ករណីគ្រោះថ្នាក់ចរាចរណ៍នៅភ្នំពេញកាលពីថ្ងៃទី៣១ ធ្នូ ។ រូបថត ប៉ូលិស
ភ្នំពេញៈអ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា បានឱ្យដឹងថា នៅយប់ថ្ងៃទី៣១ ខែធ្នូ ឆ្នាំ២០២៣ ឆ្លងចូលឆ្នាំថ្មីឆ្នាំសកល២០២៤ នៅរាជធានីភ្នំពេញមានគ្រោះថ្នាក់ចរាចរណ៍ចំនួន៩ករណី បណ្តាលឱ្យជនរងគ្រោះចំនួន៦នាក់បានបាត់បង់ជីវិត, របួសធ្ងន់ចំនួន៣នាក់ និងរបួសស្រាលចំនួន២នាក់។
លោក សំ វិច្ឆិកា បានប្រាប់នៅថ្ងៃទី១ ខែមករា ឆ្នាំ២០២៤ ថា ក្នុងចំណោមករណីគ្រោះថ្នាក់ចរាចរណ៍នេះ បានកើតឡើងរវាងរថយន្តនិងម៉ូតូដែលករណីខ្លះអ្នកបង្កបានចូលមកសារភាព ប៉ុន្តែអ្នកបង្កគ្រោះថ្នាក់ចរាចរណ៍ផ្សេងទៀតបានរត់គេចខ្លួនពីកន្លែងកើតហេតុ។
ទាក់ទងនឹងការរត់គេចខ្លួននេះដែរ លោក សំ វិច្ឆិកា បានអំពាវនាវឱ្យចូលខ្លួនមកសារភាពដើម្បីឱ្យសមត្ថកិច្ចអនុវត្តតាមនីតិវិធី។
លោកបានថ្លែងថា៖«រាល់ករណីគ្រោះថ្នាក់ចរាចរណ៍បើករត់គេចនេះ ឯកឧត្តម ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញបានបញ្ជាឱ្យមន្ត្រីជំនាញស្រាវជ្រាវយ៉ាងម៉ឺងម៉ាត់នៅកន្លែងកើតហេតុរួមទាំងវត្ថុតាងនិងបានបង្កើតក្រុមការងារតាមដានស្រាវជ្រាវស្វែងរកចាប់ខ្លួនរាល់ជនបង្កពោលគឺមិនអាចគេចខ្លួនពីសំណាញ់ច្បាប់បាននោះទេ»។
លោកសំ វិច្ឆិកា បានបន្ថែមថា ជាពិសេសក្នុងករណីបើកបង្កគ្រោះថ្នាក់ហើយគេចខ្លួនមិនទទួលខុសត្រូវជាបទល្មើសផ្សេងមួយទៀត។
លោក គឹម បញ្ញា នាយកអង្គការបង្ការរបួសអាស៊ីនៅថ្ងៃទី១ ខែមករា ឆ្នាំ២០២៤ ក៏បានប្រាប់ដែរថា វាជារឿងធម្មតាទៅហើយឱ្យតែមានកម្មវិធីបុណ្យទានផ្សេងៗមានករណីគ្រោះថ្នាក់ចរាចរណ៍និងអ្នកស្លាប់ដោយគ្រោះថ្នាក់ចរចរណ៍នេះ កើនឡើងគួរឱ្យព្រួយបារម្ភ។
លោកបានបន្តថា បើអាជ្ញាធរនៅតែបន្តផ្សព្វផ្សាយ អប់រំណែនាំ ដោយមិនបានអនុវត្តច្បាប់ឱ្យបានតឹងរ៉ឹងទេនឹងបន្តឱ្យមានអ្នកស្លាប់ រងរបួស ពីករណីគ្រោះថ្នាក់ចរាចរណ៍នេះកាន់តែច្រើនឡើង។
លោក គឹម បញ្ញា ក៏បានសំណូមពរទៅនគរបាលចរាចរណ៍ទាំងអស់នៅក្នុងឆ្នាំ២០២៤ នេះ បង្កើនការរឹតបន្តឹងការអនុវត្តច្បាប់ចរាចរណ៍ឱ្យបានតឹងរ៉ឺងនិងមានប្រសិទ្ធភាពព្រមទាំងស្មើភាព និងតម្លាភាពដើម្បីកាត់បន្ថយគ្រោះថ្នាក់ចរាចរណ៍ទាំងនៅក្នុងពេលមានពិធីបុណ្យទាន និងថ្ងៃធម្មតា។
លោកបានថ្លែងថា៖«បើមានតែការផ្សព្វផ្សាយ អប់រំ ក្រើនរំឭកប្រជាពលរដ្ឋយើងមួយចំនួនគាត់មិនចាប់អារម្មណ៍ទេ។យើងត្រូវផ្សារភ្ជាប់ជាមួយការអនុវត្តច្បាប់ដើម្បីឱ្យចំនួនគ្រោះថ្នាក់វាធ្លាក់ចុះបើនៅភ្នំពេញស្លាប់៦នាក់ហើយចុះទម្រាំខេត្តផ្សេងទៀតដែលពលរដ្ឋទៅលេងកម្សាន្តអាចនឹងមានច្រើនថែមទៀត»។
ក្នុងទិវាអន្តរជាតិរំឭកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៨ដែលបានរៀបចំឡើងនៅទីលានតេជោក្នុងក្រុងព្រះសីហនុ ខេត្តព្រះសីហនុ កាលពីថ្ងៃទី២៥ ខែធ្នូ ឆ្នាំ២០២៣ លោក ស សុខា រដ្ឋមន្ត្រីក្រសួងមហាផ្ទៃបានថ្លែងបញ្ជាក់ថា នៅឆ្នាំ២០២៤នេះទៅគឺជាវិធានការក្នុងការរឹតបន្តឹងលើច្បាប់ចរាចរណ៍ព្រោះគ្រប់គ្នាយល់ពីច្បាប់ចរាចរណ៍ តែអ្នកខ្លះចេះតែភ្លេចខ្លួន។
លោកបានថា៖«ហានិភ័យដែលបង្កឱ្យមានគ្រោះថ្នាក់ចរាចរណ៍គឺជាមហន្តរាយធំណាស់សម្រាប់ជាតិសម្រាប់ខ្លួនឯងនិងសម្រាប់ក្រុមគ្រួសារ»៕
