សមត្ថកិច្ចត្រួតពិនិត្យអាវុធជាតិផ្ទុះនៅខណ្ឌឫស្សីកែវ កាលពីថ្ងៃទី ២៣ ខែមករា។ រូបថត ប៉ូលិស
ភ្នំពេញៈ អគ្គស្នងការដ្ឋាននគរបាលជាតិនឹងចាប់ផ្តើមបើកយុទ្ធនាការត្រួតពិនិត្យលើអ្នកបើកបរមានជាតិស្រវឹងចាប់ពីសប្តាហ៍ក្រោយ បន្ទាប់ពីលោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យត្រួតពិនិត្យជាតិអាល់កុលលើអ្នកបើកបរ។ នេះបើយោងតាមលោក ស ថេត អគ្គស្នងការនគរបាលជាតិ។
ការត្រួតពិនិត្យឡើងវិញនេះបន្ទាប់ពីថ្មីៗនេះគ្រោះថ្នាក់ចរាចរណ៍ដែលបង្កឡើងដោយអ្នកបើកបរមានសារជាតិអាល់កុល បានបង្កគ្រោះថ្នាក់ធ្វើឱ្យអ្នកដំណើរតាមដងផ្លូវបាត់បង់ជីវិតជាញឹកញាប់។
ក្រោយពីទទួលបានការណែនាំ និងបញ្ជាពីប្រមុខរាជរដ្ឋាភិបាល លោក ស ថេត អគ្គស្នងការនគរបាលជាតិបានបើកកិច្ចប្រជុំនិងដាក់បទបញ្ជាដល់ផ្នែកពាក់ព័ន្ធដើម្បីបើកយុទ្ធនាការរឹតបន្តឹងត្រួតពិនិត្យជាតិស្រវឹងទៅដល់អ្នកបើកបរ ដែលការពិនិត្យនឹងធ្វើឡើងនៅពេលយប់ដោយសារករណីបង្កគ្រោះថ្នាក់ភាគច្រើន កើតនៅពេលយប់។
ក្នុងកិច្ចសម្ភាសន៍ជាមួយទូរទស្សន៍បាយ័ន លោក ស ថេត បានបញ្ជាក់ថា៖ «ខ្ញុំបានឱ្យអគ្គរងដែលទទួលបន្ទុកផ្នែកចរាចរណ៍ ប្រធាននាយកដ្ឋានអ្នកពាក់ព័ន្ធ រួមទាំងស្នងការ ស្នងការរងរាជធានី-ខេត្តធ្វើការរឹតបន្ដឹង និងពិនិត្យវាស់ជាតិអាល់កុលនេះដែលយើងសង្កត់ធ្ងន់នៅពេលយប់ ព្រោះពេលយប់មានគ្រោះថ្នាក់ច្រើន ពិសេសម៉ូតូច្រើនជាងឡាន»។
លោកបន្តថា ភូមិសាស្ត្រដែលត្រូវយកចិត្តទុកដាក់ជាងគេគឺនៅរាជធានីភ្នំពេញ និងខេត្តដែលមានអត្រាគ្រោះថ្នាក់ចរាចរណ៍ច្រើន ហើយនឹងធ្វើដោយម៉ឺងម៉ាត់ និងហ្មត់ចត់បំផុត។
លោកបានបញ្ជាក់ថា៖ «បើរកឃើញមានជាតិអាល់កុលក្នុងខ្លួនលើសកំណត់ដែលមានចែងនៅក្នុងច្បាប់ គឺយើងនឹងចាត់វិធានការទៅតាមច្បាប់ដោយគ្មានការលើកលែងឡើយ»។
បើតាមលោក ស ថេត ការត្រួតពិនិត្យជាតិស្រវឹងនេះ លោកបានដាក់បទបញ្ជាឱ្យអនុវត្តបានលឿន ដោយការពិនិត្យនឹងធ្វើឡើងចាប់ពីម៉ោង ៩ ឬម៉ោង ១០ យប់ទៅ។
លោកបានថ្លែងថា៖ «បើយើងមិនរឹតបន្តឹងទេ យើងនឹងមិនអាចកាត់បន្ថយគ្រោះថ្នាក់ចរាចរណ៍បានទេ ព្រោះក្នុង ១ ថ្ងៃ គ្រោះថ្នាក់ចរាចរណ៍កើតឡើងចំនួន ១០ លើកនៅទូទាំងប្រទេស ហើយយើងពិនិត្យឃើញករណីកើតឡើងម៉ូតូច្រើនជាងឡាន»។
កាលពីថ្ងៃទី ២៣ ខែមករា ឆ្នាំ ២០២៤ លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យលោក ស ថេត ពិនិត្យមើល និងពង្រឹងឡើងវិញនូវការត្រួតពិនិត្យជាតិអាល់កុល ព្រោះករណីបង្កគ្រោះថ្នាក់ចរាចរណ៍ អ្នកបើកបរមានជាតិស្រវឹងបានកើតឡើងច្រើនគួរឱ្យបារម្ភ។
លោកបានថ្លែងថា៖ «ពិតជាសោកនាដកម្មណាស់ដូចដែលយើងបានដឹងហើយករណីប៉ុន្មានថ្ងៃកន្លងមកនេះ។ មិនមានអ្នកណាចង់ទេ សូម្បីតែអ្នកបើកក៏មិនចង់ដែរ ប៉ុន្តែអាហ្នឹង (ជាតិស្រវឹង) នៅក្នុងខ្លួន អ៊ីចឹង!ត្រូវធ្វើយ៉ាងម៉េចទប់វាមិនឱ្យចូលក្នុងខ្លួន ដែលធ្វើឱ្យការបើកបរដោយមិនដឹងខ្លួន»។
លោកបានបន្ថែមថា៖ «ត្រូវពង្រឹងច្បាប់ពង្រឹងការត្រួតពិនិត្យករណីនេះ ហើយមហាជន ដែលជាសាមីខ្លួនត្រូវចូលរួមជាមួយគ្នា ព្រោះសមាជិកដែលបាត់បង់ដោយសាររឿងនេះគឺវាពិតជាសង្វេគ ហើយគ្រោះថ្នាក់ធំរបស់យើងឥឡូវគឺគ្រោះថ្នាក់ចរាចរណ៍នេះឯង។ ស្លាប់ច្រើនជាងគ្រាប់បែក គ្រាប់មីន»។
បើតាមការបញ្ជាក់បន្ថែមពីលោក ស ថេត ការអប់រំ ផ្សព្វផ្សាយនេះបានធ្វើយូរ និងច្រើនដងមកហើយ ប៉ុន្តែអ្នកប្រើប្រាស់ផ្លូវហាក់មិនមានការយល់ ឬពួកគាត់យល់ និងដឹងហើយ ប៉ុន្តែមិនចូលរួមអនុវត្តតាម។
ជាមួយគ្នានេះលោកបានអំពាវនាវដល់អ្នកប្រើប្រាស់ផ្លូវឱ្យចូលរួមសហការជាមួយសមត្ថកិច្ចដើម្បីការពារអាយុជីវិត ទ្រព្យសម្បត្តិរបស់ខ្លួន និងអ្នកដទៃ ហើយកុំប្រឆាំងនឹងសមត្ថកិច្ចដែលពួកគាត់ចេញប្រតិបត្តិការគ្រប់ពេលវេលាផងដែរ។
ទាក់ទងនឹងចរាចរណ៍នេះដែរ លោក ទូច សុខៈ អ្នកនាំពាក្យរងក្រសួងមហាផ្ទៃ ក៏បានលើកឡើងផងដែរ ទៅលើសកម្មភាពសិស្សមួយចំនួនដែលជិះម៉ូតូមិនពាក់មួកសុវត្ថិភាពដោយលោកថា ច្បាប់ចរាចរណ៍ផ្លូវគោកមិនមានការលើកលែងទៅតាមប្រភេទមនុស្សទេ។
លោកថា៖ «ច្បាប់របស់យើងគឺមានចរិតអនុវត្តជាទូទៅទាំងអស់ទៅគ្រប់មនុស្សទាំងអស់ដែលប្រើប្រាស់ម៉ូតូ ហើយនិងយានផ្សេងៗទៀតដែលចាំបាច់ឱ្យមានការប្រើប្រាស់មួកសុវត្ថិភាពនេះ ដោយមិនថាសិស្ស ឬព្រះសង្ឃ...»។
ជុំវិញរឿងនេះនាយកអង្គការមូលនិធិបង្ការរបួសអាស៊ី លោក គឹម បញ្ញា បានប្រាប់នៅថ្ងៃទី ២៥ ខែមករា ថា លោកគាំទ្រចំពោះការរឹតបន្តឹងការអនុវត្តច្បាប់លើអ្នកបើកបរដែលមានជាតិស្រវឹងដែលល្មើសនឹងច្បាប់កំណត់ ប៉ុន្តែលោកស្នើឱ្យកុំរឹតបន្តឹងតែករណីបើកបរមានសារជាតិស្រវឹងតែមួយ។
លោក គឹម បញ្ញា បានបញ្ជាក់ថា៖ «ខ្ញុំសុំឱ្យការអនុវត្តច្បាប់នេះ រឹតបន្តឹងទៅលើកត្តាហានិភ័យទាំងអស់ដែលបង្កឱ្យមានគ្រោះថ្នាក់ដល់ការស្លាប់ និងរងរបួស។ មួយទៀតសុំឱ្យការរឹតបន្តឹងនេះធ្វើជាប់ជាប្រចាំ មិនធ្វើតែនៅក្នុងពេលមានករណីគ្រោះថ្នាក់ចរាចរណ៍ខ្ពស់ទេ»។
លោកថា៖ «អ្វីដែលសំខាន់មួយទៀតខ្ញុំចង់ឱ្យមានការពិនិត្យលើច្បាប់ចរាចរណ៍ផ្លូវគោកដោយដំឡើងការពិន័យ ការផ្តន្ទាទោសដល់អ្នកបើកបរក្រោមឥទ្ធិពលគ្រឿងស្រវឹងដែលបង្កគ្រោះថ្នាក់ចរាចរណ៍ដល់ស្លាប់ ឬមានការរងរបួសធ្ងន់ ឬរហូតធ្លាក់ខ្លួនពិការ»។
លោក គឹម បញ្ញា ក៏ស្នើសុំឱ្យផ្សព្វផ្សាយសារអប់រំ ការដាក់ពាក្យស្លោក និងការណែនាំផ្សេងៗដើម្បីក្រើនរំឭកអ្នកបើកបរឱ្យមានការប្រុងប្រយ័ត្នផងដែរ។របាយការណ៍របស់អគ្គស្នងការនគរបាលជាតិបានឱ្យដឹងថា នៅក្នុងឆ្នាំ ២០២៣ កន្លងទៅគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន ៣ ៣១៧ លើក បណ្តាលឱ្យមនុស្សចំនួន ១ ៥៩០ នាក់ បានស្លាប់ និងរងរបួសចំនួន ៤ ៥១៥ នាក់។
ករណីគ្រោះថ្នាក់ចរាចរណ៍មានការកើនឡើងចំនួន ៣៤១ លើក ស្មើនឹង ១១ ភាគរយ បើធៀបនឹងឆ្នាំ ២០២២ ដែលមានចំនួន ២ ៩៧៦ លើក។ ចំណែកឯអត្រាអ្នកស្លាប់វិញមានការថយចុះចំនួន ១១៩ នាក់ ស្មើនឹង ៧ ភាគរយ បើធៀបជាមួយនឹងឆ្នាំ ២០២២ ដែលមានអ្នកស្លាប់ចំនួន ១ ៧០៩ នាក់ ប៉ុន្តែចំនួនអ្នករងរបួសមានការកើនឡើង ៤៨៩ នាក់ ស្មើនឹង ១២ ភាគរយ៕
