ពិធីបិទបញ្ចប់គម្រោងស្តីពីទីផ្សារការងារនៅថ្ងៃទី១១ ធ្នូ ។ រូបថត ក្រសួងការងារ
ភ្នំពេញៈនៅក្នុងពិធីបិទបញ្ចប់គម្រោងស្តីពីទីផ្សារការងារប្រកបដោយបរិយាបន្នគាំទ្រដល់អ្នកស្វែងរកការងារធ្វើដែលមានពិការភាពនៅថ្ងៃទី១១ ខែធ្នូ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា ក្រសួងនឹងធ្វើការជាមួយដៃគូពាក់ព័ន្ធដើម្បីជំរុញឱ្យរោងចក្រសហគ្រាសទទួលយកជនមានពិការភាពឱ្យបាន៣ភាគរយចូលក្នុងប្រតិបត្តិការ។
យោងតាមការផ្សព្វផ្សាយរបស់ក្រសួងការងារបានឱ្យដឹងថា ការជំរុញរបស់លោក ហេង សួរ គឺស្របពេលដែលចំនួនចូលធ្វើការរបស់ជនមានពិការភាពទូទាំងប្រទេសនៅមានកម្រិតនៅឡើយ។
លោកបានថ្លែងថា៖«ក្រសួងការងារនឹងបន្តធ្វើការជាមួយរោងចក្រសហគ្រាសបន្តទៀតដើម្បីបង្កលក្ខណៈបត់បែនសម្រាប់ជនមានពិការភាពអាចចូលធ្វើការបន្ថែមទៀតទៅតាមជំនាញផ្សេងទៀតដូចជាអ្នកទទួលនិងលើកទូរស័ព្ទ និងកិច្ចការងារមិនប្រើប្រាស់កម្លាំងផ្សេងៗទៀតដើម្បីអាចឱ្យបងប្អូនជនជនពិការទាំងអស់អាចទទួលបានការងារសមរម្យ និងមានជីវភាពកាន់តែប្រសើរ»។
តាមរយៈក្រសួងនេះលោករដ្ឋមន្ត្រីក៏បានជំរុញឱ្យជនមានពិការភាពអាចសម្លឹងមើលជំនាញវិជ្ជាជីវៈដែលរាជរដ្ឋាភិបាលបានប្រកាសផ្តល់ជូនអ្នកដែលមកពីគ្រួសារក្រីក្រនិងងាយរងហានិភ័យស្របតាមលទ្ធភាពក្នុងការពង្រឹងសមត្ថភាពចំណេះជំនាញរបស់ខ្លួន។
ទោះជាយ៉ាងណាក៏ដោយ លោក ហេង សួរ បានលើកទឹកចិត្តដល់ជនមានពិការភាពទាំងអស់មិនត្រូវអស់សង្ឃឹមហើយត្រូវតស៊ូជម្នះរាល់ការលំបាកនានាដើម្បីចូលរួមជាមួយរាជរដ្ឋាភិបាលក្នុងការកសាងសង្គមជាតិដែលមិនមែនជាបន្ទុកសង្គមនោះឡើយ។
ដោយឡែកនៅថ្ងៃដដែលនោះដែរ លោក ឯម ច័ន្ទមករា រដ្ឋលេខាធិការនិងជាអគ្គលេខាធិការក្រុមប្រឹក្សាសកម្មភាពជនពិការក៏បានជំរុញឱ្យមានការផលិត និងការបោះពុម្ពឯកសារឬព័ត៌មានជាទម្រង់ងាយស្រួលអានសម្រាប់ជនមានពិការភាពផងដែរ។
ការជំរុញនេះ បានធ្វើឡើងក្នុងពិធីបើកសិក្ខាសាលាផ្ទៀងផ្ទាត់លទ្ធផលស្រាវជ្រាវ «ការវាយតម្លៃតម្រូវការព័ត៌មានសម្រាប់ជនមានពិការភាពនៅកម្ពុជា»។
យោងតាមគេហទំព័ររបស់ក្រសួងសង្គមកិច្ច អតីតយុទ្ធជន និងយុវនីតិសម្បទាបានឱ្យដឹងថា នៅក្នុងឱកាសនោះ លោក ឯម ច័ន្ទមករា បានជំរុញឱ្យមានការពង្រីកស្ថានីយផ្សាយនិងតំបន់គ្របដណ្តប់នៃប្រព័ន្ធផ្សព្វផ្សាយដែលធ្វើប្រតិបត្តិការដោយជនមានពិការភាព។
លោកបានថ្លែងថា ៖ «ការទទួលបានព័ត៌មានគ្រប់គ្រាន់គឺជាការបង្កើតនូវកាលានុវត្តភាពថ្មីៗអាចជួយឱ្យគុណភាពជីវិតជនមានពិការភាពកាន់តែប្រសើរឡើង ខណៈការទទួលបាននូវព័ត៌មានទាក់ទងនឹងសេដ្ឋកិច្ច ការអប់រំ និងបណ្តុះបណ្តាលសេវាសុខភាព សេវាសាធារណៈផ្សេងទៀត ដោយលើកទឹកចិត្តដល់ជនមានពិការភាពគ្រប់រូបខិតខំស្រាវជ្រាវរកព័ត៌មានថ្មីៗតាមថ្នាលសារព័ត៌មាននានាដោយប្រើប្រាប់កម្មវិធីដែលមានផាសុកវត្ថុដើម្បីទទួលបានព័ត៌មានដោយជនពិការខ្លួនឯង»។
ក្នុងឱកាសនោះ លោកក៏បានស្នើដល់អង្គភាពពាក់ព័ន្ធបង្កើនការប្រើប្រាស់ភាសាសញ្ញា អក្សររត់ អក្សរប្រៃយ៍(អក្សរស្ទាប)អក្សរពុម្ពធំ សំឡេងឱ្យបានទូលំទូលាយដើម្បីផ្តល់ឱកាសទំនាក់ទំនង ការបញ្ចេញមតិយោបល់ និងទទួលបានព័ត៌មានសម្រាប់ជនមានពិការភាពគ្រប់ប្រភេទ៕
