លោក សាយ ឈុំ ប្រធានព្រឹទ្ធសភា និងលោក កៅ យុនឡុង អនុប្រធានសភាប្រឹក្សានយោបាយចិន។ រូបថត ព្រឹទ្ធសភា
ភ្នំពេញៈ កម្ពុជា-ចិន តាមរយៈស្ថាប័នសភាបានវាយតម្លៃខ្ពស់ និងបានសម្តែងការពេញចិត្តជាខ្លាំងចំពោះសមិទ្ធផលជាប្រវត្តិសាស្ត្រជាច្រើននៃប្រទេសទាំង២ និងកិច្ចសហប្រតិបត្តិការ «ភាពជាដៃគូយុទ្ធសាស្ត្រគ្រប់ជ្រុងជ្រោយ»និងសហគមន៍វាសនារួមកម្ពុជា-ចិនប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់។
ការវាយតម្លៃខ្ពស់នេះបានធ្វើឡើងតាមរយៈជំនួបរវាងប្រមុខរដ្ឋស្តីទី លោក សាយ ឈុំ ប្រធានព្រឹទ្ធសភា បានទទួលជួបលោក កៅ យុនឡុង (GaoYunlong) អនុប្រធានសភាប្រឹក្សានយោបាយប្រជាជនចិននៃសាធារណរដ្ឋប្រជាមានិតចិន កាលពីថ្ងៃទី២០ ខែធ្នូ ឆ្នាំ ២០២៣ ក្នុងឱកាសដែលលោកបានដឹកនាំគណៈប្រតិភូអញ្ជើញមកបំពេញទស្សនកិច្ចជាផ្លូវការនៅកម្ពុជា។
បើសេចក្តីប្រកាសព័ត៌មានរបស់ព្រឹទ្ធសភាស្តីពីជំនួបនោះលោក សាយ ឈុំ បានវាយតម្លៃខ្ពស់ចំពោះគណៈប្រតិភូ ដែលបានមកបំពេញទស្សនកិច្ចជាផ្លូវការនៅកម្ពុជានាពេលនេះ ពិតជាបានរួមចំណែកដ៏ធំធេងក្នុងការអភិវឌ្ឍចំណងមិត្តភាព សាមគ្គីភាព កិច្ចសហប្រតិបត្តិការរវាងប្រទេស និងសភាទាំង២ ឱ្យកាន់តែរឹងមាំស៊ីជម្រៅថែមទៀត ដែលនាំមកនូវផលប្រយោជន៍ទៅវិញទៅមកសម្រាប់ប្រជាជនទាំង២ ទាំងពេលបច្ចុប្បន្ន និងពេលអនាគត។
លោក សាយ ឈុំ បាន បញ្ជាក់ថា៖ «ឆ្នាំ២០២៣នេះ គឺជា ឆ្នាំមិត្តភាពកម្ពុជា-ចិន និងជាខួបអនុស្សាវរីយ៍លើកទី៦៥ ឆ្នាំ នៃថ្ងៃបង្កើតទំនាក់ទំនងការទូតកម្ពុជា-ចិន។ ប្រទេស និងប្រជាជនទាំង២ បានរួមគ្នាប្រារព្ធពិធីអបអរសាទរជាច្រើន ដើម្បីបង្កើនការយល់ដឹងពីវប្បធម៌ និងជីវភាពរស់នៅរវាងគ្នាទៅវិញទៅមក ហើយថ្នាក់ដឹកនាំប្រទេសទាំង២បានកំណត់យកឆ្នាំ២០២៤ ជាឆ្នាំនៃការផ្លាស់ប្ដូរប្រជាជនកម្ពុជា-ចិន»។
លោក សាយ ឈុំ ក៏បានថ្លែងដោយកត់សម្គាល់ផងដែរថា តាមរយៈកិច្ចព្រមព្រៀងនានា កម្ពុជាបាននិងកំពុងទទួលនូវប្រយោជន៍ដ៏ធំធេងសម្រាប់អភិវឌ្ឍសង្គម-សេដ្ឋកិច្ចលើគ្រប់វិស័យ ហើយតាមរយៈការជួយឧបត្ថម្ភគាំទ្រពីសភា ប្រឹក្សានយោបាយប្រជាជនចិនដល់ព្រឹទ្ធសភាកម្ពុជា ក៏បានរួមចំណែកដ៏ខ្លាំងក្លាដល់លើកកម្ពស់សមត្ថភាពស្ថាប័ន ក៏ដូចជាលើកកម្ពស់សមត្ថភាពមន្ត្រីរាជការដែលធ្វើការនៅក្នុងអគ្គលេខាធិការដ្ឋានព្រឹទ្ធសភាផងដែរ។
តាមរយៈសេចក្តីប្រកាសនោះដែរ លោក កៅ យុនឡុង បានវាយតម្លៃខ្ពស់ ចំពោះសមិទ្ធផលយ៉ាងច្រើននៃទំនាក់ទំនងចិន-កម្ពុជា ដែលឆ្លុះបញ្ចាំងពីមិត្តភាពដែកថែប តាមរយៈការជួបតំណាងសមាគម និងប្រជាជននៅមូលដ្ឋាន។
ក្នុងនាមគណៈប្រតិភូ លោកបានថ្លែងអំណរគុណយ៉ាងជ្រាលជ្រៅចំពោះកម្ពុជាដែលបានគាំទ្រផលប្រយោជន៍ស្នូលរបស់ចិន និងគាំទ្រចិននៅលើឆាកអន្តរជាតិ ព្រមទាំងគាំទ្រដល់គំនិតផ្តួចផ្ដើមផ្លូវ និងខ្សែក្រវាត់។ ជាមួយគ្នានោះលោកសង្ឃឹមថា ការផ្លាស់ប្ដូររវាងព្រឹទ្ធសភាកម្ពុជា និងសភាប្រឹក្សា នយោបាយប្រជាជនចិន រវាងសង្គមស៊ីវិល និងរវាងសហគ្រាសនៃប្រទេសទាំង២ កាន់តែត្រូវបានពង្រឹងពង្រីកឱ្យរឹងមាំ និងល្អប្រសើរថែមទៀត។
លោក កៅ យុនឡុងក៏បានលើកឡើងពីគោលបំណងចំនួន៣ នៃដំណើរទស្សនកិច្ចនាពេលនេះផងដែរ ដោយក្នុងនោះ១.ដើម្បីចូលរួមអនុវត្តជាក់ស្ដែងនៃការជំរុញទំនាក់ទំនងចិន-កម្ពុជា និងការជំរុញការកសាងសហគមន៍ជោគវេសនារួម ចិន-កម្ពុជា ឱ្យកាន់តែស៊ីជម្រៅ។ ២. ពង្រឹងពង្រីកទំនាក់ទំនង និងកិច្ចសហប្រតិបត្តិការរវាងព្រឹទ្ធសភាកម្ពុជា និងសភាប្រឹក្សានយោបាយប្រជាជនចិន និង៣.ចូលរួមការដាក់ដំណើរការកិច្ចសហប្រតិបត្តិការកម្ពុជានិងចិន ដើម្បីផលប្រយោជន៍ប្រជាជនក្រោមក្របខ័ណ្ឌប្រតិបត្តិការជំរុញការតភ្ជាប់ប្រជាជននិងប្រជាជនតាមផ្លូវសូត្រ។
សូមជម្រាបដែរថា នៅថ្ងៃទី២០ ខែធ្នូ លោក កៅ យុនឡុង (GaoYunlong) ក៏បានចូលរួមសម្តែងការគួរសម និងពិភាក្សាការងារជាមួយនឹងលោកនាយករដ្ឋមន្ត្រី ហ៊ុន ម៉ាណែត ផងដែរ៕
