ក្រុមកីឡាករចំបាប់កម្ពុជាក្រោយការប្រកួតចប់កាលពីថ្ងៃទី៩ ធ្នូ ។ សហការី
ភ្នំពេញៈ ក្រុមកីឡាករ កីឡាការិនីចំបាប់កម្ពុជាបានរួមគ្នាដណ្តើមបានមេដាយយ៉ាងច្រើនរហូតដល់៤៨ពីការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ ឆ្នាំ២០២៣ (Southeast Asia Wrestling Championship 2023) ក្នុងនាមជាម្ចាស់ផ្ទះ ចំណែកបច្ចេកទេសរៀបចំរបស់កម្ពុជាមានភាពយុត្តិធម៌ និងរលូនល្អ ដោយទទួលបានការសរសើរខ្លាំងពីអន្តរជាតិ ហើយប្រទេសចូលរួមភាគច្រើនហើយបានស្នើសុំឱ្យកម្ពុជាធ្វើម្ចាស់ផ្ទះការប្រកួតជើងឯកអាស៊ាននេះ ម្តងទៀត នៅឆ្នាំ២០២៤។
ការប្រកួតនេះ មានប្រតិភូកីឡាចំបាប់ចំនួន៧ប្រទេសចូលរួម ដោយមានអត្តពលិកសរុប២៧៥នាក់ ហើយតាមរយៈការប្រកួតនៅសាលដំបូលទូកនៃពហុកីឡដ្ឋានជាតិអូឡាំពិកតាំងពីថ្ងៃទី៦ និងបានបញ្ចប់ កាលពីថ្ងៃទី៩ ខែធ្នូ ក្រុមចំបាប់កម្ពុជាបានឈ្នះមេដាយមាស៤ ប្រាក់២៧ និងមេដាយសំរឹទ្ធចំនួន១៧ សរុប៤៨ គឺមានការកើនឡើងជាង២ដង បើធៀបទៅនឹងការប្រកួតកីឡាចំបាប់ជើងឯកអាស៊ីអាគ្នេយ៍ ឆ្នាំ២០២២ ដោយកាលនោះ ក្រុមចំបាប់កម្ពុជា ឈ្នះបានមេដាយសរុប១៩ គឺមេដាយមាស៣ ប្រាក់៣ និងសំរឹទ្ធ១៣ ក្នុងនាមជាម្ចាស់ផ្ទះដូចគ្នា។
នៅក្នុងចំណោមមេដាយសរុបទាំង៤៨នេះ ក្រុមចំបាប់កម្ពុជា ដណ្តើមបានមេដាយមាស៣ ប្រាក់១៧ និងសំរឹទ្ធ៨ ពីការប្រកួតចំបាប់ជំនាញខ្ពស់ (Seniors) ហើយមេដាយមាសទាំង៣នេះ គឺម្ចាស់មេដាយមាសស៊ីហ្គេម ស៊ូបាលី ដណ្តើមបាន២តែម្នាក់ឯង ទាំងការប្រកួតចំបាប់ក្រិចកូរ៉ូម៉ាងទម្ងន់១៣០គីឡូក្រាម និងចំបាប់សេរី ទម្ងន់១២៥គីឡូក្រាម រីឯមេដាយមាស១ទៀតរកបានដោយកីឡាករ ម៉ូ សារី លើការប្រកួតចំបាប់សេរីទម្ងន់៩៧គីឡូក្រាម។
ចំណែកការប្រកួតចំបាប់អាយុក្រោម១៧ឆ្នាំវិញ ក្រុមអត្តពលិកកម្ពុជា ឈ្នះបានមេដាយមាស១ ប្រាក់៦ និងសំរឹទ្ធ៧ ដោយមេដាយមាស១នេះ ដណ្តើមបានដោយកីឡាករ អេង រតនៈ លើការប្រកួតចំបាប់សេរី ទម្ងន់៥១គីឡូក្រាម។ រីឯការប្រកួតចំបាប់លើប្រភេទអាយុក្រោម២០ឆ្នាំ គឺក្រុមចំបាប់កម្ពុជា ឈ្នះបានមេដាយប្រាក់៤ និងសំរឹទ្ធ២។
សម្រាប់ការឈ្នះបានមេដាយសរុបចំនួន៤៨នេះបានជួយឱ្យកម្ពុជាឈរនៅចំណាត់ថ្នាក់លេខ២ក្រោមវៀតណាម ដែលឈ្នះបានមេដាយមាស៦៩ ប្រាក់១៤ និងសំរឹទ្ធ១ រីឯថៃ ឈរនៅលេខ៣ ដោយបានមាស៣ ប្រាក់៩ សំរឹទ្ធ៦ លើហ្វីលីពីន ដែលបានមាស១ ប្រាក់១៤ សំរឹទ្ធ១០ ហើយសិង្ហបុរី ឈរនៅលេខ៥ ដោយឈ្នះបានមេដាយមាស១ ប្រាក់៧ សំរឹទ្ធ៥ ខណៈឥណ្ឌូនេស៊ី បានមេដាយប្រាក់៥ សំរឹទ្ធ១១ និងឡាវ បានប្រាក់១ និងសំរឹទ្ធ១។
ជាមួយជោគជ័យនេះ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងជាប្រធានសហព័ន្ធកីឡាចំបាប់អាស៊ីអាគ្នេយ៍ បានថ្លែងក្រោយពិធីបិទការប្រកួតកាលពីថ្ងៃទី៩ ខែធ្នូថា កីឡាករ កីឡាការិនីចំបាប់កម្ពុជា ពេលនេះ មានសមត្ថភាពនិងគុណភាពកើនឡើង ព្រោះអត្តពលិកមួយចំនួនដែលធ្លាប់ដណ្តើមបានត្រឹមមេដាយសំរឹទ្ធ ពីការប្រកួតជើងឯកអាស៊ាន កាលពីឆ្នាំ២០២២ និងប្រកួតស៊ីហ្គេម លើកទី៣២ ឆ្នាំ២០២៣ គឺពេលនេះ ពួកគេអាចមានលទ្ធភាពដណ្តើមបានមេដាយប្រាក់ ពីការប្រកួតជើងឯកអាស៊ាននេះ។
លោកបានបញ្ជាក់ថា៖ «ការឈ្នះបានមេដាយសរុបចំនួន៤៨នេះ វាបានបំបែកឯតទគ្គកម្ម សម្រាប់ការឈ្នះបានមេដាយសរុបចំនួន១៩ ពីការប្រកួតជើងឯកអាស៊ាន កាលពីឆ្នាំ២០២២ គឺមានន័យថា គុណភាព និងសមត្ថភាពរបស់អត្តពលិកយើង មានការកើនឡើងច្រើន ដោយសារតែក្រុមចំបាប់កម្ពុជា បានប្រឹងប្រែងហ្វឹកហាត់ខ្លាំងទាំងនៅក្នុងស្រុក និងនៅប្រទេសចិន គឺពួកគាត់ មិនបានឈប់នោះទេ ចាប់តាំងពីការប្រកួតស៊ីហ្គេម ឆ្នាំ២០២៣ បានបញ្ចប់»។
ការខិតខំហ្វឹកហាត់មិនឈប់ឈររបស់ក្រុមអត្តពលិកចំបាប់កម្ពុជានេះ ត្រូវបានលោក ខេស៊ី បាណេត ទម្លាយថា វាជាគោលដៅរបស់សហព័ន្ធកីឡាចំបាប់កម្ពុជា ក្នុងការបន្តសម្រួចគុណភាពរបស់ក្រុមជម្រើសជាតិ ដើម្បីត្រៀមឆ្ពោះទៅប្រជែងមេដាយជូនជាតិក្នុងការស៊ីហ្គេម លើកទី៣៣ ឆ្នាំ២០២៥ នៅប្រទេសថៃ ហើយក៏ដើម្បីពង្រឹងសមត្ថភាពក្រុមយុវជន សម្រាប់ឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៥ ឆ្នាំ២០២៩ ផងដែរ។
ជាមួយគ្នានេះ សហព័ន្ធកីឡាចំបាប់កម្ពុជា បានទទួលការសរសើរពីអន្តរជាតិ សម្រាប់ការរៀបចំការប្រកួត Southeast Asia Wrestling Championship ជាលើកទី២នេះ។ លោក ខេស៊ី បានបញ្ជាក់ថា៖ «ការរៀបចំបានដោយរលូន និងស្របតាមស្តង់ដាអន្តរជាតិ លើកនេះ គឺយើងទទួលបានការសរសើរពីតំណាងសហព័ន្ធកីឡាចំបាប់អន្តរជាតិ និងមានការកោតសរសើរពីមេអាជ្ញាកណ្តាលសម្រាប់ការប្រកួតនេះ គឺជាអាជ្ញាកណ្តាលអូឡាំពិកអន្តរជាតិ ហើយពួកគាត់គ្រប់គ្នាបានស្នើសុំឱ្យកម្ពុជារៀបចំការប្រកួតកីឡាចំបាប់ជើងឯកអាស៊ាននេះ ម្តងទៀត នៅឆ្នាំ២០២៤»។
យ៉ាងណាក៏ដោយ ចំពោះសំណើនេះ លោក ខេស៊ី បាណេត បានថ្លែងថា៖ «យើងមិនទាន់សម្រេចថា យ៉ាងណានោះទេ ព្រោះជាធម្មតា នៅតំបន់អាស៊ាន យើងតែងតែផ្តល់ឱកាសដល់ប្រទេសជាម្ចាស់ផ្ទះស៊ីហ្គេមនីមួយៗ ជាអ្នករៀបចំ អ៊ីចឹងថៃ ដែលជាម្ចាស់ផ្ទះស៊ីហ្គេម ឆ្នាំ២០២៥ ជាជម្រើសទី១ ក្នុងការទទួលបានសិទ្ធិនេះ តែបើសិនប្រទេសថៃ មិនទទួលរៀបចំការប្រកួតជើងឯកអាស៊ាន នៅឆ្នាំ២០២៤ទេ គឺកម្ពុជានឹងបន្តរៀបចំម្តងទៀត ដែលមានរយៈពេល៣ឆ្នាំជាប់ៗគ្នាតែម្តង»៕
