អាកាសធាតុចុះត្រជាក់នៅផ្លូវឡើងភ្នំបូកគោក្នុងខេត្តកំពត កាលពីខែកក្កដាឆ្នាំ២០២៣។ ហុង មិនា
ភ្នំពេញៈ អាជ្ញាធរខេត្តជាប់ព្រំដែន បានអំពាវនាវឱ្យប្រជាពលរដ្ឋត្រៀមការពារសុខភាព ជាពិសេសមនុស្សចាស់ ត្រូវនៅក្នុងផ្ទះ កុំចេញក្រៅ ខណៈដែលអាកាសធាតុ នឹងចុះត្រជាក់ខ្លាំងនៅថ្ងៃទី២១ ខែធ្នូ ដោយសារកម្ពុជាទទួលរងឥទ្ធិពលខ្យល់មូសុងឦសានបក់ក្នុងល្បឿនពីបង្គួរទៅខ្លាំង។
ការអំពាវនាវបែបនេះ ធ្វើឡើងបន្ទាប់ពីការប្រកាសរបស់ក្រសួងធនធានទឹក និងឧតុនិយម នៅថ្ងៃទី១៩ ខែធ្នូ បានឱ្យដឹងថា ចាប់ថ្ងៃទី២១ ដល់ថ្ងៃទី២៤ ខែធ្នូ ឆ្នាំ២០២៣ ខេត្តចំនួន៥ នៅក្នុងប្រទេសកម្ពុជា នឹងចុះត្រជាក់ខ្លាំងនៅកម្រិត ១៥អង្សាសេ ក្នុងសីតុណ្ហភាពពេលព្រឹក។
ខេត្តទាំង៥នោះរួមមាន៖ ខេត្តមណ្ឌលគិរី ព្រះវិហារ ឧត្តរមានជ័យ រតនគិរី និងខេត្តប៉ៃលិន នឹងមានសីតុណ្ហភាពអប្បបរមាពី ១៥-១៦ អង្សាសេ។ ចំពោះខេត្តផ្សេងទៀតដែលមាន ខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ធំ និងខេត្តស្ទឹងត្រែង នឹងមានសីតុណ្ហភាពអប្បបរមាពី ១៧-១៩ អង្សាសេ។
ក្រសួងបានបន្តទៀតថា ចំណែកនៅរាជធានីភ្នំពេញ និងបណ្តាខេត្តដទៃទៀត នឹងមានសីតុណ្ហភាពអប្បបរមាពី ២០-២៣ អង្សាសេ។
ដោយឡែកនៅលើផ្ទៃសមុទ្រវិញ នឹងមានខ្យល់បក់មកពីទិសឦសានក្នុងល្បឿនពី ៧-៩ ម៉ែត្រ/វិនាទី និងរលកសមុទ្រមានកម្ពស់១,៥០-២,០០ ម៉ែត្រ។
ប្រភពដដែលបញ្ជាក់ថា៖ «សូមណែនាំឱ្យប្រជាពលរដ្ឋ និងសាធារណជន ត្រូវមានការប្រុងប្រយ័ត្ន ថែរក្សាសុខភាព ស្លៀកសម្លៀកបំពាក់ឱ្យបានគត់មត់ ដើម្បីបង្ការពីជំងឺដង្កាត់នានា ដែលអាចកើតមានឡើងជាយថាហេតុ»។
បើតាមក្រសួងធនធានទឹក មូលហេតុដែលនាំឱ្យកម្ពុជាចុះត្រជាក់បែបនេះ គឺមកពីប្រព័ន្ធនៃសម្ពាធខ្ពស់នៅលើប្រទេសចិនបង្កើនឥទ្ធិពលគ្របដណ្តប់លើប្រទេសកម្ពុជា ជាមួយនឹងខ្យល់មូសុង ឦសានបក់ពីបង្គួរទៅខ្លាំង។
លោក ឌី រ៉ាដូ អភិបាលរងខេត្តឧត្តរមានជ័យ បានឱ្យដឹងនៅថ្ងៃទី១៩ ខែធ្នូថា រាល់សេចក្ដីប្រកាសរបស់ក្រសួងធនធានទឹក ទាក់ទងនឹងការប្រែប្រួលអាកាសធាតុ គឺអាជ្ញាធរខេត្តតែងតែផ្សព្វផ្សាយជូនដំណឹងទៅដល់អាជ្ញាធរមូលដ្ឋានពាក់ព័ន្ធទាំងអស់ ដើម្បីឱ្យពួកគាត់ធ្វើការផ្សព្វផ្សាយបន្តទៅកាន់ប្រជាពលរដ្ឋ ឱ្យមានការប្រុងប្រយ័ត្នខ្ពស់ចំពោះអាកាសធាតុចុះត្រជាក់នេះ។
ក្រៅពីការផ្សព្វផ្សាយហើយ អាជ្ញាធរខេត្ត ក៏មានក្រុមការងារគ្រប់គ្រងគ្រោះមហន្តរាយ ដែលត្រៀមនូវសម្ភារសង្គ្រោះជានិច្ច នៅពេលមានបញ្ហាសុខភាពណាមួយកើតឡើងលើប្រជាពលរដ្ឋ។
លោក ឌី រ៉ាដូ បានថ្លែងថា៖ «ក្នុងនាមជាអាជ្ញាធរខេត្ត យើងសូមអំពាវនាវឱ្យបងប្អូនប្រជាពលរដ្ឋទាំងអស់នៅក្នុងខេត្ត ត្រូវត្រៀមលក្ខណៈការពារខ្លួនទុកជាមុន និងប្រុងប្រយ័ត្នឱ្យបានខ្ពស់ ជាពិសេសអ្នកដែលមានឪពុកម្ដាយចាស់ជរា សុំកុំឱ្យគាត់ចេញទៅខាងក្រៅ»។
ជាមួយគ្នានេះ លោក ញ៉ែម សំអឿន អភិបាលខេត្តរតនគិរី ក៏បានប្រាប់ឱ្យដឹងដែរថា កន្លងមកអាជ្ញាធរខេត្ត បានត្រៀមវិធានជាហូរហែររួចមកហើយ ដែលជាវិធានការពារនៅតាមមូលដ្ឋាន ដែលមានអាជ្ញាធរគ្រប់លំដាប់ថ្នាក់តាំងពីភូមិ ឃុំ/សង្កាត់ ទាំងស្រុក និងទាំងខេត្ត បានចុះទៅធ្វើការណែនាំទៅដល់ប្រជាពលរដ្ឋ នៅពេលដែលមានការប្រែប្រួលអាកាសធាតុ ដើម្បីឱ្យប្រជាពលរដ្ឋ ពួកគាត់មានការត្រៀមការពារ និងប្រុងប្រយ័ត្នចំពោះសុខភាពជាដើម។
លោកបញ្ជាក់ថា៖ «អ៊ីចឹង! អាជ្ញាធរមូលដ្ឋានរបស់យើង តាំងពីភូមិមក គឺឱ្យគាត់មើលការខុសត្រូវ ពិនិត្យមើលពីការខ្វះខាតរបស់ពលរដ្ឋយើង ដើម្បីមានការបែងចែកជូនខោអាវរងា និងចែកអីជូនទៅគាត់។ អ៊ីចឹងហើយអ្នកដែលមានភាពលំបាកខ្លាំង គឺអាជ្ញាធរយើង នឹងមើលថែគាត់ អំឡុងពេលដែលអាកាសធាតុចុះត្រជាក់ហ្នឹង»។
សម្រាប់ជនចាស់ជរា និងអ្នកដែលមិនមានទីជម្រកគ្រប់គ្រាន់ គឺអាជ្ញាធរមូលដ្ឋាន ក៏បានយកចិត្តទុកដាក់ និងមើលការខុសត្រូវដូចជាផ្ដល់ជាខោអាវរងាសម្រាប់ការពារសុខភាពរបស់ពួកគាត់ផងដែរ។
លោកបានបន្ថែមថា ចំណែកជនចាស់ជរាដែលមានកូនចៅនៅជាមួយ គឺអាជ្ញាធរមូលដ្ឋាននឹងមិនផ្ដល់សម្ភារការពារនោះទេ ប៉ុន្តែណែនាំឱ្យជនចាស់ជរាទាំងនោះ កុំចេញទៅខាងក្រៅផ្ទះ ក្នុងអំឡុងពេលអាកាសធាតុចុះត្រជាក់ខាងមុខនេះ។
សូមបញ្ជាក់ដែរថា ក្រសួងសុខាភិបាល កាលពីថ្ងៃទី៨ ខែធ្នូ បានចេញសេចក្តី អំពាវនាវ និងក្រើនរំឭកដល់ប្រជាពលរដ្ឋឱ្យយកចិត្តទុកដាក់ប្រុងប្រយ័ត្នលើសុខភាព ដើម្បីបង្ការនូវការចម្លងជំងឺផ្តាសាយនារដូវធ្លាក់ខ្យល់ និងជំងឺកូវីដ១៩ ជាយថាហេតុ ខណៈនាពេលបច្ចុប្បន្ននេះ វីរុសកូវីដ១៩ មិនទាន់បាត់អស់ពីប្រទេសកម្ពុជានៅឡើយ។
កាវិធានការទាំងនោះរួមមាន ពាក់ម៉ាស់ក្នុងករណីមានបញ្ហាសុខភាពផ្លូវដង្ហើម និងលាងដៃឱ្យញឹកញាប់ជាមួយសាប៊ូ ឬអាល់កុល ឬជែលលាងដៃ ត្រូវខ្ទប់មាត់ និងច្រមុះពេលក្អកកណ្ដាស់ ដោយប្រើផ្នត់កែងដៃ ម៉ាស់ ក្រម៉ា កន្សែង ឬក្រដាស អនាម័យ រួចខ្ចប់បោះចោលក្នុងធុងសំរាមបិទជិត។
ប្រសិនបើមានរោគសញ្ញាគ្រុនក្តៅ ក្អក ឈឺក្បាល ហៀរសំបោរ ពិបាកដកដង្ហើម សូមទៅស្វែងរក ការពិគ្រោះយោបល់នៅមណ្ឌលសុខភាព ឬមន្ទីរពេទ្យ ឱ្យបានទាន់ពេលវេលា៕
