ជំនួបរវាងមន្ត្រីក្រសួងសុខាភិបាលនិងតំណាងក្រុមហ៊ុន Pfizer នៅថ្ងៃទី១៣ ធ្នូ ។ រូបថត ក្រសួងសុខាភិបាល
ភ្នំពេញៈ នាយកក្រុមហ៊ុន Pfizer មានបំណងចង់អនុវត្តគម្រោងជាមួយក្រសួងសុខាភិបាលតាមរយៈការលក់ឱសថ និងវ៉ាក់សាំងរបស់ខ្លួនក្នុងតម្លៃទាបដោយមិនគិតពីប្រាក់ចំណេញ បន្ទាប់ពីកន្លងមកក្រុមហ៊ុននេះបានរួមចំណែកគាំទ្រប្រព័ន្ធថែទាំសុខភាពនៅកម្ពុជា ដូចជាផ្ដល់វ៉ាក់សាំងកូវីដ១៩ ជាដើម។
ការបង្ហាញបំណងអនុវត្តគម្រោងបែបនេះតាមរយៈជំនួបពិភាក្សាការងាររវាងលោក ឈាង រ៉ា រដ្ឋមន្ត្រីក្រសួងសុខាភិបាលជាមួយលោក Nirutti Pradubyati នាយកក្រុមហ៊ុន Pfizer ផ្នែកកិច្ចការវេជ្ជសាស្ត្រប្រចាំប្រទេសថៃ និងតំបន់ឥណ្ឌូចិនកាលពីថ្ងៃទី១៣ ខែធ្នូ ឆ្នាំ២០២៣។ នេះបើយោងតាមក្រសួងសុខាភិបាល។
បើតាមក្រសួង ក្នុងជំនួបនេះ លោកនាយកក្រុមហ៊ុនPfizer បានថ្លែងអំណរគុណដល់ក្រសួងសុខាភិបាលដែលបានអនុញ្ញាតឱ្យប្រតិភូក្រុមហ៊ុន Pfizer បានជួបពិភាក្សាការងារលើកិច្ចសហប្រតិបត្តិការក្នុងវិស័យសុខាភិបាល ពាក់ព័ន្ធនឹងការផ្ដួចផ្ដើមអនុវត្តគម្រោង Accord for a Healthier World ដែលជាគម្រោងផ្តោតលើការកាត់បន្ថយគម្លាតសមធម៌សុខភាព។
លោកបញ្ជាក់ថា៖ «គម្រោង Accord for a Healthier World ដែលជាគម្រោងផ្តោតលើការកាត់បន្ថយគម្លាតសមធម៌សុខភាពតាមរយៈការលក់ជូននូវឱសថនិងវ៉ាក់សាំងរបស់ក្រុមហ៊ុន Pfizer ក្នុងតម្លៃទាបនិងមិនគិតពីប្រាក់ចំណេញ»។
ជាការឆ្លើយតប លោក ឈាង រ៉ា រដ្ឋមន្ត្រីក្រសួងសុខាភិបាលបានស្វាគមន៍កិច្ចសហប្រតិបត្តិការពាក់ព័ន្ធនឹងគំនិតផ្តួចផ្តើមរបស់ក្រុមហ៊ុន Pfizer ក្នុងវិស័យសុខាភិបាល ក៏ដូចជាការផ្តល់ជំនួយឬការផ្គត់ផ្គង់ឱសថនិងវ៉ាក់សាំងដល់កម្ពុជាប្រកបដោយគុណភាព សុវត្ថិភាព ប្រសិទ្ធភាព និរន្តរភាព និងសមធម៌។ យ៉ាងណាមិញលោកផ្តល់ជាអនុសាសសន៍និងលើកទឹកចិត្តឱ្យក្រុមហ៊ុនមានការពិភាក្សាជាមួយក្រុមការងារបច្ចេកទេសជាមុនសិនមុននឹងចាប់ផ្ដើមអនុវត្តគម្រោងនេះ។
លោកថ្លែងថា៖«សូមលើកទឹកចិត្តឱ្យក្រុមហ៊ុនPfizerត្រូវតែពិភាក្សាកិច្ចសហការនេះជាមួយក្រុមការងារបច្ចេកទេស ជាពិសេសត្រូវតែគិតគូរនិងចាប់ផ្តើមគម្រោងសាកល្បង(Pilot Project)ជាមួយមន្ទីរណាមួយជាមុនសិន មុននឹងបន្តគម្រោងនៅទូទាំងប្រទេស»។
បើតាមលោក ឈាង រ៉ា កន្លងមកក្រុមហ៊ុនPfizer បានរួមចំណែកគាំទ្រដល់ប្រព័ន្ធថែទាំសុខភាពនៅកម្ពុជា ដូចជាការមកដល់នៃវ៉ាក់សាំងកូវីដ១៩ (វ៉ាក់សាំង Pfizer)តាមរយៈ COVAX Facility ក្នុងដំណាក់កាលនៃការរីករាលដាលជាសកលនៃជំងឺឆ្លងកូវីដ១៩។
ជុំវិញរឿងនេះ លោក នុត សម្បត្តិ ប្រធានវិទ្យាស្ថានវេជ្ជសាស្ត្រជីវសាស្ត្រ និងកសិកម្មនៃរាជបណ្ឌិតសភាកម្ពុជា បានឱ្យដឹងនៅថ្ងៃទី១៤ ខែធ្នូថា ក្រុមហ៊ុន Pfizer គឺជាក្រុមហ៊ុនលំដាប់អន្តរជាតិមួយដែលផលិតឱសថនិងវ៉ាក់សាំងដ៏ល្អនិងមានគុណភាព។ លោកបន្តថា ប្រសិនបើគម្រោងរបស់ក្រុមហ៊ុននេះបានចាប់ដៃគូជាមួយក្រសួងសុខាភិបាលកម្ពុជានោះវាជួយបម្រើឱ្យសេវាសុខាភិបាលកាន់តែល្អប្រសើរក៏ដូចជាមានតម្លៃទាបទទួលយកបាន និងគ្របដណ្ដប់បានគ្រប់ទីកន្លែងនៅទូទាំងប្រទេស។
លោកថ្លែងថា៖«ខ្ញុំជឿថាប្រសិនបើគម្រោងនេះបានចាប់ដៃគូជាមួយក្រសួងសុខាភិបាលយើងពិតមែននោះវាជួយធ្វើឱ្យសេវាសុខាភិបាលយើងកាន់តែល្អប្រសើរដោយសារយើងមានដៃគូដែលមានឱសថនិងវ៉ាក់សាំងល្អយកមកព្យាបាល ខណៈដែលវាមានតម្លៃថោក ហើយប្រសិទ្ធភាពអាចទទួលយកបានទៀត»។
បន្ថែមពីនេះ ក៏នឹងធ្វើឱ្យវិស័យសុខាភិបាលមានការរីកលូតលាស់សេវាល្អជាពិសេសឈានទៅជាវិស័យសុខាភិបាលមួយស្មើមុខស្មើមាត់អន្តរជាតិ ដោយសារមានឱសថ និងវ៉ាក់សាំងដែលមានតម្លៃទាប សម្រាប់ជួយព្យាបាលប្រជាពលរដ្ឋ។
សូមបញ្ជាក់ថា ក្នុងអាណត្តិទី៧នេះអាទិភាពសំខាន់ៗវិស័យសុខាភិបាលមានចំនួន៣អាទិភាព រួមមានទី១ ការពង្រឹងគុណភាពសេវានៅមណ្ឌលសុខភាពទាំងអស់តាមរយៈការពង្រឹងហេដ្ឋាសម្ព័ន្ធសុខាភិបាលការផ្គត់ផ្គង់ឱសថ និងបំពាក់សម្ភារបរិក្ខារចាំបាច់ធ្វើឱ្យលទ្ធភាពក្នុងការផ្តល់សេវាពេញ២៤ម៉ោង។២ការព្រងឹងគុណភាពសេវានៅមន្ទីរពេទ្យបង្អែកស្រុកនិងមន្ទីរពេទ្យខេត្តតាមរយៈការពង្រឹងសេវាសង្គ្រោះបន្ទាន់
ICU,Emergency, Surgeryនិងមន្ទីរពិសោធន៍ជាដើមនិងអាទិភាពនិងទី៣ការពង្រឹងធនធានមនុស្សតាមរយៈការពង្រឹងភាពជាអ្នកដឹកនាំនិងនវានុវត្តន៍ដល់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់៕
