ជំនួបរវាងលោក ហ៊ុន ម៉ាណែត និងលោក Obayashi Takeo នៅថ្ងៃទី១៩ ធ្នូ ។ រូបថត STPM
ភ្នំពេញៈសហព័ន្ធសេដ្ឋកិច្ចតំបន់កាន់សៃរបស់ជប៉ុនបង្ហាញបំណងពង្រីកវិនិយោគរបស់ខ្លួនក៏ដូចជាជំរុញទឹកចិត្តក្រុមហ៊ុនជប៉ុនដទៃឱ្យទៅវិនិយោគនៅកម្ពុជា ខណៈលោកនាយករដ្ឋមន្ត្រី ហ៊ុន ម៉ាណែត លើកទឹកចិត្តឱ្យសហព័ន្ធនេះជួយផ្សព្វផ្សាយអំពីសក្តានុពលរបស់កម្ពុជាទៅដល់វិនិយោគិនជប៉ុនដើម្បីទទួលបានការចាប់អារម្មណ៍និងឱកាសក្នុងការពង្រីកវិនិយោគរបស់ខ្លួននៅកម្ពុជា។
ការលើកឡើងពីបំណងនេះធ្វើឡើងក្នុងជំនួបរវាងលោក ហ៊ុន ម៉ាណែត និងលោក អូបាយ៉ាស៊ី តាកេអុ (Obayashi Takeo)ប្រធានផ្នែកទំនាក់ទំនងអន្តរជាតិតំណាងសហព័ន្ធសេដ្ឋកិច្ចតំបន់កាន់សៃនិងជាប្រធានក្រុមហ៊ុន Obayashi Corporation កាលពីថ្ងៃទី១៩ ខែធ្នូ ក្នុងឱកាសលោកចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ នៅទីក្រុងតូក្យូ ប្រទេសជប៉ុន។
ក្នុងជំនួបនេះ លោក តាកេអុ បានលើកឡើងពីសកម្មភាពអាជីវកម្មរបស់សហព័ន្ធនេះ ជាពិសេសសកម្មភាពការងារមួយចំនួនដែលបានអនុវត្តនៅកម្ពុជា តួយ៉ាងដូចជា ការជួលជុលស្ពានមិត្តភាពកម្ពុជា-ជប៉ុនជ្រោយចង្វារ ជាដើម ។
បណ្តាញសង្គមលោក ហ៊ុន ម៉ាណែត បញ្ជាក់ថា៖ «លោកប្រធាន [តាកេអុ] បានជម្រាបផងដែរ អំពីបំណងពង្រីកវិនិយោគរបស់ខ្លួន ក៏ដូចជាជំរុញទឹកចិត្តក្រុមហ៊ុនជប៉ុនដទៃឱ្យទៅវិនិយោគនៅប្រទេសកម្ពុជា»។
លោកតាកេអុ បានប្រាប់លោក ហ៊ុន ណែត អំពីគម្រោងពិព័រណ៍សកលនៅក្នុងសហព័ន្ធសេដ្ឋកិច្ចតំបន់កាន់សៃ នៅឆ្នាំ២០២៤ ខាងមុខ ដោយសង្ឃឹមថាកម្ពុជានឹងចូលរួមក្នុងព្រឹត្តិការណ៍នេះខណៈលោក ហ៊ុន ម៉ាណែត បញ្ជាក់ថា ក្រសួងពាណិជ្ជកម្មកម្ពុជា នឹងរៀបចំក្នុងការចូលរួមព្រឹត្តិការណ៍ពិព័រណ៍សកលក្នុងសហព័ន្ធសេដ្ឋកិច្ចតំបន់កាន់សៃ នៅពេលខាងមុខ។
លោកនាយករដ្ឋមន្ត្រីបញ្ជាក់ថា៖«រាជរដ្ឋាភិបាលកម្ពុជា បាននិងកំពុងយកចិត្តទុកដាក់នៅក្នុងការធានានិរន្តរភាពនៃបរិយាកាសអំណោយផលសម្រាប់ធុរកិច្ច និងវិនិយោគ តាមរយៈការដាក់ចេញនូវគោលនយោបាយ យន្តការអនុវត្ត និងក្របខ័ណ្ឌគតិយុត្តថ្មីៗព្រមជាមួយនឹងការអភិវឌ្ឍហេដ្ឋារចនាសម្ព័ន្ធតភ្ជាប់និងឡូជីស្ទិកសំខាន់ៗ ដូចជា ផ្លូវលឿន ផ្លូវដែក និងកំពង់ផែ ជាដើម»។
សហព័ន្ធសេដ្ឋកិច្ចតំបន់កាន់សៃ ប្រមូលផ្តុំនូវក្រុមហ៊ុន ឬសហគ្រាសខ្នាតយក្ស ដែលមានទីតាំងក្នុងតំបន់កាន់សៃ នៅភាគខាងលិចនៃប្រទេសជប៉ុន ក្នុងនោះរួមមានចំនួន៧ខេត្ត ដូចជា ខេត្តអូសាកា, ខេត្តក្យូតុ, ខេត្តហ្យូហ្កុ, ខេត្តណារ៉ា, ខេត្តស៊ីហ្កា, ខេត្តមិអិ និងខេត្តវ៉ាកាយ៉ាម៉ា ដោយក្រុមហ៊ុនយក្សទាំងអស់នោះ សុទ្ធសឹងមានឥទ្ធិពលដល់ការអភិវឌ្ឍសេដ្ឋកិច្ចរបស់ប្រទេសជប៉ុន។
ដោយឡែក ក្នុងជំនួបជាមួយលោក ហ៊ុន ម៉ាណែត នៅថ្ងៃដដែលនាទីក្រុងតូក្យូ លោក អូកាដា ម៉ូតូយ៉ា (Okada Motoya) ប្រធាន និងជានាយកប្រតិបត្តិក្រុមហ៊ុន AEON MALL បានបញ្ជាក់អំពីគម្រោងពង្រីកវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជា និងលើកឡើងអំពីការចូលរួមរបស់ក្រុមហ៊ុនក្នុងវិស័យអប់រំតាមរយៈការកសាងសាលាបឋមសិក្សានៅតាមបណ្តាខេត្តនិងការផ្តល់អាហារូបករណ៍ជូនដល់សិស្សកម្ពុជាដើម្បីបន្តឱកាសសិក្សា។
ក្នុងឱកាសនោះលោក ហ៊ុន ម៉ាណែត បានអរគុណដល់ក្រុមហ៊ុន AEON MALL ដែលបានសម្រេចចិត្តបោះទុនវិនិយោគ និងគ្រោងវិនិយោគបន្ថែមនៅកម្ពុជា និងអរគុណចំពោះការចូលរួមចំណែកក្នុងការបណ្តុះបណ្តាលធនធានមនុស្សកម្ពុជាតាមរយៈការផ្តល់អាហារូបករណ៍ និងការកសាងសាលារៀននៅតាមមូលដ្ឋាន។
លោកថ្លែងថា៖«រាជរដ្ឋាភិបាលអាណត្តិទី៧ នៃរដ្ឋសភានឹងបន្តយកចិត្តទុកដាក់បន្ថែមទៀតក្នុងការពង្រឹងការអប់រំ បណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសចំនួន ១,៥ លាននាក់»។
ក្នុងជំនួបជាមួយលោក ហ៊ុន ម៉ាណែត នៅថ្ងៃទី១៩ ខែធ្នូនោះលោក កាត្សឹណារី ម៉ាត្សឹដា (Katsunari Matsuda) នាយកក្រុមហ៊ុន Meiji បានបង្ហាញពីចំណាប់អារម្មណ៍និងគ្រោងវិនិយោគនៅកម្ពុជានាពេលអនាគត។ នេះបើយោងតាមបណ្តាញសង្គមដដែល។
លោក ហ៊ុន ម៉ាណែត ថ្លែងក្នុងជំនួបនោះថា៖«រាជរដ្ឋាភិបាលកម្ពុជាបាននិងកំពុងយកចិត្តទុកដាក់លើការអភិវឌ្ឍធនធានមនុស្ស ដែលចាំបាច់ត្រូវផ្អែកលើកត្តាចំណេះដឹង សមត្ថភាព និងសុខភាព ដូច្នេះការផ្គត់ផ្គង់ចំណីអាហារប្រកបដោយគុណភាព និងសុវត្ថិភាព ជាកត្តាអាទិភាពចម្បង»។
លោកបានលើកទឹកចិត្តឱ្យក្រុមហ៊ុននេះបណ្តាក់ទុនវិនិយោគលើវិស័យកសិកម្ម ដោយធ្វើការផលិតផ្ទាល់ ដើម្បីលក់នៅទីផ្សារកម្ពុជា និងនាំចេញទៅប្រទេសជិតខាង និងប្រទេសក្នុងតំបន់ ដោយលោកអះអាងថា កំពុងមានតម្រូវការខ្ពស់ចំពោះផលិតផលទាំងអស់នេះ។លោកបានលើកទឹកចិត្តឱ្យក្រុមហ៊ុននេះជួយបណ្តុះបណ្តាលធនធានមនុស្សកម្ពុជាលើជំនាញកសិកម្មដើម្បីចូលរួមលើកកម្ពស់ផលិតភាពក្នុងវិស័យនេះឱ្យកាន់តែខ្លាំងក្លាថែមទៀត។
ក្នុងជំនួបជាមួយលោក ហ៊ុន ម៉ាណែត ក្នុងថ្ងៃដដែលនោះ ដែរ លោក Ichiro Kashitani បានបញ្ជាក់ថា ដំណើរការបង្កើតរោងចក្រដំទ្បើងរថយន្ត Toyota នៅកម្ពុជានឹងរួចរាល់នៅពាក់កណ្តាលឆ្នាំ២០២៤ ហើយលោកបានស្នើសុំលោក ហ៊ុន ម៉ាណែត ធ្វើជាអធិបតីក្នុងពិធីសម្ពោធដាក់ឱ្យដំណើរការរោងចក្រដំទ្បើងរថយន្ត Toyota នាពេលខាងមុខ។
លោក ហ៊ុន ម៉ាណែត បានទទួលយកការអញ្ជើញជាអធិបតីនេះ ដោយលោកបញ្ជាក់ថា៖«ការសម្ពោធដាក់ឱ្យដំណើរការរោងចក្រដំទ្បើងរថយន្តToyota នេះ ស្របពេលទៅនឹងឆ្នាំ២០២៤ គឺជាគម្រប់ខួបអនុស្សាវរីយ៍លើកទី៧១នៃទំនាក់ទំនងការទូតកម្ពុជា-ជប៉ុនដែលនេះជាការសបញ្ជាក់យ៉ាងប្រត្យក្សច្បាស់អំពីភាពលូតលាស់រីកចម្រើននៃទំនាក់ទំនងរវាងប្រទេសទាំង២»។
លោកនាយករដ្ឋមន្ត្រីជឿជាក់ថា តាមរយៈដំណើរការនៃរោងចក្រដំទ្បើងរថយន្ត Toyota នេះនឹងនាំមកនូវការរីកចម្រើនសម្រាប់ក្រុមហ៊ុន ក៏ដូចជាការបង្កើតឱកាសការងារប្រកបដោយគុណភាព និងការបណ្តុះបណ្តាលលើកកម្ពស់ថែមទៀតលើជំនាញវិស្វកម្មរថយន្តសម្រាប់ប្រជាជនកម្ពុជាផងដែរ។
លោកថែមទាំងបានលើកទឹកចិត្តឱ្យក្រុមហ៊ុននេះពិចារណាបង្កើតកម្មវិធីផ្លាស់ប្តូរបទពិសោធន៍ការងាររវាងបុគ្គលិកបម្រើការកម្ពុជា-ជប៉ុន ដើម្បីពង្រឹងការដកបទពិសោធន៍លើចំណេះដឹង, វិជ្ជាជីវៈ, វប្បធម៌, ប្រពៃណី ក៏ដូចជាទំនាក់ទំនងជិតស្និទ្ធរវាងប្រជាជន និងប្រជាជននៃប្រទេសទាំង២៕
