ស្ត្រីម្នាក់ដើរចេញពីមន្ទីរពេទ្យគន្ធបុប្ផា បន្ទាប់ពីគ្រូពេទ្យពិនិត្យ និងផ្ដល់ថ្នាំសម្រាប់ព្យាបាល។ ហេង ជីវ័ន
ភ្នំពេញៈ ក្នុងឆ្នាំ ២០២៣ មន្ទីរពេទ្យគន្ធបុប្ផា បានពិនិត្យ និងព្យាបាលកុមារឈឺនៅផ្នែកពិគ្រោះជំងឺក្រៅបានចំនួនជិត ៩០ ម៉ឺននាក់បើធៀបនឹងឆ្នាំ ២០២២ មានការកើនឡើងចំនួន ៣៦%។
លោក គី សង់ទី ប្រធានមន្ទីរពេទ្យគន្ធបុប្ផាភ្នំពេញ បានឱ្យដឹងនៅថ្ងៃទី ១៤ ខែមករាថា ក្នុងឆ្នាំ ២០២៣ មន្ទីរពេទ្យគន្ធបុប្ផាទាំង ៥ សាខា ទាំងនៅភ្នំពេញ និងខេត្តសៀមរាប បានពិនិត្យ និងព្យាបាលកុមារឈឺនៅផ្នែកពិគ្រោះជំងឺក្រៅបានសរុប ៨៩៩ ៦៩២ នាក់ បើធៀបនឹងឆ្នាំ ២០២២ មានការកើនឡើងចំនួន ៣៦%។
ចំណែកកុមារមានជំងឺធ្ងន់ធ្ងរ ត្រូវបានដាក់ឱ្យចូលសម្រាកព្យាបាលក្នុងមន្ទីរពេទ្យមានចំនួនសរុប ១៨៤ ០៥៥ នាក់ បើធៀបនឹងឆ្នាំ ២០២២ មានការកើន ៥៣%។ ក្នុងចំណោមកុមារដែលមានជំងឺធ្ងន់ធ្ងរបានដាក់ឱ្យសម្រាកនៅពេទ្យ មានប្រហែលពី ២៥-៣០ ភាគរយ។
លោក គី សង់ទី ឱ្យដឹងទៀតថា ដោយឡែកកុមារដែលកើតជំងឺគ្រុនឈាមធ្ងន់ធ្ងរ មាន ១៦ ១៦០ នាក់ត្រូវបានសម្រាកព្យាបាលក្នុងមន្ទីរពេទ្យ និងកុមារដែលត្រូវវះកាត់មាន ២៧ ៧០០នាក់ ក្នុងនោះមានវះកាត់បេះដូង និងភ្ជិតប្រហោងបេះដូងតាមសរសៃឈាមមាន ៩៤៩ នាក់។ ចំពោះនៅផ្នែកសម្ភពវិញស្ដ្រីមានផ្ទៃពោះចំនួន ១០៨ ៧១៩ នាក់បានមកពិនិត្យតាមដានផ្ទៃពោះ និងព្យាបាល និងមានស្ត្រីមកសម្រាលកូនចំនួន ២១ ៦៤៤ នាក់។
លោកថា៖ «យើងមានបញ្ហាប្រឈមខ្វះខាតគ្រែសម្រាប់ទារក និងកុមារមានជំងឺធ្ងន់ៗដែលបានចូលសម្រាកពេទ្យផ្នែកសង្គ្រោះបន្ទាន់ដែលពេលខ្លះត្រូវគេង ២ នាក់លើគ្រែតែ ១ ហើយកុមារមានជំងឺខ្លះត្រូវបញ្ជូនពីគ្លីនិកឯកជន មន្ទីរពេទ្យផ្សេងៗក្នុងស្ថានភាពធ្ងន់ធ្ងរខ្លាំងពេកដែលករណីខ្លះមន្ទីរពេទ្យមិនអាចជួយសង្គ្រោះបាន ករណីខ្លះត្រូវសម្រាកពេទ្យក្នុងរយៈពេលយូរ»។ មន្ទីរពេទ្យគន្ធបុប្ផា បានរកឃើញកុមារឈឺភាគច្រើន រលាកផ្លូវដង្ហើម រលាកសួត ជំងឺរបេង ជំងឺគ្រុនឈាម និងជំងឺរលាកស្រោមខួរជាដើម៕
