ពិធីសម្ដែងវប្បធម៌ ដើម្បីពង្រីកទំនាក់ទំនង និងលើកកម្ពស់វប្បធម៌កម្ពុជា-ចិន។ រូបថត ក្រសួងវប្បធម៌
ភ្នំពេញៈ កម្ពុជា-ចិន បានរៀបចំព្រឹត្តិការណ៍ «សប្តាហ៍ផ្លាស់ប្តូរវប្បធម៌ និងភាពយន្តកម្ពុជា-ចិន ឆ្នាំ ២០២៣» ដើម្បីរួមចំណែកលើកកម្ពស់ចំណងមិត្តភាព និងកិច្ចសហប្រតិបត្តិការជុំវិញវិស័យវប្បធម៌រវាងប្រទេសទាំង ២ ជាពិសេសលើវិស័យភាពយន្ត សំដៅបង្កើនទំនាក់ទំនង និងការយល់ដឹងរវាងប្រជាជន និងប្រជាជន ស្របពេលប្រារព្ធខួបលើកទី ៦៥ នៃទំនាក់ទំនងការទូតទ្វេភាគី។
ព្រឹត្តិការណ៍នេះរៀបចំឡើងរយៈពេល ២ ថ្ងៃ ពីថ្ងៃទី ១៩ ដល់ថ្ងៃទី ២០ ខែធ្នូ ឆ្នាំ ២០២៣ នៅទីក្រុងសៀកមិន ខេត្តហ្វូជៀន ដោយភាគីកម្ពុជា លោកហាប់ ទូច រដ្ឋលេខាធិការប្រចាំការ បានដឹកនាំគណៈប្រតិភូផលិតករ និងសិល្បករភាពយន្តកម្ពុជាចូលរួមក្នុងកម្មវិធីនេះ។ នេះបើយោងតាមការប្រកាសពីក្រសួងវប្បធម៌ និងវិចិត្រសិល្បៈនៅថ្ងៃទី ២១ ខែធ្នូ។
ប្រភពដដែលបានឱ្យដឹងថា ព្រឹត្តិការណ៍នេះសហការរៀបចំដោយរដ្ឋបាលក្រុងសៀកមិន រួមនឹងគណៈកម្មការរៀបចំមហោស្រពភាពយន្តអាស៊ីកម្ពុជា និងនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ គាំទ្រដោយការិយាល័យភាពយន្តប្រចាំខេត្តហ្វូជៀន ការិយាល័យភាពយន្តទីក្រុងសៀកមិន និងសាលាភាពយន្តនៃសាកលវិទ្យាល័យសៀកមិន។
ក្នុងកម្មវិធីនេះ គេបានចាក់ខ្សែភាពយន្តកម្ពុជាចំនួន ៤ ចំណងជើង ជាសាធារណៈ តាមរោងភាពយន្តនានានៅទីក្រុងសៀកមិននេះ ហើយក៏មានការរៀបចំពិព័រណ៍វត្ថុសិល្បៈខ្មែរថែមទៀតផង។
ក្រៅពីនេះ គណ:ប្រតិភូកម្ពុជាក៏បានធ្វើទស្សនកិច្ចនៅសាលាភាពយន្ត នៃសាកលវិទ្យាល័យសៀកមិន ព្រមទាំងមានកិច្ចពិភាក្សាស្តីពីឱកាស បញ្ហាប្រឈម នៃការធ្វើសហផលិតកម្ម និងការរីកចម្រើននៃការសម្តែងភាពយន្ត។
ទន្ទឹមនឹងនេះ លោក ហាប់ ទូច លើកឡើងថា៖«ការរៀបចំសប្តាហ៍ផ្លាស់ប្តូរភាពយន្ត និងវប្បធម៌កម្ពុជា-ចិននៅទីក្រុងសៀកមិន Xiamen នាពេលនេះ គឺជាព្រឹត្តិការណ៍ដ៏សំខាន់មួយទៀត ក្នុងការលើកកម្ពស់ចំណងមិត្តភាព និងកិច្ចសហប្រតិបត្តិការលើវិស័យវប្បធម៌រវាងកម្ពុជា-ចិន។
លោកថ្លែងទៀតថា កម្មវិធីនេះក៏ជាការផ្តល់ឱកាសដល់អ្នកនៅក្នុងវិស័យភាពយន្តនៃប្រទេសទាំង ២ អាចបង្កើតការវិនិយោគមួយរួមគ្នា ការផ្លាស់ប្តូរបទពិសោធន៍គ្នា ផលិតភាពយន្តរួមគ្នា ដើម្បីជាប្រយោជន៍លើការបង្កើនការយល់ដឹងរវាងប្រជាជន និងប្រជាជន តាមរយៈខ្សែភាពយន្ត ក៏ដូចជាការពង្រឹងទំនាក់ទំនងផ្នែកវប្បធម៌។
លោក ឈត ប៊ុនថង មន្ត្រីស្រាវជ្រាវផ្នែកទំនាក់ទំនង អប់រំ ទេសចរណ៍ និងវប្បធម៌ នៃរាជបណ្ឌិត្យសភាកម្ពុជា ថ្លែងថា កាលណាទំនាក់ទំនងផ្នែកនយោបាយ និងការទូត រវាងកម្ពុជា និងចិនល្អ ទំនាក់ទំនងពាណិជ្ជកម្ម វប្បធម៌ សិល្បៈ ប្រជាជន និងប្រជាជន នឹងអមទៅជាមួយ ខណៈទំនាក់ទំនងសង្គមវប្បធម៌ក៏មានភាពសំខាន់ដែរ ហើយការបង្កើតកម្មវិធី«សប្តាហ៍ផ្លាស់ប្តូរវប្បធម៌ និងភាពយន្តកម្ពុជា-ចិន ឆ្នាំ ២០២៣» គឺជាការបង្កើតលទ្ធភាពឱ្យអ្នកជំនាញវិស័យភាពយន្តបង្កើនការស្វែងយល់ពីគ្នា ចែករំលែកជំនាញគ្នា និងបង្កើនទំនាក់ទំនងគ្នាកាន់តែជិតស្និទ្ធ។
លោកថ្លែងថា៖«បើនិយាយពីវិស័យវប្បធម៌ កម្ពុជា និងចិនគឺខ្លាំងដូចគ្នា សម្បូរមរតកវប្បធម៌ ដូចគ្នា ដែលការបង្កើតកម្មវិធីនេះ ធ្វើឱ្យអ្នកជំនាញរវាងប្រទេសទាំង ២ កាន់តែស្និទ្ធស្នាលគ្នា ហើយក៏បង្កើនទំនាក់ទំនងរវាងប្រជាជន និងប្រជាជន។ ចិនអាចជួយឱ្យទីផ្សារភាពយន្តកម្ពុជាមានភាពទូលំទូលាយលើឆាកអន្តរជាតិ ព្រោះចិនពូកែណាស់លើវិស័យភាពយន្តនេះ»។
លោក ប៉ុក បូរ៉ាក់ ប្រធាននាយកដ្ឋានភាពយន្តខ្មែរនៃក្រសួងវប្បធម៌ ថ្លែងថា៖ «យើងឃើញមានសកម្មភាពជាច្រើនក្នុងវិស័យវប្បធម៌ ទាំងក្នុងវិស័យភាពយន្តរវាងកម្ពុជា និងចិន ក្នុងរយៈពេលប៉ុន្មានខែចុងក្រោយនេះ ដែលយើងផ្តោតជាសំខាន់លើការផ្លាស់ប្តូរភាពយន្ត ការផ្សាយភាពយន្តចិននៅកម្ពុជា ការផ្សាយភាពយន្តកម្ពុជានៅចិន ហើយយើងបង្កើតឱកាសវិនិយោគផ្សេងៗផងដែរ ជាពិសេសការបង្កើតធនធនមនុស្សក្នុងវិស័យភាពយន្ត៕
