ទិដ្ឋភាពព្រៃឈើ នៅតំបន់ព្រៃឡង់។ រូបថត ក្រសួងបរិស្ថាន
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានសម្រេចមិនឱ្យមានការពង្រីកអាជីវកម្មរ៉ែ និងការរុករករ៉ែក្នុងតំបន់ដែនជម្រកសត្វព្រៃ ព្រៃឡង់ ទៀតទេ ដោយដាក់តំបន់ព្រៃឡង់ជាតំបន់ក្រហម និងមិនឱ្យមានការចេញអាជ្ញាប័ណ្ណថ្មីក្នុងការរុករកធនធានរ៉ែ និងការពង្រីកផ្ទៃដីបន្ថែមទៀតឡើយ។
ការសម្រេចនេះត្រូវបានប្រកាសឱ្យដឹងតាមរយៈលោក កែវ រតនៈ រដ្ឋមន្ត្រីក្រសួងរ៉ែ និងថាមពល កាលពីថ្ងៃទី ២១ វិច្ឆិកា ឆ្នាំ ២០២៣ នាវេទិកាពិភាក្សាស្តីពី «គោលនយោបាយរ៉ែ និងថាមពលនៅកម្ពុជា» ដែលរៀបចំដោយក្លិបអ្នកកាសែតកម្ពុជា សហការជាមួយក្រសួងរ៉ែ និងថាមពល។ លោក កែវ រតនៈ បានប្រកាសជូនប្រជាពលរដ្ឋ និងអ្នកសារព័ត៌មានឱ្យបានដឹងនាឱកាសនោះថា កាលពីថ្ងៃទី ២ ខែវិច្ឆិកា លោកបានស្នើទៅលោកនាយករដ្ឋមន្ត្រី សុំមិនពង្រីកអាជីវកម្មរ៉ែ និងការរុករករ៉ែនៅក្នុងតំបន់ដែនជម្រកសត្វព្រៃព្រៃឡង់ទៀតនោះទេ។
លោកថ្លែងថា៖ «សម្តេចធិបតីផ្អែកទៅលើសំណើរបស់ក្រសួងចុះថ្ងៃទី ២ ខែវិច្ឆិកា ឆ្នាំ ២០២៣ លោកបានឯកភាពនៅថ្ងៃទី ២ ដដែលនោះដែរ ដែលនេះបញ្ជាក់ពីឆន្ទៈរបស់សម្តេចបវរធិបតី ហ៊ុន ម៉ាណែត ដោយសម្តេចសម្រេចចាត់ទុកតំបន់ព្រៃឡង់ជាតំបន់ក្រហម»។
លោកបន្ថែមថា៖ «សម្តេចបានសម្រេចដោយទី១ មិនចេញអាជ្ញាប័ណ្ណធនធានរ៉ែគ្រប់ប្រភេទបន្ថែមទៀតទេ លើកលែងតែក្រុមហ៊ុនចំនួន ២ ដែលមានគោលការណ៍ពីអាណត្តិមុនមករួចហើយ។ ទី២ ពិនិត្យលទ្ធភាពកាត់បន្ថយផ្ទៃដីដែលសិក្សារួច និងមិនមានសក្តានុពលសម្រាប់ធ្វើអាជីវកម្មធនធានរ៉ែ។ចំណែកទី៣ មិនអនុញ្ញាតឱ្យមានការពង្រីកផ្ទៃដីអាជ្ញាប័ណ្ណបន្ថែមទៀតសម្រាប់អាជ្ញាប័ណ្ណដែលមានស្រាប់»។
ទាំងនេះជាការសម្រេចរបស់លោក ហ៊ុន ម៉ាណែត តាមសំណើរបស់ក្រសួងរ៉ែ និងថាមពលក្នុងរយៈពេល ៩០ ថ្ងៃ ដោយមិនឱ្យមានការរីកបន្ថែមទៀតទេ។ នាវេទិកានោះដែរ រដ្ឋមន្ត្រីក្រសួងរ៉ែ ក៏បានលើកឡើងដែរថា នៅក្នុងតំបន់ព្រៃឡង់មានការសិក្សាច្រើនពីក្រុមហ៊ុនដែលមានអាជ្ញាប័ណ្ណចំនួន ១៣ ដែលមានទាំងក្រុមហ៊ុនខ្មែរ ចិន ជប៉ុន ជាដើមចាប់តាំងពីឆ្នាំ ២០០៨ រហូតមកដល់បច្ចុប្បន្ននេះ។
លោកបានបន្តថា ក្នុងចំណោមអាជ្ញាប័ណ្ណចំនួន ១៣ នោះ មានក្រុមហ៊ុន ៣ នៅខេត្តកំពង់ធំ មានអាជ្ញាប័ណ្ណស្វែងរុករក ហើយនិងអាជ្ញាប័ណ្ណស្វែងរុករកមាសមួយផងដែរ។ ចំណែកនៅខេត្តក្រចេះមានអាជ្ញាប័ណ្ណចំនួន ៧ ដែលជាក្រុមហ៊ុនសិក្សាស្រាវជ្រាវរុករកនៅឡើយទេ និងនៅខេត្តព្រះវិហារមានក្រុមហ៊ុន ២ កំពុងរុករកផងដែរ ហើយនៅខេត្តស្ទឹងត្រែងមានក្រុមហ៊ុន ១ កំពុងរុករក។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា (CYN) បានសាទរចំពោះការសម្រេចរបស់ប្រមុខរាជរដ្ឋាភិបាល និងក្រសួងរ៉ែ និងថាមពលនេះ ដោយលោកថ្លែងថា ក្នុងនាមជាអ្នកធ្វើការងារនៅក្នុងតំបន់ព្រៃឡង់ ១ រូបពិតជាសម្តែងនូវការសប្បាយរីករាយចំពោះការសម្រេចដូចនេះ។
ទន្ទឹមនឹងការសាទរនេះដែរ លោក គឹមហុង ក៏បានស្នើឱ្យមានការត្រួតពិនិត្យ និងតាមដានឱ្យបានម៉ឺងម៉ាត់ ជាពិសេសគោលការណ៍ដែលក្រសួងបានប្រកាសថា មិនមានការពង្រីកបន្ថែមទៀតលើសកម្មភាពក្រុមហ៊ុនរ៉ែទៀត។
លោកថ្លែងថា៖ «ខ្ញុំយល់ថា គួរតែអនុវត្តឱ្យបានម៉ឹងម៉ាត់ និងមិនឱ្យពង្រីកបន្ថែមទៀត ហើយប្រសិនបើរកឃើញមានក្រុមហ៊ុនដែលនៅតំបន់នោះស្រាប់បង្កើននូវយន្តការផ្សេងៗ បង្កើននូវវិធីសាស្ត្រមួយចំនួនដោយមានការលួចលាក់ជាមួយនឹងប្រជាពលរដ្ឋផ្សេងៗនៅជុំវិញតំបន់នោះ ខ្ញុំគិតថា មិនអាចយោគយល់បានទេ ហើយត្រូវតែទទួលខុសត្រូវចំពោះមុខច្បាប់»។
មួយវិញទៀត ក្រសួងរ៉ែ និងថាមពលត្រូវតែសហការជាមួយនឹងឧទ្យានុរក្សទប់ស្កាត់សកម្មភាពរុករករ៉ែខុសច្បាប់ និងការប្រើសារធាតុគីមីនៅក្នុងតំបន់ការពារធនធានធម្មជាតិ ជាពិសេសព្រៃឡង់ ដែលវាពិតជាគ្រោះថ្នាក់ ដល់ជីវចម្រុះ និងធនធានធម្មជាតិ នៅក្នុងតំបន់នោះ។
លោកបញ្ជាក់ថា៖ «មួយទៀត ត្រូវទប់ស្កាត់កុំឱ្យធ្វើសកម្មភាពណាមួយប្រឆាំងនឹងបញ្ញត្តិដែលបានដាក់ចេញឡើងដោយស្ថាប័នពាក់ព័ន្ធហើយក៏ត្រូវឃ្លាំមើល និងតាមដានការធ្វើសវនកម្ម ទៅលើមន្ត្រីធ្វើអធិការកិច្ច របស់មន្ត្រីមូលដ្ឋានថាតើមានពាក់ព័ន្ធនឹងសកម្មភាពនានាដែរទេ ដែលអាចធ្វើឱ្យខូចខាតដល់ ដែនជម្រក សត្វព្រៃ តំបន់ការពារ និងសកម្មភាពរុករករ៉ែដោយខុសច្បាប់នៅក្នុងតំបន់ព្រៃឡង់ជាដើម»៕
