កិច្ចប្រជុំកំពូលសភាកម្ពុជា វៀតណាម និងឡាវ ពីថ្ងៃទី៤-៧ ធ្នូ ។ រូបថត រដ្ឋសភា
ភ្នំពេញៈ ថ្នាក់ដឹកនាំរដ្ឋសភានៃប្រទេសកម្ពុជា ឡាវ និងប្រទេសវៀតណាម បានប្តេជ្ញាពង្រឹងពង្រីកកិច្ចសហប្រតិបត្តិការនិងភាពជាដៃគូសភា ដើម្បីលើកកម្ពស់ផលប្រយោជន៍រួមរបស់ប្រជាពលរដ្ឋក្នុងតំបន់នៃប្រទេសទាំង៣ (CLV)។
ការប្តេជ្ញារបស់ប្រធានរដ្ឋសភានៃប្រទេសទាំង៣នេះ បានធ្វើឡើងនៅក្នុងកិច្ចប្រជុំកំពូលសភាកម្ពុជា-ឡាវ-វៀតណាម (CLV)ក្នុងថ្ងៃបញ្ចប់កាលពីថ្ងៃទី៦ ខែធ្នូ ឆ្នាំ២០២៣ នៅប្រទេសឡាវ ។ នេះបើតាមសេចក្តីប្រកាសព័ត៌មាននៅថ្ងៃទី៧ ខែធ្នូ ស្តីពីលទ្ធផលនៃការចូលរួមកិច្ចប្រជុំកំពូលសភាកម្ពុជា-ឡាវ-វៀតណាមលើកទី១ របស់គណៈប្រតិភូជាន់ខ្ពស់សភាកម្ពុជានៅសាធារណរដ្ឋប្រជាធិបតេយ្យប្រជាមានិតឡាវពីថ្ងៃទី៤ ដល់ថ្ងៃទី៧ ខែធ្នូ ឆ្នាំ២០២៣។
សេចក្តីប្រកាសបានបញ្ជាក់ថា ប្រធានរដ្ឋសភានៃប្រទេសទាំង៣ បានប្តេជ្ញាចិត្ត ពង្រឹងនិងពង្រីកបន្ថែមនូវកិច្ចសហប្រតិបត្តិការនិងភាពជាដៃគូសភាឱ្យកាន់តែជិតស្និទ្ធដើម្បីផលប្រយោជន៍រួម។ ប្រភពដដែលបានបន្តថា ៖ «រដ្ឋសភាទាំង៣បានប្ដេជ្ញាអនុវត្ត តួនាទីតាមដាន ត្រួតពិនិត្យការអនុវត្តច្បាប់ និងចូលរួមដោះបញ្ហាប្រឈមដែលនៅសេសសល់ដើម្បីជាប្រយោជន៍រួមរបស់ប្រជាជនដែលកំពុងរស់នៅក្នុងតំបន់ត្រីកោណអភិវឌ្ឍន៍ (CLV-DTA) និងតំបន់ដទៃទៀត»។
ជាមួយគ្នានោះដែរ ប្រធានរដ្ឋសភា លោកស្រី ឃួន សុដារី ចង់ឃើញតំបន់ត្រីកោណអភិវឌ្ឍន៍ដើរតួនាទីជាយុទ្ធសាស្ត្រ និងជាកត្តាជំរុញឱ្យមានការផ្លាស់ប្ដូរ ក្នុងការតភ្ជាប់តំបន់ឱ្យទៅជាមជ្ឈមណ្ឌលសេដ្ឋកិច្ចដ៏រស់រវើក ដែលអាចទាក់ទាញវិនិយោគ គាំទ្រដល់បណ្តាញផលិតកម្ម និងខ្សែច្រវាក់ផ្គត់ផ្គង់ក្នុងមហាអនុតំបន់ និងការអភិវឌ្ឍសេដ្ឋកិច្ច-សង្គម ក្រោយពេលងើបឡើងវិញពីវិបត្តិជំងឺកូវីដ១៩ និងក្នុងបរិបទសកលមិនប្រាកដប្រជា។
លោកស្រី ឃួន សុដារី បានដឹកនាំគណៈប្រតិភូជាន់ខ្ពស់សភាកម្ពុជា ចូលរួមកិច្ចប្រជុំកំពូលសភាកម្ពុជា-ឡាវ-វៀតណាម នេះ ដែលរដ្ឋសភាឡាវធ្វើជាម្ចាស់ផ្ទះ ក្រោមប្រធានបទ «ការពង្រឹងតួនាទីសភាក្នុងការលើកកម្ពស់កិច្ចសហប្រតិបត្តិការគ្រប់ជ្រុងជ្រោយរវាងប្រទេសកម្ពុជា ឡាវ និងវៀតណាម»។
តាមរយៈលទ្ធផលនេះ លោកស្រី បានស្នើឱ្យមានការយកចិត្តទុកដាក់បន្ថែមក្នុងការជំរុញសេដ្ឋកិច្ចនៅក្នុងតំបន់ ត្រីកោណអភិវឌ្ឍន៍ ដែលសម្បូរទៅដោយធនធានធម្មជាតិ និងជីវៈចម្រុះយ៉ាងសម្បូរបែប ឈរលើគំនិតផ្តួចផ្តើម «ប្រទេស៣ គោលដៅទេសចរណ៍តែមួយ»។
លោកស្រី បានបញ្ជាក់ថា ៖ «ការលើកកម្ពស់ពាណិជ្ជកម្មឌីជីថល ការបង្កើនសមត្ថភាព និងភាពធន់នៃសហគ្រាសធុនតូចនិងមធ្យម(MSMEs) និងការបង្កើតមជ្ឈមណ្ឌលនវានុវត្តន៍CLV ស្របតាមចក្ខុវិស័យរបស់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រក្នុងការប្រែក្លាយតំបន់ព្រំដែនទៅជាតំបន់អភិវឌ្ឍន៍ កិច្ចសហប្រតិបត្តិការ និងសុខដុមនីយកម្មនៃការតភ្ជាប់ប្រជាជននិងប្រជាជននៅលើដងវិថីនៃសន្តិភាព សន្តិសហវិជ្ជមាននិងវិបុលភាពរួម»។
សូមបញ្ជាក់ថា តំបន់ត្រីកោណអភិវឌ្ឍន៍ ត្រូវបានបង្កើតឡើងនៅក្នុងឆ្នាំ១៩៩៩ ដោយប្រមុខដឹកនាំប្រទេសទាំង៣ ដែលមានខេត្តចំនួន១៣ ក្នុងនោះប្រទេសកម្ពុជា មានចំនួន៤ខេត្ត រួមមាន ខេត្តរតគិរី មណ្ឌលគិរី ក្រចេះ និងខេត្តស្ទឹងត្រែង។ ចំណែក ប្រទេសឡាវមានចំនួន៤ខេត្ត ហើយប្រទេសវៀតណាមមានចំនួន៥ខេត្ត។ តំបន់ត្រីកោណអភិវឌ្ឍន៍ជាប្រភពនៃសក្តានុពល សេដ្ឋកិច្ច ទេសចរណ៍និងវប្បធម៌។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក គិន ភា ធ្លាប់បានថ្លែងថា កិច្ចប្រជុំCLV នេះនឹងលើកកម្ពស់យន្តការសភានៅក្នុងការចូលរួមជាមួយរដ្ឋាភិបាលប្រទេសទាំង៣ ក្នុងការអភិវឌ្ឍតំបន់ត្រីកោណអភិវឌ្ឍន៍ CLV ជាពិសេសការពង្រឹងទំនាក់ទំនងរដ្ឋសភា ប្រជាជននិងប្រជាជននឹងត្រូវបានលើកកម្ពស់ក្នុងការពង្រឹងកិច្ចសហប្រតិបត្តិការបន្ថែមទៀតរវាងប្រទេសទាំង៣នៅគ្រប់កម្រិត និងគ្រប់វិស័យ។
លោកបានបន្តថា នៅមានកិច្ចការជាច្រើនទៀតដែលត្រូវធ្វើដើម្បីទាញយកផលប្រយោជន៍ពីតំបន់ត្រីកោណអភិវឌ្ឍន៍នេះ ដោយសារតែការតភ្ជាប់ហេដ្ឋារចនាសម្ព័ន្ធ ផ្លូវ ទឹក ភ្លើង ពីកម្ពុជាទៅកាន់តំបន់ត្រីកោណនៅមានភាពលំបាកខ្លាំង ខណៈកម្លាំងពលកម្មពីកម្ពុជាដែលទៅធ្វើការនៅក្នុងតំបន់នេះក៏នៅមានកម្រិតដែរ។
ក្នុងពិធីបិទកិច្ចប្រជុំនៅល្ងាចថ្ងៃទី៦ ខែធ្នូ បានប្រព្រឹត្តទៅក្រោមអធិបតីភាព លោក សាយសំផន ភុមវិហាន ប្រធានរដ្ឋសភាឡាវ, លោកស្រី ឃួន សុដារី ប្រធានរដ្ឋសភាកម្ពុជា និងលោក វឿង ឌិញហ្វេ ប្រធានរដ្ឋសភាវៀតណាម ដោយបានចុះហត្ថលេខាលើសេចក្ដីថ្លែងការណ៍រួម ដែលជាលទ្ធផលនៃកិច្ចប្រជុំកំពូលសភា CLV លើកទី១។ នៅឆ្នាំ២០២៥ រដ្ឋសភានៃសាធារណរដ្ឋសង្គមនិយមវៀតណាមនឹងទទួលធ្វើជាម្ចាស់ផ្ទះកិច្ចប្រជុំកំពូលសភា CLVលើកទី២៕
