កូនឈើដែលមន្ត្រីក្នុងខេត្ដបណ្ដុះទុកចែកជូនពលរដ្ឋដាំកាលពីថ្ងៃទី១០ មករា ។ រូបថត ក្រសួងបរិស្ថាន
ភ្នំពេញៈ រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានបង្ហាញក្តីរំពឹងថា នៅក្នុងខែមិថុនានិងកក្កដា ឆ្នាំ ២០២៤ ខាងមុខ ក្រសួងអាចនឹងចែកកូនឈើជូនប្រជាពលរដ្ឋចំនួនយ៉ាងតិច ១ លានដើម យកទៅដាំដោយឥតគិតថ្លៃ ក្នុងយុទ្ធនាការដាំដើមឈើយ៉ាងតិចចំនួន ១ លានដើមក្នុង ១ ឆ្នាំ។
អនុលោមតាមអនុសាសន៍ណែនាំរបស់លោកនាយករដ្ឋមន្ត្រីហ៊ុន ម៉ាណែត ក្រសួងបរិស្ថានបានដាក់ចេញយុទ្ធសាស្ត្រចក្រាវិស័យបរិស្ថាន២០២៣-២០២៨ ដោយផ្តោតលើជ្រុងចំនួន៣គឺភាពស្អាត ភាពបៃតង និងចីរភាព។
លោកអ៊ាង សុផល្លែត បានឱ្យដឹងថា ដើម្បីទទួលបាននូវភាពបៃតងគឺទាំងអស់គ្នាត្រូវរួមចំណែកធ្វើយ៉ាងណាដាំដើមឈើឱ្យបានច្រើននៅកម្ពុជាដើម្បីឆ្ពោះទៅសម្រេចបានការបង្កើនគម្របព្រៃឈើចំនួន៦០%នៅឆ្នាំ២០៥០។ដើម្បីសម្រេចគោលដៅនេះក្រសួងបរិស្ថានបានដាក់ចេញនូវ
យុទ្ធនាការដាំដើមឈើយ៉ាងតិចចំនួន១លានដើមក្នុង១ឆ្នាំ។
លោកបានលើកឡើងតាមរយៈវីដេអូឃ្លីបនៅថ្ងៃទី១៧ ខែមករាថា៖ «ដើមឈើមានចម្រុះ តែយើងនឹងចែកជូនទៅប្រជាជនឱ្យដាំដើមឈើដែលស្របទៅតាមស្ថានភាពដី ស្ថានភាពអាកាសធាតុ។ ឧទាហរណ៍ដូចនៅខេត្តកំពង់ស្ពឺមានសហគមន៍មួយធ្វើអាជីវកម្មដើមឫស្សីដោយពួកគាត់ឡើងទៅកាប់ឫស្សីនៅលើភ្នំយកមកលក់ឱ្យក្រុមហ៊ុនកែច្នៃធ្វើការនាំចេញ»។
លោករដ្ឋមន្ត្រីបានបន្តថា៖«យើងពិនិត្យឃើញថាស្ថានភាពដីនៅទីនោះដាំឫស្សីបានល្អអ៊ីចឹងហើយក្រសួងបរិស្ថាននឹងប្រគល់កូនដើមឫស្សីចំនួន១០ម៉ឺនដើមទៅពួកគាត់ដើម្បីដាំហើយឫស្សីនេះមានប្រយោជន៍ច្រើនណាស់ដែលស្រូបយកកាបូនច្រើន ហើយវាក៏ចាត់ទុកជាប្រភេទព្រៃឈើមួយផងដែរ»។
លោកក៏បានបញ្ជាក់ដែរថា រហូតមកទល់ពេលនេះក្រសួងបរិស្ថានបានចែកកូនឈើជូនប្រជាពលរដ្ឋដាំដុះ បានចំនួន១៤ម៉ឺនដើមរួចហើយ។ជាមួយគ្នានេះមន្ទីរបរិស្ថាននៅគ្រប់ខេត្តបានបង្កើតថ្នាលបណ្តុះកូនឈើតាមខេត្តរៀងៗខ្លួនផងដែរ។
លោក អ៊ាង សុផល្លែត បានបង្ហាញក្តីរំពឹងថា ៖ «នៅក្នុងខែមិថុនា និងកក្កដា ឆ្នាំ២០២៤ ខាងមុខ កូនឈើនៅតាមថ្នាល់បណ្តុះ រីកដុះធំល្មម ហើយនឹងអាចចែកជូនប្រជាពលរដ្ឋចំនួនយ៉ាងតិច១លានដើមយកទៅដាំ ដោយឥតគិតថ្លៃ។ដើមឈើដែលបានដាំដុះទាំងអស់នោះនៅពេលធំធាត់ទៅនឹងស្រូបយកកាបូនដែលយើងអាចលក់បានសម្រាប់ជួយដល់ការអភិវឌ្ឍប្រទេសជាតិនិងចូលរួមចំណែកដល់ការអភិវឌ្ឍនិងសេដ្ឋកិច្ចប្រជាពលរដ្ឋនៅមូលដ្ឋាន»។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា (CYN) បានគាំទ្រទៅដល់ក្រសួងបរិស្ថានដែលចែកកូនឈើទៅដល់ប្រជាពលរដ្ឋសម្រាប់ដាំយ៉ាងហោចណាស់ក៏ជាការដាំសម្រាប់តាំងលម្អឬក៏មាននូវប្រភេទកូនឈើកម្រមួយចំនួនដែរដែលផុតពូជនិងជិតផុតពូជដើម្បីឱ្យប្រជាពលរដ្ឋបានដឹង បានស្គាល់។
លោកបានបញ្ជាក់ថា៖«ខ្ញុំយល់ថា ការដែលយើងទៅដាំកូនឈើឡើងវិញនេះជាចំណែកមួយដែរ តែមួយទៀតយើងក៏ត្រូវការពារនិងផ្សព្វផ្សាយកុំឱ្យមានការប្រើប្រាស់គ្រឿងសង្ហារិមហើយក្រសួងក៏គួរតែបង្កើតយន្តការការពារធនធានធម្មជាតិនិងព្រៃឈើឱ្យមានប្រសិទ្ធភាពទើបជារឿងមួយសំខាន់និងធានានូវនិរន្តរភាពព្រៃឈើនិងធនធានធម្មជាតិ»។
លោកហេង គឹមហុង បានបន្ថែមថា ប្រសិនបើគ្រាន់តែមានឆន្ទៈក្នុងការអប់រំនិងការផ្សព្វផ្សាយក៏មិនទាន់មានប្រសិទ្ធភាពខ្ពស់ដូចការចូលរួមចំណែកក្នុងការការពារនិងពង្រឹងវិធានការច្បាប់បានដែរព្រោះកន្លងមកបទល្មើសធនធានធម្មជាតិនៅតែបន្តកើតមានឡើង ដែលជាសញ្ញាមួយនៅតែមានការព្រួយបារម្ភ។
សូមរំឭកដែរថា រាជរដ្ឋាភិបាលកម្ពុជា បានប្រកាសឱ្យអនុវត្តវិធានប្រតិបត្តិមាត្រា៦ នៃកិច្ចព្រមព្រៀងទីក្រុងប៉ារីស៍ស្តីពីការប្រែប្រួលអាកាសធាតុដែលបានចែងពីការធ្វើអាជីវកម្មកាបូន។ការធ្វើពាណិជ្ជកម្មកាបូននេះគឺពិតជាមានសារៈសំខាន់សម្រាប់ប្រទេសកម្ពុជាដែលកំពុងមាននិន្នាការលើការអភិវឌ្ឍក្នុងលក្ខខណ្ឌគិតគូរពីបរិស្ថានដែលប្រកបដោយចីរភាព៕
