ Humans of Cambodia ក៏ផ្តល់វេទិកាសម្រាប់ការចូលរួមរបស់អ្នកទស្សនាផងដែរ៕
