ក្មេងប្រុសម្នាក់កំពុងត្រូវបានគ្រូពេទ្យចាក់វ៉ាក់សាំ ងបង្ការជំងឺកូវីដ ១៩កាលពីពេលកន្លងមក។ ហុង មិនា
ភ្នំពេញៈ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងអង្គការសុខភាពពិភពលោក (WHO) បានក្រើនរំឭកឱ្យប្រជាពលរដ្ឋត្រូវបន្តចាក់វ៉ាក់សាំងបង្ការជំងឺកូវីដ ១៩ ឡើងវិញ ដើម្បីកាត់បន្ថយហានិភ័យនៃការឆ្លងជំងឺកូវីដ ១៩ និងកាត់បន្ថយអត្រាស្លាប់ដោយសារជំងឺនេះ។
លោកស្រី ឱ វណ្ណឌីន បានសរសេរលើតេឡេក្រាមរបស់លោកស្រីកាលពីថ្ងៃទី ៣០ ខែធ្នូថា នាឱកាសឆ្នាំថ្មី ឆ្នាំ ២០២៤ ខាងមុខនេះ សូមក្រើនរំឭកទៅប្រជាពលរដ្ឋទាំងអស់ត្រូវមានការប្រុងប្រយ័ត្ន និងយកចិត្តទុកដាក់ចំពោះជំងឺកូវីដ ១៩ បំប្លែងថ្មី ដែលកំពុងរាតត្បាតនៅក្នុងពិភពលោក ក្នុងតំបន់ និងនៅក្នុងប្រទេសកម្ពុជាបច្ចុប្បន្ននេះ។
លោកស្រីថា៖ «សូមនាំគ្នាទៅទទួលការចាក់វ៉ាក់សាំងបង្ការជំងឺកូវីដ ១៩ ប្រចាំឆ្នាំឱ្យបានទៀងទាត់ដោយរៀងរាល់ពី ៨ ខែទៅដល់ ១២ ខែម្ដង ដើម្បីការពារខ្លួនអ្នកនិងមនុស្សជាទីស្រឡាញ់របស់អ្នក»។
យោងតាមលោកស្រី ម៉ារីយ៉ា វ៉ាន់កែខូវេ (Maria VanKerkhove) អ្នកជំនាញផ្នែកជំងឺឆ្លងដែលជាអ្នកដឹកនាំផ្នែកបច្ចេកទេសសម្រាប់ការឆ្លើយតបនឹងមេរោគកូវីដ ១៩ នៃ WHO កាលពីដើមខែធ្នូបានពន្យល់ពីសារការចាក់វ៉ាក់សាំងដូសជំរុញថាពិតជាមានសារៈសំខាន់ណាស់ ដើម្បីបង្ការពីការឆ្លងជំងឺកូវីដ ១៩ ខណៈដែលជំងឺរាតត្បាតកូវីដ ១៩ កំពុងបន្តវិវត្ត ក៏ដូចជាមេរោគកំពុងផ្លាស់ប្តូរ និងបំប្លែងខ្លួនជានិច្ច។
លោកស្រីបានថ្លែងថា៖ «ការចាក់វ៉ាក់សាំងដូសជំរុញជួយបង្កើនប្រព័ន្ធភាពស៊ាំរបស់យើង និងផ្តល់ឱ្យយើងនូវការការពារជាថ្មីប្រឆាំងនឹងមេរោគ ដើម្បីអាចជួយកាត់បន្ថយហានិភ័យនៃការឆ្លងជំងឺកូវីដ ១៩ ក៏ដូចជាកាត់បន្ថយហានិភ័យនៃឈឺធ្ងន់ធ្ងរ ដោយសម្រាកព្យាបាលនៅមន្ទីរពេទ្យ ជាពិសេសវាក៏កាត់បន្ថយហានិភ័យនៃផលវិបាករយៈពេលវែងនៃជំងឺកូវីដ ១៩»។
បើតាមលោកស្រី ម៉ារីយ៉ា វ៉ាន់កែខូវេ បានបញ្ជាក់ដែរថា ចំពោះផលរំខានធ្ងន់ធ្ងរពីការចាក់វ៉ាក់សាំង គឺកម្រឃើញមានផលប៉ះពាល់ដល់សុខភាពណាស់ ប៉ុន្តែនៅពេលចាក់ដូសជំរុញហើយ បែរជាមានប្រសិទ្ធភាពក្នុងការជួយការពារនិងថែទាំសុខភាពជាច្រើន។
លោក សឿម ប៊ុនរិទ្ធិ អភិបាលរងខេត្តបាត់ដំបង បានឱ្យដឹងនៅថ្ងៃទី ៣១ ខែធ្នូថា អាជ្ញាធរខេត្តបានធ្វើការផ្សព្វផ្សាយទៅដល់រដ្ឋបាលក្រុង-ស្រុក ជាពិសេសរដ្ឋបាលក្រុង-ស្រុក ដែលជាប់ព្រំដែនរួមមាន ស្រុកសំឡូត ស្រុកកំរៀង ស្រុកភ្នំព្រឹក និងស្រុកសំពៅលូនដោយតម្រូវឱ្យអាជ្ញាធរចុះទៅណែនាំ អប់រំប្រជាពលរដ្ឋពីការបង្ការខ្លួនពីជំងឺកូវីដ ១៩ ពិសេសមេរោគបំប្លែងថ្មីដែលក្រសួងទើបបានរកឃើញ។ ក្រៅពីនេះ អាជ្ញាធរក៏ណែនាំដល់អ្នករៀបចំកម្មវិធីជួបជុំធំៗ ត្រូវពាក់ម៉ាស់ និងត្រូវអនុវត្តតាមវិធានការរបស់ក្រសួងសុខាភិបាលផងដែរ។
ចំពោះការចាក់វ៉ាក់សាំងបង្ការជំងឺកូវីដ ១៩ វិញ នៅទូទាំងខេត្តបាត់ដំបង បានដំណើរការចាក់វ៉ាក់សាំងជូនប្រជាពលរដ្ឋដល់ដូសទី៦ ហើយ ក៏ប៉ុន្តែដំណើរការចាក់ដូសទី៦ និងដូសទី៥ មិនសូវមានប្រជាពលរដ្ឋមកចាក់បង្ការច្រើនដូចដូសទី១ ដល់ដូសទី៤ នោះទេ ដោយហេតុប្រជាពលរដ្ឋគិតថា បញ្ហាជំងឺកូវីដ ១៩ បានសាបរលាបជាបណ្ដើរៗស្របពេលរាជរដ្ឋាភិបាល ក៏បានបើកដំណើរប្រទេសឡើងវិញផងដែរ។
លោក សឿម ប៊ុនរិទ្ធិបញ្ជាក់ថា៖ «រាល់ថ្ងៃនេះយើងនៅតែបន្តជំរុញពលរដ្ឋឱ្យទៅចាក់វ៉ាក់សាំង ខណៈដែលមានកម្មវិធីបុណ្យជាតិធំៗ យើងតែងតែផ្សារភ្ជាប់ឱ្យពលរដ្ឋយើងទៅចាក់វ៉ាក់សាំងនៅតាមស្ដង់សុខាភិបាលដែលរៀបចំនៅក្នុងពិធីបុណ្យទាំងនោះ»។
ចំណែកលោក ណុប វុទ្ធី អភិបាលរងខេត្តព្រះវិហារក៏បានឱ្យដឹងដែរថា អាជ្ញាធរខេត្ត បានណែនាំឱ្យមន្ទីរសុខាភិបាលធ្វើការផ្សព្វផ្សាយឱ្យកាន់តែទូលំទូលាយ នូវវិធានការបង្ការការពារខ្លួនពីកូវីដ ១៩ បំប្លែងថ្មី និងការជំរុញប្រជាពលរដ្ឋ និងអាជ្ញាធរ ដែលនៅតាមតំបន់ព្រំដែន ត្រូវបន្តការចាក់វ៉ាក់សាំងឱ្យបានគ្រប់ដូស។
លោកបានថ្លែងថា៖ «យើងនឹងបន្តផ្សព្វផ្សាយ និងជំរុញឱ្យបងប្អូនប្រជាពលរដ្ឋយើងដែលមិនទាន់បានចាក់គ្រប់ដូសឬដល់ថ្ងៃចាក់ត្រូវមកចាក់វ៉ាក់សាំងដូសជំរុញ ដោយត្រូវឱ្យគាត់ពន្លឿន និងជួយមកទទួលវ៉ាក់សាំង»។
ប្រជាពលរដ្ឋនៅទូទាំងខេត្តព្រះវិហារ ទទួលបានវ៉ាក់សាំងគ្រប់ដូស និងគ្របដណ្ដប់ទាំងអស់ទោះបីការចាក់វ៉ាក់សាំងដូសទី៥ និងទី៦ មានចំនួនពលរដ្ឋចាក់តិចតួចក្ដី ក៏អាជ្ញាធរខេត្តនៅតែបន្តធ្វើការផ្សព្វផ្សាយ និងក្រើនរំឭកពលរដ្ឋឱ្យទៅទទួលវ៉ាក់សាំងទាំងនោះផងដែរ។
សូមបញ្ជាក់ថា កាលពីថ្ងៃទី ៣០ ខែធ្នូ ឆ្នាំ ២០២៣ ក្រសួងសុខាភិបាល បានរកឃើញវីរុសកូវីដ ១៩ បំប្លែងថ្មីប្រភេទ Omicron JN.1 ចំនួន ១១ ករណី ខណៈក្រសួងបញ្ជាក់ថាប្រភេទវីរុសបំប្លែងថ្មីនេះកំពុងមានវត្តមានក្នុងសហគមន៍ និងអាចមានករណីឆ្លងជាបន្តបន្ទាប់៕
