លោកស សុខា ក្នុងកិច្ចប្រជុំកាលពីថ្ងៃទី១១ខែធ្នូ។ រូបថត ក្រសួងមហាផ្ទៃ
ភ្នំពេញៈ ឧបនាយករដ្ឋមន្រ្តី និងជារដ្ឋមន្ត្រីក្រសួងមហាផ្ទៃ លោក ស សុខា បានណែនាំទៅកាន់អាជ្ញាធរមានសមត្ថកិច្ច គ្រប់មូលដ្ឋាន បង្កើនការយកចិត្តទុកដាក់ក្នុងការបង្ការទប់ស្កាត់ និងបង្ក្រាបបទល្មើស រួមទាំងបាតុភាពអវិជ្ជមាននានាក្នុងសង្គម ដើម្បីធានារក្សាបរិយាកាសសន្តិសុខជាទូទៅផង និងសម្រាប់ការបោះឆ្នោតជ្រើសតាំងសមាជិកព្រឹទ្ធសភា និងការបោះឆ្នោតក្រុមប្រឹក្សារាជធានីខេត្ត ក្រុង ស្រុក និងខណ្ឌ ដែលនឹងប្រព្រឹត្តទៅនៅក្នុងឆ្នាំ២០២៤ខាងមុខ។
លោក ស សុខា ដែលជាប្រធានគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត (គ.ស.អ) ផងនោះ បានធ្វើការណែនាំបែបនេះក្នុងកិច្ចប្រជុំផ្សព្វផ្សាយអនុក្រឹត្យ ស្តីពីការបង្កើតគណៈបញ្ជាការសន្តិសុខអចិន្ត្រៃយ៍ សម្រាប់ការបោះឆ្នោតថ្នាក់ជាតិ និងថ្នាក់ក្រោមជាតិ ប្រព្រឹត្តទៅនៅទីស្ដីការក្រសួងមហាផ្ទៃ នាថ្ងៃទី១១ ខែធ្នូ ដោយមានការចូលរួមពីលោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប.) និងមន្រ្តីពាក់ព័ន្ធទាំងថ្នាក់ជាតិ និងថ្នាក់ក្រោមជាតិជាច្រើនរូប។
តាមរយៈការផ្សព្វផ្សាយលើហ្វេសប៊ុកក្រសួងមហាផ្ទៃនៅថ្ងៃទី១២ ខែធ្នូ លោក ស សុខា បានថ្លែងថា៖«ទោះបីបរិយាកាសជារួមនៅកម្ពុជាមានលក្ខណៈល្អប្រសើរ ប៉ុន្តែបទល្មើសចោរកម្មនានា អំពើមនុស្សឃាត អំពើហិង្សាក្នុងគ្រួសារ និងក្នុងសង្គម ព្រមទាំងសកម្មភាពអនាធិបតេយ្យ រួមទាំងទំនាស់ផ្សេងៗ នៅតែបន្តកើតឡើង ដែលជះឥទ្ធិពលដល់សង្គម និងអាចមានការរិះគន់ផ្នែកនយោបាយពីមជ្ឈដ្ឋានអគតិដែលមានទស្សនៈទុទ្ទិដ្ឋិនិយមលើរាជរដ្ឋាភិបាលផងដែរ»។
ជាមួយគ្នានេះ លោកក៏បានណែនាំអាជ្ញាធរមានសមត្ថកិច្ច បន្តចាត់វិធានការ បង្ការ ទប់ស្កាត់ តាមគ្រប់មធ្យោបាយ និងគ្រប់រូបភាពស្របតាមច្បាប់ ព្រមទាំងបង្ក្រាបឱ្យបានទាន់ពេលវេលាចំពោះបទល្មើសទាំងនោះ ហើយរាល់បទល្មើសដែលកើតឡើង ទោះក្នុងរូបភាពណាក៏ដោយ ត្រូវខិតខំស្រាវជ្រាវរកឱ្យឃើញជនប្រព្រឹត្តបទល្មើស ដើម្បីនាំខ្លួនយកទៅផ្តន្ទាទោសតាមច្បាប់ជាធរមាន បញ្ចៀសឱ្យបាននូវនិទណ្ឌភាពក្នុងសង្គម។
លោក ស សុខា បានលើកឡើងថា «គណៈបញ្ជាការឯកភាពរដ្ឋបាលគ្រប់ថ្នាក់ ត្រូវយកចិត្តទុកដាក់សហការផ្តល់សេវាសន្តិសុខឱ្យបានល្អ ជាពិសេសត្រូវសហការជាមួយ គ.ជ.ប គ្រប់ថ្នាក់ និងភាគីពាក់ព័ន្ធ ដើម្បីមានវិធានការអប់រំ បំភ្លឺជូនមហាជនឱ្យបានយល់ពីឧបាយកលញុះញង់ ប៉ុនប៉ងរំខានការបោះឆ្នោត សំដៅរួមគ្នារក្សាភាពស្ងប់ស្ងាត់ និងត្រូវដោះស្រាយបញ្ហាដោយសន្តិវិធី និងចាត់វិធានការឱ្យបានស្របទៅតាមច្បាប់»។
ទន្ទឹមនឹងនោះដែរ លោក ប្រាជ្ញ ចន្ទ ប្រធាន គ.ជ.ប បានថ្លែងថា គ.ជ.ប បានបង្កើតលេខាធិការដ្ឋានសន្តិសុខបោះឆ្នោត ដើម្បីសម្របសម្រួល និងសហការជាមួយលេខាធិការដ្ឋាននៃ គ.ស.អ និងគណៈបញ្ជាការរដ្ឋបាលឯកភាពថ្នាក់ក្រោមជាតិ ដើម្បីធានាឱ្យដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ការបោះឆ្នោតនៅថ្នាក់ជាតិ និងថ្នាក់ក្រោមជាតិនីមួយៗ ជាបន្តបន្ទាប់នាពេលខាងមុខ ប្រព្រឹត្តទៅដោយរលូន មានសន្តិសុខ សន្តិភាព សុវត្ថិភាព សណ្ដាប់ធ្នាប់ល្អ គ្មានការគំរាមកំហែង និងគ្មានអំពើហិង្សា។
លោកបានបន្តថា ចាប់ពីពេលនេះតទៅ គ.ជ.ប និងគណៈកម្មការរៀបចំការបោះឆ្នោតគ្រប់លំដាប់ថ្នាក់ នឹងបង្កើនកិច្ចសហការជាមួយ គ.ស.អ និងគណៈបញ្ជាការឯកភាពរដ្ឋបាលរាជធានីខេត្ត ដឹកនាំដោយលោក ស សុខា ដើម្បីបង្កើនបរិយាកាសមួយដ៏ប្រសើរជាងមុនពេល ក្នុងពេល និងក្រោយពេលបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤, ការបោះឆ្នោតជ្រើសរើសក្រុមប្រឹក្សាអាណត្តិទី៤ ឆ្នាំ២០២៤ និងការចុះឈ្មោះបោះឆ្នោតប្រចាំឆ្នាំ ឱ្យប្រព្រឹត្តទៅដោយសេរី ត្រឹមត្រូវ និងយុត្តិធម៌។
ជាមួយគ្នានោះដែរ លោក ប្រាជ្ញ ចន្ទ ក៏បានអំពាវនាវដល់កងយោធពលខេមរភូមិន្ទ នគរបាលជាតិ ជាពិសេសកងកម្លាំងដែលបំពេញភារកិច្ច ជាភ្នាក់ងារសន្តិសុខបោះឆ្នោត ត្រូវប្រកាន់ជំហរអព្យាក្រឹត និងត្រូវគោរពតាមក្រមសីលធម៌សម្រាប់កងយោធពលខេមរភូមិន្ទ និងកងនគរបាលជាតិ ដែលរៀបចំដោយ គ.ជ.ប។
លោកមានប្រសាសន៍ថា៖«គណៈបញ្ជាការឯកភាពរដ្ឋបាលរាជធានី ខេត្ត គណៈកម្មការរៀបចំការបោះឆ្នោត គ្រប់លំដាប់ថ្នាក់ គណបក្សនយោបាយ សមាគម និងអង្គការមិនមែនរដ្ឋាភិបាល ត្រូវសហការសម្របសម្រួល និងដោះស្រាយបញ្ហាពាក់ព័ន្ធនឹងសន្តិសុខបោះឆ្នោត ដែលអាចកើតមានក្នុងគ្រប់ដំណាក់កាលនៃការបោះឆ្នោតទាំងនៅថ្នាក់ជាតិ និងថ្នាក់ក្រោមជាតិ»។
សូមបញ្ជាក់ថា សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤ ដែលគិតមកដល់ពេលនេះ មានគណបក្សនយោបាយចំនួន ៤ ហើយបានដាក់ពាក្យសុំចុះបញ្ជីនៅ គ.ជ.ប ដែលរួមមាន គណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច៕
