សប៊ុក អភិបាលខេត្តពោធិ៍សាត់លោក ខួយ រីដា
ក្រសួងធនធានទឹក និងឧតុនិយម អំពាវនាវដល់ស្ថាប័នពាក់ព័ន្ធ អាជ្ញាធរដែនដី និងសាធារណជនឱ្យចូលរួមសហការថែរក្សា ប្រើប្រាស់ទឹកដោយសន្សំសំចៃក្នុងកម្រិតខ្ពស់ ជាពិសេសបណ្តាតំបន់ជនបទដាច់ស្រយាល ដែលនៅឆ្ងាយពីប្រភពទឹក ខណៈរដូវប្រាំងនឹងបន្តអូសបន្លាយដល់ខែឧសភា ២០២៤។
សេចក្តីជូនដំណឹងរបស់ក្រសួងធនធានទឹកចុះថ្ងៃទី១២ ខែមករា ឆ្នាំ ២០២៤ បានបញ្ជាក់ថា បន្ទាប់ពីបានធ្វើការតាមដាន និងព្យាករណ៍ស្ថានភាពអាកាសធាតុរួចមក ស្ថានភាពអាកាសធាតុបន្ត នៅក្នុងរដូវប្រាំង ដែលក្នុងនោះ សីតុណ្ហភាពមានការប្រែប្រួលខ្លាំង ជាមួយនឹងសីតុណ្ហភាពក្តៅកើនឡើងខ្ពស់ជាងមធ្យមភាគច្រើនឆ្នាំ និងក្តៅជាងឆ្នាំ២០២៣ ដោយសីតុណ្ហភាពមធ្យមអតិបរមា ៣៧°C និង សីតុណ្ហភាពអតិបរមាខ្ពស់បំផុតរង្វង់ ៤១°C នៅក្នុងខែមេសា និងដើមខែឧសភា។
ក្រសួងបានបញ្ជាក់ទៀតថា ភ្លៀងកក់ខែអាចមានតិចតួច ជាមួយគ្នានឹងរបបខ្យល់មូសុងនិរតីខ្សោយធ្វើឱ្យរដូវវស្សាចាប់ផ្តើមយឺត(យឺតជាងឆ្នាំ២០២៣) រីឯបាតុភូតផ្គររន្ទះនិងខ្យល់កន្ត្រាក់កើតច្រើននៅក្នុងខែមេសា និង ខែឧសភា ឆ្នាំ២០២៤។ ក្រសួងក៏បានអំពាវនាវដល់ស្ថាប័នពាក់ព័ន្ធ អាជ្ញាធរដែនដី និងសាធារណជនសូមយកចិត្តទុកដាក់ ដោយប្រុងប្រយ័ត្នចំពោះបាតុភូតផ្គររន្ទះ និងខ្យល់កន្ត្រាក់ដែលនឹងអាចកើតមានច្រើន។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានប្រាប់ឱ្យដឹងបន្ថែមនៅថ្ងៃទី១៣ ខែមករា នេះថា នៅក្នុងឆ្នាំ២០២៤នេះ កម្ពុជាអាចទទួលរងសីតុណ្ហភាពក្ដៅ និងបរិមាណទឹកភ្លៀងតិចជាងបណ្ដាឆ្នាំកន្លងទៅ ដោយសារតែបាតុភូតសកលអែលនីណូ។ មួយផ្នែកទៀត ទឹកទន្លេមានកម្រិតទាប មិនអាចហូរចូលសព្វអាង បឹងបួ និងព្រែកធម្មជាតិមួយចំនួន នៅអមសងខាងទន្លេមេគង្គលើ មេគង្គក្រោម ទន្លេបាសាក់ និងទន្លេសាប បានច្រើននោះទេ។
លោកបានបញ្ជាក់ថា៖«លក្ខខណ្ឌអាកាសធាតុបែបនេះ នឹងធ្វើឱ្យទឹកហួត ឬរីងស្ងួត ឆាប់រហ័ស។ ដូចនេះ ខ្ញុំសូមណែនាំឱ្យពលរដ្ឋធ្វើស្រែប្រាំងតែ១លើកប៉ុណ្ណោះ ដើម្បីរក្សាទឹកទុកប្រើប្រាស់ក្នុងជីវភាពរស់នៅប្រចាំថ្ងៃ ចៀសវាងការខ្វះខាត ឬប្រឈមខ្លាំង ដូចដែលកម្ពុជាធ្លាប់ជួបកាលពីឆ្នាំ២០១៥ និង២០១៦»។
លោកបានបន្ថែមថា គ្រប់រាជធានី-ខេត្ត អាចប្រឈមខ្វះទឹកប្រើប្រាស់ បើសិនពលរដ្ឋមិនព្រមអនុវត្តតាមផែនការបង្កបង្កើនស្រូវប្រាំង ដែលដាក់ចេញដោយមន្ទីរធនធានទឹក មន្ទីរកសិកម្ម និងរដ្ឋបាលខេត្ត។
គិតមកទល់ពេលនេះ មានខេត្តចំនួន៣ហើយ បានប្រកាសឱ្យពលរដ្ឋផ្អាកធ្វើស្រែប្រាំងលើកទី២ ដោយសារខ្វះទឹកស្រោចស្រព ក្នុងនោះរួមមាន ខេត្តពោធិ៍សាត់ កំពង់ឆ្នាំង និងស្វាយរៀង៕
