លោកនាយករដ្ឋមន្ត្រី ហ៊ុន ម៉ាណែត ថ្លែងនៅក្នុងសិក្ខាសាលាវិនិយោគកម្ពុជាឆ្នាំ ២០២៣ នៅទីក្រុងតូក្យូ ប្រទេសជប៉ុន ម្សិលមិញ។ រូបថត STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា រាជរដ្ឋាភិបាលកំពុងពិនិត្យលទ្ធភាពក្នុងការបង្កើតសួនឧស្សាហកម្មកម្ពុជា-ជប៉ុន ដើម្បីធានានិរន្តរភាពនៃបរិយាកាសអំណោយផលសម្រាប់ការធ្វើធុរកិច្ច និងវិនិយោគរបស់វិនិយោគិនជប៉ុននៅកម្ពុជា។
លោកនាយករដ្ឋមន្ត្រីបានថ្លែងបែបនេះ ក្នុងពេលលោកជួបពិភាក្សាការងារជាមួយលោក កៃនុម៉ា យ៉ូស៊ីហ៊ីសា អគ្គនាយកក្រុមហ៊ុនមីនេបៀ មីត្សូមី (Minebea) កាលពីថ្ងៃទី ១៨ ខែធ្នូ ឆ្នាំ ២០២៣ ក្នុងឱកាសលោកចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី ១៥-១៩ ខែធ្នូ ឆ្នាំ ២០២៣ នៅទីក្រុងតូក្យូ ប្រទេសជប៉ុន។
តាមរយៈលទ្ធផលនៃជំនួបនេះ លោក កៃនុម៉ា យ៉ូស៊ីហ៊ីសា បានលើកឡើងពីភាពរីកចម្រើននៃសកម្មភាពអាជីវកម្មរបស់ក្រុមហ៊ុន Minebea និងពីគម្រោងនៃការពង្រីកវិនិយោគរបស់ខ្លួនបន្ថែមទៀតនៅកម្ពុជា ដែលក្នុងនោះលោក ហ៊ុន ម៉ាណែត បានឆ្លើយតបវិញថា រាជរដ្ឋាភិបាលកម្ពុជាបាន និងកំពុងយកចិត្តទុកដាក់នៅក្នុងការធានានិរន្តរភាពនៃបរិយាកាសអំណោយផលសម្រាប់ធុរកិច្ច និងវិនិយោគ តាមរយៈការដាក់ចេញគោលនយោបាយ យន្តការអនុវត្តន៍ និងក្របខ័ណ្ឌគតិយុត្តថ្មីៗព្រមជាមួយនឹងការអភិវឌ្ឍហេដ្ឋារចនាសម្ព័ន្ធតភ្ជាប់ និងឡូជីស្ទិកសំខាន់ៗ។
ក្នុងនោះមានដូចជា ផ្លូវលឿន ផ្លូវដែក និងកំពង់ផែ ជាដើមដើម្បីជួយសម្រួល និងលើកទឹកចិត្តប្រកបដោយភាពអនុគ្រោះនិងភាពទាក់ទាញដល់វិនិយោគិនទាំងក្នុង និងក្រៅស្រុក។
លោកបានបញ្ជាក់ថា៖ «រាជរដ្ឋាភិបាល ក៏កំពុងពិនិត្យលទ្ធភាពក្នុងការបង្កើតសួនឧស្សាហកម្មកម្ពុជា-ជប៉ុន និងការកសាងផែនការមេក្នុងវិស័យឡូជីស្ទិក ដើម្បីប្រែក្លាយកំពង់ផែស្វយ័តក្រុងព្រះសីហនុ ទៅជាកំពង់ផែស្នូលដ៏សំខាន់មួយនៅក្នុងតំបន់។ លើសពីនេះ រាជរដ្ឋាភិបាល នីតិកាលទី៧ នៃរដ្ឋសភា បានប្តេជ្ញាបន្តពង្រឹងបរិស្ថានវិនិយោគនៅកម្ពុជាឱ្យកាន់តែមានភាពបត់បែន ងាយស្រួល និងអំណោយផលបន្ថែមទៀត»។
នៅថ្ងៃទី ១៩ ខែធ្នូ ឆ្នាំ ២០២៣ មុននឹងធ្វើមាតុភូមិនិវត្តន៍មកកាន់ប្រទេសកម្ពុជាវិញ លោកនាយករដ្ឋមន្ត្រី ហ៊ុន ម៉ាណែត ក៏បានចូលរួមជាអធិបតីនៅក្នុងសិក្ខាសាលាវិនិយោគកម្ពុជាឆ្នាំ ២០២៣ ស្តីពីបរិយាកាសវិនិយោគ និងសក្តានុពលនៃការធើ្វធុរកិច្ចនៅកម្ពុជាផងដែរ។
លោកហ៊ុន ម៉ាណែត ពេលជួបភាគីក្រុមហ៊ុនជប៉ុនពីថ្ងៃទី ១៩ ធ្នូ។ រូប STPM
តាមរយៈហ្វេសប៊ុកលោក ហ៊ុន ម៉ាណែត បានបញ្ជាក់ថា៖ «សិក្ខាសាលានេះ នឹងដើរតួសំខាន់ក្នុងការជំរុញលំហូរពាណិជ្ជកម្ម និងវិនិយោគ,កិច្ចសហប្រតិបត្តិការធុរកិច្ច និងនវានុវត្តន៍,ការយោគយល់គ្នាទៅវិញទៅមក និងមិត្តភាពរវាងប្រទេសទាំង ២ កម្ពុជា-ជប៉ុន»។
សិក្ខាសាលានេះក៏មានវិនិយោគិនចូលរួមសរុបប្រមាណជិត ៧០០ នាក់ ក្នុងនោះវិនិយោគិនជប៉ុនចូលរួមដោយផ្ទាល់ និងតាមអនទ្បាញមានប្រមាណជាង ៦០០នាក់ និងវិនិយោគិនកម្ពុជាចំនួនប្រមាណជាង ៨០ នាក់។
លោក លឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងបន្ថែមនៅថ្ងៃទី ១៩ ខែធ្នូថា ការរៀបចំសិក្ខាសាលាវិនិយោគកម្ពុជា ឆ្នាំ ២០២៣ នេះ មានក្រុមហ៊ុនជាច្រើនបានចាប់អាម្មណ៍ខ្លាំងក្នុងការវិនិយោគនៅកម្ពុជា។
លោកបានបញ្ជាក់ថា៖ «យើងឃើញថា សម្តេចធិបតីបានខិតខំទាក់ទាញអ្នកវិនិយោគជប៉ុនឱ្យមកវិនិយោគនៅកម្ពុជា ជាពិសេសទាក់ទាញអ្នកវិនិយោគឱ្យមកបង្កើតតំបន់សេដ្ឋកិច្ចពិសេស ឬការបង្កើតសួនឧស្សាហកម្មកម្ពុជា-ជប៉ុន ដែលជាការវិនិយោគរវាងដៃគូ រដ្ឋ និងឯកជន»។
លោក លឹម ហេង បានបន្ថែមថា ប្រមុខរាជរដ្ឋាភិបាលបានលើកពីការតភ្ជាប់ហេដ្ឋារចនាសម្ព័ន្ធយ៉ាងច្រើននៅកម្ពុជា ដែលបានជំនួយពីប្រទេសជប៉ុន ជាពិសេសការតភ្ជាប់ផ្លូវក្នុងមហាអនុតំបន់ទន្លេមេគង្គ វៀតណាម ថៃ កម្ពុជា ដូចជា ផ្លូវជាតិលេខ ៥ ដើម្បីតភ្ជាប់ទៅខាងថៃ ស្ពានអ្នកលឿង (ស្ពានត្សឹបាស្សា) ទៅខាងវៀតណាម គឺដើម្បីជំរុញឱ្យក្រុមហ៊ុនជប៉ុនគិតគូរពិចារណាលើការវិនិយោគបូក ១។
ដោយឡែក ក្នុងពេលអមដំណើរ លោក ហ៊ុន ម៉ាណែត ចូលរួមកិច្ចប្រជុំកំពូលរំឭកខួបអនុស្សាវរីយ៍លើកទី៥០ នៃទំនាក់ទំនងអាស៊ាន-ជប៉ុន នៅទីក្រុងតូក្យូដែរនោះ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានជួបប្រជុំទ្វេភាគីជាមួយ លោក SAITO Ken រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដើម្បីពិភាក្សាការងារ រឹតចំណងមិត្តភាព និងពង្រឹងកិច្ចសហប្រតិបត្តិការលើវិស័យពាណិជ្ជកម្មរវាងប្រទេសទាំង ២។
យោងតាមក្រសួងពាណិជ្ជកម្មបានឱ្យដឹងថា ជំនួបទ្វេភាគីនេះ ភាគីទាំង ២ បានកត់សម្គាល់លើការសម្រេចបាននូវលំហូរពាណិជ្ជកម្មទ្វេភាគីរវាងកម្ពុជា-ជប៉ុន នាពេលកន្លងមក។
នៅក្នុងន័យនេះ ភាគីទាំង ២ បានពិភាក្សាផ្លាស់ប្ដូរយោបល់ល្អៗដើម្បីពង្រឹង និងជំរុញសកម្មភាពធុរកិច្ច និងលំហូរពាណិជ្ជកម្មបន្ថែមទៀត ជាពិសេសបានបញ្ជាក់ពីភាពចាំបាច់ក្នុងការខិតខំប្រឹងប្រែងបន្ថែមលើការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយអាស៊ាន-ជប៉ុន និងកិច្ចព្រមព្រៀងអាសិបដើម្បីពង្រឹងបន្ថែមនូវកិច្ចសហប្រតិបត្តិការនិងទំនាក់ទំនងសេដ្ឋកិច្ចរវាងប្រទេសទាំង ២។
លោកស្រី ចម និម្មល បានលើកឡើងថា ការចូលរួមពីវិស័យឯកជនរបស់ជប៉ុន ពិតជាមានសារៈសំខាន់ណាស់ក្នុងការអភិវឌ្ឍសេដ្ឋកិច្ចរបស់កម្ពុជា ជាពិសេសក្នុងការបង្កើតឱកាសការងារ និងការធ្វើពិពិធកម្មឧស្សាហកម្ម និងពាណិជ្ជកម្មរបស់កម្ពុជា។
លោកស្រីបានបញ្ជាក់ថា៖ «សូមលើកទឹកចិត្តសហគមន៍ធុរកិច្ច និងវិនិយោគិនជប៉ុនឱ្យធ្វើធុរកិច្ច និងបណ្ដាក់ទុនបន្ថែមទៀតនៅកម្ពុជា ជាពិសេសលើវិស័យដែលរដ្ឋាភិបាលចាត់ទុកថា ជាវិស័យដែលមានតម្លៃបន្ថែមខ្ពស់ដល់សេដ្ឋកិច្ចជាតិដូចជា វិស័យកសិកម្ម និងឧស្សាហកម្មកែច្នៃ វាយនភណ្ឌនិងកម្មន្ដសាល ទេសចរណ៍ ឧស្សាហកម្មច្នៃប្រឌិត ស្រាវជ្រាវ និងអភិវឌ្ឍន៍ ដឹកជញ្ជូន និងឡូជីស្ទិក បច្ចេកវិទ្យាឌីជីថល សេវាហិរញ្ញវត្ថុ និងសេវាអប់រំ ជាពិសេសការបង្កើតតំបន់សេដ្ឋកិច្ចពិសេស និងឧទ្យានឧស្សាហកម្មជាដើម»៕
