លោក លី ធុជ អនុប្រធានទី១ អាជ្ញាធរមីន បានយាងអញ្ជើញអ្នកអង្គម្ចាស់នៃប្រទេសបែលហ្ស៊ិក ចូលរួមក្នុងកិច្ចប្រជុំកំពូលសៀមរាប-អង្គរ នៃប្រទេសកម្ពុជា ស្តីពីពិភពលោកមួយដែលគ្មានមីន ដែលនឹងធ្វើឡើងក្នុងខែវិច្ឆិកា ឆ្នាំ២០២៤ ខាងមុខនេះ។ អាជ្ញាធរមីន
លោក លី ធុជ អនុប្រធានទី១ អាជ្ញាធរមីន បានយាងអញ្ជើញអ្នកអង្គម្ចាស់នៃប្រទេសបែលហ្ស៊ិក ចូលរួមក្នុងកិច្ចប្រជុំកំពូលសៀមរាប-អង្គរ នៃប្រទេសកម្ពុជា ស្តីពីពិភពលោកមួយដែលគ្មានមីន ដែលនឹងធ្វើឡើងក្នុងខែវិច្ឆិកា ឆ្នាំ២០២៤ ខាងមុខនេះ។
សំណើរបស់ភាគីកម្ពុជា បានលើកឡើងក្នុងឱកាសដែលលោក លី ធុជ បានជួបប្រជុំទ្វេភាគីជាមួយលោក Marc Pecsteen de Buytswerve ឯកអគ្គរដ្ឋទូត និងតំណាងអចិន្ត្រៃយ៍ប្រទេសបែលហ្ស៉ិកប្រចាំនៅអង្គការសហប្រជាជាតិ នៅទីក្រុងហ្សឺណែវ កាលពីថ្ងៃទី២៤ ខែមករា ឆ្នាំ២០២៤ ដើម្បីស្វែងរកកិច្ចសហប្រតិបត្តិការ និងការគាំទ្ររបស់ប្រទេសបែលហ្ស៊ិក។
លោកបានលើកឡើងថា ៖ «តាងនាមសម្តេចធិបតីនាយករដ្ឋមន្រ្តី ហ៊ុន ម៉ាណែត និងជាប្រធានអាជ្ញាធរមីន ខ្ញុំបានយាងអញ្ជើញអ្នកអង្គម្ចាស់នៃប្រទេសបែលហ្ស៊ិក ដែលជាប្រេសិតពិសេសនៃអនុសញ្ញាអូតាវ៉ា ចូលរួមក្នុងកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន ក្នុងខែវិច្ឆិកា ឆ្នាំ២០២៤ ខាងមុខនេះ»។
លោក លី ធុជ ក៏បានលើកឡើងពីការងារអាទិភាពរបស់កម្ពុជា ក្នុងនាមជាប្រធាន និងម្ចាស់ផ្ទះរៀបចំកិច្ចប្រជុំអនុសញ្ញាអូតាវ៉ាឆ្នាំ២០២៤ ព្រមទាំងជំរុញឱ្យមានការចូលរួមជាមួយកម្ពុជាដើម្បីឱ្យកម្ពុជាទទួលបានជោគជ័យក្នុងការរៀបចំកិច្ចប្រជុំអនុសញ្ញាអូតាវ៉ាឆ្នាំ២០២៤។
ពាក់ព័ន្ធនឹងសកម្មភាពមីននៅកម្ពុជា លោក លី ធុជ ក៏បានរំលេចពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការថែរក្សាឱ្យបាននូវសុខសន្តិភាព និងធានានូវការអភិវឌ្ឍនៅកម្ពុជា ក្នុងនោះរួមទាំងការដោះស្រាយបញ្ហាមីន ដោយបានដាក់ចេញនូវចក្ខុវិស័យ និងផែនការយុទ្ធសាស្រ្ត ដើម្បីឱ្យកម្ពុជាសម្រេចបាននូវគោលដៅកម្ពុជាគ្មានមីនឆ្នាំ២០២៥។
យោងតាមអាជ្ញាធរមីន តំណាងអចិន្ត្រៃយ៍ប្រទេសបែលហ្ស៊ិក ក៏បានសាទរ និងកោតសរសើរចំពោះភាពជាប្រធាន និងម្ចាស់ផ្ទះរបស់កម្ពុជានៃអនុសញ្ញាអូតាវ៉ាឆ្នាំ២០២៤ ហើយបានសន្យាផ្តល់កិច្ចសហការ និងគាំទ្រកម្ពុជាឱ្យទទួលបានជោគជ័យទៅតាមគោលដៅដែលរំពឹងទុក។ ប្រទេសបែលហ្ស៊ិក បានសន្យានឹងជួយសិក្សាប្រមូលព័ត៌មានពីជំហរ លក្ខខណ្ឌនានា និងស្ថាប័នសម្រេចចិត្ត នៃប្រទេសមិនទាន់ក្លាយជារដ្ឋភាគីនៃអនុសញ្ញាអូតាវ៉ា ឱ្យបានចូលរួមជារដ្ឋភាគីនៃអនុសញ្ញា ក្នុងខណៈពេលកម្ពុជាជាប្រធាន និងម្ចាស់ផ្ទះនៃកិច្ចប្រជុំ៕
