ការប្រកួតរវាងក្រុមព្រះខ័នរាជស្វាយរៀង(អាវខៀវ)និងក្រុមភ្នំពេញក្រោន(អាវស)កាលពីថ្ងៃទី២៣ ធ្នូ ។រូបថត CPL
ភ្នំពេញៈ ក្រុមព្រះខ័នរាជស្វាយរៀងនៅតែអាចរក្សាភាពខ្លាំងក្នុងការបន្តយកឈ្នះលើក្រុមវិសាខាសម្រាប់ការប្រកួតជើងទី២ នៃលីគកំពូលកម្ពុជា ចំណែកក្រុមអង្គរថាយហ្គឺរ ក៏ដណ្តើមបាន៣ពិន្ទុដ៏មានន័យនៅក្រៅផ្ទះ ប៉ុន្តែក្រុមកងយោធពលខេមរភូមិន្ទ និងក្រុមបឹងកេត មិនអាចរកបានគ្រាប់បាល់ដូចគ្នា សម្រាប់ការជួបគ្នាជាលើកទី២ នារដូវកាលថ្មី ឆ្នាំ២០២៣-២០២៤។
យ៉ាងណាក៏ដោយ ការយកឈ្នះលើក្រុមភ្ញៀវវិសាខា ៤-៣ ដែលត្រូវធ្វើនៅកីឡដ្ឋានខេត្តស្វាយរៀងកាលពីយប់ថ្ងៃទី២៣ ខែធ្នូ កន្លងទៅគឺហាក់មិនបានបំពេញតាមការចង់បានរបស់លោក Pep Muñoz នោះទេ ព្រោះតាមរយៈការប្រកួតជាក់ស្តែងនោះ លោកបានមើលឃើញថា ក្រុមព្រះខ័នរាជស្វាយរៀង គួរតែអាចយកឈ្នះលើក្រុមវិសាខា ត្រឹមការប្រកួតដ៏អំណោយផលនៅដើមតង់ទី១ ដែលស្វាយរៀងមានឱកាសជាច្រើន តែរកបានត្រឹម៣គ្រាប់។
លោក Pep Muñoz បាននិយាយថា៖ «យើងត្រូវចែកការប្រកួតនេះជា២ផ្នែក គឺទី១ វាទាក់ទងជាមួយក្រុមរបស់យើងផ្ទាល់ដែលត្រូវបញ្ចប់ការប្រកួតតាំងពីតង់ទី១ ដោយសារយើងមានឱកាសច្រើនក្នុងការបញ្ជូនបាល់ឱ្យគ្នា នៅតាមតំបន់ដែលយើងចង់បាន ហើយយើងក៏គ្រប់គ្រងបាល់បានច្រើនទៀត។ នេះជាចំណុចសំខាន់ ហើយប្រសិនបើយើងធ្វើបានល្អជាងនេះទៀត គឺយើងអាចនឹងបញ្ចប់ការប្រកួតតាំងពីដើមតង់»។
ចំណែកផ្នែកទី២ លោក Pep Muñoz បានទទួលស្គាល់ថា វិសាខា ជាក្រុមធំ និងលេងបានល្អ ពិសេសជាក្រុមដែលមិនចេះបោះបង់ អ៊ីចឹងហើយចូលដល់តង់ទី២ក្រុមទាំង២ មានភាពស្វិតស្វាញដូចគ្នាដែលធ្វើឱ្យការប្រកួតនេះមានភាពប្រទាញប្រទង់គ្នារហូតដល់នាទីចុងក្រោយ ទើបអាចឈ្នះបាន៣ពិន្ទុ មុនពេលលីគកំពូលកម្ពុជា ត្រូវសម្រាករយៈពេលខ្លីដើម្បីទុកពេលឱ្យក្រុមជម្រើសជាតិកម្ពុជាត្រៀមខ្លួនសម្រាប់ការប្រកួតមិត្តភាពជាមួយក្រុមជម្រើសជាតិកាតា នៅថ្ងៃទី៣១ ខែធ្នូ ឆ្នាំ២០២៣។
គ្រូបង្វឹកអេស្ប៉ាញរូបនេះ បានបញ្ជាក់ថា៖ «ការប្រកួតនេះ មានចំណុចមួយចំនួនដែលយើងមិនអាចគ្រប់គ្រងបានច្រើន ដោយសារយើងឃើញតំបន់ទំនេរលឿនពេក ហើយកីឡាករចេះតែចង់លេងទៅមុខលឿន ក៏ប៉ុន្តែចុងក្រោយកីឡាកររបស់យើង ជាពិសេសកីឡាករវ័យក្មេងដែលដាក់ឱ្យចូលលេង គឺលេងដោយគុណភាពនិងជួយឱ្យក្រុមទទួលបានជ័យជម្នះ ហើយខ្ញុំសូមជូនពរចំពោះការខិតខំប្រឹងប្រែងរបស់ពួកគាត់ នៅក្នុងការប្រកួតដ៏សំខាន់មួយនេះ»។
តាមរយៈការប្រកួត កាលពីថ្ងៃសៅរ៍នោះ ក្រុមម្ចាស់ផ្ទះ ព្រះខ័នរាជស្វាយរៀង បានបង្កើតឱកាសជាច្រើននៅក្នុងតង់ទី១ ហើយខ្សែប្រយុទ្ធរបស់កាណាដា Marcus Warren Haber អាចរកបាន៣គ្រាប់តែម្នាក់ឯង គឺការស៊ុតបញ្ចូលទីនៅនាទីទី៨ និងការទាត់បាល់ពិន័យ ១១ម៉ែត្រ បានសម្រេចនៅនាទីទី១២ ហើយ១គ្រាប់ទៀត ជាការលោតតែតបញ្ចូលទីយ៉ាងស្អាតពីការលើកបាល់ចេញពីជ្រុងរបស់ប្រាក់ មុន្នីឧត្តម នៅនាទីទី២២។
បន្ថែមលើគ្រាប់បាល់នាំមុខ ៣-០ នេះ ក្រុមម្ចាស់ផ្ទះស្វាយរៀង ក៏បានបង្កើតឱកាសមាសជាច្រើនទៀតផងដែរ ប៉ុន្តែពួកគេ មិនអាចរកបានគ្រាប់បាល់បន្ថែមទៅតាមការចង់បានរបស់លោកPep Muñoz។ ផ្ទុយទៅវិញ ក្រុមស្វាយរៀងបានរហូត២គ្រាប់វិញនៅនាទីទី៣៨ ដែលជាការស៊ុតបញ្ចូលទីរបស់ខ្សែប្រយុទ្ធទីម័រខាងកើត Barreto De Lima Mouzinhoនិងគ្រាប់បាល់ទាត់ហ្វ្រីឃីករបស់ខ្សែប្រយុទ្ធ ស៊ិន កក្កដា នៅនាទីទី៤៤។
ឈានចូលតង់ទី២ កីឡាករ ស រតនា បានអូសបាល់រំលងខ្សែការពារទាំង២នាក់របស់ក្រុមស្វាយរៀងទាំងលំបាក រួចស៊ុតបញ្ចូលទី១គ្រាប់ទៀត ដើម្បីជួយឱ្យក្រុមវិសាខា អាចតាមស្មើក្រុមស្វាយរៀង ៣-៣ នៅនាទីទី៧៣។ តែទោះបីជាយ៉ាងណា នៅក្នុងការប្រកួតប្រជែងគ្នាដ៏តានតឹងនេះ ខ្សែប្រយុទ្ធប្រេស៊ីល ដែលដាក់ឱ្យចូលលេងនៅនាទីទី៦៥ Iago Bento Fernandesបានស៊ុតជើងឆ្វេងពីចម្ងាយបញ្ចូលទីល្អបំផុតនៅនាទីទី៩០+៥ ជួយឱ្យក្រុមស្វាយរៀង ឈ្នះ វិសាខា ៤-៣ យ៉ាងរំភើបបំផុត។
ជាមួយការដណ្តើមបាន៣ពិន្ទុដ៏មានន័យពីក្រុមវិសាខា នេះ បានជួយឱ្យក្រុមព្រះខ័នរាជស្វាយរៀង បន្តឈរនៅលេខរៀងទី១ ដោយមាន៣៧ពិន្ទុ ចំណែកក្រុមវិសាខា បន្តឈរនៅលេខ៣ មាន២៦ពិន្ទុដដែល។ ជាមួយគ្នានេះ ក្រុមបឹងកេត បានត្រឹមស្មើ ០-០ ជាមួយក្រុមម្ចាស់ផ្ទះកងយោធពលខេមរភូមិន្ទុ ប៉ុន្តែក្រុមអង្គរថាយហ្គឺរ បានយកឈ្នះក្រុមម្ចាស់ផ្ទះព្រៃវែងអេហ្វស៊ី ៣-២ ហើយនេះជាជ័យជម្នះលើកទី៤ ក្នុងចំណោមការប្រកួតទាំង១៥លើករបស់ពួកគេនៅលីគកំពូលកម្ពុជា នារដូវកាលថ្មីនេះ៕
