កិច្ចប្រជុំពាក់ព័ន្ធនឹងបញ្ហាអ្នកញៀនថ្នាំនៅខេត្ដក្រចេះនាថ្ងៃទី៦ ធ្នូ ។ រូបថត NACD
ក្រចេះៈ អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនលោក នាក់ យុទ្ធា បានស្នើឱ្យអាជ្ញាធរខេត្តក្រចេះរៀបចំចុះស្ថិតិចំនួនអ្នកប្រើគ្រឿងញៀន នៅតាមភូមិ ឃុំ សង្កាត់ ក្នុងខេត្ត ដើម្បីលើកផែនការនិងវិធានការសម្រាប់ព្យាបាល ស្តារនីតិសម្បទា ឬដោះស្រាយបញ្ហាឱ្យបានសមស្របនិងមានប្រសិទ្ធភាព ។
សំណើនេះបានធ្វើឡើងអំឡុងពេលលោក នាក់ យុទ្ធា និងលោកទុយ ប៊ុនសេរីរ័ត្នមុនី អភិបាលរង និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តក្រចេះបានដឹកនាំកិច្ចប្រជុំផ្សព្វផ្សាយបទបញ្ជាគោលការណ៍ណែនាំពាក់ព័ន្ធនានាក្នុងការងារប្រយុទ្ធប្រឆាំងគ្រឿងញៀនដែលបានដាក់ចេញដោយរាជរដ្ឋាភិបាលកន្លងមក និងស្តាប់របាយការណ៍ស្តីពីវឌ្ឍនភាពការងារប្រយុទ្ធប្រឆាំងគ្រឿងញៀនក្នុងខេត្តក្រចេះ កាលពីថ្ងៃទី៦ ខែធ្នូ ឆ្នាំ២០២៣។ នេះបើយោងតាមអគ្គស្នងការដ្ឋាននគរបាលជាតិ។
ប្រភពដដែលបានឱ្យដឹងថា ក្នុងកិច្ចប្រជុំនេះលោក នាក់ យុទ្ធា បានស្នើសុំគណៈកម្មាធិការប្រយុទ្ធប្រឆាំងគ្រឿងញៀនខេត្តក្រចេះបន្តយកចិត្តទុកដាក់និងពិចារណារលើការចាត់ចែងដឹកនាំរៀបចំកិច្ចការមួយចំនួនដើម្បីឱ្យការគ្រប់គ្រងបញ្ហាគ្រឿងញៀនក្នុងខេត្តមានប្រសិទ្ធភាព។
កិច្ចការដែលលោកបានស្នើទាំងនោះរួមមាន អាជ្ញាធរខេត្តត្រូវរៀបចំផែនការសកម្មភាពសម្រាប់ចាត់តាំងអនុវត្តការងារប្រយុទ្ធប្រឆាំងគ្រឿងញៀនឱ្យបានឆាប់តាមស្មារតីនៃការណែនាំរបស់អាជ្ញាធរជាតិប្រយុទ្ធប្រឆាំងគ្រឿងញៀនកាលពីថ្ងៃទី១៥ ខែកញ្ញា ឆ្នាំ២០២៣ ដែលជាកិច្ចការសំខាន់និងត្រូវយកចិត្តទុកដាក់ខ្ពស់បំផុត។
មួយវិញទៀតត្រូវផ្ដោតការយកចិត្តទុកដាក់អនុវត្តខ្លឹមសារនៃឯកសារគោលការណ៍ណែនាំឱ្យមានប្រសិទ្ធភាពខ្ពស់លើគ្រប់ចំណុចពាក់ព័ន្ធ និងស្ថិតក្នុងដែនសមត្ថកិច្ចរបស់ខេត្តនីមួយៗ ។
លោក នាក់ យុទ្ធា បានបញ្ជាក់ថា៖«ត្រូវរៀបចំយន្តការគាំទ្រនិងតាមដានឱ្យបានច្បាស់លាស់សម្រាប់ការបញ្ជូន និងទទួលអ្នកប្រើគ្រឿងញៀនទៅព្យាបាល ស្តារនីតិសម្បទា និងសមាហរណកម្ម និងត្រូវរៀបចំចុះបញ្ជីស្ថិតិចំនួនអ្នកប្រើគ្រឿងញៀនដែលមាននៅតាមភូមិ ឃុំ សង្កាត់ ក្នុងខេត្ត ដើម្បីលើកផែនការ និងវិធានការសម្រាប់ព្យាបាល ស្តារនីតិសម្បទា ឬដោះស្រាយ ចំពោះឱ្យបានសមស្រប និងមានប្រសិទ្ធភាព» ។
លោកបន្តថា អាជ្ញាធរខេត្តក៏ត្រូវរៀបចំ និងពង្រឹងយន្តការសម្រាប់ការងារប្រយុទ្ធប្រឆាំងគ្រឿងញៀនពីថ្នាក់ខេត្ត ដល់ ឃុំ សង្កាត់ ដោយផ្អែកលើលិខិតបទដ្ឋានណែនាំនាដែលមានកន្លងមក សំដៅចូលរួមអនុវត្តឱ្យមានប្រសិទ្ធភាពនូវការអនុវត្តគោលនយោបាយ ភូមិ ឃុំ សង្កាត់ មាន
សុវត្ថិភាព ។
ក្នុងនាមគណៈកម្មាធិការត្រួតពិនិត្យគ្រឿងញៀនខេត្តក្រចេះ លោក ទុយ ប៊ុនសេរីរ័ត្នមុនី បានលើកឡើងអំពីការចាត់តាំងអនុវត្តយ៉ាងសកម្មក្នុងការងារប្រយុទ្ធប្រឆាំងគ្រឿងញៀនស្របតាមផែនការ បទបញ្ជា និងគោលការណ៍ណែនាំនានាដែលបានដាក់ចុះកន្លងមក ដូចជា ការអប់រំ បង្ការ ទប់ស្កាត់ បង្ក្រាប ព្យាបាល ស្តារនីតិសម្បទា ត្រួតពិនិត្យសារធាតុគីមីផ្សំ សំដៅសុខុមាលភាពរបស់ប្រជាពលរដ្ឋចៀសផុតពីបញ្ហាគ្រឿងញៀនស្របតាមឆន្ទ:របស់រាជរដ្ឋាភិបាលនីតិកាលទី៧ នៃរដ្ឋសភា។
ពាក់ព័ន្ធគ្រឿងញៀនេះលោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូធ្លាប់ថ្លែងថា បញ្ហាគ្រឿងញៀនត្រូវផ្តើមចេញពីបុគ្គលនីមួយៗ ពោលគឺនៅឱ្យឆ្ងាយពីគ្រឿងញៀនទាំងមន្ត្រីអនុវត្តច្បាប់ ក៏ដូចជាពលរដ្ឋខ្លួនឯង។ លោកថា៖«ប្រសិនបើកងកម្លាំងទាំងអស់ស្ថិតនៅឆ្ងាយពីគ្រឿងញៀនគឺជាការចាប់ផ្តើមមួយក្នុងការទប់ស្កាត់ហើយវាជាគុណតម្លៃនៃកងកម្លាំងគ្រប់ប្រភេទប្រសិនបើនៅឆ្ងាយពីគ្រឿងញៀន។ដូច្នេះរាល់ការដាក់វិធានការទាំងអស់គឺជារឿងមួយដើម្បីចូលរួមទប់ស្កាត់គ្រឿងញៀនព្រោះគ្រឿងញៀនបំផ្លាញសង្គមជាតិនិងធនធាន
មនុស្ស»។
គួរជម្រាបថា លទ្ធផលនៃការបង្ក្រាបបទល្មើសគ្រឿងញៀនទូទាំងប្រទេសថ្ងៃទី៦ ធ្នូ មានចំនួន២២ករណី ឃាត់ខ្លួនជនពាក់ព័ន្ធចំនួន៧១នាក់ដែលរឹបអូសវត្ថុតាងបានរួមមានមេតំហ្វេតាមីន(Ice)៥៥,០៦ក្រាមនិង៥កញ្ចប់តូច និងមេតំហ្វេតាមីន(Wy)ចំនួន០,១៥ក្រាម៕
