ជនបើកបរក្នុងស្ថានភាពស្រវឹងបង្កឱ្យមានគ្រោះថ្នាក់ចរាចរណ៍បណ្តាលឱ្យមនុស្សស្លាប់ និងរបួស៨នាក់។ រូបថត នគរបាល
ភ្នំពេញៈ អយ្យការអមសាលាដំបូងរាជធានីភ្នំពេញ បានបើកការស៊ើបសួរលើជនសង្ស័យឈ្មោះ នាង សំអូន ពីបទបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាលឱ្យរបួស និងស្លាប់អ្នកដទៃនៅចំណុចស្ពានឫស្សីកែវ ខណ្ឌឫស្សីកែវ រាជធានីភ្នំពេញកាលពីថ្ងៃទី២០ ខែមករា ឆ្នាំ២០២៤។
អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានចេញសេចក្តីប្រកាសព័ត៌មាននៅថ្ងៃទី២៣ ខែមករា ដោយបានបញ្ជាក់ថា អយ្យការអមសាលាដំបូងរាជធានីភ្នំពេញ បានទទួលចាត់ការលើសំណុំរឿងព្រហ្មទណ្ឌទាក់ទងនឹងករណីគ្រោះថ្នាក់ចរាចរណ៍ កាលពីយប់ថ្ងៃទី២០ ខែមករា ដែលបង្កឡើងដោយជនសង្ស័យឈ្មោះ នាង សំអូន អាយុ ៥៦ ឆ្នាំ ដែលបានបើកបររថយន្តក្នុងល្បឿនលឿន និងក្នុងស្ថានភាពស្រវឹង ដោយមានអត្រាជាតិអាល់កុល ០.៥៤ mg/l បណ្តាលឱ្យស្លាប់មនុស្ស ៤ នាក់ (ស្រី ៣ នាក់) និងរងរបួសមនុស្ស ៤ នាក់ (ស្រី ៣ នាក់)។
សេចក្តីប្រកាសបន្ថែមថា៖«បន្ទាប់ពីបានធ្វើការស៊ើបអង្កេតស្រាវជ្រាវ និងពិនិត្យភ័ស្តុតាងក្នុងសំណុំរឿង អយ្យការអមសាលាដំបូង រាជធានីភ្នំពេញ បានសម្រេចបើកការស៊ើបសួរលើជនសង្ស័យឈ្មោះ នាង សំអូន ពីបទ៖ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកដែលមានបញ្ញត្តិឱ្យផ្តន្ទាទោសតាម មាត្រា ៨៣ កថាខណ្ឌ២ ចំណុច ខ.គ និងមាត្រា ៨៥ កថាខណ្ឌ២ ចំណុច ខ.គ នៃច្បាប់ស្ដីពីចរាចរណ៍ផ្លូវគោក» ។
ជុំវិញករណីនេះដែរ លោកនាយករដ្ឋមន្ត្រី ហ៊ុន ម៉ាណែត នៅថ្ងៃទី២៣ ខែមករា ឆ្នាំ២០២៤ ក៏បានលើកឡើងពីបញ្ហាគ្រោះថ្នាក់ចរាចរណ៍នេះនិងបានណែនាំឱ្យអាជ្ញាធរមានសមត្ថកិច្ចពាក់ព័ន្ធជាពិសេស លោក ស ថេត អគ្គស្នងការនគរបាលជាតិ ពិនិត្យ និងរឹតបន្តឹង ចំពោះគ្រឿងស្រវឹង ដល់អ្នកបើកបរយានយន្តគ្រប់ប្រភេទ ដើម្បីចៀសវាងគ្រោះថ្នាក់ចរាចរណ៍កើតឡើងបន្តទៀត។
លោក អំ សំអាត នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ បានថ្លែងថា បញ្ហាគ្រោះថ្នាក់ចរាចរណ៍នៅកម្ពុជានាពេលបច្ចុប្បន្ននេះកំពុងស្ថិតនៅក្នុងបន្ទាត់ក្រហម ដែលត្រូវមានការរឹតបន្តឹង និងការអនុវត្តច្បាប់ចរាចរណ៍ឱ្យបានតឹងរ៉ឹង ជាពិសេសពាក់ព័ន្ធនឹងការប្រើប្រាស់គ្រឿងស្រវឹងចំពោះអ្នកបើកបរ ។ មួយវិញទៀត ត្រូវលុបបំបាត់នូវវប្បធម៌អន្តរាគមន៍ ទាក់ទងបញ្ហាគ្រោះថា្នក់ចរាចរណ៍នេះ។
លោក អំ សំអាត បានថ្លែងថា៖ «អ្នកដែលបង្កឱ្យមានគ្រោះថ្នាក់ចរាចរណ៍ ក្នុងស្ថានភាពណាក៏ដោយ ឬជាអ្នកណាក៏ដោយ ដែលបង្កឱ្យមានអ្នកស្លាប់ ត្រូវតែអនុវត្តផ្លូវច្បាប់ដើម្បីជាគំរូក្នុងការកាត់បន្ថយគ្រោះថ្នាក់។ បើសិនជាអនុវត្តច្បាប់ឱ្យតឹងរ៉ឹង អ្នកដទៃទៀត នឹងមិនបារម្ភទេ ប៉ុន្តែបើគាត់ធ្វេសប្រហែស ហើយបើកបរក្នុងស្ថានភាពស្រវឹង ត្រូវជាប់ពន្ធនាគារទៅតាមផ្លូវច្បាប់។ អ៊ីចឹងម្នាក់ៗ ងាកទៅរកការគោរពច្បាប់ហើយ»។
យោងតាមមាត្រា៨៣ នៃច្បាប់ចរាចរណ៍ផ្លូវគោកចែងថា ជនណាដែលបើកបរធ្វេសប្រហែស ខ្ជីខ្ជា មិនប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្ដីចរាចរណ៍ផ្លូវគោក បណ្ដាលឱ្យអ្នកដទៃមានរបួស ហើយអ្នករងគ្រោះអសមត្ថភាពធ្វើការ ស្មើ ឬលើសពី៨ថ្ងៃគិតពីថ្ងៃកើតហេតុ ត្រូវផ្ដន្ទាទោសដាក់ពន្ធនាគារពី៦ខែ ទៅ ២ឆ្នាំ និងពិន័យជាប្រាក់ពី ២លានរៀល ទៅ ១០លានរៀល។
ច្បាប់ស្ដីពីចរាចរណ៍ផ្លូវគោក មាត្រា៨៣ ដដែល ក៏បានបញ្ជាក់ទៀតថា អំពើល្មើសខាងលើ ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ៣ឆ្នាំ និងពិន័យជាប្រាក់ពី ៤ លានរៀល ទៅ ១៥ លានរៀល បើអំពើនេះប្រព្រឹត្តក្នុងករណីដូចជា បើកបរដោយគ្មានបណ្ណបើកបរ ឬមានបណ្ណបើកបរតែមិនត្រូវតាមប្រភេទយានយន្ដ។ អ្នកប្រព្រឹត្តស្ថិតក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ មិល្លីក្រាមក្នុង ១ លីត្រខ្យល់ ឬចាប់ពី ០,៨០ ក្រាម ក្នុង ១ លីតឈាមឡើងទៅ។ មានរបួសមនុស្សច្រើននាក់ ហើយរត់គេចខ្លួនពីកន្លែងកើតហេតុ ក្នុងបំណងគេចវេះពីការទទួលខុសត្រូវ។
ចំពោះមាត្រា ៨៥ បានចែងថា ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិ ស្តីពីចរាចរណ៍ផ្លូវគោកតម្រូវបណ្តាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី ១ ឆ្នាំ ដល់ ៣ ឆ្នាំ និងពិន័យជាប្រាក់ ៤ លានរៀលទៅ ១៥ លានរៀល និងអាចត្រូវផ្តន្ទាទោសបន្ថែមមួយ ឬច្រើនដូចមានចែងក្នុងមាត្រា ៥៣ (ប្រភេទនៃទោសបន្ថែម) នៃក្រមព្រហ្មទណ្ឌ៕
