សន្និសីទកាសែតនៅសហព័ន្ធកីឡាទោចក្រយានកម្ពុជា កាលពីថ្ងៃទី២ខែមករា។ រូបថត NOCC
ភ្នំពេញៈ សហព័ន្ធកីឡាទោចក្រយានកម្ពុជា បានទទួលការឧបត្ថម្ភនូវទឹកប្រាក់ពីវិស័យឯកជនចំនួន ៤២ ៧៥០ ដុល្លារ បន្ថែមទៅលើកញ្ចប់ថវិកាចំណាយប្រចាំឆ្នាំរបស់ក្រសួងអប់រំ យុវជន និងកីឡា ដើម្បីយកមករៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ២០២៣ ដែលបានលើកយកមកធ្វើ នៅថ្ងៃទី៥ ដល់ទី៨ ខែមករា ឆ្នាំ២០២៤នេះ។
ជាមួយគ្នានេះ ការប្រកួតកីឡាទោចក្រយានជើងឯកថ្នាក់ជាតិ ដែលតែងតែធ្វើនៅខេត្តសៀមរាបនោះ ត្រូវបានសហព័ន្ធកីឡាទោចក្រយានកម្ពុជា យកមករៀបចំនៅខេត្តកំពង់ឆ្នាំងវិញ ព្រោះជាខេត្ត មានអំណោយផល ទាំងស្ថានភាពផ្លូវ សម្រាប់ការប្រកួតកង់គួក និងកង់ភ្នំ ជាមួយហេដ្ឋារចនាសម្ព័ន្ធផ្លូវថ្មី ដែលទើបសាងសង់រួច។ ម្យ៉ាងទៀត ខេត្តកំពង់ឆ្នាំង ក៏ជាខេត្តឈរលេខ៣ ដែលមានប្រជាជនជិះកង់ច្រើនជាងគេ បន្ទាប់ពីភ្នំពេញ និងខេត្តសៀមរាបផងដែរ។
តាមរយៈការទទួលបានការឧបត្ថម្ភនូវទឹកប្រាក់ចំនួន ៤២ ៧៥០ ដុល្លារ ពីក្រុមហ៊ុន Herbalife នេះ សហព័ន្ធកីឡាទោចក្រយានកម្ពុជា បានសម្រេចដំឡើងវិញ្ញាសាប្រកួតពី ៤ វិញ្ញាសា ទៅ ៧ វិញ្ញាសា។ រីឯរង្វាន់ជយលាភី ដែលកន្លងមកផ្ដល់ជូនត្រឹមចំណាត់ថ្នាក់លេខ៣នោះ គឺនៅឆ្នាំនេះ សហព័ន្ធ នឹងផ្ដល់ជូនពីចំណាត់ថ្នាក់លេខ១ រហូតដល់លេខ៥។ នេះបើការបញ្ជាក់របស់លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា ក្នុងសន្និសីទកាសែត កាលពីថ្ងៃទី២ ខែមករា។
តាមខ្លឹមសារ ដែលត្រូវបានប្រកាស ក្នុងសន្និសីទកាសែត នៅទីស្នាក់ការ NOCC កាលពីថ្ងៃអង្គារនោះដែរ បានឱ្យដឹងថា ការប្រកួតកីឡាទោចក្រយានជើងឯកថ្នាក់ជាតិ ឆ្នាំ២០២៣ នេះ មានប្រតិភូ និងកីឡាករ កីឡាការិនីចូលរួមសរុប ២៩៨ នាក់ មកពី ២៨ សមាគម-ក្លិប និងរាជធានី-ខេត្ត។
ក្រៅពីនេះ ក៏មានការចូលរួមជិះកង់អបអរសាទរពីថ្នាក់ដឹកនាំ និងមន្ដ្រីក្នុងខេត្តកំពង់ឆ្នាំង ព្រមទាំងមានការចូលរួមពីមន្ដ្រីគណៈកម្មការបច្ចេកទេស និងអ្នកស្ម័គ្រចិត្ត ដោយមានចំនួនសរុបលើសពី ៥០០ នាក់ ហើយមានក្រុមម៉ូតូធំ ជាអ្នកជួយសម្រួលក្នុងការប្រកួត។
ជាមួយតួលេខអ្នកចូលរួមនេះ លោក នូ ចំរើន បាននិយាយ ក្នុងសន្និសីទកាសែតនោះថា៖ «ចំនួនប្រតិភូកីឡា ចូលរួមការប្រកួតជើងឯកថ្នាក់ជាតិឆ្នាំនេះ មានការកើនឡើង១០ភាគរយ បើធៀបទៅនឹងឆ្នាំចាស់ ហើយកីឡាករភាគច្រើន បានចុះឈ្មោះប្រកួតបន្ថែមទាំងលើការប្រកួតកង់គួក នាថ្ងៃទី៦ និងប្រកួតកង់ភ្នំ នៅថ្ងៃទី៧ ខែមករា»។
ចំពោះគោលដៅនៃការរៀបចំព្រឹត្តការណ៍ប្រកួតជើងឯកថ្នាក់ជាតិនេះ លោក នូ ចំរើន បានបញ្ជាក់ថា៖ «យើងមានគោលដៅធំ២ ទី១ អនុវត្តតាមផែនការយុទ្ធសាស្ត្ររបស់សហព័ន្ធ ដោយមានការឯកភាព និងណែនាំដ៏ខ្ពងខ្ពស់ពីឯកឧត្តម ប៉ាន សូរស័ក្តិ ជាប្រធានសហព័ន្ធ បានដាក់ចេញ គឺយើងត្រូវបង្កើន និងពង្រឹងសមត្ថភាពគណៈកម្មការបច្ចេកទេស និងគណៈកម្មការរៀបចំកាប្រកួត ក្នុងដំណើរឈានទៅទទួលរៀបចំធ្វើជាម្ចាស់ផ្ទះការប្រកួតកីឡាយុវជនអាស៊ី ឆ្នាំ២០២៩ ក៏ដូចជាការប្រកួតកីឡាទោចក្រយាន លើឆាកអន្តរជាតិផ្សេងៗទៀត នាពេលខាងមុខ»។
ចំណែកគោលដៅទី២ លោក នូ ចំរើន បានបន្ថែមថា ដោយសារការប្រកួតថ្នាក់ជាតិលើកនេះ មានកីឡាករ កីឡាការិនីចូលរួមច្រើន អ៊ីចឹងនឹងផ្ដល់ឱកាសដល់ពួកគេ បានប្រកួតប្រជែងគ្នា ដើម្បីបង្ហាញនូវទេសកោសល្យ ចំណេះ និងជំនាញ ដែលពួកគេមាន ហើយតាមរយៈការប្រកួតបែបនេះ នឹងធ្វើឱ្យក្រុមមន្ត្រីបច្ចេកទេសរបស់សហព័ន្ធ បានមើលឃើញពីសមត្ថភាព និងកម្រិតបច្ចេកទេសរបស់កីឡាករ កីឡាការិនីទាំងអស់នេះ កាន់តែច្បាស់ ដើម្បីឈានទៅដល់ការសម្រិតសម្រាំងយកអ្នកមានសមត្ថភាព និងទេពកោសល្យល្អ ដាក់ឱ្យប្រមូលផ្តុំហ្វឹកហាត់ជាមួយក្រុមជម្រើសជាតិ។
លោក នូ ចំរើន បានបញ្ជាក់ថា៖ «សហព័ន្ធ កំពុងតែស្វែងរកធនធានកីឡាករ កីឡាការិនី ដែលមានសមត្ថភាព ដើម្បីបញ្ចូលក្នុងក្រុមជម្រើសជាតិ ហេតុដូចនេះមន្ត្រីបច្ចេកទេសរបស់យើង តែងតែសម្លឹងមើលលើទេពកោសល្យរបស់ពួកគាត់ជារៀងរាល់ឆ្នាំ តាមរយៈការប្រកួតជើងឯកថ្នាក់ជាតិ ដែលជាព្រឹត្តិការណ៍ប្រកួតកម្រិតជាតិខ្ពស់ និងធំជាងគេប្រចាំឆ្នាំនេះ ដើម្បីត្រៀមបញ្ចូលក្នុងបញ្ជីឈ្មោះកីឡាករ កីឡាការិនី សម្រាប់ទៅចូលរួមការប្រកួតកីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ»៕
