ភ្ញៀវដែលមកកម្សាន្ដក្នុងពិធីប្រណាំងទូកងនៅថ្ងៃទី២៨ វិច្ឆិកា ។ ហុង មិនា
ភ្នំពេញៈ មន្ទីរទេសចរណ៍រាជធានីខេត្តចំនួន ១១ បានឱ្យដឹងថា នៅក្នុងរយៈពេល ៣ ថ្ងៃនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ពោលគឺចាប់ពីថ្ងៃទី ២៦ ដល់ ២៨ ខែវិច្ឆិកាឆ្នាំ២០២៣ បានទទួលភ្ញៀវទេសចរដែលមកកម្សាន្តប្រមាណជាជិត ៦ លាននាក់។
យោងតាមរបាយការណ៍ពីមន្ទីរទេសចរណ៍រាជធានី-ខេត្តទាំងនេះបានបង្ហាញថា ក្នុងរយៈពេល៣ថ្ងៃនេះ រាជធានីភ្នំពេញទទួលបានទេសចរជាតិ និងអន្តរជាតិ ជិត៥លាននាក់,ខេត្តបាត់ដំបងចំនួន ១០០ ៥៤០នាក់, ខេត្តមណ្ឌលគិរីចំនួនប្រមាណ ៣២ ១៧០នាក់,ព្រះវិហារចំនួនប្រមាណ ១២ ៩៥០នាក់,ឧត្តរមានជ័យ ចំនួនប្រមាណ ៧ ១០០នាក់ ,កំពង់ឆ្នាំង ចំនួនប្រមាណ ៥២ ៥០០ នាក់,ពោធិ៍សាត់ចំនួនប្រមាណ ២៩ ៨០០នាក់,ខេត្តសៀមរាប ចំនួនប្រមាណ ៣០៤ ២០០នាក់,កែប ចំនួន ៩២ ៧៦១នាក់,កំពត ចំនួន ៨៤ ២៣៤ នាក់ និងខេត្តព្រះសីហនុ ចំនួន ២៦២ ៤១១នាក់។
ដោយសារតែរាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ បានរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក យ៉ាងមហោឡារិក នៅក្នុងឆ្នាំ២០២៣នេះ ក្រោយពីខកខានអស់រយៈពេល៣ឆ្នាំ បានធ្វើឱ្យរាជធានីភ្នំពេញទទួលបានភ្ញៀវទេសចរច្រើនជាងគេ ខណៈដែលប្រជាពលរដ្ឋនៅតាមបណ្តាខេត្តនានាបានឡើងមកកម្សាន្តនៅក្នុងពិធីបុណ្យអុំទូកនេះ។
យោងតាមគេហទំព័ររដ្ឋបាលរាជធានីភ្នំពេញនៅថ្ងៃទី២៩ ខែវិច្ឆិកា បានបញ្ជាក់ថា ៖«ព្រះរាជពិធីបុណ្យអុំទូក ឆ្នាំ២០២៣នេះ បានបញ្ចប់ទៅប្រកបដោយជោគជ័យ និងសប្បាយរីករាយក្រៃលែង។ ក្នុងនាមរដ្ឋបាលរាជធានីភ្នំពេញ សូមថ្លែងអំណរគុណចំពោះការខិតខំប្រឹងប្រែងរបស់កងកម្លាំងប្រដាប់អាវុធគ្រប់ប្រភេទគ្រប់លំដាប់ថ្នាក់ អាជ្ញាធរដែនដី មន្ត្រីសុខាភិបាលគ្រប់ជំនាញ និងបុគ្គលិកអនាម័យគ្រប់គោលដៅ ដែលបានលះបង់ពេលវេលារបស់ខ្លួន ដើម្បីការពារសន្តិសុខ សុវត្ថិភាព រៀបចំសណ្តាប់ធ្នាប់ ធានាបានបរិស្ថានស្រស់ស្អាត ជូនបងប្អូនប្រជាពលរដ្ឋ និងព្រះរាជពិធីទាំងមូល»។
ដោយឡែកនាខេត្តព្រះសីហនុ លោកតាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឱ្យដឹងដែរថា ក្នុងថ្ងៃសម្រាក នៃព្រះរាជពិធីបុណ្យអុំទូកចាប់ពីថ្ងៃទី២៦ ដល់ទី២៨ ខែវិច្ឆិកា ភ្ញៀវទេសចរចម្រុះជាតិសាសន៍ បានមកទស្សនាលេងកម្សាន្ដយ៉ាងសប្បាយនៅឆ្នេរសមុទ្រ។
លោកបានឱ្យដឹងទៀតថា ក្នុងចំណោមភ្ញៀវទេសចរសរុបចំនួន ២៦២ ៤១១ នាក់ ក្នុងនោះមានភ្ញៀវជាតិ២៥៥ ២៣៣នាក់ និងភ្ញៀវបរទេស ចំនួន ៧ ១៧៨ នាក់ ខណៈដែលមានភ្ញៀវចូលតាមព្រលានយន្តហោះអន្តរជាតិ៦ជើង ស្មើនឹងភ្ញៀវសរុប២៦៦នាក់ផងដែរ។
លោកបន្តថា ចំពោះភ្ញៀវទេសចរ ទៅកម្សាន្តតាមកោះនានា សរុបមានចំនួន ២ ៤៣១នាក់ ក្នុងនោះភ្ញៀវជាតិ ១ ០៦២នាក់ និងភ្ញៀវបរទេស១ ៣៦៩នាក់។ចំណែកភ្ញៀវទៅកម្សាន្តតាមបណ្តាឆ្នេរនិងរមណីយដ្ឋាននានាសរុប ២៥៩ ៧១៤នាក់។
លោកតាំង សុចិត្តគ្រឹស្នា បានបញ្ជាក់ថា ៖«បញ្ហាសន្តិសុខ សុវត្ថិភាព មានភាពល្អប្រសើរ ក្នុងរយៈពេល៣ថ្ងៃនេះ ដោយមានការយកចិត្តដាក់ពីថ្នាក់ដឹកនាំខេត្ត មានលោក គួច ចំរើន ប្រធានគណៈបញ្ជាការឯកភាពខេត្តព្រះសីហនុ សហការជាមួយបញ្ជាការដ្ឋានកងរាជអាវុធហត្ថខេត្ត កម្លាំងស្នងការដ្ឋាននគរបាលខេត្ត ចុះគោលដៅត្រៀម២៤ម៉ោងដើម្បីការពារសន្តិសុខ សុវត្ថិភាព រក្សាសណ្ដាប់ធ្នាប់ និងសង្គ្រោះបន្ទាន់ជូនប្រជាពលរដ្ឋ ភ្ញៀវជាតិ អន្តរជាតិ»។
ចំពោះខេត្តកំពតវិញ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់ថា ភ្ញៀវទេសចរជាតិ អន្តរជាតិបានមកទស្សនាកម្សាន្តក្នុងរយៈពេល៣ថ្ងៃនៃពិធីបុណ្យអុំទូកនេះមានចំនួន ៨៤ ២៣៤នាក់នេះគឺមានការកើនឡើង៥,៣៧ភាគរយ បើធៀបនឹងពិធីបុណ្យអុំទូកឆ្នាំ២០២២។
លោកបញ្ជាក់បន្ថែមថា៖«បើយើងមើលពីសេវាកម្មស្នាក់នៅត្រូវបានភ្ញៀវស្នាក់នៅពេញស្ទើរ ១០០ភាគរយ ហើយពុំមានការដំឡើងថ្លៃសេវាកម្ម គ្រប់ប្រភេទដែរ។ ម្យ៉ាងវិញទៀត ស្ថានភាពទូទៅតាមរមណីយដ្ឋាន សហគមន៍ ទេសចរណ៍គោលដៅទាក់ទាញទេសចរនានាបាន ប្រព្រឹត្តទៅដោយរលូនពុំមានបាតុភាពអ្វីគួរឱ្យកត់សម្គាល់ឡើយ»។
លោកបានបង្ហាញពីការរំពឹងទុកថា នាឱកាសឈប់សម្រាកបុណ្យឆ្លងឆ្នាំសកលនាពេលខាងមុខនេះ ចំនួនភ្ញៀវទេសចរទៅកម្សាន្តនៅខេត្តកំពតនឹងមានកំណើនលើសនេះទៀត។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានឱ្យដឹងថា ជាទូទៅឱ្យតែមានពិធីបុណ្យជាតិធំៗទេសចរជាតិ តែងតែចេញដើរកម្សាន្ត ខណៈដែលភ្ញៀវអន្តរជាតិក៏មានកើនឡើងគួរឱ្យកត់សម្គាល់ផងដែរ ។
លោកបានថ្លែងបែបនេះថា៖«ពិធីបុណ្យអុំទូក ជាពិធីមួយដែលមានការពេញនិយម ក្នុងការដើរលេងកម្សាន្ត ហើយស្របពេលដែលឆ្នាំនេះ រាជធានីភ្នំពេញបានប្រារព្ធការប្រណាំងទូកឡើងវិញទៀត បានរុញចលនាទេសចរចេញដើរកម្សាន្តកាន់តែច្រើន ជាពិសេសនៅភ្នំពេញ។ យើងឃើញមានទេសចរបរទេសមកកម្សាន្តច្រើនដែរក្នុងពេល៣ថ្ងៃនេះ អាចដោយសារតែរដូវ High Season ផងក៏ថាបានទើបភ្ញៀវអន្តរជាតិមានកំណើនបែបនេះ»៕
