ពិធីបំបួសដើមឈើនៅតំបន់ព្រៃឡង់កាលពីឆ្នាំមុន ។ រូប ហ្វេសប៊ុក
ភ្នំពេញៈបណ្តាញសហគមន៍ព្រៃឡង់មកពីខេត្តក្រចេះ ស្ទឹងត្រែង ព្រះវិហារ និងកំពង់ធំ ដែលកំពុងអាស្រ័យផល និងមានជំនឿលើវប្បធម៌ ទំនៀមទម្លាប់ ប្រពៃណីជាជនជាតិដើមភាគតិចកួយ នឹងរៀបចំប្រារព្ធពិធីបុណ្យព្រៃឡង់ និងបំបួសដើមឈើ នៅដើមខែកុម្ភៈខាងមុខ ដើម្បីរំឭកគុណដល់ព្រៃឈើ និងបួងសួងសុំឱ្យព្រៃឡង់នៅគង់វង្ស។
លោក ហឿន សុភាព សមាជិកបណ្ដាញសហគមន៍ព្រៃឡង់ មកពីខេត្តកំពង់ធំ បានប្រាប់ថា ការប្រារព្ធពិធីបុណ្យព្រៃឡង់ និងបំបួសដើមឈើនេះ គឺបណ្ដាញសហគមន៍ទាំង ៤ ខេត្ត បានរៀបចំប្រារព្ធជារៀងរាល់ឆ្នាំ ហើយឆ្នាំនេះ គ្រោងមានអ្នកចូលរួមពីបណ្ដាញសហគមន៍ព្រៃឡង់ទាំង ៤ ខេត្ត អាជ្ញាធរមូលដ្ឋាន អង្គការដៃគូ ក៏ដូចជាភ្ញៀវជាតិ និងអន្តរជាតិ សរុបប្រមាណជា ៤០០ នាក់។
លោកបានឱ្យដឹងថា ពិធីនេះគ្រោងនឹងប្រារព្ធឡើងនៅចំណុចដំណាក់ធំ ក្នុងតំបន់ព្រៃឡង់ ត្រង់ព្រំប្រទល់រវាងខេត្តកំពង់ធំ ក្រចេះ និងស្ទឹងត្រែង នៅថ្ងៃទី១៤ ដល់ថ្ងៃទី១៥ ខែកុម្ភៈ ឆ្នាំ២០២៤ ដោយមានរៀបពិធីសែនព្រេនតាមបែបប្រពៃណីជនជាតិដើមភាគតិច និងតាមបែបសាសនា ជាពិសេសនៅពេលរាត្រីមានការរៀបចំរបាំវាយខែល របាំទន្សោង និងរបាំវង់ភ្លេងបុរាណជាដើម។
លោកបានឱ្យដឹងទៀតថា៖«ពិធីបុណ្យព្រៃឡង់ និងបំបួសដើមឈើនេះ រៀបចំឡើងក្នុងគោលបំណងដើម្បីឧទ្ទិស និងរំឭកគុណដល់ព្រៃឈើ និងបួងសួងសុំឱ្យព្រៃឡង់នៅគង់វង្ស រក្សានូវអត្តសញ្ញាណរបស់ជនជាតិដើមភាគតិចកួយដែលរស់នៅពឹងអាស្រ័យផលនឹងព្រៃឈើនិងដើម្បីផ្សព្វផ្សាយនិងលើកកម្ពស់ការយល់ដឹងដល់ប្រជាសហគមន៍ ក៏ដូចជាសាធារណជនពីសក្ដានុពលរបស់ព្រៃឡង់ផងដែរ»។
បើតាមលោក ហឿន សុភាព ក្នុងឆ្នាំនេះ បណ្ដាញសហគមន៍ទាំង៤ខេត្តបានស្នើសុំកិច្ចសហការជាមួយក្រសួងបរិស្ថាន មន្ទីរបរិស្ថាន និងអាជ្ញាធរមូលដ្ឋាន ដើម្បីអនុញ្ញាតឱ្យសហគមន៍បានប្រារព្ធពិធីបំបួសដើមឈើនេះនៅតំបន់ព្រៃឡង់ បន្ទាប់ពីពិធីបំបួសដើមឈើកន្លងទៅ ក្រសួងបរិស្ថានបានហាមប្រារព្ធក្នុងតំបន់ព្រៃឡង់។
ជុំវិញការប្រារព្ធពិធីបំបួសដើមឈើនេះដែរ លោក ម៉ែន គុង អ្នកនាំពាក្យសាលាខេត្តស្ទឹងត្រែងក៏បានឱ្យដឹងដែរថា អាជ្ញាធរខេត្តនឹងមិនមានការហាមឃាត់ទេចំពោះការប្រារព្ធពិធីបំបួសដើមឈើក្នុងតំបន់ព្រៃឡង់ក្នុងករណីសហគមន៍ទាំងនោះត្រូវបានទទួលស្គាល់ និងបានចុះបញ្ជីត្រឹមត្រូវជាមួយក្រសួងមហាផ្ទៃក៏ដូចជាអាជ្ញាធរមូលដ្ឋាន។
លោកបានបន្តថា ក្នុងតំបន់ព្រៃឡង់ មិនមែនអាចចេញចូលសេរីបានទេ ដោយសាររាជរដ្ឋាភិបាលបានដាក់តំបន់នេះជាព្រៃការពារ និងជាដែនជម្រកសត្វព្រៃផងដែរ។
លោក ម៉ែន គុង បានថ្លែងថា៖ «ទោះបីជាយ៉ាងណាក៏ដោយ ឱ្យតែមានការរៀបចំព្រឹត្តិការណ៍ដែលទាក់ទងព្រៃឈើគឺសុទ្ធតែបានរួមចំណែកលើកកម្ពស់ការការពារធនធានធម្មជាតិដ៏មានសារៈសំខាន់ទាំងនោះ ក៏ប៉ុន្តែក្នុងកិច្ចការដ៏មានសារៈសំខាន់ហ្នឹងគឺត្រូវការកិច្ចសហប្រតិបត្តិការនិងការអនុវត្តទៅតាមគោលការណ៍នានាដែលមានជាធរមាន»។
សហគមន៍មានសិទ្ធិអាចប្រារព្ធពិធីនេះបានហើយប្រសិនបើចង់រៀបចំនៅក្នុងតំបន់ព្រៃឡង់ពួកគាត់ត្រូវមានការស្នើសុំការអនុញ្ញាតពីក្រសួងបរិស្ថានជាមុនសិន ដើម្បីឱ្យមានការចូលរួមពីគ្រប់ភាគីពាក់ព័ន្ធនៅក្នុងតំបន់ដែលគ្រប់គ្រងទាំងអស់នោះរបស់អាជ្ញាធរ។ នេះបើតាមការបន្ថែមរបស់លោក ម៉ែន គុង។
ចំណែកលោកសុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ ក៏បានថ្លែងដែរថា អ្វីដែលសហគមន៍ តែងតែរៀបចំធ្វើនេះ បានរួមចំណែកផ្សព្វផ្សាយទៅដល់សាធារណជនឱ្យដឹងពីអត្ថប្រយោជន៍នៃការការពារតំបន់ព្រៃឡង់ ក៏ដូចជាលើកកម្ពស់កិច្ចការងារអភិរក្សរបស់សហគមន៍ និងរបស់ក្រសួងបរិស្ថានជាដើម។
លោកបានបន្តថា ក៏ប៉ុន្តែបណ្ដាញសហគមន៍របស់ពួកគាត់មិនដឹងមកពីខាងណាទេហើយក៏មិនទាន់ទទួលស្គាល់ត្រឹមត្រូវពីអាជ្ញាធរឡើយ ខណៈដែលក្រសួងក៏មានបណ្ដាញសហគមន៍ផងដែរ ដើម្បីធ្វើកិច្ចការការពារធនធានធម្មជាតិនៅតាមមូលដ្ឋាន។
លោកបានបញ្ជាក់ថា៖ «ដូច្នេះបើគាត់ជាបណ្ដាញការពារធនធានធម្មជាតិដែរ យើងសុំឱ្យគាត់ត្រូវសហការជាមួយក្រសួង បរិស្ថាន ក៏ដូចជាមន្ទីរបរិស្ថាន ទៅសុំច្បាប់អនុញ្ញាត សម្រាប់ធ្វើការរៀបចំជាមួយគ្នាទៅដើម្បីកុំឱ្យគាត់ធ្វើតែឯង»។
ដោយឡែកនេះ លោក ផៃ ប៊ុនឈឿន អ្នកនាំពាក្យក្រសួងបរិស្ថាននៅថ្ងៃទី២២ ខែមករា ឆ្នាំ២០២៤ មិនបានឆ្លើយតបជាមួយសំណួរទាក់ទងនឹងការសុំអនុញ្ញាតរបស់បណ្ដាញសហគមន៍ព្រៃឡង់ ដើម្បីរៀបចំពិធីបំបួសដើមឈើនេះ នៅឡើយទេ៕
