យុវជនម្នាក់កំពុងជិះម៉ូតូ កាត់ពីមុខសាកលវិទ្យាល័យក្រចេះកាលពីថ្ងៃទី១ខែធ្នូឆ្នាំ២០២៣។ ហុង មិនា
ភ្នំពេញៈ សាកលវិទ្យាល័យក្រចេះ គ្រោងបង្កើតឱ្យមានវគ្គបណ្តុះបណ្តាលបច្ចេកទេសកសិកម្មខ្លីៗ ដែលមានរយៈពេលពី១ខែ ទៅ៣ខែ ដោយមិនគិតថ្លៃ ពាក់ព័ន្ធនឹងការដាំដុះស្វាយចន្ទី និងដំណាំផ្សេងៗ ដើម្បីឆ្លើយតបទៅនឹងតម្រូវការរបស់ប្រជាសហគមន៍ក្នុងមូលដ្ឋាន។ នេះជាការថ្លែងរបស់លោក គី វិសាល សាកលវិទ្យាធិការរង នៃសាកលវិទ្យាល័យក្រចេះ។
លោកបានថ្លែងបែបនេះ នៅចំពោះមុខអ្នកសារព័ត៌មានក្នុងពេលទទួលដំណើរទស្សនកិច្ចសារព័ត៌មាន ដែលរៀបចំដោយ ក្រសួងកសិកម្ម រុក្ខាប្រមាញ់ និងនេសាទ និងសហភាពអឺរ៉ុប អំពីខ្សែច្រវាក់ផលិតកម្មស្វាយចន្ទីនៅកម្ពុជា កាលពីថ្ងៃទី១ ខែធ្នូ ឆ្នាំ២០២៣។ ដំណើរទស្សនកិច្ចនេះមាន រយៈពេល៤ថ្ងៃចាប់ពីថ្ងៃទី២៩ ខែវិច្ឆិកា ដល់ថ្ងៃទី២ ខែធ្នូ នៅរាជធានីភ្នំពេញ និងទៅកាន់ខេត្តកំពង់ធំ ក្រចេះ និងខេត្តស្ទឹងត្រែង។
ប្រភពដដែលបានឱ្យដឹងថា ចាប់ពីសម្ពោធដាក់ឱ្យប្រើប្រាស់ជាផ្លូវការក្នុងឆ្នាំ២០១៨ រហូតដល់បច្ចុប្បន្ននេះ សាកលវិទ្យាល័យក្រចេះមិនទាន់ផ្តោតសកម្មលើការពង្រីកកិច្ចសហប្រតិបត្តិការជាមួយសហគមន៍ជុំវិញនៅឡើយទេ បុន្តែ ក្នុងរយៈពេលកន្លងមកនេះ រាល់ពេលមានសិក្ខាសាលា ឬមានវគ្គបណ្តុះបណ្តាលទាក់ទងជាពិសេសលើផ្នែកកសិកម្ម សាលាតែងអញ្ជើញកសិករក្នុងសហគមន៍ឱ្យចូលរួមដើម្បីទទួលយកចំណេះដឹងថ្មីៗ។
លោកថ្លែងថា៖«យើងតែងតែអញ្ជើញនូវកសិករគំរូ ក៏ដូចជាកសិករផ្សេងៗក្នុងសហគមន៍របស់យើង ដើម្បីចូលមកស្តាប់ ទទួលបានចំណេះដឹងថ្មីៗ ជាគុណប្រយោជន៍មួយដែលគាត់ទទួលបានផលប្រយោជន៍ទាំងអស់នេះ ហើយយកទៅផ្សព្វផ្សាយ និងអាចផ្លាស់ប្តូរការធ្វើកសិកម្មនៅសហគមន៍របស់គាត់»។
យ៉ាងណាក៏ដោយ លោកសាកលវិទ្យាធិការរង លើកឡើងថា ជាទស្សនៈវិស័យនៅពេលខាងមុខឆាប់ៗនេះ សាកលវិទ្យាល័យក្រចេះនឹងបង្កើតឱ្យមានវគ្គបណ្តុះបណ្តាលខ្លីៗ អំពីជំនាញដាំដុះស្វាយចន្ទី និងដំណាំសំខាន់ៗផ្សេងៗទៀត ជូនដល់កសិករក្នុងសហគមន៍ ដើម្បីរួមចំណែកផ្តល់ជូនចំណេះដឹង លើកកម្ពស់វិស័យកសិកម្មកម្ពុជា ស្របពេលការធ្វើទំនើបកម្មវិស័យកសិកម្ម របស់រាជរដ្ឋាភិបាល។
លោក គី វិសាល ឱ្យដឹងទៀតថា បច្ចុប្បន្នសាកលវិទ្យាល័យក្រចេះមាន៣មហាវិទ្យាល័យ រួមមាន មហាវិទ្យាល័យក្សេត្រវិទ្យា មហាវិទ្យាល័យកសិឧស្សាហកម្ម និងមហាវិទ្យាល័យទេពកោសល្យជនបទ ព្រមទាំងមាន២វិទ្យាស្ថាន គឺវិទ្យាស្ថានភាសា និងព័ត៌មានវិទ្យា និងវិទ្យាស្ថានមជ្ឈវិទ្យា។
នៅឆ្នាំ២០២៤ ខាងមុខនេះ សាលានឹងពង្រីកនូវកម្មវិធីបណ្តុះបណ្តាលថ្នាក់កម្រិតបច្ចេកទេស ៩បូក៣ ជាពិសេសសម្រាប់សិស្សបោះបង់ការសិក្សាត្រឹមថ្នាក់ទី៩ អាចមកទទួលការសិក្សាដោយមិនគិតថ្លៃ ដែលនៅពេលបញ្ចប់ថ្នាក់បណ្តុះបណ្តាលនេះសិស្សទទួលបានបន្តការសិក្សានៅកម្រិតមហាវិទ្យាល័យបាន ដូចសិស្សបញ្ចប់ថ្នាក់បាក់ឌុប ផងដែរ។
លោក Bryan FORNARI ប្រធានផ្នែកកិច្ចសហប្រតិបត្តិការរបស់ សហភាពអឺរ៉ុប បានបង្ហាញការចាប់អារម្មណ៍ជាខ្លាំងពេលបានចូលទស្សនកិច្ចនៅសាកលវិទ្យាល័យក្រចេះ ក្នុងការពិនិត្យមើលជ្រុង១បន្ថែមទៀត ទាក់ទងនិងវិស័យអប់រំ ដែលមានតួនាទីសំខាន់ក្នុងការបណ្តុះបណ្តាលជំនាញដល់យុវជនជំនាន់ក្រោយ ដើម្បីឱ្យពួកគេទទួលបានការងារល្អ។
លោកថ្លែងថា៖«យើងមើលឃើញថា វិស័យអប់រំ ទាក់ទងទៅនឹងខ្សែច្រវាក់ផលិតកម្មរបស់ស្វាយចន្ទី គឺយើងត្រូវមើលរហូតតាំងពីការផលិត ការកែច្នៃ និងទីផ្សារ ដូចច្នេះការបណ្តុះបណ្តាលជំនាញទៅដល់យុវជនជំនាន់ក្រោយ គឺជួយដល់ខ្សែច្រវាក់តម្លៃទាំងមូលដែលធ្វើឱ្យស្វាយចន្ទី មានការប្រកួតប្រជែងក្នុងទីផ្សាសកល ក៏ដូចជានៅក្នុងតំបន់»។
លោក Guenter wessel ប្រធានពហុគម្រោង GIZ បានឱ្យដឹងថា កម្មវិធីគម្រោងរបស់ GIZ មួយចំនួនបានសហការជាមួយសាកលវិទ្យាល័យក្រចេះ ដោយគាំទ្រដល់សិស្សនិស្សិតធ្វើការសិក្សាស្រាវជ្រាវ ដើម្បីបញ្ចប់នូវការសិក្សាថ្នាក់បរិញ្ញាបត្រ ទោះបីជានៅពេលចាប់ផ្តើមដំណើរការសាកលវិទ្យាល័យនេះ បានជួបបញ្ហាវិបត្តិកូវីដ១៩ ដែលធ្វើឱ្យសកម្មភាពមួយចំនួនមិនអាចរលូនក៏ដោយ។
លោកបន្ថែមថា អង្គការ GIZ និងធ្វើការសហការបន្តក្នុងក្របខ័ណ្ឌគម្រោងថ្មី ដោយមានការគាំទ្រពីសហភាពអឺរ៉ុប ទៅលើសកម្មភាពជាច្រើន ពាក់ព័ន្ធនឹងការកែច្នៃអាហារ និងស្តង់ដាផ្សេងៗទៀត៕
