អ្នកចូលរួមពិព័រណ៍ទេសចរណ៍ជប៉ុនប្រចាំឆ្នាំលើកទី៥។ រូបថត ហុង រស្មី
ភ្នំពេញ: ពិព័រណ៍ទេសចរណ៍ជប៉ុនប្រចាំឆ្នាំលើកទី៥ ដែលរៀបចំដោយស្ថាប័នទេសចរណ៍ជាតិជប៉ុន (JNTO) បានបើកសម្ពោធនៅថ្ងៃទី៩ ខែធ្នូ ឆ្នាំ២០២៣ នៅផ្សារទំនើប AEON Mall 1 រាជធានីភ្នំពេញ រយៈពេល២ថ្ងៃ ជាព្រឹត្តិការណ៍ដ៏សំខាន់មួយក្នុងការផ្លាស់ប្តូរទេសចរណ៍រវាងកម្ពុជា និងជប៉ុន។
ព្រឹត្តិការណ៍នេះបានបង្ហាញពីការលាយបញ្ចូលគ្នានៃវប្បធម៌ជប៉ុនបុរាណ និងទំនើប ហើយមានគោលបំណងលើកកម្ពស់វិស័យទេសចរណ៍រវាងប្រទេសទាំង២។
យោងតាម JNTO ភ្ញៀវទេសចរកម្ពុជាដែលទៅទស្សនាប្រទេសជប៉ុន មានចំនួន ១៧ ៧០៥នាក់ នៅចន្លោះខែមករា ដល់ខែសីហា ឆ្នាំ២០២៣។
ដោយសង្កត់ធ្ងន់លើគោលដៅរបស់ប្រទេសជប៉ុនក្នុងការទាក់ទាញភ្ញៀវទេសចរបរទេសចំនួន៦០លាននាក់ជារៀងរាល់ឆ្នាំនៅឆ្នាំ២០៣០ ឯកអគ្គរដ្ឋទូតជប៉ុនប្រចាំព្រះរាជាណាចក្រកម្ពុជា លោក អ៊ូអិណុ អាត់ស៊ូស៊ី បានថ្លែងអំពីភាពធន់នៃវិស័យទេសចរណ៍របស់ប្រទេសជប៉ុនក្រោយការរីករាលដាលនៃមេរោគកូវីដ១៩ ជាមួយនឹងចំនួនភ្ញៀវបរទេសបានកើនលើសពីកម្រិតមុនការរាតត្បាត។
លោក អាត់ស៊ូស៊ី ឱ្យដឹងថា៖ «ថ្មីៗនេះ ចំនួនភ្ញៀវទេសចរទៅកាន់ប្រទេសជប៉ុន មកពីបណ្តាប្រទេសអាស៊ីអាគ្នេយ៍ រួមទាំងកម្ពុជាមានការកើនឡើង ហើយខ្ញុំពិតជារីករាយណាស់ដែលបានដឹងបន្ទាប់ពីការមកដល់របស់ខ្ញុំក្នុងខែមករាឆ្នាំនេះថា មានប្រជាជនកម្ពុជាជាច្រើនដែលបានទៅប្រទេសជប៉ុនជាច្រើនដង និងស្គាល់ប្រទេសជប៉ុនយ៉ាងច្បាស់»។
ការគូសបញ្ជាក់យ៉ាងសំខាន់នៃពិព័រណ៍នេះគឺការណែនាំជាភាសាខ្មែរនៃមគ្គុទ្ទេសក៍ទេសចរណ៍ផ្លូវការរបស់ប្រទេសជប៉ុនក្នុងគោលបំណងផ្តល់ជូនប្រជាជនកម្ពុជានូវបទពិសោធន៍ដែលសមស្របទៅនឹងភាពទាក់ទាញរបស់ប្រទេសជប៉ុន។
ពិព័រណ៍នេះក៏បានណែនាំពីបទពិសោធន៍ដំណើរកម្សាន្ដ ដែលភ្ញៀវទេសចរអាចចូលរួមក្នុងល្បែងប្រពៃណីជប៉ុន និងសាកល្បងយូកាតា ដោយផ្តល់ជូននូវផ្នែកខ្លះនៃវប្បធម៌ជប៉ុននៅក្នុងប្រទេសកម្ពុជា។
លោក អាត់ស៊ូស៊ី បាននិយាយថា ប្រសិនបើនរណាម្នាក់ចាប់អារម្មណ៍នឹងបទពិសោធន៍ផ្នែកមួយនៃវប្បធម៌ជប៉ុនបន្ថែមទៀត ពួកគេគួរតែពិចារណាធ្វើដំណើរទៅកាន់ប្រទេសជប៉ុន។
លោកក៏បានសម្តែងក្តីសង្ឃឹមថា ពិព័រណ៍ទេសចរណ៍ជប៉ុននឹងដើរតួនាទីជាកត្តាជំរុញឱ្យមនុស្សកាន់តែច្រើនចាប់អារម្មណ៍លើប្រទេសជប៉ុន និងពិចារណាឱ្យបានហ្មត់ចត់អំពីការធ្វើដំណើរទៅកាន់ប្រទេសនេះ។
អ្នកស្រី ឧយ ខេ ជានាយកស្ថាប័នទេសចរណ៍ជាតិជប៉ុន (JNTO) ប្រចាំទីក្រុងបាំងកក បានសម្ដែងនូវសេចក្តីសោមនស្សរីករាយ ក្នុងការរៀបចំពិព័រណ៍ទេសចរណ៍បែបនេះជាបន្តបន្ទាប់នៅរាជធានីភ្នំពេញ។
អ្នកស្រី បានឱ្យដឹងថា៖ «កម្ពុជាសម្រេចបាននូវកំណើនសេដ្ឋកិច្ចយ៉ាងឆាប់រហ័សក្នុងប៉ុន្មានឆ្នាំថ្មីៗ។ នេះៗមានការទាក់ទាញការចាប់អារម្មណ៍កាន់តែខ្លាំងអំពីកម្ពុជាពីភាគីដែលពាក់ព័ន្ធនឹងវិស័យទេសចរណ៍ជប៉ុន ហើយលើកនេះរដ្ឋបាលក្នុងតំបន់ដែលមានតំបន់ទេសចរណ៏សំខាន់ៗ ក៏ដូចជាភាគីពាក់ព័ន្ធនឹងវិស័យទេសចរណ៍ជ ប៉ុនក៏បានចូលរួមបង្ហាញក្នុងពិព័រណ៍នេះផងដែរ»។
លោក គុជ បញ្ញាសា រដ្ឋលេខាធិការក្រសួងទេសចរណ៍ បានសង្កត់ធ្ងន់លើសារៈសំខាន់នៃពិព័រណ៍ទេសចរណ៍ជប៉ុននេះ ជាការប្រារឰខួបទំនាក់ទំនងការទូតកម្ពុជា-ជប៉ុន ៧០ឆ្នាំ។
លោកបានបន្ដថា៖ «ខ្ញុំសូមថ្លែងអំណរគុណដល់មជ្ឈមណ្ឌលអាស៊ានជប៉ុន (AJC) ដែលបានជួយដល់វិស័យទេសចរណ៍កម្ពុជាតាមរយៈការអភិវឌ្ឍធនធានមនុស្ស និងផ្សព្វផ្សាយទេសចរណ៍កម្ពុជាទៅកាន់ទីផ្សារជប៉ុន»។
លោកបានបន្ថែមថា ក្រៅពីនេះ កិច្ចសហប្រតិបត្ដិការទ្វេភាគី ការផ្លាស់ប្ដូរមិត្ដភាពអាចត្រូវបានពង្រឹងតាមរយៈកិច្ចសហប្រតិបត្ដិការពហុភាគី ក្រសួងទេសចរណ៍កម្ពុជា បានបោះឆ្នោតគាំទ្រជប៉ុនជាសមាជិកក្រុមប្រឹក្សាប្រតិបត្ដិសម្រាប់អង្គការទេសចរណ៍ពិភពលោក (UNWTO) អាណត្ដិឆ្នាំ ២០២៣-២០២៧។
យោងតាមលោក បញ្ញាសា បានឱ្យដឹងថា ក្នុងឆ្នាំ២០១៩ កម្ពុជាបានស្វាគមន៍ភ្ញៀវទេសចរអន្តរជាតិចំនួន ៦,៦ លាននាក់ ដែលរួមចំណែកជាង ១២ ភាគរយ ដល់ GDP ជាតិ និងបង្កើតការងារផ្ទាល់ចំនួន ៦៣ ម៉ឺននាក់។
នៅឆ្នាំ២០២២ កម្ពុជាទទួលបានកំណើនទេសចរយ៉ាងច្រើន ដោយបានស្វាគមន៍ភ្ញៀវអន្តរជាតិចំនួន ២,២៨ លាននាក់ កើនឡើង ១០៥៩ ភាគរយ។
លោក បញ្ញាសា បានបន្ដថា៖ «ទេសចរជប៉ុនមានចំនួន ២៩៧៣៣ នាក់ ពោលគឺកើនឡើងគួរឱ្យកត់សម្គាល់ ១៣៧៨,៥ ភាគរយ។ ក្នុងរយៈពេលដប់ខែដំបូងនៃឆ្នាំ២០២៣ និន្នាការវិជ្ជមានបានបន្តដោយមានភ្ញៀវទេសចរអន្តរជាតិចំនួន ៤,៤ លាននាក់ កើនឡើងគួរឱ្យកត់សម្គាល់ ១៧៩,៧ ភាគរយ»។
លោកបានថ្លែងថា៖ «ក្នុងអំឡុងពេលនេះ ភ្ញៀវទេសចរជប៉ុនចំនួន ៦៦ ម៉ឺននាក់បានមកទស្សនា ដែលបង្ហាញពីការកើនឡើងគួរឱ្យកត់សម្គាល់ ២៣៥ ភាគរយ។ កំណើននេះត្រូវបានគេសន្មតថាជាអាទិភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃវិស័យទេសចរណ៍ដែលជាកត្តាជំរុញដ៏សំខាន់នៃកំណើនសេដ្ឋកិច្ចក្នុងស្រុក»។
លទ្ធភាពទទួលបានភ្ញៀវទេសចរជប៉ុន ពឹងផ្អែកលើផែនការយុទ្ធសាស្ត្ររបស់រាជរដ្ឋាភិបាលកម្ពុជា រួមទាំងគោលនយោបាយ ដូចជា បើកចំហជើងមេឃ និងការសម្រួលការធ្វើដំណើរ ជាពិសេសជាមួយប្រទេសជប៉ុន។
វិធានការទាំងនេះ ដូចជា Visa on Arrival, E-Visa និងជម្រើសទិដ្ឋាការច្រើនដែលមានរយៈពេល១២ និង៣ឆ្នាំ (អនុវត្តតាំងពីឆ្នាំ២០១៣) រួមចំណែកដល់ការជំរុញទេសចរណ៍៕
