ពិធីចុះកិច្ចព្រមព្រៀង រវាងលោក អ៊ុម រម្យណី និងភាគីអូស្ដ្រាលី កាលពីថ្ងៃទី១៥ មករា ។ រូបថត ក្រសួងអប់រំ
កំពង់ស្ពឺៈគណៈប្រតិភូប្រទេសអូស្រ្តាលី បានចុះកិច្ចព្រមព្រៀងបន្តអនុវត្ត «គម្រោងអង្គរ» ជាមួយក្រសួងអប់រំយុវជន និងកីឡា ដើម្បីជួយគាំទ្រជាសម្ភារ និងហិរញ្ញវត្ថុទៅដល់សាលារៀនគោលដៅបន្ថែមទៀតក្នុងខេត្តកំពង់ស្ពឺ ខណៈគម្រោងនេះបានអនុវត្តក្នុងខេត្តកំពង់ស្ពឺអស់រយៈពេល ១៨ ឆ្នាំ មកហើយ។
ការចុះកិច្ចព្រមព្រៀងបន្តគម្រោងអង្គរនេះធ្វើឡើងនៅវិទ្យាស្ថានបច្ចេកវិទ្យាកម្ពុជា ក្រោមអធិបតីលោក អ៊ុម រម្យណី រដ្ឋលេខាធិការក្រសួងអប់រំ ជាមួយគណៈប្រតិភូប្រទេសអូស្រ្តាលី កាលពីថ្ងៃទី១៥ ខែមករា ឆ្នាំ២០២៤ ។ ការបន្តគម្រោងអង្គរនេះ ភាគីប្រទេសអូស្រ្តាលីក៏នឹងជួយគាំទ្របន្ថែមទៀត ដល់ការអភិវឌ្ឍសាលារៀនក្នុងខេត្តកំពង់ស្ពឺក៏ដូចជាសាលាសម្ព័ន្ធមេត្រីឱ្យកាន់តែប្រសើរឡើងផងដែរ។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជននិងកីឡាបានឱ្យដឹងនៅថ្ងៃទី១៦ ខែមករាថា គម្រោងអង្គរចាប់ផ្ដើមអនុវត្តសកម្មភាពក្នុងខេត្តកំពង់ស្ពឺតាំងពីឆ្នាំ២០០៦តាមរយៈការកៀងគររកម្ចាស់ជំនួយដែលជាគ្រឹះស្ថានសិក្សាសាធារណៈនៅប្រទេសអូស្ត្រាលី មកជួយសាលារៀនគោលដៅក្នុងខេត្តកំពង់ស្ពឺ។
លោកស្រីបន្តថា៖«ចាប់តាំងពីឆ្នាំ២០០៦ រហូតមកទល់ពេលនេះមានសាលារៀនគោលដៅចំនួន ២៤ កន្លែង ក្នុងខេត្តកំពង់ស្ពឺ បានទទួលផលពីការអនុវត្តគម្រោងនេះ ដែលគាំទ្រដោយភាគីប្រទេសអូស្រ្តាលី ដើម្បីជួយជំរុញនិងអភិវឌ្ឍសាលាក្នុងខេត្តកំពង់ស្ពឺឱ្យកាន់តែប្រសើរឡើងថែមទៀត»។
លោកស្រី ឃួន វិច្ឆិកា បានបន្ដថា សកម្មភាពនៃការអភិវឌ្ឍសាលារៀនក្នុងគោលដៅទាំងនោះរួមមានការកសាងបង្គន់អនាម័យ កសាងអាងទឹកសម្រាប់ប្រើប្រាស់ក្នុងសាលា ទិញសម្ភាររៀន និងបង្រៀន សម្ភារកីឡា សម្ភារការិយាល័យ និងសម្ភារICT សម្រាប់ដំណើរការសាលាសម្ព័ន្ធមេត្រីផងដែរ។
អ្នកនាំពាក្យក្រសួងអប់រំក៏បានបញ្ជាក់បន្ថែមទៀតថា ក្រៅពីការជួយជាសម្ភារនិងសាងសង់ហេដ្ឋារចនាសម្ព័ន្ធហើយ ក្នុងឆ្នាំ២០២៣កន្លងមក គម្រោងអង្គរបានកៀងគរថវិកាបានចំនួនជាង២ម៉ឺនដុល្លារដើម្បីជួយដល់ការអភិវឌ្ឍសាលារៀននៅក្នុងខេត្តកំពង់ស្ពឺ ហើយគម្រោងអង្គរនេះអនុវត្តតែនៅក្នុងខេត្តកំពង់ស្ពឺមួយប៉ុណ្ណោះ។
អភិបាលរងខេត្តកំពង់ស្ពឺ លោកស្រី ឡុង បូណារ៉េត ក៏បានឱ្យដឹងដែរថា មុននឹងភាគីប្រទេសអូស្ត្រាលី បន្តគម្រោងនេះជាមួយក្រសួងអប់រំគឺគណៈប្រតិភូនៅប្រទេសអូស្ត្រាលី តែងតែចុះមកពិនិត្យមើលជារៀងរាល់ ១ ឆ្នាំ ម្ដង អំពីដំណើរការនៃការអភិវឌ្ឍសាលារៀនក្នុងខេត្តនេះ។
លោកស្រីបានបន្តថា បន្ទាប់ពីពិនិត្យរួចហើយ ក៏ឃើញថាក្នុង១ឆ្នាំៗរាល់ជំនួយជាហិរញ្ញវត្ថុ សម្ភារសម្រាប់ការគាំទ្រក្នុងសាលារៀនគោលដៅ គឺត្រូវបានបែងចែកដោយមានតម្លាភាព ហេតុនេះហើយបានជាធ្វើឱ្យភាគីប្រទេសអូស្ដ្រាលីនៅតែបន្តគម្រោងនេះដើម្បីជួយទៅដល់សាលារៀនក្នុងខេត្តកំពង់ស្ពឺ។
លោកស្រីបញ្ជាក់ថា៖«ក្នុងឆ្នាំនេះយើងពិតជាមានសំណាងបានទទួលឱកាសក្នុងការអនុវត្តគម្រោងនេះបន្តទៀតក្រោមការគាំទ្រពីប្រទេសអូស្ដ្រាលី។ការបន្តគម្រោងនេះបានផ្ដល់ផលប្រយោជន៍យ៉ាងច្រើនទៅកាន់សិស្សានុសិស្សនៅតាមសាលារៀនរបស់យើង»។
បើតាមលោកស្រី ឡុង បូណារ៉េត ការបន្តគម្រោងអង្គរក្នុងឆ្នាំ២០២៤នេះដែរគឺភាគីអូស្រ្តាលីនឹងគ្រោងជួយអភិវឌ្ឍសាលារៀននៅក្នុងខេត្តកំពង់ស្ពឺចំនួន១២កន្លែងថែមទៀតដែលមិនទាន់មានបន្ទប់អនាម័យ សម្ភារការិយាល័យ ក៏ដូចជាសម្ភារសម្រាប់ជំនួយដល់លោកគ្រូ អ្នកគ្រូបង្រៀនសិស្សផងដែរ៕
