ក្រុមបាល់ទាត់ជម្រើសជាតិពេលកំពុងហ្វឹកហាត់នៅថ្ងៃទី២៨ ធ្នូ ដើម្បីត្រៀមទៅប្រកួតនៅប្រទេសកាតា ។ រូបថត FFC
ភ្នំពេញៈ ក្រុមបាល់ទាត់ជម្រើសជាតិកម្ពុជាបានធ្វើដំណើរចាកចេញពីមាតុប្រទេស ហើយហោះបោះពួយទៅកាន់រាជធានីដូហា ប្រទេសកាតា នៅរសៀលថ្ងៃទី ២៨ ខែធ្នូ ដើម្បីប្រកួតសាកល្បងសមត្ថភាពអន្តរជាតិជាមួយ ក្រុមជម្រើសជាតិកាតា នៅថ្ងៃទី៣១ ខែធ្នូ ឆ្នាំ២០២៣។
កីឡាករចំនួន ២៤ នាក់ ដែលភាគច្រើនជាអ្នកចំណូលថ្មី និងកីឡាករវ័យក្មេង ត្រូវបានកោះហៅឱ្យចូលប្រមូលផ្តុំហ្វឹកហាត់ជាក្រុមជម្រើសជាតិកម្ពុជានៅពហុកីឡដ្ឋានជាតិអូឡាំពិក កាលពីថ្ងៃទី២៦ ខែធ្នូ សម្រាប់ត្រៀមការប្រកួតសាកល្បងសមត្ថភាពជាមួយក្រុមជម្រើសជាតិកាតាលើកនេះ ប៉ុន្តែក្នុងនោះ គ្មានវត្តមានខ្សែប្រយុទ្ធ សៀង ចន្ធា ដែលកំពុងប្រកបអាជីពនៅលីគទី២របស់កាតានោះទេ ហើយខ្សែប្រយុទ្ធវ័យក្មេង លឹម ពិសុទ្ធ និងមិត្តរួមក្រុមរបស់គេ អ៊ន ចាន់ប៉ូលីន ក៏គ្មានវត្តមានដែរ។
ជាមួយគ្នានេះ ខ្សែការពារ ជួន ចាន់ចាវ ត្រូវបានដកឈ្មោះចេញវិញ បន្ទាប់ពីមានរបួសកជើងខាងស្តាំធ្ងន់ធ្ងរ និងទើបបានវះកាត់កាលពីពេលថ្មីៗនេះ ចំណែកខ្សែការពារ ទេស សម្បត្តិ និងខ្សែប្រយុទ្ធ ញាណ សុស៊ីដាន ក៏បានសុំដកខ្លួនចេញ ព្រោះមានធុរៈផ្ទាល់ខ្លួន ហើយការអវត្តមានរបស់អ្នកទាំង៣នេះ ត្រូវបានដាក់ជំនួសដោយ សារ៉េត គ្រីយ៉ា, លឹម អារុណរ៉េយមិននិង ហួត វ៉ាន់ណេត។
ចំពោះបេក្ខភាពចំនួន២១នាក់ទៀតរួមមានកីឡាករ គង់ លីហ៊ួរ, ផាន សុផេន, ឃាន់ សុបិន, សុះ ស៊ូហាណា, ជា ច័ន្ទដារ៉ា, ម៉ាត់ នូរុណ, វ៉ាន់ តៃឡាម៉ី, ចន្ថា ចន្ទកា, សឿយ វិសាល, ថេឡរ នីកូឡាស់ មឿង, វីរៈ ដារ៉ា, យូឌៃ អូកាវ៉ា, អ៊ុំ វិចិត្រ, ផាច សុជាវីឡា, ឡុង ភារ៉ាត, ហ៊ុល គឹមហ៊ុយ, សារ ទី, ស រតនា, ស៊ិន កក្កដា, ស៊ិន សុផាណាត់ និងកីឡាករ តែម វ៉ាន់ដា។
ជាមួយសមាសភាពកីឡាករទាំងនេះលោក Felix Dalmasគ្រូបង្គោលក្រុមជម្រើសជាតិកម្ពុជាបាននិយាយថា៖ «កីឡាករមួយចំនួនដែលយើងបានកោះហៅ មិនសូវបានបង្ហាញខ្លួននៅក្នុងលីគទេ ប៉ុន្តែខ្ញុំបានដឹងពីសក្តានុពលរបស់ពួកគាត់ ហើយប្រជាជនកម្ពុជា គួរតែសរសើរ និងលើកទឹកចិត្តដល់ពួកគាត់ដែលមានឆន្ទៈចូលរួមតំណាងឱ្យជាតិ ដោយសុខចិត្តឃ្លាតឆ្ងាយពីក្រុមគ្រួសារនៅថ្ងៃឆ្លងឆ្នាំ ក៏ព្រោះតែពួកគាត់ចង់នាំយកនូវភាពសប្បាយរីករាយ និងមោទនភាពជូនកម្ពុជា និងអ្នកគាំទ្រ»។
យ៉ាងណាក៏ដោយ លោក Felix Dalmasបានបង្ហាញទុក្ខក្រៀមក្រំចំពោះបញ្ហារបួស ជួន ចាន់ចាវ ដោយលោកសង្ឃឹមថា ខ្សែការពារដ៏ល្អម្នាក់នេះ នឹងឆាប់បានជាសះស្បើយ ដើម្បីអាចវិលមកកាន់ទីលានវិញ ហើយលោក ក៏បានបង្ហាញការសោកស្តាយ ដែលកីឡាករសំខាន់ៗមួយចំនួនទៀត មិនបានទៅចូលរួមការប្រកួតសាកល្បងជាមួយក្រុមកម្រិតពិភពលោកដូចជាកាតាលើកនេះ។
លោក Felix បានបញ្ជាក់ថា៖ «វាមិនមែនតែ ជួន ចាន់ខាវ ទេ ដែលមិនបានទៅចូលរួមប៉ុន្តែ អ៊ន ចាន់ប៉ូលីន, លឹម ពិសុទ្ធ, សៀង ចន្ធា និងកីឡាករសំខាន់ៗមួយចំនួន សុទ្ធតែមិនមានសំណាងល្អដូចគ្នា ប៉ុន្តែវាក៏ជាឱកាសដ៏ល្អមួយសម្រាប់កីឡាករចំណូលថ្មី និងកីឡាករវ័យក្មេងរបស់យើងដែលត្រូវបង្ហាញពីសមត្ថភាពដើម្បីយើងមានឱកាសបានមើលទៅលើការលេងរបស់ពួកគាត់ និងជ្រើសរើសពួកគេព្រោះយើងចង់ឱ្យមានជម្រើសច្រើនក្នុងការជ្រើសរើសកីឡាករចូលជម្រើសជាតិ»។
គ្រូបង្វឹកអាហ្សង់ទីនរូបនេះ បានបន្ថែមថា៖ «ការអវត្តមានកីឡាករសំខាន់ៗ វាអាចនឹងផ្តល់ការលំបាកសម្រាប់យើងដែរ ព្រោះការបើកការប្រយុទ្ធរបស់យើងត្រូវលេងទាំងតំបន់លើ ហើយក៏ត្រូវបង្កើតឱកាសពីខាងក្រោមទៅផងដែរ ប៉ុន្តែវាជាឱកាសល្អចំពោះកីឡាករចំណូលថ្មី ក្នុងការទទួលបានបទពិសោធន៍ ដែលយើងត្រូវប៉ះ កាតា ជាក្រុមកម្រិតពិភពលោក ដែលធ្លាប់បានចូលរួមការប្រកួតបាល់ទាត់ពិភពលោក និងធ្លាប់បានយកឈ្នះក្រុមជម្រើសជាតិជប៉ុន ទៀត»។
បន្ថែមលើនេះ លោក Felix បានឱ្យដឹងដែរថា ការប្រកួតសាកល្បងសមត្ថភាពអន្តរជាតិជាលក្ខណៈបិទទ្វារ ជាមួយក្រុមជម្រើសជាតិកាតា នឹងជួយឱ្យកីឡាកររបស់កម្ពុជា ទទួលបានបទពិសោធន៍ និងចំណេះដឹងថ្មីៗបន្ថែមទៀតដើម្បីយកមកអភិវឌ្ឍខ្លួនឯងបន្ថែម ព្រោះសមាសភាពកីឡាករសំខាន់ៗដែលបានលេងឱ្យក្រុមកាតាក្នុងពេលប្រកួតបាល់ទាត់ពិភពលោកឆ្នាំ២០២២ សុទ្ធតែមានវត្តមានសម្រាប់ការប្រកួតសាកល្បងជាមួយក្រុមជម្រើសជាតិកម្ពុជាលើកនេះ។
លោក Felix បានបញ្ជាក់ថា៖ «ពិតណាស់ ការប្រកួតប្រជែងនៅលីគ ធ្វើឱ្យកីឡាកររបស់យើងមានការរីកចម្រើនច្រើនដែរ ប៉ុន្តែយើងនៅមិនទាន់ឈានដល់កម្រិតពិភពលោកទេ អ៊ីចឹងតាមរយៈការប្រកួតនេះ នឹងជួយឱ្យកីឡាករយើងអាចប្រៀបធៀបសមត្ថភាពខ្លួនឯងទៅនឹងកីឡាករកម្រិតពិភពលោកថាតើយើងអាចធ្វើអ្វីបាន ធ្វើអ្វីមិនបាន និងត្រូវតែបន្ថែមអ្វីទៀត អ៊ីចឹងពួកគាត់យល់ពីអ្វីដែលខ្លួនត្រូវការដើម្បីធ្វើឱ្យមានភាពប្រសើរជាងហ្នឹងក្នុងការប្រៀបធៀបខ្លួនឯងទៅនឹងកីឡាករកម្រិតពិភពលោក»៕
