លោក វង សូត ក្នុងពិធីបុណ្យនៅស្រុកពញាក្រែក ខេត្តត្បូងឃ្មុំ នៅថ្ងៃទី២ ខែមករា ។ រូបថត រដ្ឋសភា
ភ្នំពេញៈ លោក វង សូត អនុប្រធានទី២ រដ្ឋសភា បានជំរុញឱ្យអាជ្ញាធរគ្រប់ជាន់ថ្នាក់ ពុទ្ធបរិស័ទ រួមទាំងសប្បុរសជនក្នុងនិងក្រៅប្រទេស ចូលរួមលើកការអភិវឌ្ឍវិស័យអប់រំ ពិសេសសាលារៀននៅតាមមូលដ្ឋាន និងហេដ្ឋារចនាសម្ព័ន្ធនានាក្នុងសាលារៀន ដើម្បីលើកកម្ពស់ធនធានមនុស្ស ដែលជាកត្តារួមចំណែកយ៉ាងសំខាន់ក្នុងការអភិវឌ្ឍសង្គមជាតិ។
លោក វង សូត បានជំរុញបែបនេះនៅឱកាសលោកបានចូលរួមក្នុងពិធីបុណ្យលើកតម្កល់រតនវត្ថុចំនួន ៩អង្គ នៅលើប្រាសាទព្រះអង្គប្រសូតដែលមានកម្ពស់២១ម៉ែត្រ ដែលចំណាយថវិកាកសាងអស់ប្រមាណ ៣៣ ម៉ឺនដុល្លារ នៅវត្តសាមគ្គីសុខារាម ហៅវត្ត«ច្រករំដេង» ស្ថិតនៅភូមិច្រករំដេង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ នៅថ្ងៃទី២ ខែមករា ឆ្នាំ២០២៤។
លោកបានលើកឡើងតាមរយៈហ្វេសប៊ុករបស់លោកថា កន្លងទៅវិស័យពុទ្ធចក្រ ដើរតួនាទីសំខាន់ក្នុងការអភិវឌ្ឍធនធានមនុស្ស ហើយសព្វថ្ងៃនេះ ប្រទេសជាតិមានការអភិវឌ្ឍ ហើយរាជរដ្ឋាភិបាលបានកសាងសាលារៀននៅគ្រប់មូលដ្ឋានទាំងអស់ នៅទូទាំងប្រទេស។
លោកបញ្ជាក់ថា៖ «ទោះយ៉ាងណាក៏ដោយ យើងត្រូវយកចិត្តទុកដាក់បន្ថែមទៀត និងចូលរួមចំណែកអភិវឌ្ឍហេដ្ឋារចនាសម្ព័ន្ធក្នុងសាលារៀន ដើម្បីបំពេញតម្រូវការឱ្យបានគ្រប់គ្រាន់ សំដៅអភិវឌ្ឍធនធានមនុស្ស និងសង្គមជាតិរបស់យើងកាន់តែជឿនលឿនថែមទៀត»។
ជាមួយគ្នានោះ លោក វង សូត ក៏បានលើកឡើងផងដែរថា រាល់សមិទ្ធផលទាំងឡាយដែលបានអភិវឌ្ឍគឺដោយសារប្រទេសមានសុខសន្តិភាព ដែលទាំងអស់គ្នាទទួលបានដោយសារការខិតខំប្រឹងប្រែងរបស់អតីតនាយករដ្ឋមន្ត្រីលោក ហ៊ុន សែន ដែលបានអនុវត្តនូវនយោបាយឈ្នះ ឈ្នះ។
លោកមានប្រសាសន៍ថា៖ «ក្រោមម្លប់សន្តិភាព ដែលជាមរតកដ៏មានតម្លៃគ្មានអ្វីកាត់ថ្លៃបាន កម្ពុជាក្នុងសម័យថ្មី ក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តីបន្តវេន ពោរពេញដោយសមត្ថភាព និងមានសីលធម៌ខ្ពស់ កម្ពុជានឹងទទួលបាននូវការអភិវឌ្ឍកាន់តែឆាប់រហ័ស ទាំងវិស័យពុទ្ធចក្រ និងវិស័យអាណាចក្រ និងមានកេរ្តិ៍ឈ្មោះល្បាញល្បីបោះសំឡេងលើឆាកអន្តរជាតិ»។
លោក គង់ សំនៀង ប្រធានសហព័ន្ធសេវាអប់រំកម្ពុជា នៅថ្ងៃទី២ ខែមករា បានថ្លែងគាំទ្រចំពោះការលើកឡើងរបស់លោក វង សូត។ លោកនិយាយថា ដើម្បីឱ្យវិស័យអប់រំនៅកម្ពុជា មានការរីកចម្រើន លុះត្រាតែមានការកសាងហេដ្ឋារចនាសម្ព័ន្ធពេញលេញទៅដល់ទីជនបទ។ ទោះជាយ៉ាងណា បញ្ហាទាំងអស់នេះ រាជរដ្ឋាភិបាលតាមរយៈក្រសួងអប់រំ យុវជន និងកីឡា បានគិតគូររួចហើយ និងធ្វើទៅតាមជំហាន និងផែនការរបស់ក្រសួង។
លោក គង់ សំនៀង បានបញ្ជាក់ទៀតថា សាលារៀននៅតាមជនបទ ត្រូវបានរាជរដ្ឋាភិបាលសាងសង់ច្រើនរួចមកហើយ ប៉ុន្តែការបំពាក់សម្ភារគាំទ្រនៅខាងក្នុង មិនទាន់មានគ្រប់គ្រាន់នៅឡើយទេ ដូចជា កុំព្យូទ័រ ប៉ុន្តែអត់មានសេវាអ៊ីនធឺណិតប្រើប្រាស់ ឬអត់មានអគ្គិសនី ឬក៏អត់គ្រូបង្រៀនជាដើម។ ដូច្នេះ ទាំងអស់នេះ ត្រូវតែមានការគិតគូរឱ្យបានវែងឆ្ងាយប្រកបដោយនិរន្តរភាព។
លោកថ្លែងថា៖ «បើយើងមានតែអគារសិក្សា អត់មានសម្ភារបំពាក់ និងហេដ្ឋារចនាសម្ព័ន្ធគាំទ្រ ក៏មិនកើតដែរ។ ដូច្នេះ ម៉ូដែលជំនាន់ថ្មី ដូចនៅសាលារៀនជំនាន់ថ្មី គួរតែមានការបំពាក់បន្ថែមទៀត នៅតាមជនបទ។ យ៉ាងហោចណាស់ ១ខែយើងធ្វើ២ ឬ៣សាលារៀនទៅ ប៉ុន្តែវាក៏អស់លុយច្រើនដែរ។ តែយ៉ាងណា យើងត្រូវគិត ដើម្បីឱ្យយើងមានធនធានមនុស្សល្អៗច្រើន»៕
