ជំនួបរវាងលោកហួត ហាក់ និងលោកស្រី Liurka Rodriguez Barrios កាលពីថ្ងៃទី៥ ធ្នូ ។ រូបថត ក្រសួងអធិការកិច្ច
ភ្នំពេញៈកម្ពុជា និងគុយបា បានព្រមព្រៀងគ្នាពង្រឹងកិច្ចសហប្រតិបត្តិការផ្នែកអធិការកិច្ចដោយគ្រោងរៀបចំទស្សនកិច្ចដើម្បីផ្លាស់ប្តូរបទពិសោធន៍គ្នានិងពិនិត្យលទ្ធភាពក្នុងការចុះអនុស្សរណៈនៃការយោគយល់គ្នា(MoU)លើផ្នែកអធិការកិច្ច ខណៈប្រទេសទាំង២មានទំនាក់ទំនងល្អនឹងគ្នាជាង ៦៣ ឆ្នាំមកហើយ។
ការព្រមព្រៀងគ្នាដូច្នេះ ធ្វើឡើងតាមរយៈជំនួបពិភាក្សាការងាររវាងលោកហួត ហាក់ រដ្ឋមន្ត្រីក្រសួងអធិការកិច្ច និងលោកស្រី Liurka Rodriguez Barrios ឯកអគ្គរដ្ឋទូតគុយបាប្រចាំកម្ពុជា កាលពីថ្ងៃទី៥ ខែធ្នូ ឆ្នាំ២០២៣។ នេះបើយោងតាមសេចក្តីប្រកាសព័ត៌មានរបស់ក្រសួងអធិការកិច្ច។
យោងតាមសេចក្តីប្រកាស លោកហួត ហាក់ លើកឡើងប្រាប់សមភាគីគុយបា ពីទំនាក់ទំនងការទូតដ៏ល្អរវាងកម្ពុជានិងគុយបាអស់រយៈពេល៦៣ឆ្នាំមកនេះពោលគឺចាប់តាំងពីឆ្នាំ១៩៦០ ដែលជាចំណែកជួយជ្រោមជ្រែងគ្នានៅលើឆាកអន្តរជាតិ ហើយទំនាក់ទំនងនេះកំពុងបន្តរីកលូតលាស់ថែមទៀត។
លោកបានបន្តថា ប្រទេសទាំង២ មានសហប្រតិបត្តិការគ្នាលើវិស័យអប់រំ កីឡា វប្បធម៌ កសិកម្ម សុខាភិបាល ជាពិសេសគុយបាបានផ្តល់ជំនួយដល់កម្ពុជាក្នុងអំឡុងក្រោយសម័យខ្មែរក្រហម។
លោក ហួត ហាក់ បានអះអាងប្រាប់ភាគីគុយបាថា ៖ «កម្ពុជាមានស្ថានភាពនយោបាយប្រសើរស្ទើរគ្រប់ទិដ្ឋភាព ទាំងនយោបាយ សង្គម សេដ្ឋកិច្ច ដែលអំណោយផលដល់ការអភិវឌ្ឍវិស័យទេសចរណ៍ និងទាក់ទាញការវិនិយោគ»។
សេចក្តីប្រកាសព័ត៌មានបានបញ្ជាក់ដែរថា ភាគីទាំង២ បានព្រមព្រៀងគ្នាពិនិត្យលទ្ធភាពចុះ MoUក្នុងវិស័យអធិការកិច្ចដោយខាងស្ថានទូតគុយបានឹងធ្វើជាស្ពានទំនាក់ទំនងរវាងក្រសួងអធិការកិច្ចរបស់កម្ពុជា និងស្ថាប័នមានសមត្ថកិច្ចប្រហាក់ប្រហែលនៅគុយបាដើម្បីកិច្ចសហប្រតិបត្តិការនេះ។
ប្រភពដដែលបានបន្តថា ភាគីទាំង២ ឯកភាពក្នុងការរៀបចំការផ្លាស់ប្តូរទស្សនកិច្ចរវាងប្រតិភូនៃប្រទេសទាំង២ ដើម្បីសិក្សាផ្លាស់ប្តូរបទពិសោធន៍គ្នាទៅវិញទៅមកលើវិស័យអធិការកិច្ចផងដែរ។
ជុំវិញរឿងនេះ លោកប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានថ្លែងថា ជាការល្អដែលកម្ពុជាមានកិច្ចសហប្រតិបត្តិការនិងរៀនសូត្រពីប្រទេសនានា ប៉ុន្តែចំពោះវិស័យអធិការកិច្ចនេះវិញ លោកថា កម្ពុជានឹងមិនអាចរៀនសូត្រអ្វីច្រើនឡើយពីគុយបាទេ ខណៈគុយបាជាប្រទេសជាប់ចំណាត់ថ្នាក់មិនល្អលើការលើកកម្ពស់អភិបាលកិច្ច ការប្រឆាំងអំពើពុករលួយជាដើម ហើយមិនមែនជាប្រទេសប្រជាធិបតេយ្យទេ។
លោកបានបន្តថា កម្ពុជាគួរបន្ថែមការរៀនសូត្រនិងកិច្ចសហប្រតិបត្តិការផ្នែកអធិការកិច្ចនេះជាមួយបណ្តាប្រទេសប្រកាន់លទ្ធិប្រជាធិបតេយ្យសេរី។
លោកបានបញ្ជាក់ថា៖«សម្រាប់ខ្ញុំ តិច ឬក៏ច្រើន យើងអាចរៀនសូត្រពីគុយបាបានខ្លះលើរឿងអធិការកិច្ចនេះ ប៉ុន្តែយើងទៅរៀនពីប្រទេសកំពុងលំបាកលំបិន ហើយមានចំណាត់ថ្នាក់ទាបលើការលើកកម្ពស់អភិបាល និងប្រឆាំងអំពើពុករលួយតាមបែបប្រជាធិបតេយ្យយើងមិនបានរៀនអ្វីជាដុំកំភួនទេដោយសារនិន្នាការនិងរបបនយោបាយខុសគ្នា»។
រីឯ លោកប៉ិច ពិសី នាយកប្រតិបត្តិការអង្គការតម្លាភាពបានថ្លែងថា កិច្ចសហប្រតិបត្តិការផ្នែកអធិការកិច្ចរវាងប្រទេសទាំង២ជារឿងល្អ ដោយសារកម្ពុជានិងគុយបាមានទំនាក់ទំនងល្អជាប្រពៃណីដែលកិច្ចការចាំបាច់រាជរដ្ឋាភិបាលថ្មីត្រូវបន្តទំនាក់ទំនងនេះ។
យ៉ាងណាក្ដី លោកបានបញ្ជាក់ថា៖«ខ្ញុំយល់ថា គុយបាមិនមែនជាប្រទេសគំរូដែលអាចរៀនសូត្រច្រើនឡើយ ក្នុងការអនុវត្តការងារក្នុងស្ថាប័ន ដោយសារគុយបាមិនមានស្ថិរភាពនយោបាយ ហើយបើពិនិត្យសមត្ថភាពគ្រប់គ្រងស្ថាប័នរដ្ឋ និងអធិការកិច្ចវិញក៏ខ្សោយខ្លាំងដែរ តែយើងអាចរៀនបទពិសោធន៍បរាជ័យវិញ»។
លោកបន្តថា សមត្ថភាពក្នុងការគ្រប់គ្រងស្ថាប័នរដ្ឋនិងការធ្វើអធិការកិច្ចកម្ពុជាគួរបង្កើនការរៀនសូត្រពីប្រទេសជិតខាងនិងបណ្តាប្រទេសប្រជាធិបតេយ្យតួយ៉ាងប្រទេសសិង្ហបុរីជាដើម។
ពាក់ព័ន្ធនឹងការលើកឡើងរបស់មន្ត្រីសង្គមស៊ីវិលនេះ លោក ណុប ចាន់ណារិន អ្នកនាំពាក្យក្រសួងអធិការកិច្ច បានថ្លែងថា គុយបានិងកម្ពុជានឹងរៀនសូត្រពីគ្នាជុំវិញវិស័យអធិការកិច្ចក្នុងកិច្ចសហប្រតិបត្តិការតាមរយៈដំណើរទស្សនកិច្ចជាដើម ថ្វីបើនៅគុយបាមិនមានក្រសួងអធិការកិច្ចក៏ដោយ ប៉ុន្តែមានស្ថាប័នសមត្ថកិច្ចស្រដៀងគ្នា។
លោកបានថ្លែងថា៖«យើងមិនមានអ្វីដែលជាការខាតឬចំណេញនោះទេគឺយើងធ្វើយ៉ាងណាពង្រឹងកិច្ចសហប្រតិបត្តិការ អ្វីដែលយើងមាន អ្វីដែលគេមាន ចែករំលែកដល់គ្នាទៅវិញទៅមក»៕
