លោក សុខ ទូច(អាវស) នៅក្នុងពិធីនៅថ្ងៃទី១៤ ធ្នូ ។ ហេង ជីវ័ន
ភ្នំពេញៈប្រធានរាជបណ្ឌិត្យសភាកម្ពុជា លោក សុខ ទូច បានលើកឡើងថា អ្នកដែលទៅរៀនដោយគ្រាន់តែកាន់កាតឬបណ្ណក្រីក្រដើម្បីបានចូលរៀនវគ្គបណ្តុះបណ្តាលជំនាញវិជ្ជាជីវៈដោយមិនមានគោលបំណង គ្មានការខិតខំប្រឹងប្រែង និងជ្រើសរើសជំនាញណាមួយច្បាស់លាស់ គឺគ្មានន័យនោះទេ។
លោកបានលើកឡើងដូចនេះនៅក្នុងកិច្ចពិភាក្សាតុមូលស្ដីពី«សារៈសំខាន់នៃការជ្រើសរើសមុខជំនាញនៅឧត្ដមសិក្សានិងក្រោយឧត្ដមសិក្សា»ដែលរៀបចំដោយរាជបណ្ឌិត្យសភាកម្ពុជាកាលពីថ្ងៃទី១៤ ខែធ្នូ ឆ្នាំ២០២៣។
លោកសុខ ទូច បានថ្លែងថា ជំនាញឯកទេសដាច់ខាតត្រូវតែមាន ពីព្រោះប្រទេសមួយរីកចម្រើនគេត្រូវការការអប់រំដោយលោកបានលើកយកប្រទេសចំនួន៣មកនិយាយគឺ ប្រទេសជប៉ុន ក្រោយសង្គ្រាមលោកលើកទី២ ជប៉ុនក្រមែនទែន,ទី២ ប្រទេសកូរ៉េខាងត្បូងក្រជាងយើងឆ្ងាយណាស់ អត់មានអីទេ ហើយទី៣ គឺប្រទេសចិនតែម្តង។
លោកបានបញ្ជាក់ថា៖«តើប្រទេសទាំងនោះធ្វើយ៉ាងម៉េច?គេចាប់ផ្តើមបណ្តុះបណ្តាលវិស័យអប់រំ គេអត់ធ្វើនយោបាយច្រើននោះទេ នយោបាយច្រើនពេកនាំតែឈឺក្បាលដោយធ្វើតែមួយឱ្យជោគជ័យគឺវិស័យអប់រំ។ កាលណាវិស័យអប់រំជោគជ័យ អ្វីៗក៏ជោគជ័យដែរ»។
ទាក់ទងនឹងការជ្រើសរើសជំនាញវិជ្ជាជីវៈថា តើត្រូវរើសតាមទីផ្សារ តាមគ្រួសារ តាមសង្គមឬជ្រើសរើសតាមទេពកោសល្យ? លោក សុខ ទូច បានបញ្ជាក់ថា ការជ្រើសរើសជំនាញគឺរើសតាមតម្រូវការគឺ«ចប់ ចេះ មានការងារធ្វើ» ប៉ុន្តែបើជ្រើសរើសតាមទេពកោសល្យ គឺ «ចប់ ចេះ មានការងារធ្វើ បង្កើតការងារនិងបង្កើនកេរ្តិ៍ឈ្មោះ»។
ចំណុចនេះ លោកបានពន្យល់ថា ៖ «ការជ្រើសរើសជំនាញតាមទេពកោសល្យដែលយើងមានអី គឺត្រូវរៀនតាមហ្នឹង កុំរៀនតាមគេ គឺត្រូវរៀនតាមទេពកោសល្យដែលយើងមានដើម្បីអាចបង្កើតការងារ បង្កើតគំនិតអ្វីដែលថ្មី ទោះជាបាត់បង់អី១ តែយើងអាចបង្កើតអ្វី១ថ្មីទៀតបាន។ ដូចនេះ ជំនាញដើរតួនាទីសំខាន់ណាស់ ហើយការរើសជំនាញកុំរើសតាមគេថា តែត្រូវមើលថាខ្លួនឯងពេញចិត្តអី មានទេពកោសល្យអី ហើយកុំបារម្ភរឿងទីផ្សារឱ្យសោះ ព្រោះយើងអាចបង្កើតទីផ្សារបាន»។
នៅឯវេទិកាដដែលនោះដែរ លោកស្រី ឡាយ ផល្លីន អគ្គនាយករងអប់រំបណ្តុះបណ្តាលបច្ចេកទេស និងវិជ្ជាជីវៈ បានលើកឡើងដែរថា ការជ្រើសរើសជំនាញមួយ ពិតជាមានការសារៈសំខាន់ខ្លាំងណាស់ ព្រោះវាធ្វើឱ្យយុវជនខ្មែរទទួលបានជំនាញច្បាស់លាស់ ឬអាជីពពិតប្រាកដសម្រាប់ជីវិត។
លោកស្រីបានថ្លែងថា៖«វាសំខាន់ ព្រោះវាជាប្រភពនៃការរកប្រាក់ចំណូល ហើយទិសដៅរបស់អ្នកសិក្សាទាំងអស់ដែលខិតខំប្រឹងរៀនតាំងពីមធ្យមសិក្សា បរិញ្ញាបត្រ រហូតដល់បណ្ឌិតឬអនុបណ្ឌិត គឺចុងក្រោយដើម្បីការងារ ហើយរកការងារដើម្បីប្រាក់ចំណូលចិញ្ចឹមជីវិត ខ្លួនឯង គ្រួសារ និងសង្គមប្រទេសជាតិ»។
ជុំវិញរឿងនេះ លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាក៏បានលើកឡើងក្នុងឱកាសនោះដែរថា ការរៀបចំវេទិកាតុមូលនាពេលនេះធ្វើឡើងស្របទៅនឹងកម្មវិធីនយោបាយរបស់រាជរដ្ឋាភិបាលនីតិកាលទី៧ដែលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព ចីរភាព និងផ្តោតជាសំខាន់ទៅលើប្រសិទ្ធភាពនៃសមិទ្ធកម្ម។
លោកបានបន្តថា៖«កម្មវិធីតុមូលនាឱកាសនេះស្របនឹងបញ្ចកោណទី១ស្តីពីការអភិវឌ្ឍមូលធនមនុស្សដែលស្របនឹងមុំទី១គឺការពង្រឹងគុណភាពវិស័យអប់រំ កីឡា វិទ្យាសាស្ត្រ បច្ចេកវិទ្យា ឌីជីថល និងមុំទី២ការ
បណ្តុះបណ្តាលវិជ្ជាជីវៈគោលដៅរាជរដ្ឋាភិបាលដែលសំដៅដល់១លាន៥សែននាក់សម្រាប់នីតិកាលទី៧នេះ»៕
