លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ហេង ជីវ័ន
ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានចេញសេចក្ដីណែនាំដល់មន្ទីរអប់រំ យុវជន និងកីឡា នៅថ្នាក់ក្រោមជាតិទូទាំងប្រទេស ត្រូវសហការជាមួយអាជ្ញាធរមូលដ្ឋានដៃគូអភិវឌ្ឈន៍ និងអ្នកពាក់ព័ន្ធ ត្រូវផ្សព្វផ្សាយ និងរៀបចំកម្មវិធីប្រឡងប្រជែងអានអត្ថបទ ស្មូតកំណាព្យ និងតែងនិពន្ធ ជាដំណាក់កាលនៅក្នុងខែមករា និងកុម្ភៈ ដើម្បីជ្រើសរើសជយលាភីថ្នាក់ជាតិ អបអរសាទរទិវាជាតិអំណាន ១១ មីនា។
សេចក្ដីណែនាំរបស់រដ្ឋមន្ត្រីចេញផ្សាយកាលពីថ្ងៃទី៤ ខែមករា ឆ្នាំ២០២៤ បានឱ្យដឹងថា៖ «ដើម្បីលើកកម្ពស់ និងបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងតែងនិពន្ធ រួមចំណែកការពារ និងពង្រឹងវប្បធម៌ អរិយធម៌ខ្មែរ…ក្រសួងអប់រំ យវជន និងកីឡាបានរៀបចំការប្រឡងប្រជែងការអាន ស្មូតកំណាព្យ និងតែងនិពន្ធ ជ្រើសរើសជយលាភីថ្នាក់ជាតិ ទទួលពានរង្វាន់«ពានរង្វាន់សម្ដេចតេជោ ហ៊ុន សែន» ដើម្បីចូលរួមអបអរសាទរការប្រារព្ធទិវាជាតិអំណានជារៀងរាល់ឆ្នាំ»។ «ការប្រគល់ពានរង្វាន់(នេះ)និងប្រាក់លើកទឹកចិត្តដល់ជយលាភីលេខ១ លេខ២ និងលេខ៣ ទាំង ៣ វិញ្ញាសា ធ្វើឡើងនៅថ្ងៃទី១១ ខែមីនា ជារៀងរាល់ឆ្នាំក្នុងកម្មវិធីប្រារព្ធទិវាអំណាន»។
ដើម្បីចូលរួមអបអរសាទរការប្រារព្ធទិវាជាតិអំណាន ១១ មីនា ខាងមុខនេះឱ្យបានឱឡារិក ថ្នាក់ដឹកនាំក្រសួងអប់រំ យុវជន និងកីឡា បានធ្វើការណែនាំដល់ក្រសួង ស្ថាប័នពាក់ព័ន្ធ សង្គមស៊ីវិលគ្រឹះស្ថានសិក្សាសាធារណៈ និងឯកជនបំផុសស្មារតី ដល់មន្ត្រីរាជការ បុគ្គលិក សិស្សនិស្សិត រួមនឹងប្រជាពលរដ្ឋទូទៅឱ្យអានគ្រប់ៗគ្នាក្នុងថ្ងៃប្រារព្ធទិវាជាតិអំណាន និងដើម្បីក្លាយជាទម្លាប់អានជាប្រចាំ។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងដូចនេះតាមរយៈសេចក្ដីណែនាំស្តីពីការប្រារព្ធទិវាជាតិអំណាន ១១ មីនា ថា អគ្គនាយកដ្ឋានអប់រំ អគ្គនាយកដ្ឋានឧត្តមសិក្សា ត្រូវណែនាំគ្រប់គ្រឹះស្ថានសិក្សាសាធារណៈ និងឯកជន ជំរុញឱ្យមានការអានសៀវភៅ សារព័ត៌មាន ឬឯកសារផ្សេងៗ ក្នុងថ្នាក់ បរិវេណសាលារៀន និងក្នុងបណ្ណាល័យ នៅចន្លោះ ម៉ោង៨:០០នាទី ទៅដល់ម៉ោង ៩:០០ នាទី នាព្រឹកថ្ងៃទី១១ ខែមីនា រៀងរាល់ឆ្នាំ ឬរៀបចំប្រារព្ធទិវា ជាតិអំណាន នៅតាមអង្គភាពរៀងៗខ្លួនតាមលទ្ធភាព។
លោកក៏បានណែនាំដល់មន្ទីរអប់រំរាជធានីខេត្ត គ្រឹះស្ថានសិក្សាសាធារណៈ ឯកជនទាំងអស់ គ្រប់រដ្ឋបាលរាជធានីខេត្ត ក្រុង ស្រុក ខណ្ឌ មន្ទីរជំនាញ និងរោងចក្រសហគ្រាស ត្រូវជំរុញថ្នាក់ដឹកនាំ មន្ត្រី បុគ្គលិក កម្មករ និយោជក អានសៀវភៅ ឬឯកសារផ្សេងៗក្នុងបរិវេណអង្គភាព ឬសាលារៀន និងក្នុងបណ្ណាល័យ ចន្លោះម៉ោង៨ ដល់ម៉ោង៩ នាព្រឹកថ្ងៃទី១១ ខែមីនា រៀងរាល់ឆ្នាំ។
លោកបន្តថា៖ «ត្រូវរៀបចំបដាប្រធានបទ ពាក្យស្លោក ឬរូបភាពដែលមានខ្លឹមសារទាក់ទងនឹងទិវាជាតិអំណាន ដាក់បង្ហាញនៅក្នុងបរិវេណមន្ទីរ គ្រឹះស្ថានសិក្សា ព្រមទាំងរៀបចំប្រារព្ធទិវាជាតិអំណាន នៅតាមទីតាំងរៀងៗខ្លួនទៅតាមលទ្ធភាព»។
ការប្រឡងប្រជែង វិញ្ញាសាការអានអត្ថបទ សម្រាប់សិស្សថ្នាក់ទី៤ ដល់ទី៦។ ការស្មូត្រកំណាព្យ សម្រាប់សិស្សថ្នាក់ទី៧ ដល់ទី៩ ក្នុងចំណោមបទពាក្យ៧ បទកាកគតិ និងបទព្រហ្មគីតិ និងការតែងនិពន្ធ សម្រាប់សិស្សថ្នាក់ទី១០ ដល់ថ្នាក់ទី១២ ជាអត្ថបទកាព្យ (បទពាក្យ៧ បទកាកគតិ និងបទព្រហ្មគីតិ) ឬពាក្យរាយ។
ក្រសួងអប់រំ បានលើកឡើងថា ការប្រឡងប្រជែង និងវាយតម្លៃជ្រើសរើសជយលាភីថ្នាក់ជាតិទាំង ៣វិញ្ញាសា ប្រព្រឹត្តទៅចាប់ពីថ្ងៃទី៩ ដល់ទី១០ ខែមីនា ជារៀងរាល់ឆ្នាំ តាមទីកន្លែងកំណត់ដោយក្រសួងអប់រំ ចំណែកការប្រគល់ពានរង្វាន់ និងប្រាក់រង្វាន់លើកទឹកចិត្តដល់ជយលាភីលេខ១ លេខ២ និងលេខ៣ ធ្វើឡើងនៅថ្ងៃទី១១ ខែមីនា ឆ្នាំ២០២៤៕
