ទិដ្ឋភាពភ្លើងឆេះព្រៃចម្ការកៅស៊ូនៅខេត្ដកំពង់ធំកាលពីពេលកន្លងទៅ។ រូប សហការី
ភ្នំពេញៈនារដូវប្រាំងនេះ ក្រសួងបរិស្ថាន បានណែនាំដល់គណៈអភិបាលរាជធានី-ខេត្តជំរុញការអនុវត្តវិធានការទប់ស្កាត់ និងកាត់បន្ថយការបំពុលខ្យល់សាធារណៈតាមរយៈអប់រំណែនាំប្រជាពលរដ្ឋកុំឱ្យដុតរានព្រៃ វាលស្មៅ និងសំណល់កសិកម្ម ខណៈអគ្គនាយកដ្ឋានកៅស៊ូបានដាក់ចេញវិធានការបង្ការអគ្គិភ័យក្នុងចម្ការកៅស៊ូនៅរដូវជ្រុះស្លឹក។
សេចក្ដីប្រកាសព័ត៌មានរបស់ក្រសួងបរិស្ថានចុះថ្ងៃទី១៨ ខែមករា ឆ្នាំ២០២៤ បានឱ្យដឹងថា នៅខណៈដែលរបបខ្យល់មូសុងកំពុងបក់ពីទិសខាងជើងមកទិសខាងត្បូងនារដូវនេះ ក្រសួងបាននិងកំពុងតាមដានយ៉ាងយកចិត្តទុកដាក់លើគុណភាពខ្យល់ដោយប្រើឧបករណ៍ និងស្ថានីយត្រួតពិនិត្យគុណភាពខ្យល់បំពាក់នៅទូទាំងប្រទេសចំនួន ៥១ ទីតាំង។
ក្រសួងបញ្ជាក់ថា៖«ជាលទ្ធផលគិតមកត្រឹមថ្ងៃទី១៦ ខែមករា ឆ្នាំ២០២៤ ស្ថានភាពគុណភាពខ្យល់នៅកម្ពុជាមានភាពល្អប្រសើរ គឺកម្រិតភាគល្អិតនិចល PM 2.5 ស្ថិតចន្លោះពី ១៨,០៣ ug/m ទៅ ២១,៤៣ g/m ដែលទាបជាងកម្រិតស្ដង់ដាកំណត់គឺ ៥០ug/m ជាមធ្យមក្នុងរយៈពេល ២៤ ម៉ោង»។
ទន្ទឹមនឹងនេះ ដើម្បីធានាបាននូវការទប់ស្កាត់ការបំពុលខ្យល់ជាយថាហេតុក្នុងរដូវប្រាំងនេះ ក្រសួងបរិស្ថាន បានណែនាំដល់គណៈអភិបាលរាជធានី-ខេត្ត ជំរុញការអនុវត្ត វិធានការទប់ស្កាត់ និងកាត់បន្ថយការបំពុលខ្យល់សាធារណៈតាមរយៈ អប់រំណែនាំប្រជាពលរដ្ឋកុំឱ្យ ដុតរានព្រៃ វាលស្មៅ សំណល់កសិកម្ម គល់ជញ្ជាំង សំរាម-សំណល់រឹង និងការដុតសំណល់ផ្សេងៗទៀតនៅទីចំហ។
ចាត់វិធានការទប់ស្កាត់សកម្មភាពដុតរានព្រៃ ដុតវាលស្មៅ ដុតសំណល់កសិកម្ម ដុតសំរាម សំណល់រឹងនៅទីចំហ និងការឆេះទីលានចាក់សំរាម, ចាត់វិធានការទប់ស្កាត់ការហុយធូលីនៅការដ្ឋាន សំណង់ និងការដឹកជញ្ជូនសម្ភារសំណង់ និងធ្វើការសម្អាតធូលី និងធ្វើអនាម័យនៅតាមដងផ្លូវ និង ទីសាធារណៈឱ្យបានជាប់ជាប្រចាំ។
ជាមួយគ្នានេះ ក្រសួងកសិកម្ម និងក្រសួងបរិស្ថាន ក៏បានចេញសេចក្តីជូនដំណឹងស្តីពីវិធានការការពារនិងទប់ស្កាត់ភ្លើងឆេះព្រៃដល់គ្រប់ស្ថាប័នមានសមត្ថកិច្ច រដ្ឋបាលថ្នាក់ ក្រោមជាតិ មន្ត្រីរាជការ កងកម្លាំងប្រដាប់អាវុធ សហគមន៍ សិស្សានុសិស្ស ព្រះសង្ឃ និងប្រជាពលរដ្ឋ ទាំងអស់ឱ្យបានយល់ច្បាស់ពីករណីកិច្ចក្នុងការការពារ ទប់ស្កាត់ និងប្រយុទ្ធនឹងភ្លើងឆេះព្រៃ ដោយរួម សហការយ៉ាងជិតស្និទ្ធជាមួយអង្គភាពជំនាញក្រោមឱវាទក្រសួងទាំង២។
ចំណែកសេចក្តីជូនដំណឹងរបស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទកាលពីថ្ងៃទី ១៦ ខែមករា បានឱ្យដឹងថា ជាទូទៅអាកាសធាតុនៅរដូវប្រាំងតែងមានសភាពក្ដៅស្ងួតហួតហែងស្របពេលដើមកៅស៊ូចាប់ផ្តើមជ្រុះស្លឹកចន្លោះពីខែមករារហូតដល់ចុងខែកុម្ភៈ ដែលអាចបង្កជាគ្រោះអគ្គិភ័យជាយថាហេតុនៅក្នុងចម្ការកៅស៊ូ។
សេចក្តីជូនដំណឹងបន្តថា «ដូច្នេះ ដើម្បីទប់ស្កាត់ និងបង្ការហានិភ័យខាងលើ អគ្គនាយកដ្ឋានកៅស៊ូ សូមជម្រាបជូនដំណឹងនិងក្រើនរំឭកដល់ម្ចាស់ចម្ការកៅស៊ូទាំងអស់នៅទូទាំងប្រទេសឱ្យមានការប្រុងប្រយ័ត្នយកចិត្តទុកដាក់ខ្ពស់ក្នុងការសម្អាតចម្ការនិងធ្វើផ្លូវភ្លើងឱ្យបានត្រឹមត្រូវ»។
សេចក្តីជូនដំណឹងណែនាំថា ម្ចាស់ចម្ការត្រូវកាត់ស្មៅនិងរុក្ខជាតិចង្រៃនៅជុំវិញព្រំចម្ការ និងចន្លោះរងកៅស៊ូជាប់ផ្លូវធ្វើដំណើរឱ្យបានស្អាតនិងស្រឡះល្អ និងប្រមូលស្មៅរុក្ខជាតិចង្រៃ ដែលកាត់រួចនិងស្លឹកកៅស៊ូដែលជ្រុះនៅតាមចន្លោះរងកៅស៊ូដែលជាប់ផ្លូវធ្វើដំណើរដោយត្រូវដាក់ជាគំនរៗប្រវែង ២៥ ម៉ែត្រ ដាច់ៗពីគ្នាតាមចន្លោះរងកៅស៊ូ។ ត្រូវដុតមួយគំនរម្តងៗដោយចាប់ផ្តើមពីគំនរ ដែលស្ថិតនៅក្រោមទិសខ្យល់មុនគេ ហើយការដុតត្រូវធ្វើនៅពេលព្រឹកព្រលឹមនិងបញ្ឈប់យ៉ាងយូរត្រឹមម៉ោង ៩ ព្រឹក ដោយត្រូវឃ្លាំមើលឱ្យបានហ្មត់ចត់ ដើម្បីចៀសវាងផ្កាភ្លើងហើរទៅឆេះកន្លែងដទៃទៀតនិងត្រូវធានាថា ភ្លើងពិតជារលត់អស់១ ០០ ភាគរយក្រោយពេលឈប់ដុត។
អគ្គនាយកដ្ឋានសង្កត់ធ្ងន់ថា៖«ហាមដាច់ខាតដុតសម្អាតនៅពេលរសៀលព្រោះអាចបង្កឱ្យមានអគ្គិភ័យកើតឡើងជាយថាហេតុនៅវេលាយប់»។
បើតាមប្រភពដដែលនេះ ម្ចាស់ចម្ការកៅស៊ូមិនត្រូវរង់ចាំរហូតដល់ស្លឹកកៅស៊ូជ្រុះ ១០០ ភាគរយ ទើបប្រមូលដុតនោះទេ ព្រោះវាបង្កើតជាគំនរក្រាស់ បង្កឱ្យភ្លើងឆេះខ្លាំង ពិបាកគ្រប់គ្រងនិងប៉ះពាល់ដល់ដើមកៅស៊ូក្នុងចម្ការ។ ការដុតស្លឹកកៅស៊ូធ្វើឡើងជា៣ដំណាក់កាលគឺ ទី១ ពេលកៅស៊ូជ្រុះស្លឹកបានប្រមាណ៣០ភាគរយ ទី២ ពេលកៅស៊ូជ្រុះស្លឹកបាន ប្រមាណ៦០ភាគរយ និងទី៣ ពេលកៅស៊ូជ្រុះស្លឹកបានប្រមាណ ១០០ ភាគរយ។
អភិបាលខេត្តកំពង់ចាមលោក អ៊ុន ចាន់ដា បានឱ្យដឹងនៅថ្ងៃទី១៨ ខែមករាថា មន្ទីរជំនាញនិងអាជ្ញាធរមូលដ្ឋានដែលមានភារកិច្ចបានចុះផ្សព្វផ្សាយស្តីពីវិធានការទាំងនេះដល់ប្រជាពលរដ្ឋ និងបានអប់រំពលរដ្ឋមិនឱ្យដុតរានព្រៃនិងវាលស្មៅផងដែរ។លោកថ្លែងថា៖«មន្ទីរបរិស្ថានបានធ្វើការផ្សព្វផ្សាយតាមជំនាញរបស់ខ្លួនរួចហើយ ចំណែកខាងមន្ទីរកសិកម្មក៏បានចាត់ចែងរឿងនេះផងដែរ»។
លោកអភិបាលខេត្តឱ្យដឹងទៀតថា សម្រាប់ខេត្តកំពង់ចាមដែលជាខេត្តមានដំណាំកៅស៊ូច្រើន មិនដែលមានអគ្គិភ័យនៅចម្ការកៅស៊ូនោះទេ ខណៈខេត្តនេះមានផ្ទៃដីដាំកៅស៊ូជាង២ម៉ឺនហិកតា៕
