លោកហង់ ជួនណារ៉ុន (កណ្ដាល)និងដៃគូអភិវឌ្ឍន៍នៅថ្ងៃទី១០ ធ្នូ ។ រូបថត ក្រសួងអប់រំ
ភ្នំពេញៈ ក្រសួងអប់រំយុវជន និងកីឡា និងភាគីពាក់ព័ន្ធកាលពីចុងសប្តាហ៍មុនបានប្រកាសដាក់ឱ្យអនុវត្តជាផ្លូវការនូវផែនការសកម្មភាពគោលនយោបាយស្តីពីគ្រូបង្រៀនឆ្នាំ ២០២៤-២០៣០ ដែលនឹងជួយអភិវឌ្ឍសមត្ថភាពគ្រូបង្រៀននៅកម្ពុជាដើម្បីពង្រឹងគុណភាពអប់រំឱ្យកាន់តែរីកចម្រើនបន្ថែមទៀត។
យោងតាមហ្វេសប៊ុករបស់ក្រសួងអប់រំកាលពីថ្ងៃទី១០ ខែធ្នូ ឆ្នាំ២០២៣ បានឱ្យដឹងថា ពិធីប្រកាសដាក់ឱ្យអនុវត្តផែនការសកម្មភាពគោលនយោបាយស្តីពីគ្រូបង្រៀនឆ្នាំ២០២៤-២០៣០បានធ្វើឡើងក្រោមវត្តមានលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា,លោកAnirbanChatterjeeនាយករងប្រចាំប្រទេសនៃអង្គការ UNICEF ប្រចាំកម្ពុជា, មន្ត្រីពាក់ព័ន្ធ និងតំណាងដៃគូអភិវឌ្ឍន៍ជាច្រើនរូបទៀត។
នាឱកាសនោះលោកហង់ជួន ណារ៉ុន បានលើកឡើងថា៖«សូមកោតសរសើរដល់ដៃគូពាក់ព័ន្ធនិងអង្គការយូនីសេហ្វ ដែលបានសហការ និងផ្តល់ការឧបត្ថម្ភគាំទ្រ ទាំងសម្ភារ ថវិកា និងបច្ចេកទេសក្នុងការជួយរៀបចំផែនការសកម្មភាពនិងការចូលរួមអនុវត្តផែនការសកម្មភាពគោលនយោបាយស្តីពីគ្រូបង្រៀនជាច្រើនឆ្នាំមកនេះនិងសម្រេចបានលទ្ធផលជាច្រើន»។
លោករដ្ឋមន្ត្រីបានឱ្យដឹងដែរថាសម្រាប់ផែនការសកម្មភាពគោលនយោបាយស្តីពីគ្រូបង្រៀននៅក្នុងដំណាក់កាលពីឆ្នាំ២០២៣ដល់ឆ្នាំ២០២៨ ក្រសួងនឹងបន្តការយកចិត្តទុកដាក់លើគ្រូបង្រៀនដោយចាត់ទុកថាគ្រូបង្រៀននៅកម្ពុជានឹងត្រូវទទួលបានការជឿទុកចិត្តនិងការទទួលស្គាល់ថាជា«អ្នកផលិតចំណេះដឹង អ្នកអនុវត្តន៍ពិតប្រាកដនៅកម្រិតសាលារៀន និងជាដៃគូសម្រាប់កែលម្អគោលនយោបាយ»។
ជុំវិញរឿងនេះ លោក គង់ សំនៀង ប្រធានសហព័ន្ធសេវាអប់រំនៅកម្ពុជានៅថ្ងៃទី១១ ខែធ្នូ បានសារទរចំពោះការដាក់ឱ្យអនុវត្តផែនការសកម្មភាពគោលនយោបាយនានាដើម្បីអភិវឌ្ឍគ្រូបង្រៀននៅកម្ពុជា ដោយលោកនិយាយថា វិស័យអប់រំឯកជន នៅតែត្រូវការគ្រូបង្រៀនពីសាលារដ្ឋ ដើម្បីមកបង្រៀន និងចែករំលែកវិធីសាស្ត្របន្ថែម។
ជាមួយគ្នានេះ លោកក៏រំពឹងដែរថា តាមរយៈការដាក់ឱ្យអនុវត្តផែនការសកម្មភាពគោលនយោបាយនេះ នឹងធ្វើឱ្យការបណ្តុះបណ្តាលគ្រូនៅកម្ពុជា កាន់តែមានគុណភាពប្រសើរឡើង។
លោក គង់ សំនៀង បានបញ្ជាក់ថា៖«ជាការពិតដើម្បីឱ្យគុណភាពបង្រៀនបានល្អប្រសើរគឺទាមទារឱ្យមានការកែលម្អនៅវិធីសាស្ត្របណ្តុះបណ្តាលល្អៗនិងថ្មីៗដើម្បីដើរទាន់សម័យកាលបច្ចុប្បន្នខណៈខ្ញុំក៏សូមឱ្យយកចិត្តទុកដាក់លើកម្រិតជីវភាពគ្រូបង្រៀនបន្ថែមទៀតដើម្បីជាកាតាលីករជំរុញវិស័យអប់រំរបស់យើងកាន់តែប្រសើរ»។
យ៉ាងណាក្ដី លោកគង់ សំនៀង បានអំពាវនាវឱ្យក្រសួងអប់រំរាប់បញ្ចូលគ្រូមកពីវិស័យឯកជននិងសាលារៀនឯកជនដើម្បីឱ្យមានលទ្ធភាពទទួលបានការបណ្តុះបណ្តាលជំនាញឬវិធីសាស្ត្រថ្មីៗដូចគ្រូមកពីសាលារដ្ឋដែរ។
បើតាមក្រសួងអប់រំ យុវជន និងកីឡា ផែនការសកម្មភាពគោលនយោបាយ ស្តីពីគ្រូបង្រៀនសម្រាប់ឆ្នាំ២០២៤-២០៣០គឺជាឯកសារដ៏សំខាន់មួយសម្រាប់ចូលរួមអនុវត្តយុទ្ធសាស្ត្របញ្ចកោណដំណាក់កាលទី១។រាជរដ្ឋាភិបាលកម្ពុជាបានចាត់ទុកវិស័យអប់រំជាវិស័យអាទិភាពទី១ឆ្ពោះទៅអភិវឌ្ឍមូលធនមនុស្សឱ្យមានចំណេះដឹងនិងសមត្ថភាពខ្ពស់ ភាពច្នៃប្រឌិត ស្មារតីសហគ្រិនភាព នវានុវត្តន៍ និងក្រមសីលធម៌ខ្ពស់ក្នុងការរួមចំណែកដល់ការអភិវឌ្ឍសង្គម និងកំណើនសេដ្ឋកិច្ចប្រកបដោយចីរភាព និងបរិយាបន្ន។
ក្រសួងបន្តថា ដើម្បីសម្រេចបានគោលដៅនិងផែនការសកម្មភាពគោលនយោបាយនេះក្រសួងនឹងបន្តធ្វើកំណែទម្រង់គ្រឹះស្ថានបណ្តុះបណ្តាលគ្រូដោយផ្ដោតលើចំណុចសំខាន់ៗដូចជាការកែលម្អកម្មវិធីបណ្តុះបណ្តាល និងវិក្រឹតការគ្រូ,ការអភិវឌ្ឍសមត្ថភាពវិជ្ជាជីវៈគ្រូឧទ្ទេសខាងផ្នែកខ្លឹមសារមេរៀន,ការអភិវឌ្ឍហេដ្ឋារចនាសម្ព័ន្ធស្របតាមបច្ចេកវិទ្យាថ្មីៗ បណ្ណាល័យនិងសម្ភារឧបទេសទំនើបសម្បូរបែបនិងការធានាគុណភាពនៃការបណ្តុះបណ្តាលជាដើម៕
