លោក ហេង សួរ ចុះពិនិត្យមជ្ឈមណ្ឌលបណ្តុះបណ្តាលវិជ្ជាជីវៈ និងមុខរបររបស់អង្គការមិត្តសំឡាញ់ កាលពីថ្ងៃទី ៧ ខែធ្នូ ឆ្នាំ ២០២៣។ រូបថត ក្រសួងការងារ
ភ្នំពេញៈ លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈឱ្យដឹងថា គិតត្រឹមថ្ងៃទី ១០ ខែធ្នូ មានយុវជន និងយុវនារីជាង ១ ម៉ឺននាក់បានចុះឈ្មោះចូលរៀនវគ្គបណ្តុះបណ្តាលជំនាញវិជ្ជាជីវៈ និងបច្ចេកទេស។
លោក កត្តា អ៊ន បានថ្លែងនៅថ្ងៃទី ១១ ខែធ្នូថា អ្នកចុះឈ្មោះដែលមកពីគ្រួសារក្រីក្រ និងគ្រួសារងាយរងហានិភ័យសរុបមានចំនួន ១១ ៦១០ នាក់ ក្នុងនោះមានស្រីចំនួន ៤ ០០១ នាក់ ដែលមកពីរាជធានីភ្នំពេញ ៥ ១១៤ នាក់ (ស្រី ១ ៦៥៧ នាក់), ខេត្តបាត់ដំបង ១ ២០៣ នាក់ (ស្រី ៥៦៧ នាក់), សៀមរាប ៧៣៦ នាក់ (ស្រី ១៥៥ នាក់), ពោធិ៍សាត់ ៤១៥ នាក់ (ស្រី ២០៨ នាក់), ព្រះសីហនុ ៤១១ នាក់ (ស្រី ១៣៥ នាក់) និងបណ្ដាខេត្តផ្សេងៗចំនួន ៣ ៧៣១ នាក់ (ស្រី ១ ២៧៩ នាក់)។
លោក កត្តា អ៊ន បញ្ជាក់ថា៖ «យើងឃើញថា កម្រិតនៃការចាប់អារម្មណ៍របស់យុវជនទូទាំងប្រទេស និងការចុះឈ្មោះចូលរៀនពីសំណាក់យុវជនរបស់យើង មានចំនួនកើនឡើងជារៀងរាល់ថ្ងៃ ដែលនេះជាដំណើរមួយឆ្ពោះទៅមុខបានល្អ ដោយយើងសង្ឃឹមថា យុវជនយើងនឹងបន្តចុះឈ្មោះបន្ថែមទៀតនៅគ្រប់ទីតាំងទាំងអស់ទូទាំងរាជធានីខេត្ត»។
បើតាមលោក កត្តា អ៊ន តាមវិស័យនានាដែលយុវជន-យុវនារីបានចុះឈ្មោះរៀន រួមមាន៖ វិស័យសំណង់សរុបមាន ១ ៦១៩ នាក់ (ស្រី ២២៦ នាក់), អគ្គិសនី និងថាមពល ៤៥៩ នាក់(ស្រី ៤៩ នាក់), អេឡិចត្រូនិក ៣០៩ នាក់ (ស្រី ៤៤ នាក់), កម្មន្តសាល ៧៩ នាក់ (ស្រី ៥ នាក់), មេកានិកទូទៅ/មេកានិករថយន្ត ១ ៧០០ នាក់ (ស្រី ៨៤ នាក់),ធុរកិច្ច និងព័ត៌មានវិទ្យា ៣ ៧៧៥ នាក់ (ស្រី ១ ៩៨២ នាក់)។ សេវាកម្ម ៦២៧ នាក់ (ស្រី ៥៤០នាក់), បរិក្ខារត្រជាក់ និងកម្តៅ ១ ៧២២ នាក់ (ស្រី ៧៥ នាក់), ទេសចរណ៍ ៧១៨ នាក់ (ស្រី ៥៣៤ នាក់), និងកសិកម្ម និងកសិ-ឧស្សាហកម្ម ៦០២ នាក់ (ស្រី ៤៦២ នាក់)។ សម្រាប់ការបើកវគ្គបណ្តុះបណ្តាលលោក កត្តា អ៊ន បញ្ជាក់ថា គឺមិនទាន់ចាប់ផ្តើមនៅឡើយទេ។
លោកថា៖ «ខ្ញុំសូមលើកទឹកចិត្តដល់យុវជននៅទូទាំងប្រទេស ទាំងយុវជនមកពីគ្រួសារក្រីក្រ និងគ្រួសារងាយរងហានិភ័យ ទាំងយុវជន និងយុវនារីដែលកំពុងធ្វើការនៅតាមរោងចក្រសហគ្រាសនានា សូមពិចារណាចាប់យកឱកាសដ៏ល្អនេះ ជាឱកាសមាស ដែលរដ្ឋាភិបាលបានផ្តល់ជូនយុវជនយើង ក្នុងការបណ្តុះបណ្តាលជំនាញវិជ្ជាជីវៈដល់យុវជនឱ្យមានជំនាញមួយច្បាស់លាស់នៅក្នុងជីវិត ដើម្បីអាចទទួលបានការងារមួយសមរម្យ និងមានស្ថិរភាពប្រាក់ចំណូលក្នុងការទ្រទ្រង់ជីវភាពគ្រួសារ និងរួមចំណែកអភិវឌ្ឍប្រទេសជាតិ»។
លោក អាត់ ធន ប្រធានសហភាពការងារកម្ពុជាថ្លែងថា គោលនយោបាយបណ្តុះបណ្តាលជំនាញវិជ្ជាជីវៈ និងបច្ចេកទេសនេះមានសារៈសំខាន់ណាស់សម្រាប់កម្លាំងពលកម្មបច្ចុប្បន្នខណៈកម្ពុជានៅមានភាពខ្វះខាតកម្លាំងពលកម្មជំនាញនៅឡើយ។
លោកថា៖ «ខ្ញុំគិតថា នេះជាឱកាសល្អហើយសម្រាប់យុវជនយើង ក្នុងការគិតគូរពង្រឹងសមត្ថភាពខ្លួនឯងបន្ថែមទៀត ជាពិសេសឱកាសចាប់យកជំនាញបច្ចេកទេសសំខាន់ៗ ដែលទីផ្សារការងារកំពុងតែមានតម្រូវការ ព្រោះថា នៅពេលដែលយើងមានជំនាញមួយច្បាស់លាស់ យើងមានអាទិភាពជាងអ្នកដទៃ ក្នុងការទទួលបានការងារដែលមានប្រាក់បៀវត្សរ៍ខ្ពស់»។
សូមរំឭកថា កាលពីថ្ងៃទី ១៤ វិច្ឆិកា ឆ្នាំ ២០២៣ លោកនាយករដ្ឋមន្ត្រី ហ៊ុន ម៉ាណែត បានប្រកាសដាក់ឱ្យអនុវត្តកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ប្រមាណ ១,៥ លាននាក់ គឺជាអាទិភាពមួយក្នុងចំណោមអាទិភាពទាំង ៦ ចំណុចរបស់នាយករដ្ឋមន្ត្រី ក្នុងវិស័យការងារ និងបណ្តុះបណ្តាលបច្ចេកទេសវិជ្ជាជីវៈ។
លោក ហេង សួរ រដ្ឋមន្ត្រីក្រសួងការងារ ក៏បានថ្លែងក្នុងពិធីចែកវិញ្ញាបនបត្រវិជ្ជាជីវៈដល់យុវជនកាលពីថ្ងៃទី ៧ ខែធ្នូថា យុវជនដែលធ្លាក់បាក់ឌុប ឬឌីប្លូម កុំអស់សង្ឃឹម គឺក្រសួងនឹងប្រើភាពបត់បែនដើម្បីជួយយុវជនឱ្យមានជំនាញវិជ្ជាជីវៈផ្ទាល់ខ្លួន។
លោកថ្លែងថា៖ «ក្រសួងការងារនឹងខិតខំធ្វើម៉េចផ្តល់ជម្រើសបត់បែនជូនក្មួយៗ ទោះបីជាក្មួយៗមិនមានសញ្ញាបត្របាក់ឌុប មិនមានសញ្ញាបត្រឌីប្លូម ក៏ប៉ុន្តែអនាគតក្មួយៗដែលស្រឡាញ់ការអប់រំ គឺមិនទាល់ទេ គឺក្មួយៗអាចចាប់ផ្តើមចេញពីសញ្ញាបត្រជំនាញដែលក្មួយៗមាននៅថ្ងៃនេះ ហើយចេញធ្វើការ ហើយក្មួយៗចង់បន្តទៀតក្រសួងមានផ្លូវ មានយន្តការសម្រាប់ឱ្យក្មួយៗអាចបន្តឡើងបន្តិចម្តងៗ»៕
