លោក ឃួង ស្រេង ក្នុងពិធីប្រកាសចូលកាន់តំណែងអភិបាលថ្មីនៃខណ្ឌមានជ័យកាលពីថ្ងៃទី២៥ធ្នូ។ រូបថត រដ្ឋបាលរាជធានីភ្នំពេញ
ភ្នំពេញៈអភិបាលរាជធានីភ្នំពេញ លោក ឃួង ស្រេង បានជំរុញឱ្យអភិបាលខណ្ឌ ត្រូវខិតខំបំពេញការងារ ដើម្បីថែរក្សាសន្តិសុខ សុវត្ថិភាពជូនប្រជាពលរដ្ឋនៅក្នុងមូលដ្ឋាន ជាពិសេស គឺពង្រឹងការអនុវត្តគោលនយោបាយភូមិសង្កាត់មានសុវត្ថិភាពឱ្យមានប្រសិទ្ធភាព។
ការជំរុញបែបនេះ ធ្វើឡើងក្នុងពិធីប្រកាសចូលកាន់តំណែងលោក សេង គន្ធ អភិបាលថ្មីនៃខណ្ឌមានជ័យ ជំនួសលោក ហែម ដារិទ្ធ ដែលត្រូវបានតែងតាំងជាអភិបាលរងខេត្តព្រះសីហនុ កាលពីថ្ងៃទី២៥ ខែធ្នូ ឆ្នាំ២០២៣។
លោក ឃួង ស្រេង បានថ្លែងក្នុងពិធីនោះថា អភិបាលខណ្ឌ បើទោះបីជាពូកែយ៉ាងណាក៏ដោយ បើមិនមានការចូលរួមសហការ ពីមេប៉ុស្តិ៍ អធិការ និងចៅសង្កាត់ទេ គឺមិនអាចទទួលបានជោគជ័យលើកិច្ចការងារបម្រើរាជរដ្ឋាភិបាល និងប្រជាពលរដ្ឋឡើយ ដូច្នេះត្រូវតែសហការជាមួយគ្នាឱ្យបានខ្លាំងក្លាទើបសម្រេចបានលទ្ធផលល្អប្រសើរ។
លោកបានបន្តថា អភិបាលខណ្ឌ ត្រូវបំពេញការងារឱ្យអស់កម្លាំងកាយ កម្លាំងចិត្ត អស់ចំណេះដឹង និងឱ្យអស់ពីសមត្ថភាព ដើម្បីដឹកនាំមូលដ្ឋានរបស់ខ្លួនទទួលបានលទ្ធផលល្អប្រសើរ។
លោក ឃួង ស្រេង បានមានប្រសាសន៍ថា៖ «អភិបាលខណ្ឌថ្មី ក៏ដូចជាខណ្ឌផ្សេងៗ ត្រូវថែរក្សាសន្តិសុខ សុវត្ថិភាពជូនប្រជាពលរដ្ឋនៅក្នុងមូលដ្ឋាន ជាពិសេសគឺអនុវត្តឱ្យបាននូវគោលនយោបាយ ភូមិសង្កាត់មានសុវត្ថិភាពហើយត្រូវបន្តការរឹតបន្តឹងច្បាប់ចរាចរណ៍ និងបញ្ហាគ្រឿងញៀនផងដែរ»។
លោកក៏បានណែនាំឱ្យអភិបាលខណ្ឌត្រូវសហការគ្រប់ថ្នាក់ គ្រប់ស្ថាប័ន ដើម្បីបម្រើប្រជាពលរដ្ឋ ជាពិសេស គឺការដោះស្រាយទំនាស់ដីធ្លីក្រៅប្រព័ន្ធតុលាការដោយអនុវត្តតាមគោលនយោបាយឈ្នះ ឈ្នះ គឺឈ្នះទាំងសងខាង។
ជាមួយគ្នានោះដែរ លោក សេង គន្ធ បានប្តេជ្ញាចិត្តបំពេញការងារឱ្យខ្លាំងក្លាទ្វេដង ដើម្បីបំពេញការងារជូនរាជរដ្ឋាភិបាល រដ្ឋបាលរាជធានីភ្នំពេញ ដោយប្តេជ្ញាចិត្តគោរពរដ្ឋធម្មនុញ្ញ ច្បាប់ ព្រះរាជក្រឹត អនុក្រឹត្យ សារាចរ ប្រកាស ដីកា សេចក្តីសម្រេច បទបញ្ជា និងលិខិតបទដ្ឋានគតិយុត្តជាធរមានរបស់រាជរដ្ឋាភិបាល ដើម្បីធានាការពារសន្តិភាព និងស្ថិរភាពនយោបាយ។
លោកបានបញ្ជាក់ថា៖ «ក្នុងនាមជាអភិបាលខណ្ឌមានជ័យ ខ្ញុំសូមប្ដេជ្ញាបម្រើប្រជាពលរដ្ឋ ទាំងថ្ងៃ ទាំងយប់ ដោយក្តីស្មោះស្ម័គ្រ និងប្តេជ្ញាការពារដាច់ខាតរាល់សមិទ្ធផលនានារបស់រាជរដ្ឋាភិបាល ជាពិសេស ប្ដេជ្ញាធានាការពាររាជរដ្ឋាភិបាលស្របច្បាប់ ដោយមិនអនុញ្ញាតឱ្យកម្លាំងណាមួយ ធ្វើឱ្យប៉ះពាល់ដល់ដំណើរការដឹកនាំជាតិ មាតុភូមិបានឡើយ»៕
