បុគ្គលិកអាជ្ញាធរជាតិអប្សរា២នាក់ ត្រូវបានឃាត់ខ្លួន ជុំវិញការប្រើហិង្សាលើអ្នកលក់អណ្តើក។ រូបថត នគរបាល
សៀមរាបៈ ស្នងការដ្ឋាននគរបាលខេត្តសៀមរាប បានឃាត់ខ្លួនជនសង្ស័យ២រូប ជាបុគ្គលិកសណ្ដាប់ធ្នាប់នៃអាជ្ញាធរជាតិអប្សរា និងត្រូវបានបញ្ជូនទៅតុលាការដើម្បីបន្តនីតិវិធីតាមច្បាប់ពាក់ព័ន្ធការប្រើអំពើហិង្សាលើយុវជន១រូប ដែលដើរលក់សត្វអណ្ដើកចល័ត នៅបរិវេណកសិន្ទុមុខប្រាសាទអង្គរវត្ត។
ការឃាត់ខ្លួនបុគ្គលិក២រូបនេះ កម្លាំងជំនាញនៃការិយាល័យនគរបាលព្រហ្មទណ្ឌកម្រិតស្រាល បានចុះធ្វើការស៊ើបអង្កេត និងស្រាវជ្រាវរកឃើញលទ្ធផលមួយចំនួន ដែលពួកគេបានប្រើហិង្សាដោយចេតនាទៅលើយុវជនដើរលក់កូនអណ្ដើកនៅមុខប្រាសាទអង្គរ កាលពីថ្ងៃទី១១ ខែមករា ឆ្នាំ២០២៤។
យោងសេចក្តីបំភ្លឺព័ត៌មានរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តសៀរាមរាប កាលពីថ្ងៃទី១៣ ខែមករា បានឱ្យដឹងថា ករណីនេះត្រូវបានសមត្ថកិច្ចស្រាវជ្រាវនាំខ្លួនជនសង្ស័យមកកាន់ស្នងការដ្ឋាននគរបាលខេត្តសៀមរាប រហូតឈានដល់ការឃាត់ខ្លួនឈ្មោះ សុខ សឿន និងឈ្មោះ ហៃ រដ្ឋា ទៅតាមបញ្ជារបស់ព្រះរាជអាជ្ញាអមសាលាដំបូងខេត្តសៀមរាប។
សូមបញ្ជាក់ថា ជនរងគ្រោះឈ្មោះ ណុល សំណាង អាយុ ១៩ឆ្នាំ រស់នៅឃុំរុនតាឯក ស្រុកបន្ទាយស្រី ខេត្តសៀមរាប។
ប្រភពដដែលបានឱ្យដឹងថា នៅថ្ងៃទី១១ ខែមករា ជនរងគ្រោះបានចាប់សត្វអណ្ដើកចំនួន ៧ក្បាល ពីក្នុងកសិន្ទុអង្គរវត្ត ហើយរូបគេ និងមិត្តភក្តិចំនួន២នាក់ទៀត បានដើរលក់កូនអណ្ដើកនៅចំណុចរានហាលអង្គរវត្ត។
ពេលនោះ ជនរងគ្រោះបានលក់កូនអណ្ដើកអស់ចំនួន ៥ក្បាល បានប្រាក់ចំនួន ៥ម៉ឺនរៀល ស្រាប់តែមានកម្លាំងអាជ្ញាធរជាតិអប្សរាមានគ្នាប្រហែលជាពី៤ ទៅ៥នាក់ ដេញចាប់ពួកគេ ខណៈមិត្តភក្តិដែលលក់ជាមួយគ្នាបានរត់ចូលព្រៃ និងលោតចូលទឹកកសិន្ធុអង្គរ។
ឈ្មោះ ណុល សំណាង ត្រូវបានកម្លាំងអាជ្ញាធរជាតិអប្សរាចាប់បាន ហើយបានចាប់ទាញកអាវជនរងគ្រោះជាប់ហើយបានទះកំផ្លៀង១ដៃ និងទាត់ចំនួន១ជើងបន្ថែមទៀត ហើយនាំជនរងគ្រោះទៅចំណុចក្បែរមាត់ទឹកមុខស្ពានបណ្តែតទឹកប្រាសាទអង្គរវត្ត ដើម្បីរង់ចាំឡានមកដឹកយកទៅឱ្យជំនាញ។
បុគ្គលិកអាជ្ញាធរជាតិអប្សរា បានប្រគល់ជនរងគ្រោះទៅឱ្យមន្ត្រីបរិស្ថាននៅកន្លែងស្នាក់ការតំបន់ការពារទេសភាពអង្គរ ដែលមានទីតាំងនៅទល់មុខឆែកសំបុត្រចូលតំបន់អង្គរ។
អាជ្ញាធរជាតិអប្សរា បានចេញសេចក្តីប្រកាសព័ត៌មានកាលពីថ្ងៃទី១២ ខែមករា ឱ្យដឹងដែរថា ថ្នាក់ដឹកនាំពាក់ព័ន្ធនៃអាជ្ញាធរជាតិអប្សរា បានរៀបចំកិច្ចប្រជុំមួយជាបន្ទាន់ ដោយបានហៅបុគ្គលិកនោះ មកសួរនាំអំពីមូលហេតុពិតប្រាកដនៃការឈានទៅដល់ការប្រើប្រាស់នូវសកម្មភាពមិនសមរម្យដែលកើតឡើងនេះ។
អាជ្ញាធរជាតិអប្សរា ក៏បានសម្រេចដាក់ពិន័យរដ្ឋបាល និងតម្រូវឱ្យចុះហត្ថលេខាលើកិច្ចសន្យាទទួលស្គាល់កំហុស និងបញ្ឈប់នូវរាល់សកម្មភាពហិង្សាបែបនេះនាពេលអនាគត។ ក្នុងករណី មិនរាងចាល នឹងត្រូវបណ្ដេញចេញពីការងារ និងទទួលរងទណ្ឌកម្មតាមផ្លូវច្បាប់ជាធរមាននានា។
ប្រភពដដែលបានបញ្ជាក់ថា ៖«អាជ្ញាធរជាតិអប្សរាមិនគាំទ្រ និងមិនអាចទទួលយកបានជាដាច់ខាត នូវរាល់ការប្រើប្រាស់អំពើហិង្សាក្នុងការអនុវត្តការងារ ដែលធ្វើឱ្យប៉ះពាល់ដល់វិន័យ សីលធម៌ និងគុណធម៌ ដែលមានជាធរមានក្នុងលក្ខន្តិកៈរបស់មន្ត្រីរាជការស៊ីវិល បុគ្គលិកសាធារណៈ»។
ជាមួយគ្នានេះ អាជ្ញាធរជាតិអប្សរា ក៏បានអំពាវនាវសាជាថ្មីម្តងទៀត ដល់សាធារណជនកុំលក់ ឬយកសត្វគ្រប់ប្រភេទទៅលែងក្នុងកសិន្ទុនានា នៃរមណីយដ្ឋានអង្គរ ដោយមិនមានការអនុញ្ញាត ដើម្បីចៀសវាងការប៉ះពាល់ដល់សត្វ និងរុក្ខជាតិដែលមានប្រភពដើមនៅទីនោះ។
ជុំវិញរឿងនេះលោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ បានថ្លែងនៅថ្ងៃទី១៤ ខែមករាថា បុគ្គលិកឬមន្រ្តីអាជ្ញាធរជាតិអប្សរា ដើរតួនាទីសំខាន់ណាស់ក្នុងការការពារក៏ដូចជាការបង្ហាញផ្លូវសម្រាប់ភ្ញៀវទេសចរជាតិ និងអន្តរជាតិ។
លោកថា៖«អ៊ីចឹង! មន្រ្តីទាំងនោះ ត្រូវប្រកាន់នូវឥរិយាបថសុភាពរាបសា ធ្វើម៉េចដើម្បីទាក់ទាញភ្ញៀវទេសចរ ដោយមិនអាចទៅប្រើប្រាស់នូវទង្វើដែលធ្វើឱ្យប៉ះពាល់ដល់មុខមាត់របស់អាជ្ញាធរឬប្រទេសកម្ពុជានោះទេ។ ករណីបុគ្គលិកអាជ្ញាធរជាតិអប្សរា ប្រើអំពើហិង្សាបែបនេះ នឹងជះឥទ្ធិពលមិនល្អសម្រាប់ក្រសែភ្នែករបស់ភ្ញៀវទេសចរដែលបានចូលទៅទស្សនា»។
លោក អំ សំអាត បានបន្ថែមថា៖«ការអនុវត្តច្បាប់របស់ស្នងការដ្ឋាននគរបាលខេត្តសៀមរាប គឺជាការអនុវត្តត្រឹមត្រូវតាមផ្លូវច្បាប់ និងនីតិវិធីដែលត្រូវដំណើរការក្នុងការចាត់ការទៅលើអ្នកដែលប្រើអំពើហិង្សា ហើយនេះក៏ជាគំរូមួយដែរ ដើម្បីកុំឱ្យមន្រ្តីផ្សេងទៀតយកគំរូនៃការប្រើហិង្សាទៅលើជនដទៃទៀត»៕
