កសិករកំពុងដើរពិនិត្យស្រូវដែលត្រូវបានព្រោះជាជួរ។ រូបថត ហ្វេសប៊ុក Yang Saing Koma
ភ្នំពេញៈ លោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១០ខែមករា បានដឹកនាំកិច្ចប្រជុំក្រុមពហុជំនាញ ដើម្បីតម្រង់ទិសលើការពង្រឹងសមត្ថភាព មន្រ្តីកសិកម្ម ឃុំ សង្កាត់ ខណៈដែលលោកបានលើកពីផលប្រយោជន៍ដែលកសិករទទួលបាន ពីការព្រោះស្រូវជាជួរដោយម៉ាស៊ីននិងព្រោះបណ្តោយថ្ងៃ។
បើយោងតាមក្រសួងកសិកម្ម ការបើកកិច្ចប្រជុំនេះ ក៏ដើម្បីគាំទ្រដល់មន្រ្តីកសិកម្មឃុំ សង្កាត់ក្នុងការដោះស្រាយបញ្ហាបច្ចេកទេសនានាជូនកសិករផងដែរ។
ក្រសួងកសិកម្ម ដោយមានការគាំទ្រពីក្រសួងមុខងារសាធារណៈ បានប្រឡងជ្រើសរើសមន្ដ្រីកសិកម្មឃុំចំនួន២៥០នាក់។
មន្ដ្រីកសិកម្មឃុំដែលប្រឡងជាប់នេះ នឹងចាប់ផ្ដើមទទួលការបណ្ដុះបណ្ដាលបន្ថែមរយៈពេលមួយខែ ចាប់ពីខែកុម្ភៈ ឆ្នាំ២០២៤តទៅ មុននឹងត្រូវដាក់ពង្រាយទៅតាមឃុំ-សង្កាត់ដែលបានកំណត់។
ជាមួយគ្នានេះ លោក យ៉ង សាំងកុមារ ដែលជាអ្នកជំនាញកសិកម្មផងនោះ បានសរសេរបង្ហោះនៅលើហ្វេសប៊ុករបស់លោកពីផលប្រយោជន៍ដែលកសិករទទួលបាន ពីការព្រោះស្រូវជាជួរ។
លោកបន្តថា ការព្រោះស្រូវជាជួរដោយម៉ាស៊ីននិងព្រោះបណ្តោយថ្ងៃគឺធ្វើឱ្យស្រូវលូតលាស់បានល្អ ដោយទទួលបានពន្លឺថ្ងៃច្រើន និងមានលំហរសម្រាប់ការលូតលាស់ឫសនិងបែកគុម្ពបានល្អ កាត់បន្ថយហានីភ័យ បំផ្លាញដោយសត្វល្អិត ជំងឺនិងចំណាយតិចលើការប្រើថ្នាំការពារដំណាំស្រូវ។
លើសពីនេះ ចំណាយលើការប្រើគ្រាប់ពូជតិច និងប្រើកម្លាំងតិចក្នុងការព្រោះ ងាយស្រួលដើរពិនិត្យនិងថែទាំស្រូវ។
ជារួមការព្រោះស្រូវជាជួរបណ្តោយពន្លឺថ្ងៃនាំមកការកើនផលនិងកាត់បន្ថយថ្លៃដើមដែលនាំមកនូវប្រាក់ចំណេញខ្ពស់ជូនកសិករ។
លោក យ៉ង សាំងកុមារ បានបញ្ជាក់ថា៖«យើងនឹងធ្វើការជំរុញការអនវត្តការពង្រោះស្រូវជាជួរឱ្យបានកាន់តែច្រើនថែមទៀតក្នុងចំណោមគ្រួសារកសិករ»៕
