កញ្ញា អែម ច័ន្ទបូមរី (ស្តាំ) បានរៀបរាប់អំពីស្នាដៃគំនូររបស់កញ្ញា ក្នុងពិព័រណ៍ស្នាដៃពហុសិល្បៈឯករាជ្យ នៅសាលសិល្បៈសណ្ឋាគារសូហ្វីតែលភ្នំពេញភូគីត្រា កាលពីថ្ងៃទី ៤ ខែមករា។ ហុង រស្មី
ភ្នំពេញ: ការតាំងពិព័រណ៍បែបប្រកួតពហុសិល្បៈឯករាជ្យ នៅសាលសិល្បៈសណ្ឋាគារសូហ្វីតែលភ្នំពេញភូគីត្រាបានបង្ហាញស្នាដៃសិល្បៈភាពច្នៃប្រឌិតដែលទាក់ទាញអ្នកទស្សនាតាំងពីពេលឈានជើងចូលសាលទទួលភ្ញៀវ។
នៅក្នុងសាលទទួលភ្ញៀវលោកអ្នកត្រូវបានស្វាគមន៍ដោយស្នាដៃគំនូរធំៗនិងសិល្បៈដំឡើង ទាំងនៅក្បែរច្រកចូលកន្លែងទទួលភ្ញៀវនិងក្បែរសាឡុង ដោយមានការបញ្ចាំងពន្លឺភ្លើងរំលេចភាពស្រស់ស្អាតដ៏ស្រទន់។
ជាមួយការដាក់ពាក្យប្រកួតអ្នកសិល្បៈ ១៦០នាក់មកពីទូទាំងប្រទេស គណៈវិនិច្ឆ័យដែលមានបទពិសោធន៍និងជំនាញខាងសិល្បៈវប្បធម៌បានជ្រើសរើសស្នាដៃចំនួន៤១ពីអ្នកសិល្បៈ ៤១រូបដើម្បីធ្វើការតាំងពិព័រណ៍និងប្រកួតប្រជែង។
ចាប់ពីផ្ទាំងគំនូរ រូបថតតូចរហូតដល់ស្នាដៃយក្សកម្ពស់៣ម៉ែត្រ សិល្បករទាំងនោះមកពីគ្រប់ទិសទីនៃប្រទេស ដើម្បីបង្ហាញទាំងស្នាដៃច្នៃប្រឌិតរបស់ខ្លួននិងដណ្ដើមពានរង្វាន់ផងដែរ។
លោក Charles-Henri Chevet នាយកគ្រប់គ្រងទូទៅប្រចាំតំបន់នៃសណ្ឋាគារសូហ្វីតែលភ្នំពេញភូគីត្រាបានថ្លែងនៅថ្ងៃបើកសម្ពោធពិព័រណ៍ស្នាដៃ កាលពីថ្ងៃទី៤ខែមករាថា៖ «ពិព័រណ៍នេះគឺជាកិច្ចសហការរវាងសណ្ឋាគារសូហ្វីតែលភ្នំពេញភូគីត្រាជាមួយ Recreation Cambodia និង Le Lezard Bleu ក្នុងគោលបំណងស្វែងយល់ពីប្រធានបទនៃឯករាជភាពក្នុងទម្រង់ផ្សេងៗនៃសិល្បៈក៏ដូចជាការអបអរសាទរខួបលើកទី៧០ នៃបុណ្យឯករាជ្យជាតិនៃប្រទេសកម្ពុជាផងដែរ»។
លក្ខណវិនិច្ឆ័យនៃការជ្រើសរើសត្រូវបានធ្វើឡើងដោយផ្តោតលើប្រធានបទនៃឯករាជភាពភាពជាក់ស្តែងនៃការបង្កើតសិល្បៈនិងប្រភពដើម។
គណៈវិនិច្ឆ័យរួមមានលោក Charles-Henri Chevet,លោក Pierre Rol ជាទីប្រឹក្សានៅ Le Lezard Bleu និងលោកស្រីបណ្ឌិត Kerya Chau Sun អ្នកនាំពាក្យអាជ្ញាធរជាតិអប្សរា។
ការប្រកួតប្រជែងក្នុងការតាំងពិព័រណ៍នេះផ្ដល់រង្វាន់ចំនួន ៣ប្រភេទ គឺរង្វាន់ផ្ដល់ពិន្ទុពីគណៈវិនិច្ឆ័យ រង្វាន់បោះឆ្នោតជាសាធារណៈនិងរង្វាន់អ្នកមានទេពកោសល្យវ័យក្មេងបំផុត។រង្វាន់ទាំងនេះបម្រើជាសក្ខីកម្មចំពោះខ្លឹមសារនៃឯករាជភាពនិងភាពច្នៃប្រឌិតនៅក្នុងពិភពសិល្បៈ។
លោក Chevet បាននិយាយថា៖ «រង្វាន់ចំនួន៣ ត្រូវបានបង្កើតឡើងដើម្បីផ្ដល់ការទទួលស្គាល់និងផ្តល់រង្វាន់ដល់ការខិតខំប្រឹងប្រែងរបស់សិល្បករឆ្នើម»។
ស្នាដៃសិល្បៈដ៏គួរឱ្យកត់សម្គាល់ ១ ក្នុងចំណោមស្នាដៃសិល្បៈទាំងអស់ «Broaden You Horizon» ពីកញ្ញា អែម ច័ន្ទបូមរី ដែលផ្តោតលើសេរីភាពរបស់ស្ត្រីនិងជានិមិត្តរូបនៃការផ្លាស់ប្តូររបស់ពួកគេដោយស្ដ្រីបានសកចេញទៅជាសត្វមេអំបៅនៅពេលដែលពួកគេរួចផុតពីឧបសគ្គក្នុងសង្គម។
កញ្ញាបាននិយាយថា ចំពោះផ្ទៃខាងក្រោយនៃគំនូរនេះជាពណ៌ព្រះអាទិត្យរះដែលតំណាងឱ្យថ្ងៃថ្មីហើយស្ដ្រីហោះចេញពីសម្បុកនាង និងប្រែក្លាយជាសត្វមេអំបៅ។
កញ្ញា អែម ច័ន្ទបូមរី បានប្រាប់ភ្នំពេញប៉ុស្ដិ៍ថា៖ «ដូច្នេះពេលណាស្ដ្រីនីមួយៗរកឃើញខ្លួនឯង និងចេញពីសម្បុកនាងដោយខ្លួនឯងនោះជាពេលវេលាដែលពួកគាត់ទទួលបានឯករាជភាព និងជីវិតថ្មីរបស់ពួកគាត់»។
ជាមួយបទពិសោធន៍ជាអ្នកគូរគំនូរបែបឌីជីថលកញ្ញាច័ន្ទបូរមី បាននិយាយថាកញ្ញាមិនរំពឹងថាស្នាដៃរបស់ខ្លួនបានជាប់មកដល់ការតាំងនៅវិចិត្រសាលរបស់សណ្ឋាគារសូហ្វីតែលនេះទេ។ប៉ុន្ដែកញ្ញាក៏សប្បាយចិត្ដពេលឃើញស្នាដៃរបស់ខ្លួនត្រូវបានតាំងបង្ហាញ និងធ្វើការប្រកួតប្រជែងជាមួយគំនូរ និងរូបថតរបស់សិល្បករឆ្នើមៗជាច្រើនរូបទៀតនេះ។
វិចិត្រករថ្មីថ្មោងរូបនេះបានឱ្យដឹងថាការរៀបចំពិព័រណ៍ និងការប្រកួតប្រជែងបែបនេះពិតជាល្អសម្រាប់សិល្បករ ជាពិសេសសិល្បករក្មេងៗដែលចង់បង្ហាញស្នាដៃរបស់ពួកគេ។
សិល្បករខ្លះមិនហ៊ានបញ្ចេញស្នាដៃរបស់ខ្លួន ដោយបានត្រឹមតែគូររួចក៏ទុកចោល តែពួកគេបានអរគុណដល់ការរៀបចំពិព័រណ៍ស្នាដៃទាំងនេះ។
កញ្ញាបានបន្ដថា៖ «ខ្ញុំគិតថាសិល្បៈគឺអ្វីដែលធ្វើឱ្យពិភពលោកមានភាពច្នៃប្រឌិត និងពោរពេញដោយពណ៌ចម្រុះ»។
ដោយប្រើបច្ចេកទេសថត ៣ប៉ុស្ដិ៍ក្នុងស៊ុមតែ១រូបថតពណ៌សនិងខ្មៅបានបង្ហាញព្រះឆាយាល័ក្ខណ៍របស់ព្រះបាទបរមរតនកោដ្ឋរូបវិមានឯករាជ្យនិងសត្វព្រាបហើរ។
សិល្បករយីនភារម្យក្នុងស្នាដៃ «ទិវាឯករាជ្យជាតិលើកទី៧០» បានឱ្យដឹងថាវាបង្ហាញពីការប្រារឰនិងអបអរសាទរចំពោះទិវាឯករាជ្យជាតិ៩វិច្ឆិកា។រូបភាពមនុស្សហាត់ប្រាណតំណាងឱ្យសេរីភាពនិងឯករាជភាពដែលពួកគេអាចធ្វើអ្វីក៏បាន។
លោកបាននិយាយថា៖ «ខ្ញុំមិនសូវមានសង្ឃឹមក្នុងការយកឈ្នះការប្រកួតនេះទេដោយសារខ្ញុំមើលឃើញថាស្នាដៃគំនូរសិល្បករមានទេពកោសល្យខ្លាំង។ពួកគាត់អាចស្រមើលស្រមៃពីអ្វីពួកគាត់គូរអំពីវា ដែលខុសពីការថត»។
លឿមឧត្តមរំលេចស្នាដៃ របាំសួព្រ័ត្រ (The Rope Dancer) បង្ហាញពីទេពអប្សរាដើរលើខ្សែដោយប្រើក្បាច់របាំជាលំនឹងរាងកាយឆ្ពោះទៅកាន់ឆត្ររួតចំនួន៩ជាន់។
លោកបាននិយាយថា៖ «ការប្រើគំនូរមនុស្សស្រីដោយសារភាគច្រើនស្ដ្រីមានវ័យចំណាស់ក្នុងភូមិជាអ្នកមើលការខុសត្រូវចម្បងនៅក្នុងគ្រួសារខណៈស្វាមីរបស់ពួកគាត់បានស្លាប់អំឡុងសម័យសង្គ្រាម ឬដោយសារគ្រឿងស្រវឹង»។
ការតាំងពិព័រណ៍នេះបើកទូលាយដល់សាធារណជនក្នុងការចូលទស្សនានិងចូលរួមបោះឆ្នោតចំពោះស្នាដៃដែលខ្លួនពេញចិត្ដតាមរយៈលេខកូដ QR ដែលបង្ហាញនៅជាប់នឹងស្នាដៃសិល្បៈនីមួយៗ។
ការប្រកាសម្ចាស់ជយលាភីចុងក្រោយក្នុងប្រភេទរង្វាន់ទាំង៣ នឹងត្រូវធ្វើឡើងនៅថ្ងៃទី២៦ ខែមករាឆ្នាំ២០២៤។
ការប្រារឰពិព័រណ៍ស្នាដៃសិល្បៈនិងឯករាជភាពនេះធ្វើឡើងតាមរយៈការគាំទ្រដ៏សប្បុរស ដែលស្រឡាញ់និងផ្ដល់តម្លៃដល់សិល្បៈដើម្បីបំផុសគំនិតនិងបង្រួបបង្រួមសហគមន៍។
លោក Chevet បាននិយាយថា៖ «ពិព័រណ៍នេះបើកជាសាធារណៈហើយអ្នកទស្សនាត្រូវបានអញ្ជើញឱ្យចូលរួមបោះឆ្នោតផងដែរ»។
ចូលរួមអបអរសាទរខួបលើកទី៧០ នៃទិវាបុណ្យឯករាជ្យជាតិកម្ពុជាតាមរយៈការចូលរួមពិព័រណ៍បែបប្រកួតប្រជែងស្នាដៃចម្រុះឯករាជ្យ ដែលសិល្បករបង្ហាញពីឥទ្ធិពលនៃសិល្បៈដោយផ្ដោតលើស្មារតីនៃសេរីភាពនិងការច្នៃប្រឌិត៕
