លោកស្រី អ័រណា សាហ្គីវ ក្នុងបទសម្ភាសន៍ជាមួយភ្នំពេញប៉ុស្តិ៍កាលពីថ្ងៃទី ២៣ ខែមករា។ ហុង មិនា
វិស័យកសិកម្មគឺជាវិស័យដែលឈានមុខគេនៅក្នុងកិច្ចសហប្រតិបត្តិការរវាងកម្ពុជា និងអ៊ីស្រាអែល។ ចាប់តាំងពីឆ្នាំ ២០០៨ មកនិស្សិតកម្ពុជាជាង ២០០០ នាក់ ត្រូវបានបញ្ជូនទៅប្រទេសអ៊ីស្រាអែលដើម្បីទទួលបានការបណ្តុះបណ្តាលក្នុងវិស័យកសិកម្ម។
លោកស្រីអ័រណា សាហ្គីវ (Orna Sagiv) ឯកអគ្គរដ្ឋទូតអ៊ីស្រាអែលទទួលបន្ទុកកម្ពុជាដែលមាននិវេសនដ្ឋាននៅក្រុងបាងកក ប្រទេសថៃ កាលពីថ្ងៃទី ២៣ ខែមករា បានផ្តល់បទសម្ភាសន៍ផ្តាច់មុខដល់កាសែតភ្នំពេញប៉ុស្តិ៍ ពាក់ព័ន្ធការពង្រឹងវិស័យកសិកម្ម និងការផ្តល់ផលប្រយោជន៍ដល់ប្រទេសទាំង ២ ក្នុងវិស័យនេះនិងការជំរុញកិច្ចសហប្រតិបត្តិការបន្ថែមលើវិស័យផ្សេងៗរវាងប្រទេសទាំង ២។
លោកស្រីក៏បានបញ្ជាក់អំពីស្ថានភាពបច្ចុប្បន្នរបស់និស្សិតកម្ពុជាដែលកំពុងស្នាក់នៅសិក្សាក្នុងប្រទេសអ៊ីស្រាអែលផងដែរ ខណៈដែលសង្គ្រាមរវាងអ៊ីស្រាអែល និងក្រុមហាម៉ាស់ (Hamas) របស់ប៉ាឡេស្ទីន (Palestine) កំពុងបន្តនៅឡើយ។ ខាងក្រោមនេះជាបទសម្ភាសន៍ផ្តាច់មុខកាសែតភ្នំពេញ ប៉ុស្តិ៍ ជាមួយលោកស្រី អ័រណា សាហ្គីវ ដែលមានខ្លឹមសារដូចតទៅ៖
តើលោកស្រីអាចបញ្ជាក់បានទេ អំពីកម្មវិធីសម្រាប់និស្សិតកសិកម្មកម្ពុជានៅអ៊ីស្រាអែល ?
ជារៀងរាល់ឆ្នាំយើងទទួលនិស្សិតកសិកម្មចំនួន ៤៥០ នាក់ ពីប្រទេសកម្ពុជាទៅសិក្សានៅប្រទេសអ៊ីស្រាអែលរយៈពេល ១១ ខែ ដែលជារយៈពេលដ៏យូរ ជាទូទៅនិស្សិតឆ្នាំទី ២ មកពីសាកលវិទ្យាល័យមួយចំនួន នៅប្រទេសកម្ពុជា ភាគច្រើនមកពីសាកលវិទ្យាល័យភូមិន្ទកសិកម្ម។
ពួកគេចាកចេញទៅកាន់អ៊ីស្រាអែលសម្រាប់កម្មវិធីពិសេសមួយ។ ហេតុអ្វីពិសេស? ដោយសារក្នុង ១ ថ្ងៃ ក្នុង ១ សប្តាហ៍ ពួកគេសិក្សាក្នុងថ្នាក់រៀនហើយពួកគេអង្គុយក្នុងថ្នាក់សិក្សាត្រូវបានបង្រៀនពីសាស្ត្រាចារ្យល្អបំផុត។ រយៈពេល ៥ ថ្ងៃទៀត ពួកគេទទួលបានបទពិសោធន៍អនុវត្តការងារជាក់ស្តែងបានន័យថា ពួកគេធ្វើការជាមួយកសិករហើយរៀនពីបច្ចេកវិទ្យានិងបច្ចេកទេសរបស់កសិករអ៊ីស្រាអែល។ ពួកគេរៀនបណ្តើរ ធ្វើការបណ្តើរ ដែលសម្រាប់ខ្ញុំគឺសំខាន់ណាស់។
នៅពេលដែលពួកគេត្រឡប់មកវិញ អ្វីដែលគួរឱ្យចាប់អារម្មណ៍ខ្លាំងសម្រាប់ខ្ញុំ គឺពួកគេបានប្រើប្រាស់ព័ត៌មាន និងជំនាញដែលពួកគេរៀននៅប្រទេសអ៊ីស្រាអែល ដើម្បីធ្វើជាសហគ្រិននៅកម្ពុជាដូចជាដាំផ្សិត និងមានអាជីវកម្មគ្រប់ប្រភេទទាក់ទងនឹងកសិកម្ម។
នេះជាអត្ថប្រយោជន៍សម្រាប់ខ្លួនឯង គ្រួសារ និងសហគមន៍ទាំងមូលរបស់ពួកគេ។ ខ្ញុំពិតជាជឿជាក់ថា វាជាឱកាសដ៏ល្អ។ ខ្ញុំសង្ឃឹមថា នឹងមាននិស្សិតកសិកម្មកម្ពុជាកាន់តែច្រើនឡើងៗទៅសិក្សានៅប្រទេសអ៊ីស្រាអែល ដោយយើងធ្វើការយ៉ាងជិតស្និទ្ធជាមួយរដ្ឋមន្ត្រីក្រសួងកសិកម្ម។
តើលោកស្រី អាចបញ្ជាក់បានទេ អំពីវត្តមាន របស់ក្រុមហ៊ុនអ៊ីស្រាអែលនៅកម្ពុជា?
យើងមានក្រុមហ៊ុនអ៊ីស្រាអែលដែលប្រតិបត្តិការនៅក្នុងប្រទេសកម្ពុជា ព្រមទាំងក្រុមហ៊ុនដែលពេលនេះមានបំណងចង់ចាប់ផ្តើមប្រតិបត្តិការ និងមើលឃើញពីសក្តានុពលក្នុងវិស័យកសិកម្មកម្ពុជា។ យើងមានកសិដ្ឋានទឹកដោះគោ Kirisu Dairy Farm ដែលនៅមិនឆ្ងាយប៉ុន្មានពីទីក្រុងភ្នំពេញ។
នេះជាការបណ្តាក់ទុនរួមគ្នារវាងប្រជាជនកម្ពុជា និងប្រជាជនអ៊ីស្រាអែល ដែលចាប់ផ្ដើមពីការបង្កាត់ពូជគោរហូតដល់ផលិតផលសម្រេចទឹកដោះគោ (yogurt)។រាល់បច្ចេកវិទ្យាទាំងអស់គឺជាបច្ចេកវិទ្យារបស់អ៊ីស្រាអែល របៀបធ្វើឱ្យលូតលាស់របៀបចិញ្ចឹម និងពេលវេលាដែលត្រូវយកទឹកដោះពីគោ។ អ្វីៗទាំងអស់គឺប្រើប្រព័ន្ធស្វ័យប្រវត្តិ (automate) ដូចនៅអ៊ីស្រាអែល។
ខ្ញុំជឿថា នេះក៏ជាឱកាសដ៏ល្អសម្រាប់ប្រជាជនកម្ពុជាផងដែរ ក្នុងការទទួលបានរសជាតិផលិតផលទឹកដោះគោដែលមានរសជាតិឈ្ងុយឆ្ងាញ់ស្រដៀងគ្នានឹង
ផលិតផលនៅអ៊ីស្រាអែលផងដែរ។ កាលពីលើកមុនពេលដែលខ្ញុំមកភ្នំពេញ ខ្ញុំបានភ្លក្សហើយគឺឆ្ងាញ់ណាស់។ ក្រៅពីនេះក៏មានប្រជាជនអ៊ីស្រាអែលនៅទីនេះដាំម្រេចខ្មៅ និងដាំផ្លែប៊ឺរ (avocado)។ ខ្ញុំក៏បានដឹងអំពីក្រុមហ៊ុនដែលមានបំណងមកសាងសង់កសិដ្ឋានដោយប្រើផ្ទះកញ្ចក់ និងក្រុមហ៊ុនផ្សេងទៀតដែលចង់ធ្វើគម្រោងកែច្នៃម្ហូបអាហារផងដែរ។ ខ្ញុំគិតថា នេះគឺជាសក្តានុពលល្អណាស់។
តើបទពិសោធន៍របស់អ៊ីស្រាអែលក្នុងវិស័យកសិកម្មជះឥទ្ធិពលទៅដល់ការចែករំលែកចំណេះដឹង និងបច្ចេកវិទ្យារបស់ខ្លួនទៅកាន់ប្រទេសផ្សេងដូចជា កម្ពុជាបែបណាដែរ?
អ៊ីស្រាអែលជាប្រទេសដែលជឿនលឿនខ្លាំងពេលនិយាយដល់វិស័យកសិកម្ម។ នៅពេលដែលអ៊ីស្រាអែលត្រូវបានបង្កើតឡើងទោះបីជាមានប្រជាជនតិចតួចក៏ដោយក៏ការផ្គត់ផ្គង់ស្បៀងអាហារមិនគ្រប់គ្រាន់ដែរ។ ជាមួយនឹងផ្ទៃដីមានកំណត់ យើងបានប្រឈមនឹងការខ្វះខាតស្បៀងអាហារយ៉ាងច្រើន។
យើងត្រូវបែងចែករបបឱ្យប្រជាជនស៊ុតតែ ១ គ្រាប់ក្នុង ១ សប្តាហ៍ មាន់ ១ ក្បាលក្នុង ១ ខែ។ ខ្ញុំអាចនិយាយបានថា សព្វថ្ងៃនេះ អ៊ីស្រាអែលបានក្លាយជាប្រទេសមហាអំណាចខាងចំណីអាហារ។ ខ្ញុំគិតថា កសិកម្ម និងបច្ចេកវិទ្យារបស់យើង គឺជឿនលឿនណាស់។
ប្រព័ន្ធអេកូឡូស៊ីទាំងមូលគឺខ្លាំង។ មានកិច្ចសហប្រតិបត្តិការយ៉ាងស្វាហាប់ និងវិលជុំក្នុងចំណោមកសិករ ស្ថាប័នអប់រំ និងរដ្ឋាភិបាល ដែលផ្តល់ផលប្រយោជន៍ដល់អ្នកពាក់ព័ន្ធទាំងអស់។ យើងរីករាយណាស់ក្នុងការចែករំលែកបច្ចេកវិទ្យា និងជំនាញទាំងនេះ និងរីករាយក្នុងការរៀនដូចគ្នាពីបទពិសោធន៍របស់កម្ពុជា។ ខ្ញុំជឿជាក់យ៉ាងមុតមាំទៅលើដំណោះស្រាយទៅវិញទៅមកយើងរីករាយក្នុងការចែករំលែកចំណេះដឹងនិងរីករាយរៀនសូត្រពីបទពិសោធន៍កម្ពុជា។
សម្រាប់ឆ្នាំនេះ និងឆ្នាំក្រោយ តើអ៊ីស្រាអែលនឹងទទួលនិស្សិតកម្ពុជាប៉ុន្មាននាក់ទៅសិក្សានៅប្រទេសអ៊ីស្រាអែល?
ជាទូទៅ ក្នុង ១ ឆ្នាំយើងមាននិស្សិតកម្ពុជាគឺប្រមាណ ៤០០ នាក់។ យើងបានបង្កើនចំនួននេះកាលពីឆ្នាំមុនដល់ ៤៥០ នាក់។ ខ្ញុំសង្ឃឹមថា នឹងរក្សាចំនួននេះ ឬក៏ប្រហែលជាអាចកើនសម្រាប់ឆ្នាំក្រោយផងដែរ។ ខ្ញុំគិតថា ឆ្នាំនេះគឺ ៤៦០ នាក់ ហើយសង្ឃឹមថា នឹងបន្តកើនឡើង។ នៅក្នុងប្រទេសកម្ពុជាខ្ញុំគិតថា ប្រហែលជាក្រុមនិស្សិតច្រើនជាងគេនៅក្នុងកម្មវិធីបណ្តុះបណ្តាលនេះនៅទូទាំងពិភពលោក។ យើងមាននិស្សិតមកពីអាស៊ី មកពីអឺរ៉ុប ភាគច្រើនមកពីអាស៊ី អាមេរិកឡាទីន និងអ្រាហ្វិក។ សម្រាប់កម្ពុជា បើមិនមែនជាក្រុមធំជាងគេទេ ក៏ស្ថិតក្នុងចំណោមក្រុមដែលធំជាងគេផងដែរ។
នៅក្នុងឆ្នាំ ២០២២ លោកស្រីបានជួបជាមួយលោកវេង សាខុន អតីតរដ្ឋមន្ត្រីក្រសួងកសិកម្មកម្ពុជា។ ក្នុងជំនួបនោះ ភាគីអ៊ីស្រាអែលបានបង្ហាញពីបំណងចុះហត្ថលេខាលើអនុស្សរណៈនៃការយោគយល់គ្នា (MoU) រវាងរដ្ឋាភិបាលទាំង ២ កម្ពុជានិងអ៊ីស្រាអែល ដើម្បីបញ្ជូនពលករកម្ពុជាទៅធ្វើការក្នុងវិស័យកសិកម្មនៅអ៊ីស្រាអែល។ តើលោកស្រីអាចបញ្ជាក់បានទេថា តើដំណើរការនេះមានការវិវឌ្ឍបែបណាដែរ?
ខ្ញុំនឹងពិភាក្សាលម្អិតជាមួយរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅក្នុងកិច្ចប្រជុំរបស់ខ្ញុំនៅថ្ងៃស្អែក [២៤ មករា]។ យើងក៏បានពិភាក្សាផងដែរជាមួយកម្ពុជាអំពីកិច្ចការនេះ។ រហូតមកដល់ពេលថ្មីៗនេះ យើងមានតែពលករបរទេសមកពីប្រទេសថៃ ដែលធ្វើការផ្នែកកសិកម្មនៅប្រទេសអ៊ីស្រាអែល។ ទោះជាយ៉ាងណាក៏ដោយ ឥឡូវនេះ យើងចង់ធ្វើពិពិធកម្ម និងផ្តល់ ឱកាសដល់កម្ពុជាក្នុងការបញ្ជូនពលករទៅធ្វើការនៅប្រទេសអ៊ីស្រាអែល។ អ៊ីស្រាអែលជាប្រទេសគោលដៅដ៏ពេញនិយមបំផុតសម្រាប់កម្មករក្នុងវិស័យ កសិកម្ម ដោយសារលក្ខខណ្ឌ ការងារអំណោយផលប្រាក់ខែមានការគិតគូរហើយនិយោជករក្សាទំនាក់ទំនងយ៉ាងល្អជាមួយកម្មកររបស់ពួកគេ។
ឥឡូវ នេះយើងត្រូវធ្វើការលម្អិត។ វាពិតជាសំខាន់ណាស់សម្រាប់យើងក្នុងការមាន MoU រវាងរដ្ឋាភិបាលនិងរដ្ឋាភិបាល។ យើងចង់ឱ្យកម្មករត្រូវបានការពារនៅខាងកម្ពុជាដោយក្រសួងការងារ ខាងអ៊ីស្រាអែលដោយក្រសួងមហាផ្ទៃ។ យើងចង់ធ្វើឱ្យប្រាកដថា គ្មាននរណាកេងប្រវ័ញ្ចពួកគេទេ។
ពួកគេមិនចាំបាច់ចំណាយប្រាក់ច្រើនពេកទេ ហើយពួកគេពិតជាទទួលបានការការពារដោយយុត្តិធម៌បំផុត។ យើងរីករាយណាស់ក្នុងការចាប់ផ្តើមការចរចាជាផ្លូវការក្នុងពេលឆាប់ៗនេះ។ ខ្ញុំសង្ឃឹមថា នឹងមានគណៈប្រតិភូមកពីប្រទេសអ៊ីស្រាអែលក្នុងពេលឆាប់ៗនេះ ដើម្បីចាប់ផ្តើមពិភាក្សាគ្នា ហើយខ្ញុំសង្ឃឹមថា នេះនឹងជាកម្រិតមួយទៀតនៃកិច្ចសហប្រតិបត្តិការរវាងអ៊ីស្រាអែល និងកម្ពុជា។
កសិកម្មគឺជាវិស័យនាំមុខក្នុងទំនាក់ទំនងកម្ពុជា-អ៊ីស្រាអែល តើវិស័យដែលមានសក្តានុពលអ្វីខ្លះទៀតដែលប្រទេសទាំង ២ កំពុងស្វះស្វែងដើម្បីពង្រីកកិច្ចសហប្រតិបត្តិការបន្ថែមទៀត?
ខ្ញុំគិតថា អ៊ីស្រាអែលខ្លាំងបំផុតគឺនវានុវត្តន៍ ដែលលើសពីផ្នែកនិងវិស័យផ្សេងៗ។ នៅកម្ពុជាយើងមានសភាពាណិជ្ជកម្មកម្ពុជា-អ៊ីស្រាអែល ដែលបានផ្តួចផ្តើមឱ្យមានមជ្ឈមណ្ឌលនវានុវត្តន៍កម្ពុជា-អ៊ីស្រាអែល នៅ ទីក្រុងភ្នំពេញ ដែលជាមធ្យោបាយមួយផ្សេងទៀត ដើម្បីជំរុញកិច្ចសហប្រតិបត្តិការក្នុងវិស័យជាច្រើន។ នៅពេលនិយាយពី វិស័យផ្សេងទៀតសម្រាប់កិច្ចសហប្រតិបត្តិការ ការគ្រប់គ្រងទឹក និងទូរគមនាគមន៍គឺមានភាពលេចធ្លោ។
នៅគ្រប់វិស័យក៏មានសក្ដានុពលផងដែរ។ ខណៈពេលដែលកសិកម្ម គឺជាវិស័យជាក់ស្តែងបំផុត ឱកាសផ្សេងទៀតជាច្រើនក៏មានដែរ។ បញ្ហាប្រឈមចម្បងនៅពេលនេះគឺការពង្រឹងការយល់គ្នា និងការស្គាល់គ្នាទៅវិញទៅមក។
នេះអាចសម្រេចបានតាមរយៈការបង្កើនការផ្លាស់ប្តូរទស្សនកិច្ចគ្នា គឺគណៈប្រតិភូកម្ពុជា និងអ៊ីស្រាអែលធ្វើការបំពេញទស្សនកិច្ចទៅកាន់ប្រទេសនីមួយៗទៅវិញទៅមកដោយគ្របដណ្តប់លើវិស័យចម្រុះដូចជា ធនាគារ និងហិរញ្ញវត្ថុ។ អ៊ីស្រាអែលក៏ជាប្រទេសខ្លាំងមួយផងដែរ ពេលនិយាយដល់សន្តិសុខអ៊ីធឺណិត ដែលជាការបង្ហាញផ្លូវបន្ថែមទៀតផងដែរ សម្រាប់កិច្ចសហប្រតិបត្តិការផ្អែកលើតម្រូវការជាក់លាក់របស់កម្ពុជា។ យើងជឿថា មានជម្រើស និងឱកាស។
យើងសង្ឃឹមថា គណៈប្រតិភូអ៊ីស្រាអែលបន្ថែមទៀតនឹងមកកាន់កម្ពុជា។ គោលដៅបច្ចុប្បន្នគឺដើម្បីជំរុញកិច្ចសហប្រតិបត្តិការក្នុងចំណោមសហគមន៍អាជីវកម្មរបស់យើង និងជំរុញការយោគយល់គ្នាកាន់តែស៊ីជម្រៅ និងជំរុញនូវអ្វីដែលអាចសម្រេចបានរួមគ្នា។
តើជម្លោះបច្ចុប្បន្នបានជះឥទ្ធិពលដល់និស្សិតកម្ពុជានៅអ៊ីស្រាអែលបែបណាដែរ ហើយតើរដ្ឋាភិបាលអ៊ីស្រាអែលមានវិធានការអ្វីខ្លះ ដើម្បីឆ្លើយតបនឹងកាលៈទេសៈទាំងនេះ?
យើងមិនអាចព្រងើយកន្តើយនឹងការណ៍ដែលអ៊ីស្រាអែលកំពុងតែមានសង្គ្រាមទេ។ ខ្ញុំសូមអរគុណយ៉ាងជ្រាលជ្រៅចំពោះការឆ្លើយតបនៅពេលដែលអរិភាពបានចាប់ផ្តើម។ នៅពេលដែលពួកយើងត្រូវបានក្រុមហាម៉ាស់វាយប្រហារយ៉ាងសាហាវឃោរឃៅកាលពីថ្ងៃទី ៧ ខែតុលា និស្សិតកម្ពុជាម្នាក់ត្រូវបានសម្លាប់។ ខ្ញុំនឹងទៅសួរសុខទុក្ខគ្រួសាររបស់គាត់នៅថ្ងៃស្អែក [២៤ មករា]។
រដ្ឋាភិបាលអ៊ីស្រាអែលប្តេជ្ញាជួយដល់ក្រុមគ្រួសារជនរងគ្រោះ និងអ្នកដែលទទួលរងផលប៉ះពាល់ផ្ទាល់ មិនថាមានរបួស ឬមានគ្រោះថ្នាក់អ្វីផ្សេងឡើយ។ ទាំងនេះរួមមានការគាំទ្រផ្នែកហិរញ្ញវត្ថុសម្រាប់គ្រួសារ ដូចគ្នាទៅនឹងអ្វីដែលពលរដ្ឋអ៊ីស្រាអែលទទួលបាន ក្នុងកម្រិតដូចគ្នានៃសំណង និងការជួយគាំទ្រពេញមួយជីវិត។ វាជារឿងសំខាន់សម្រាប់ខ្ញុំក្នុងការកត់សម្គាល់ថា យើងមានការចាប់អារម្មណ៍យ៉ាងខ្លាំងចំពោះការណ៍ដែលលោកអតីតនាយករដ្ឋមន្ត្រី ហ៊ុន សែន ឆ្លើយតបនៅពេលចាប់ផ្តើមនៃជម្លោះ។
ខណៈពេលដែលប្រទេសផ្សេងទៀតបានជម្លៀសនិស្សិត និងកម្មកររបស់ខ្លួន លោកបានបញ្ជាក់ជំហរថា កម្ពុជាមិនជម្លៀសទេ ព្រោះអ៊ីស្រាអែលជាមិត្ត ហើយមិត្តក៏មិនត្រូវបោះបង់ចោលក្នុងពេលដែលមានតម្រូវការដែរ។ ជាទស្សនៈផ្ទាល់ខ្លួនខ្ញុំ និងក្នុងនាមរដ្ឋាភិបាលរបស់ខ្ញុំ ខ្ញុំចង់បញ្ជាក់ថា ជំហរនេះគឺមានការកោតសរសើរយ៉ាងខ្លាំង។ វាជាការគួរឱ្យរំភើបចិត្តក្នុងការកត់សម្គាល់ថា និស្សិតស្ទើរតែទាំងអស់បានជ្រើសរើសស្នាក់នៅក្នុងប្រទេសអ៊ីស្រាអែលដែលយើងសូមផ្តល់តម្លៃយ៉ាងខ្លាំង។ យើងទាំងអស់គ្នាសង្ឃឹមថា ជម្លោះនឹងបញ្ចប់ក្នុងពេលឆាប់ៗ។
តើលោកស្រីអាចបញ្ជាក់បានទេអំពីស្ថានភាពនិស្សិតកម្ពុជាដែលកំពុងស្នាក់នៅក្នុងប្រទេសអ៊ីស្រាអែល ខណៈដែលសង្គ្រាមរវាងអ៊ីស្រាអែល និងក្រុមហាម៉ាស់ប៉ាឡេស្ទីនកំពុងបន្ត?
ពួកគេស្ថិតនៅក្នុងតំបន់ដែលមានសុវត្ថិភាពបំផុត។ នៅអ៊ីស្រាអែល យើងមានតំបន់ក្រហម លឿង និងបៃតង។ និស្សិតទាំងអស់នោះស្ថិតក្នុងតំបន់បៃតង។ នេះក៏ដោយសារការឆ្លើយតបរបស់រដ្ឋាភិបាលកម្ពុជាផងដែរ។ បន្ទាប់ពីសង្គ្រាមបានចាប់ផ្តើម រដ្ឋាភិបាលបានសម្រេចចិត្តមិនជម្លៀសនិស្សិតទាំងនោះ ដោយផ្តល់អាទិភាពដល់សុវត្ថិភាពរបស់ពួកគេ និងធានាថា ពួកគេនៅតែស្ថិតក្នុងតំបន់សុវត្ថិភាព។នេះសម្រេចបានដោយមានកិច្ចសហប្រតិបត្តិការជាមួយរដ្ឋាភិបាលអ៊ីស្រាអែល និងស្ថាប័នអប់រំក្នុងប្រទេសអ៊ីស្រាអែល។
យើងបន្តធានាថា ពួកគេស្ថិតក្នុងតំបន់សុវត្ថិភាព។ រហូតមកដល់ពេលនេះ ខ្ញុំអាចនិយាយបានថា ពួកគេមានសុវត្ថិភាព ហើយពួកគេស្ថិតនៅក្នុងតំបន់ល្អ ហើយពួកគេកំពុងត្រូវបានយកចិត្តទុកដាក់។ រដ្ឋាភិបាលកម្ពុជានៅតែមានការព្រួយបារម្ភអំពីពួកគេ ដោយពិនិត្យមើលពួកគេជាប្រចាំ។ ដូចគ្នានេះដែររដ្ឋាភិបាលរបស់យើងក៏ពិនិត្យមើលពួកគេគ្រប់ពេល ដើម្បីដឹងថា ពួកគេស្ថិតនៅក្នុងតំបន់មានសុវត្ថិភាព។ ខ្ញុំគិតថា នេះជាផ្នែកមួយទៀតនៃកិច្ចសហប្រតិបត្តិការរវាងរដ្ឋាភិបាលទាំង ២ របស់យើង ដោយធានាថា និស្សិតទាំងអស់មិនត្រឹមតែស្នាក់នៅក្នុងប្រទេសអ៊ីស្រាអែលប៉ុណ្ណោះទេ ប៉ុន្តែនៅតែស្ថិតក្នុងតំបន់សុវត្ថិភាព៕
