ទូកនេសាទនៅខេត្ដកែបកាលពីពេលកន្លងទៅ ។ Post Staff
កែបៈ អាជ្ញាធរខេត្តកែប និងមន្ទីរពាក់ព័ន្ធកំពុងរៀបចំផែនការ ជំរុញការផ្ដល់សេវាចុះបញ្ជីទូកនេសាទទៅដល់មូលដ្ឋានរបស់ប្រជានេសាទ ដើម្បីបង្កភាពងាយស្រួលជូនប្រជាពលរដ្ឋដែលធ្វើអាជីវកម្មនេសាទឱ្យមានភាពស្របច្បាប់ ហើយផលនេសាទបាន ក៏អាចនាំចេញទៅក្រៅប្រទេសផងដែរ។
លោក ថឹង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែប បានឱ្យដឹងនៅថ្ងៃទី ១៧ ខែមករាថា តាមរយៈកិច្ចប្រជុំរៀបចំផែនការនាពេលថ្មីៗនេះគឺអាជ្ញាធរខេត្តនិងមន្ទីរកសិកម្មក៏ដូចជាមន្ទីរសាធារណការនិងដឹកជញ្ជូននឹងគ្រោងចុះទៅផ្ដល់សេវាចុះបញ្ជីទូកនេសាទរបស់ប្រជាពលរដ្ឋដែលកំពុងប្រកបអាជីវកម្មនេសាទនៅលើដែនសមុទ្រខេត្តកែប។
លោកបានបន្តថា មុននឹងឈានទៅដល់ការផ្ដល់សេវានេះនៅមូលដ្ឋាន តាមផែនការរបស់អាជ្ញាធរខេត្ត ខាងមន្ទីរកសិកម្ម កំពុងជំរុញណែនាំឱ្យតំណាងសហគមន៍នេសាទនីមួយៗនៅទូទាំងខេត្តកែប ត្រូវចូលរួមជួយផ្សព្វផ្សាយពីការចុះបញ្ជីទូកនេសាទទៅកាន់ប្រជានេសាទនៅតាមមូលដ្ឋានដើម្បីផ្ដល់ភាពងាយស្រួលនិងមានការយល់ច្បាស់ពីការងារចុះបញ្ជីទូកនេសាទនេះ។
លោកបានថ្លែងថា៖«យើងចាប់ផ្ដើមណែនាំតំណាងសហគមន៍នេសាទឱ្យគាត់ជួយពន្លឿនក្នុងការផ្សព្វផ្សាយទៅកាន់ប្រជានេសាទនៅតាមមូលដ្ឋានគាត់និងដាក់ពេលវេលាដើម្បីឱ្យយើងរៀបចំក្រុមការងារក្នុងការចុះទៅផ្ដល់សេវាចុះបញ្ជីទូកនេសាទនៅតាមមូលដ្ឋានរបស់ពួកគាត់។ដូច្នេះផែនការដែលយើងមានគម្រោងចុះទៅផ្ដល់សេវានេះ គឺយើងរំពឹងថា វានឹងទទួលបានលទ្ធផលប្រសើរជាងឆ្នាំមុន»។
លោកថឹង បូរិន ថ្លែងថាក្រោយពីដឹងចំនួនទូកនេសាទដែលកំពុងធ្វើអាជីវកម្មនេសាទនៅលើដែនសមុទ្រក្នុងខេត្តកែបហើយ អាជ្ញាធរនឹងកំណត់ប្រភេទឧបករណ៍នេសាទរបស់ប្រជាពលរដ្ឋ ដើម្បីងាយស្រួលគ្រប់គ្រងពីបទល្មើសនេសាទផ្សេងៗ។
ចំពោះការងារផ្ដល់សេវាចុះបញ្ជីទូកនេសាទនេះដែរកន្លងមកគឺបានរៀបចំឡើងនៅអង្គភាពច្រកចេញ-ចូលតែមួយរបស់សាលាខេត្ត តែលោកសង្កេតឃើញមានប្រជានេសាទតិចតួចណាស់ដែលមកចុះបញ្ជីទូកនេសាទ។
បើតាមលោកប្រធានមន្ទីរកសិកម្មខេត្តកែប មានទូកនេសាទកំពុងធ្វើអាជីវកម្មនេសាទប្រមាណជា៥០០ទូក ក្នុងនោះមានមួយចំនួនតិចតូចបានចុះបញ្ជីរួចរាល់ហើយ ប៉ុន្តែចំនួនជាក់លាក់ប៉ុន្មាននោះលោកមិនទាន់អាចបញ្ជាក់បានឡើយ ព្រោះមន្ទីរពាក់ព័ន្ធកំពុងចាប់ផ្ដើមជំរុញធ្វើកិច្ចការងារនេះ។
ដោយឡែកលោក សោម ពិសិដ្ឋ អភិបាលខេត្តកែប ក៏បានឱ្យដឹងដែរថា ការជំរុញការងារចុះបញ្ជីទូកនេសាទនេះគឺដើម្បីដឹងអំពីចំនួនទូកនេសាទនិងប្រភេទទូកនេសាទដែលកំពុងធ្វើអាជីវកម្មនេសាទក៏ដូចជាដឹងពីប្រភេទនៃការប្រើប្រាស់ឧបករណ៍នេសាទនៅលើដែនសមុទ្រខេត្តកែប។
លោកបានបញ្ជាក់ថា៖«ឥឡូវនេះយើងកំពុងរៀបចំចងក្រងផែនការជំរុញការចុះបញ្ជីទូកនេសាទរបស់ប្រជានេសាទដោយត្រូវចាប់ផ្ដើមណែនាំផ្សព្វផ្សាយចាប់ពីតំណាងសហគមន៍រហូតដល់យើងឈានចុះទៅផ្ដល់សេវាចុះបញ្ជីហ្នឹងនៅតាមមូលដ្ឋានរបស់ប្រជានេសាទ»។
នៅឆ្នាំ២០២៤នេះប្រជានេសាទមិនចាំបាច់ពិបាកខាតពេលមកធ្វើដំណើរចុះបញ្ជីទូកនេសាទរបស់ខ្លួននៅអង្គភាពច្រកចេញ-ចូលតែមួយទៀតឡើយ គឺអាជ្ញាធរ នឹងចុះទៅផ្ដល់សេវានេះទៅដល់មូលដ្ឋានក្រោយពីបង្កើតក្រុមការងារ និងរៀបចំផែនការរួចរាល់។
យោងតាមលោក ផន រឹម អ្នកនាំពាក្យក្រសួងសាធារណការ និងដឹកជញ្ជូន ធ្លាប់បានឱ្យដឹងនាពេលកន្លងមកថា នៅក្នុងខេត្តឆ្នេរសមុទ្រទាំង៤របស់កម្ពុជាដែលមាន ខេត្តព្រះសីហនុ កោះកុង កំពត និងខេត្តកែប មាននាវាសរុបចំនួន៨០៩៤គ្រឿង ក្នុងនោះមាននាវាដឹកទំនិញចំនួន៣៧០គ្រឿង នាវាដឹកអ្នកដំណើរ១៣៣គ្រឿង និងនាវានេសាទ៧៥៩១គ្រឿង។
លោកបានបញ្ជាក់ថា គិតមកត្រឹមឆ្នាំ២០២៣កន្លងមក មាននាវាចុះបញ្ជីសរុបចំនួន២១២០គ្រឿង ក្នុងនោះមាន នាវាដឹកទំនិញ៤២០គ្រឿង និងនាវាដឹកអ្នកដំណើរ ២៥៩គ្រឿង និងនាវានេសាទ១៤៤១គ្រឿង ។
ជាមួយគ្នានេះកាលពីចុងឆ្នាំ២០២៣ក្រសួងសាធារណការនិងដឹកជញ្ជូនក៏បានចេញសេចក្ដីប្រកាសផងដែរ ដោយឱ្យប្រជាពលរដ្ឋជាពិសេសម្ចាស់នាវាដឹកទំនិញដែលមានចំណុះផ្ទុកលើសពី៤០តោនដល់១៥០តោន និងនាវានេសាទដែលមានកម្លាំងម៉ាស៊ីនលើសពី៩០សេះដល់២៥០សេះទាំងអស់អាចមកចុះបញ្ជីនាវារបស់ខ្លួនបាននៅតាមមន្ទីរសាធារណការ និងដឹកជញ្ជូនខេត្តឆ្នេរសមុទ្ររួមមាន ខេត្តព្រះសីហនុ កោះកុង កំពត និងខេត្តកែប៕
