លោក ហង់ជួន ណារ៉ុន ថ្លែងក្នុងកិច្ចប្រជុំកំពូលចលនាមិនចូលបក្សសម្ព័ន្ធដែលធ្វើឡើងនៅសាធារណរដ្ឋអ៊ូហ្គង់ដា។ រូបថត MoEYS
ភ្នំពេញៈ នៅក្នុងកិច្ចប្រជុំកំពូលចលនាមិនចូលបក្សសម្ព័ន្ធដែលធ្វើឡើងនៅសាធារណរដ្ឋអ៊ូហ្គង់ដា តំណាងប្រទេសកម្ពុជា បានប្តេជ្ញាចិត្តប្រកាន់ខ្ជាប់នូវពហុភាគីនិយម និងបន្តអនុវត្តគោលនយោបាយការបរទេសឯករាជ្យ ដោយឈរលើគោលការណ៍ច្បាប់អន្តរជាតិ ដោយប្រឆាំងនឹងការគំរាមកំហែងដោយការប្រើប្រាស់កម្លាំងខណៈកម្ពុជាក៏បានអំពាវនាវឱ្យត្រឡប់មកវិញនូវយន្តការដោះស្រាយវិវាទដោយសន្តិវិធី។
លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាថ្លែងបែបនេះ ក្នុងកិច្ចប្រជុំកំពូលចលនាមិនចូលបក្សសម្ព័ន្ធលើកទី ១៩ នៅទីក្រុងកាំប៉ាឡា សាធារណរដ្ឋអ៊ូហ្គង់ដាថ្ងៃទី ១៩-២០ ខែមករា ឆ្នាំ ២០២៤។
លោក ហង់ជួន ណារ៉ុន បានលើកឡើងតាមរយៈសុន្ទរកថារបស់លោកថា កិច្ចប្រជុំនេះគឺជាការកំណត់ត្រាប្រវត្តិសាស្ត្រមួយ ដែលផ្ដល់ឱកាសឱ្យយើងទាំងអស់គ្នាធ្វើការឆ្លុះបញ្ចាំងពីអតីតកាល និងរៀបចំផែនការសម្រាប់ទិសដៅអនាគតនៃចលនាមិនចូលបក្ស សម្ព័ន្ធ ទាំងអស់គ្នា។
លោកបានសង្កត់ធ្ងន់ថា៖ «យើងកំពុងរស់នៅក្នុងយុគសម័យនៃការប្រកួតប្រជែងមហាអំណាចម្ដងទៀត ហើយក្នុងនាមជាសមាជិកនៃចលនាមិនចូលបក្សសម្ព័ន្ធ តាំងពីឆ្នាំ ១៩៦១ កម្ពុជាបានប្ដេជ្ញាចិត្តប្រកាន់ខ្ជាប់នូវគោលការណ៍ទីក្រុង Bandung និងគោលការណ៍អនុម័តដទៃទៀតនៅក្នុងកិច្ចប្រជុំកំពូល Havana ក្នុងគោលបំណងដើម្បីពង្រឹងបន្ថែមទៀតនូវតួនាទី និងឋានៈជាវេទិកានយោបាយដ៏សំខាន់ ដែលតំណាងឱ្យប្រទេសកំពុងអភិវឌ្ឍន៍»។
លោកបញ្ជាក់ទៀតថា៖ «កម្ពុជាប្តេជ្ញាចិត្តប្រកាន់ខ្ជាប់នូវពហុភាគីនិយមនិងបន្តអនុវត្តគោលនយោបាយការបរទេសឯករាជ្យដូច្នេះយើងប្រឆាំងនឹងការប្រើប្រាស់កម្លាំង ឬការគំរាមកំហែងដោយការប្រើប្រាស់កម្លាំងប៉ុន្តែកម្ពុជាសូមអំពាវនាវឱត្រឡប់មកវិញនូវយន្តការដោះស្រាយវិវាទដោយសន្តិវិធី»។
បើតាមលោក ហង់ជួន ណារ៉ុន ជាង ២ ទសវត្សរ៍កន្លងផុតទៅកម្ពុជាបានប្រែក្លាយជ្រុងមួយនៃប្រវត្តិសាស្ត្រ ដោយបានដោះស្រាយបញ្ចប់ជម្លោះផ្ទៃក្នុងជាស្ថាពរ ហើយបានពើបប្រទះនូវអនាគតដ៏ភ្លឺស្វាងរបស់ខ្លួន។ ជាមួយនឹងឆន្ទៈនយោបាយដ៏រឹងមាំរាជរដ្ឋាភិបាលកម្ពុជាបានអនុវត្តកម្មវិធីកំណែទម្រង់សេដ្ឋកិច្ច និងសម្រេចបានកំណើនសេដ្ឋកិច្ចប្រចាំឆ្នាំ ៧% ក្នុងរយៈពេល ២ ទសវត្សរ៍ចុងក្រោយនេះដោយបានឆ្លងផុតពីប្រទេសក្រីក្រ ទៅជាប្រទេសដែលមានចំណូលមធ្យមកម្រិតទាប។
លោក ហង់ជួន ណារ៉ុន ថា៖ «យើងទទួលស្គាល់ពីសារៈសំខាន់នៃកិច្ចសហប្រតិបត្តិការត្បូងទល់ត្បូង (South-South cooperation)។ យើងចាំបាច់ត្រូវធ្វើការជាមួយគ្នា ដើម្បីកសាងភាពធន់នៃសេដ្ឋកិច្ច ជំរុញការអភិវឌ្ឍប្រកបដោយចីរភាព និងធានាបាននូវយុត្តិធម៌សង្គម។ យើងចាំបាច់ត្រូវចែករំលែកចំណេះដឹង បច្ចេកវិទ្យា និងធនធាន ដើម្បីដោះស្រាយបញ្ហាប្រឈមរួមគ្នា និងសម្រេចបាននូវគោលដៅរួម»។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាបានថ្លែងថា ការតាំងចិត្តរបស់កម្ពុជានាពេលនេះ គឺស័ក្តិសមទៅតាមការវិវត្តជាក់ស្តែងនៃស្ថានការណ៍ពិភពលោក។
លោកថា៖ «ប្រសិនបើកម្ពុជាមិនប្រកាន់គោលការណ៍ពហុភាគីនិយមក្នុងកិច្ចសហប្រតិបត្តិការអន្តរជាតិ និងឯករាជ្យនោះទេ កម្ពុជានឹងទទួលរងគ្រោះក្នុងរយៈពេលកន្លងមក»។
លោកបានលើកឡើងទៀតថា រឿងមួយដែលពិភពលោកមិនគួរបណ្តែតបណ្តោយឱ្យប្រទេសដែលមានអំណាចរំលោភបំពានប្រទេស ឬរដ្ឋដែលមានអំណាចខ្សោយជាង ដូច្នេះការប្រកាន់ខ្ជាប់នូវពហុភាគីនិយមមានសារៈសំខាន់។
ពាក់ព័ន្ធតួនាទីកម្ពុជាលើឆាកអន្តរជាតិវិញលោក យង់ ពៅ មើលឃើញថា មួយរយៈកន្លងមកនេះ កម្ពុជាបានចូលរួមយ៉ាងសកម្មនៅក្នុងកិច្ចការតំបន់ និងអន្តរជាតិ ដើម្បីរក្សាថែរក្សាសន្តិភាពពិភពលោក និងសណ្តាប់ធ្នាប់តំបន់ដូចគ្នា។
លោកថា៖ «តួនាទីកម្ពុជាកាន់តែមានសារៈសំខាន់ដូច្នេះការអំពាវនាវរបស់កម្ពុជានាពេលនេះ ពិតជាមានតម្លៃនៅក្នុងសារនយោបាយអន្តរជាតិ»៕
